Revised Common Lectionary (Semicontinuous)
7 हे यहोवा, मोर पुकार सुना, मोका जवाब द्या।
मोह पइ दयालु रहा।
8 मोर हिरदइ कहत ह, “जा, ओकरे दर्सन बरे जा।”
एह बरे यहोवा मइँ तोहसे बात करउँ बरे तोहार समन्वा आवा हउँ।
9 हे यहोवा, किरोध मँ आपन सेवक स जिन मोड़या!
एक जउन मोर मदद कइ सकत ह उ तू अहा।
मोका अकेल्ला जिन छोड़्या!
मोका जिन त्यागा।
परमेस्सर जउन मोका बचाइ सकत ह उ तू अहा!
10 मोर महतारी अउ मोर बाप मोका तजि दिहन,
पर यहोवा मोका अंगीकार किहस अउर आपन बनाइ लिहस।
11 हे यहोवा, मोरे दुस्मनन क कारण, मोका आपन मारग देखावा।
मोका नीक काम क सिच्छा द्या।
12 मोह पइ मोर दुस्मनन हमला किहे अहइँ।
उ पचे मोरे बरे झूठ बोलेन ह।
उ पचे मोका नस्कान पहोंचावइ बरे झूठ बोलेन।
13 मोका भरोसा अहइ
कि मरइ स पहिले मइँ फुरइ यहोवा क धरम भावना क लखउँ।
14 यहोवा क मदद क बाट जोहत रहा!
साहसी अउ सुदृढ़ बना रहा
अउर यहोवा क मदद क प्रतीच्छा करत रहा।
याकूब आपन पूतन क असीसत ह
49 तब याकूब आपन सबहि बेटवन क आपन लगे बोलाएस। उ कहेस, “मोर सबइ बेटउनो, हिआँ मोरे लगे आवा। मइँ तोहका बताउब कि भविस्स मँ का होइ।
2 “याकूब क पूते, एक साथे आवा अउ सुना,
आपन पिता इस्राएल क सुना।
यहूदा
8 “यहूदा, तोहार भाईयन तोहार प्रसंसा करिहीं।
तू आपन दुस्मनन क हरउब्या।
तोहरे भाई तोहरे समन्वा निहुरिही।
9 यहूदा उ सेर क नाईं अहइ जउन कउनो जनावर क मारे होइ।
हे मोर पूत, तू उ सेर क तरह अहा जउन आपना सिकार क बाद
अराम करई बरे सोइ जात ह।
अउर कउनो ऍतना बहादुर नाही कि ओका छेड़ि देइ।
10 यहूदा क परिवार क मनई राजा होइहीं।
ओकरे परिवार क राज-चीन्हा सीलो।[a]
क अवाई स पहिले खतम न होइ।
तब अनेक लोग ओकर हुकुम मनिहीं।
11 उ आपन गदहा क अंगूरे क लता स बाँधत ह।
उ आपन गदहा क बच्चन क सबसे बढ़िया अंगूरे क लता मँ बाँधत ह।
उ आपन ओढ़ना क धोवइ बरे सबसे बढ़िया दाखरस क बइपरत ह।
12 ओकर आँखिन दाखरस पिए स ललछउँड़ रहत हीं।
ओकर दँतवन दूध पिए स उज्जर अहइँ।
जबूलन
13 “जबूलब समुद्दर क निअरे रही।
ऍकर समुद्दर क किनारा जहाजन बरे सुरच्छित रही।
ऍकर पहटा सीदोन तलक फइला होइ।
नप्ताली
21 “नप्ताली एक अजाद मादा हिरन क तरह अहइ जेका अजाद कीन्ह गवा ह।
उ सुन्नर सब्द कहत ह।
यूसुफ
22 “यूसुफ बहोत सुफल अहइ।
यूसुफ फलन स लदी भइ गवा क तरह अहइ।
उ झरना क लगे जमी अंगूरे क गवा क तरह बाटइ,
बाड़ा क सहारे जमी अंगूरे क गवा क तरह अहइ।
23 ढेर मिला ओकरे खिलाफ भएन
अउ ओसे लड़ेन।
धनुर्धारी मनइयन ओकर दुस्मन होइ गवा।
24 मुला उ आपन सकतीवाला धनुख
अउ फुर्ताला बाँहे स जुद्ध जीतेस।
उ याकूब क सकतीवाला परमेस्सर गड़रियन,
इस्राएल क चट्टान स सकती पावत ह।
25 अउर आपन पिता क परमेस्सर स सकती पावत ह।
परमेस्सर तोहका आसीर्बाद देइ।
सर्वसक्तीमान परमेस्सर तोहका आसीर्बाद देइ।
उ तोहका ऊपर स आसीर्बाद देइ
अउर खाले गहिर समुद्दर स आसीर्बाद देइ।
होइ सकत ह उ तोहका छाती
अउ गरभ स आसीर्बाद देइ।
26 मोरे महतारी-बाप क बहोत स बढ़िया चीजन होत रहिन।
अउर मइँ तोहार पिता बहोत जियादा आसीर्बाद पावत रहा।
अब मइँ आपन आसीर्बाद क यूसुफ पइ जमा करब जउन
पहाड़ क समान ऊँचा होइ, हाँ ओकरे सिर पई जेका ओकरे भाईयन स
अल्गाइ दीन्ह गवा रहेन।
जकरयाह क स्तुति
67 तब ओकर बाप जकरयाह पवित्तर आतिमा स सराबोर होइ गवा अउर उ भविस्सवाणी किहेस:
68 “इस्राएल क पर्भू परमेस्सर क आसीस होइ
काहेकि उ आपन मनइयन क मदद बरे आवा
अउर ओनका आजाद कराएस।
69 उ हमरे बरे आपन सेवक दाऊद क परिवार स
एक उद्धारकर्ता दिहस।
70 जइसा कि उ बहोत पहिले
आपन पवित्त नबी स वचन देवॉएस।
71 उ हमका हमार दुस्मनन स अउर ओन सब क हथवन स,
जउन हम स घिना करत रहेन, हमका छोड़ावइ क वचन दिहस।
72 हमरे पूर्वजन प दाया देखावइ क
अउर आपन पवित्तर बचन क याद रखइ क।
73 ओकर बचन रहा एक उ सपथ जउन हमरे पूर्वजन इब्राहीम क संग लीन्ह गइ रहिन,
74 कि हमार दुस्मनन क हथवन स हमार छुटकारा
अउर बेडर क पर्भू क सेवा करइ क हुकुम दीन।
75 अउर आपन जिन्नगी भर हर रोज ओकरे समन्वा हम पचे पवित्तर अउर धर्मी रहि सकी।
76 “हे बालक! अब तू सर्वोच्च (परमेस्सर) क बड़ा नबी कहा जाइ
काहेकि तू पर्भू क अगवा अगवा चलिके ओकरे बरे राह तइयार करी।
77 अउर ओकरे मनइयन स कही कि ओनके पापन क छमा स उ
ओनके लोगन क उद्धार का गियान देबा।
78 “हमरे परमेस्सर क नरम अनुग्रह स
एक नवा दिन क भोर हम पइ ऊपर स उतरी।
79 ओन प चमकइ बरे जउन मउत क गहरी छाया मँ जिअत
अहइँ काहेकि हमरे गोड़वन सांति क राहे प सीधा जाइँ।”
Awadhi Bible: Easy-to-Read Version. Copyright © 2005 Bible League International.