Chronological

Nneebazanga Mukama n’omutima gwange gwonna,
    mu lukiiko lw’abalongoofu, era ne mu lukuŋŋaana.

^2 (A)Mukama by’akola bikulu;
    bifumiitirizibwako abo bonna ababisanyukira.
³ Emirimu gye mikulu nnyo era gya kitiibwa,
    n’obutuukirivu bwe tebuggwaawo emirembe gyonna.
^4 (B)Ayamba abantu okujjukira ebyamagero bye,
    Mukama wa kisa era ajjudde okusaasira.
^5 (C)Agabira abamutya emmere;
    era ajjukira endagaano ye buli kiseera.

⁶ Abantu be abalaze ng’ebikolwa bye bwe biri eby’amaanyi;
    n’abagabira ensi eyali ey’abannaggwanga.
^7 (D)By’akola byonna bya bwesigwa era bya bwenkanya;
    n’amateeka ge gonna ga bwesigwa,
^8 (E)manywevu emirembe gyonna;
    era yagassaawo nga ga bwesigwa era nga ga mazima.
^9 (F)Yanunula abantu be;
    n’alagira endagaano ye ebeerewo emirembe gyonna.
    Erinnya lye ttukuvu era lya ntiisa!

^10 (G)Mu kutya Mukama amagezi mwe gasookera
    era abo abagondera ebigambo ebyo bajjudde obutegeevu.
    Mukama atenderezebwenga emirembe gyonna.
112 ^(H)Mutendereze Mukama!^[a]

Alina omukisa omuntu atya Katonda,
    era asanyukira ennyo mu mateeka ge.

² Abaana be baliba ba kitiibwa mu nsi;
    omulembe gw’abalongoofu guliweebwa omukisa.
³ Ennyumba ye enejjulanga ebintu n’obugagga obungi;
    era anaabanga mutuukirivu ennaku zonna.
^4 (I)Ne mu kizikiza, ekitangaala kyakira omulongoofu,
    alina ekisa, n’oyo alina okusaasira, era omutuukirivu.
^5 (J)Omuntu oyo agabira abeetaaga, era tawolera magoba,
    era akola emirimu gye gyonna n’obwenkanya, alifuna ebirungi.
^6 (K)Omutuukirivu talinyeenyezebwa,
    era anajjukirwanga ennaku zonna.
^7 (L)Amawulire amabi tegaamutiisenga,
    kubanga omutima gwe munywevu gwesiga Mukama.
^8 (M)Omutima gwe guteredde, tewali ky’anaatyanga,
    era oluvannyuma alitunuulira abalabe be n’amaaso ag’obuwanguzi.
^9 (N)Agabidde abaavu bye beetaaga;
    mutuukirivu ebbanga lyonna;
    era bonna banaamussangamu ekitiibwa.

^10 (O)Omubi anaabirabanga ebyo, n’asunguwala,
    n’aluma abugigi, naye nga talina kya kukola.
    Okwegomba kw’ababi tekuubengako kye kubagasa.
113 ^(P)Mutendereze Mukama!

Mumutendereze, mmwe abaweereza be,
    mutendereze erinnya lya Mukama.
^2 (Q)Erinnya lya Mukama litenderezebwe
    okuva leero n’okutuusa emirembe gyonna.
^3 (R)Enjuba weeviirayo okutuusa bw’egwa,
    erinnya lya Mukama litenderezebwenga.

^4 (S)Mukama agulumizibwa okusinga amawanga gonna,
    era n’ekitiibwa kye kisinga eggulu.
^5 (T)Ani afaanana nga Mukama Katonda waffe,
    atuula ku ntebe ye ey’obwakabaka eri waggulu ennyo,
^6 (U)ne yeetoowaza
    okutunuulira eggulu n’ensi?

^7 (V)Abaavu abayimusa n’abaggya mu nfuufu;
    n’abali mu kwetaaga n’abasitula ng’abaggya mu vvu,
^8 (W)n’abatuuza wamu n’abalangira,
    awamu n’abalangira abo abafuga abantu be.
^9 (X)Omukazi omugumba amuwa abaana,
    n’abeera mu maka ge n’ezzadde lye ng’ajjudde essanyu.

Mutendereze Mukama!
114 ^(Y)Isirayiri bwe yava mu Misiri,
    abaana ba Yakobo abo, ne bava mu bantu abaayogeranga olulimi olutali lwabwe;
² Yuda n’afuuka omutukuvu wa Katonda,
    Isirayiri n’afuuka amatwale ge.

^3 (Z)Ennyanja bwe yabalaba n’edduka;
    Omugga Yoludaani ne gudda emabega.
⁴ Ensozi ne zibuukabuuka ng’endiga zisseddume,
    n’obusozi obutono ng’obuliga obuto.

⁵ Ggwe ennyanja, lwaki wadduka?
    Ggwe Yoludaani, lwaki wadda emabega?
⁶ Mmwe ensozi, lwaki mwabuukabuuka ng’endiga zisseddume,
    nammwe obusozi obutono ng’obuliga obuto?

