M’Cheyne Bible Reading Plan

2 En aus ekj nu junt kjeem, Breeda, kjeem ekj nich met huage Wead oda groote Weisheit, junt daut Zeichnes fonn Gott to jaewe.

² Dan ekj haud mie faea jenome mank ju nusscht to weete buta Jesus Christus, dee jekjrietsicht wea.

³ En ekj wea bie junt enn Schwakheit en angst en fael tsetre.

⁴ En miene Raed en miene Praedicht wea nich met konnstfolle Weisheits Wead, oba enn Bewies emm Jeist en enn Krauft,

⁵ daut jun Gloowe nich sull enn Mensche Weisheit stone, oba enn Gott siene Krauft.

⁶ Oba wie raede Weisheit mank soone dee follkome sent; doch nich Weisheit dee ut dise Welt kjemt, uk nich fonn daen dee enn dise Welt Leida sent, dee to nusscht jebrocht woare:

⁷ Oba wie raede Gott siene Weisheit enn en Jeheemnes, daut festoake wea, daut Gott bestemt haud fa onnse Harlichkjeit eeha de Welt wea;

⁸ daut kjeene fonn dise Welt Leida wiste; dan, wan see daut jewist haude,

⁹ wudde see daem Herr de Harlichkjeit nich jekjrietsicht ha; oba so auset jeschraewe steit: "Waut daut Uag nich jeseene haft, en daut Ua nich jeheat haft, en nich enn en Mensche Hoat enenn jekome es, waut Gott reed jemoakt haft fa daen dee am leef habe."

¹⁰ Oba Gott haft onns daut jeoppenboat derch sien Jeist; dan dee Jeist forscht aules ut, sogoa daut deepste fonn Gott.

¹¹ Dan waea weet waut enn en Mensch es buta dee Jeist dee enn am es? Jrod so weet kjeen Mensch waut enn Gott es, buta Gott sien Jeist.

¹² En wie ha nich de Welt aea Jeist jekraeaje, oba dee Jeist dee fonn Gott kjemt, daut wie weete kjenne waut Gott onns soo rikjlich jejaeft haft.

¹³ Aulsoo dit es waut wie nu raede, nich met Wead dee weltliche Weisheit leat, oba met Wead dee de Heilje Jeist leat, en fejlikje jeistlichet met jeistlichet.

¹⁴ Oba dee natearliche Mensch fenemt nich daut waut fonn Gott sien Jeist kjemt: daut es fa am ne Dommheit, en hee kaun daut uk nich weete, wiels daut es emm jeistliche auntoerkjanne.

¹⁵ Oba aun eene haunt dee, dee jeistlich es, deit aules unjascheede, oba aune aundre Haunt woat hee fonn kjeenem be-uadeelt.

¹⁶ Dan waea haft daem Herr sien Senn jekjant, waea woat am unjarechte? Oba wie ha Christus sien Senn.

Dee 36 Psalm

To dän Haupt Musikaunt, a Psalm fonn Doft däm Herr Gott sien Deena.

¹ Ne Räd fonn dee Gottloose äa Äwaträde. Doa es kjeene Forjcht fa Gott fer an.

² Hee schmeijchelt sikj selfst enn sien eajna Senn, wan hee sien Beeset utfinjt, un wan hee haust.

³ Dee Wead enn sien Mul sent Beeset un Lest; hee heat opp met Weis haundle daut hee Goots doone wudd.

⁴ Hee plont Beeset opp sien Bad, hee jeft sikj selfst opp en wajch dee nijch Goot es, hee deit daut Beeset nijch hause.

⁵ Dien Erboarme, O Herr Gott, es enne Himels; diene Trueheit soo aus dee huage Stoff Wolkje.

⁶ Diene Jerajchtijchkjeit es soo aus Gott siene Boaj. Diene Jerejchte soo aus daut grootet Deepet; O Herr Gott, du deist Tiare un Mensche rade.

⁷ Woo kjestlijch es dien Erboarme, O Gott! Menscheit deit sikj enn dän Schaute fonn diene Flijchte fetruehe.

⁸ Dee woare Tofräd senne met daut Follet fonn dien Hus, un du muakst an drinkje fonn dän Äwafluss fonn dien Fejneaje.

⁹ Dan bie die es dee Läwes Sprinkjborm; enn dien Lijcht see wie Lijcht.

¹⁰ O hool aun met dien erboarme to dän dee die kjanne, un diene Jerajchtijchkjeit to dän dee Opprajcht sent enn Hoat.

¹¹ Lot daut nijch too daut en stollta Foot sull no mie kome, un lot dee Beese äare Haunt mie nijch wajch driewe.

¹² Doa sent dee, dee Beeset driewe, jefolle; dee sent dol jeschmäte un kjenne nijch trigj oppstone.