Revised Common Lectionary (Semicontinuous)
15 Yon jou, tout frè yo te rasanble. Te gen anviwon san ven (120) moun konsa ki te la. Pyè kanpe nan mitan foul la, li di: 16 Frè ak sè m yo, li te nesesè pou pawòl ki te ekri nan Liv la rive vre. Mwen vle pale de pawòl Sentespri a te anonse davans nan bouch wa David konsènan Jida. Li te di se Jida li t apral mennen moun ki te vin arete Jezi yo.
17 Jida se te youn pami nou ki te gen sèvis pa l nan travay sa n ap fè a.
18 Jida te achte yon moso tè avèk lajan sal li te resevwa pou trayi l te trayi Jezi a. Men apre sa, li sot tonbe sou tèt, vant li pete, tout trip li gaye sou menm moso tè sa a. 19 Pawòl lanmò Jida a te gaye rive nan zòrèy tout moun ki t ap viv nan lavil Jerizalèm. Sa te fè yo te bay moso tè a yon non. Nan lang pa yo, yo te rele l “Akèldama”, ki vle di “Jaden san”.
20 Men sa ki ekri nan Liv Sòm yo:
Se pou lakay li tounen yon dezè,
se pou pèsonn pa rete lakay li.[a]
Men sa ki ekri ankò:
Se pou yon lòt moun ranplase li nan travay la.[b]
Copyright © 2017 by Bible League International