^7 (AA)Kankana, ggwe ensi, mu maaso ga Mukama,
    mu maaso ga Katonda wa Yakobo,
^8 (AB)eyafuula olwazi ekidiba eky’amazzi,
    n’olwazi olugumu n’aluggyamu ensulo ez’amazzi.
115 ^(AC)Si ffe, Ayi Mukama, si ffe.
    Wabula erinnya lyo lye ligwana okuweebwanga ekitiibwa,
    olw’okwagala kwo n’olw’obwesigwa bwo.

^2 (AD)Lwaki amawanga gabuuza nti,
    “Katonda waabwe ali ludda wa?”
^3 (AE)Katonda waffe ali mu ggulu;
    akola buli ky’ayagala.
^4 (AF)Bakatonda baabwe bakole mu ffeeza ne zaabu,
    ebikolebwa n’emikono gy’abantu.
^5 (AG)Birina emimwa, naye tebyogera;
    birina amaaso, naye tebiraba.
⁶ Birina amatu, naye tebiwulira;
    birina ennyindo, naye tebiwunyiriza.
⁷ Birina engalo, naye tebikwata;
    birina ebigere, naye tebitambula;
    ne mu bulago bwabyo temuvaamu ddoboozi n’akamu,
⁸ abakozi ababikola,
    n’abo bonna ababyesiga balibifaanana.

⁹ Mmwe ennyumba ya Isirayiri mwesigenga Mukama,
    ye mubeezi wammwe era ye ngabo yammwe.
^10 (AH)Mmwe ennyumba ya Alooni mwesigenga Mukama,
    ye mubeezi wammwe era ye ngabo yammwe.
¹¹ Mmwe abamutya, mwesigenga Mukama,
    ye mubeezi wammwe, era ye ngabo yammwe.

¹² Mukama anaatujjukiranga, era anaatuwanga omukisa.
    Ab’ennyumba ya Isirayiri anaabawanga omukisa;
    ab’omu nnyumba ya Alooni anaabawanga omukisa;
^13 (AI)n’abo abamutya, ab’ekitiibwa n’abatali ba kitiibwa,
    Mukama anaabawanga omukisa.

^14 (AJ)Mukama abaaze mweyongere nnyo obungi,
    mmwe n’abaana bammwe.
^15 (AK)Mukama, eyakola eggulu n’ensi,
    abawe omukisa.

^16 (AL)Eggulu ery’oku ntikko lya Mukama,
    naye ensi yagiwa abantu bonna.
^17 (AM)Abafu tebatendereza Mukama,
    wadde abo abaserengeta emagombe.
^18 (AN)Naye ffe tunaatenderezanga Mukama,
    okuva leero n’okutuusa emirembe gyonna.

Mutendereze Mukama!
116 ^(AO)Mukama mmwagala,
    kubanga awulidde eddoboozi lyange n’okwegayirira kwange.
^2 (AP)Kubanga ateze okutu kwe gye ndi,
    kyennaavanga mmukoowoola ebbanga lyonna lye ndimala nga nkyali mulamu.

^3 (AQ)Emiguwa gy’okufa gyansiba,
    n’okulumwa okw’emagombe kwankwata;
    ne nzijula ennaku nnyingi n’okutya.
^4 (AR)Ne ndyoka nkoowoola erinnya lya Mukama nti,
    “Ayi Mukama, ndokola.”

^5 (AS)Mukama wa kisa, era mutuukirivu;
    Katonda waffe ajjudde okusaasira.
^6 (AT)Mukama alabirira abantu abaabulijjo;
    bwe nnali mu buzibu obunene, n’andokola.

^7 (AU)Wummula ggwe emmeeme yange,
    kubanga Mukama abadde mulungi gy’oli.
^8 (AV)Kubanga ggwe, Ayi Mukama, owonyezza omwoyo gwange okufa,
    n’amaaso gange ogawonyezza okukaaba;
    n’ebigere byange n’obiwonya okwesittala,
^9 (AW)ndyoke ntambulirenga mu maaso ga Mukama
    mu nsi ey’abalamu.

^10 (AX)Nakkiriza kyennava njogera nti,
    “Numizibbwa nnyo.”
^11 (AY)Ne njogera nga nterebuse nti,
    “Abantu bonna baliraba.”

¹² Mukama ndimusasula ntya
    olw’ebirungi bye ebingi bwe bityo by’ankoledde?
^13 (AZ)Nditoola ekikompe eky’obulokozi,
    ne nkoowoola erinnya lya Mukama.
^14 (BA)Ndituukiriza obweyamo bwange eri Mukama,
    mu maaso g’abantu be bonna.

^15 (BB)Okufa kw’abatukuvu ba Mukama kwa muwendo nnyo eri Mukama.
^16 (BC)Ayi Mukama,
    onsumuluddeko ebyansiba n’onfuula wa ddembe,
    nange nnaakuweerezanga ennaku zonna.

