Revised Common Lectionary (Semicontinuous)

¹ यहोवा क बड़कई करा।

    ओकर बड़कई सरग स करा।
² हे सबहिं सरगदूतो, यहोवा क जस गावा।
    ग्रहो अउ नछत्रो ओकर गुण गान करा।
³ सूरज अउ चाँद, तू पचे यहोवा क गुण गावा।
    अकासे क तारो अउ जोतियो, ओकर बड़कई करा।
⁴ यहोवा क बड़कई सबन त ऊँच पर्वत मँ करा!
    हे जल अकासे क ऊपर, ओकर बड़कई करा।
⁵ यहोवा क नाउँ क बड़कई करा।
    काहेकि उ आदेस दिहस, अउर सब कछू रचे रहा।
⁶ उ ऍन सबन्क बनाएस एह बरे उ सबइ सदा-सदा बना रहइँ।
    उ अपरिवर्तनसील कानून बनाएस।
⁷ ओ धरती पइ क हर वस्तु, यहोवा क गुण गावा।
    ओ बिसाल जन्तुओ अउ सबइ महासागरो, ओकर गुण गावा।
⁸ आगी अउ ओलन, बरफ अउ कुहासा, तूफानी पवन
    जउन ओकर वचन क पूरा किहेन, ओकर गुण गावा।
⁹ पर्वतन अउ सबइ पहाड़न,
    फलदार बृच्छ अउ देवदार क बृच्छ, ओकरे गुण गावा।
¹⁰ बनेर पसुअन अउ सब पालतु मवेसी, रेंगइवाले जीव अउ पंछियन, ओकर गुण गावा।
¹¹ धरती क सबहिं राजा लोग अउ सबइ रास्ट्रन,
    प्रमुखन अउ धरती पइ क सबहिं निआवाधीसन, ओकर स्तुति करा।
¹² नव जवान मनसेधू अउ नव जवान मेहरारू, ओकर स्तुति करा।
    परमेस्सर बूढ़े लोगन अउ गदेलन क रचेस ह।
¹³ ओनका यहोवा क नाउँ क स्तुति करइ द्या।
    अकेल्ले ओकरे नाउँ ही ऊँच सम्मानित अहइ।
धरती अउ अकास
    ओकर चमक-दमक स भरि जाइहीं।
¹⁴ उ आपन लोगन क मजबूती क स्रोत क निर्माण किहेस।
    उ आपन सबइ भगतन अरथ इस्राएलियन,
अउ ओकरे समीप रहइवाले रास्ट्रन बरे, स्तुति क स्रोत क निर्माण किहेस।

यहोवा क बड़कई करा।

यहोवा कहेस, “जउन मेहरारू अकेल्ली अहइ,
    ओकर जियादा सन्तानन होइहीं
बनिस्बत उ मेहरारू क जेकरे लगे ओकर पति अहइ।”

² आपन तम्बू फइलावा,
    आपन दुआर पूरा खोला।
    आपन तम्बू क बढ़इ स जिन रोका।
आपन रस्सियन बढ़ावा अउर खूँटन मजबूत करा।
³     काहेकि तू आपन बंस-बेल दाहिन अउ बाएँ फइलाई।
तोहार सन्तानन अनेकानेक रास्ट्रन क धरती क लइ लेइहीं
    अउर उ सबइ सन्तानन ओन नगरन मँ फुन बसिहीं जउन बर्बाद भ रहेन।
⁴ तू ससाउ जिन, तू लज्जित नाहीं होबिउ।
    आपन मन जिन हारा
काहेकि तोहका अपमानित नाहीं होइ क होइ।
    जब तू जवान रहिउ,
तू लज्जित भइ रहिउ
    किन्तु उ लज्जा क अब तू बिसरब्या।
अब तोहका उ लाज नाहीं याद राखब अहइ तू जेका उ काल मँ भोग्या रहा
    जब तू आपन भतार खोया रह्या।
⁵ काहेकि तोहार भतार उहइ रहा!
    जउन तोहका रचे रहा।
    ओकर नाउँ सर्वसक्तिमान यहोवा अहइ।
उहइ इस्राएल क रच्छा करत ह, उहइ इस्राएल क पवित्तर अहइ
    अउर उहइ समूची धरती क परमेस्सर कहवावत ह।

⁶ तू एक ठु अइसी मेहरारू क जइसी रहिउ जेका ओकर ही भतार तलाक दिहे रहा।
    तोहार मन बहोत भारी रहा किन्तु तोहका यहोवा आपन बनावइ बरे बोलाए रहा।
    तू उहइ मेहरारू क समान अहा जेकर बचपने मँ ही बियाह भवा
अउर जेका ओकर भतार तलाक दिहेस ह।
    किन्तु परमेस्सर तू पचन्क आपन बनावइ बरे बोलाएस ह।
⁷ तोहार परमेस्सर कहत ह, “मइँ तोहका थोड़े समय बरे तजे रहेउँ।
    किन्तु अब मइँ तोहका फुन स अपने पास आउब अउर आपन महा करुणा तोह पइ दर्साउब।
⁸ मइँ बहोत कोहाइ गवा अउर थोड़े स समय क बरे तोहसे छुप गवा
    किन्तु आपन महाकरुणा स मइँ तोहका सदा चैन देब।”
    तोहार उद्धारकर्ता यहोवा इ कहेस ह। परमेस्सर आपन लोगन स सदा पिरेम करत ह

⁹ परमेस्सर कहत ह, “इ ठीक वइसा ही अहइ जइसे नूह क काल मँ मइँ बाढ़ क जरिये दुनिया क दण्ड दिहे रहेउँ।
    मइँ नूह क वरदान दिहेउँ कि फुन स मइँ दुनिया पइ बाढ़ नाहीं लाउब।
उहइ तरह तोहका, मइँ उ वचन देत हउँ, मइँ तोहसे कुपित नाही होब
    अउर तोहसे फुन कठोर बचन नाहीं बोलब।”

¹⁰ यहोवा कहत ह, “चाहे पर्वत लुप्त होइ जाइँ
    अउर इ पहाड़ियन रेत मँ बदल जाइँ
किन्तु मोर करुणा तोहका कबहुँ भी नाहीं तजी।
    मइँ तोहसे मेल करब
    अउर उ मेल क कबहुँ अंत न होइ।”
यहोवा तोह पइ करुणा देखावत ह अउर उ यहोवा ही उ सबइ बातन बताएस ह।

¹¹ “हे नगरी, हे दुखियारी!
    तोहका तूफानन सतायन ह
    अउर कउनो तोहका चैन नाहीं दिहेस ह।
मइँ तोहार कीमती पाथरन स फुन स निर्माण करब।
    मइँ तोहार नींव फिरोजन
    अउ नीलम स धरब।
¹² मइँ तोहार देवारन चुनइ मँ माणिक क लगाउब।
    तोहरे दुआरन पइ दमकत भए रत्नन क जड़ब।
    तोहरी सबहिं देवारन मइँ कीमती पाथरन स उठाउब।
¹³ तोहार सन्तानन यहोवा ब्दारा सिच्छित होइहीं।
    तोहार सन्तानन क सम्पन्नता महान होइ।