^17 (BD)Ndiwaayo ekiweebwayo eky’okwebaza,
    ne nkoowoola erinnya lya Mukama.
¹⁸ Ndituukiriza obweyamo bwange eri Mukama,
    mu maaso g’abantu be bonna,
^19 (BE)mu mpya z’ennyumba ya Mukama;
    wakati wo, ggwe Yerusaalemi.

Mutendereze Mukama.
117 ^(BF)Mutendereze Mukama, mmwe ensi zonna;
    mumugulumize, mmwe amawanga gonna.
^2 (BG)Kubanga okwagala kwe okutaggwaawo kungi gye tuli;
    n’obwesigwa bwa Mukama bwa lubeerera.

Mutendereze Mukama.
118 ^(BH)Mwebaze Mukama, kubanga mulungi;
    okwagala kwe kubeerera emirembe gyonna.

^2 (BI)Kale Isirayiri ayogere nti,
    “Okwagala kwa Mukama kubeerera emirembe gyonna.”
³ N’ab’ennyumba ya Alooni boogere nti,
    “Okwagala kwe kubeerera emirembe gyonna.”
⁴ Abo abatya Mukama boogere nti,
    “Okwagala kwe kubeerera emirembe gyonna.”

^5 (BJ)Bwe nnali mu nnaku empitirivu, nakoowoola Mukama,
    n’annyanukula, n’agimponya.
^6 (BK)Mukama ali ku ludda lwange, siriiko kye ntya.
    Abantu bayinza kunkolako ki?
^7 (BL)Mukama ali nange, ye anyamba.
    Abalabe bange nnaabatunuuliranga n’amaaso ag’obuwanguzi.

^8 (BM)Kirungi okwesiga Mukama
    okusinga okwesiga omuntu.
^9 (BN)Kirungi okuddukira eri Mukama
    okusinga okwesiga abalangira.
^10 (BO)Ensi zonna zanzinda ne zinneebungulula,
    naye mu linnya lya Mukama naziwangula.
^11 (BP)Banneebungulula enjuuyi zonna;
    naye mu linnya lya Mukama nabawangula.
^12 (BQ)Bankuŋŋaanirako ne banneebungulula ng’enjuki;
    naye ne basirikka ng’amaggwa agakutte omuliro;
    mu linnya lya Mukama nabawangula.
^13 (BR)Bannumba n’amaanyi mangi, ne mbulako katono okugwa;
    naye Mukama n’annyamba.
^14 (BS)Mukama ge maanyi gange, era lwe luyimba lwange,
    afuuse obulokozi bwange.

^15 (BT)Muwulire ennyimba ez’essanyu ez’obuwanguzi,
    nga ziyimbirwa mu weema z’abatuukirivu nti,
    “Omukono gwa Mukama ogwa ddyo gutukoledde ebikulu!
¹⁶ Omukono gwa Mukama ogwa ddyo gugulumizibbwa;
    omukono gwa Mukama ogwa ddyo gutukoledde ebikulu!”
^17 (BU)Sijja kufa, wabula nzija kuba mulamu,
    ndyoke ntegeeze ebyo byonna Mukama by’akoze.
^18 (BV)Mukama ambonerezza nnyo,
    naye tandese kufa.
^19 (BW)Munzigulirewo emiryango egy’obutuukirivu,
    nnyingire, neebaze Mukama.
^20 (BX)Guno gwe mulyango omunene ogwa Mukama,
    abatuukirivu mmwe banaayingiriranga.
^21 (BY)Nkwebaza kubanga onnyanukudde
    n’ofuuka obulokozi bwange.

^22 (BZ)Ejjinja abazimbi lye baagaana lye
    lifuuse ejjinja ekkulu ery’oku nsonda.
²³ Kino Mukama ye yakikola;
    era ffe tukiraba nga kya kitalo mu maaso gaffe.
²⁴ Luno lwe lunaku Mukama lw’akoze;
    tusanyuke tulujagulizeeko.

²⁵ Ayi Mukama tukwegayiridde, tulokole,
    Ayi Mukama tukwegayiridde otuwe obuwanguzi.

^26 (CA)Alina omukisa oyo ajja mu linnya lya Mukama.
    Tubasabidde omukisa nga tuli mu nnyumba ya Mukama.
^27 (CB)Mukama ye Katonda,
    y’atwakiza omusana.
Mukumbire wamu nga mukutte amatabi mu ngalo zammwe n’ekiweebwayo kyammwe
    kituukire ddala ku mayembe g’ekyoto.

^28 (CC)Ggwe Katonda wange, nnaakwebazanga;
    ggwe Katonda wange, nange nnaakugulumizanga.

²⁹ Mwebaze Mukama kubanga mulungi,
    n’okwagala kwe kubeerera emirembe gyonna.