Revised Common Lectionary (Semicontinuous)

⁸ Achtu, inte ankishmatit katka Teut wan antekitket ipal sejse ká inte teujteut yekkaya, ⁹ wan achtu kwak ankishmattiwit Teut, o mas yek kwak ne Teut metzinhishmattuk, ken ka anmuishkwepat senpa itech ne tay inte weli tatka wan te kipia tatka wan ankinekit mukwepat tekitit inpal, ¹⁰ wan antajpiat tujtunal wan ijilwit wan mejmetzti wan shijshiwit? ¹¹ Nimajmawi ka tay ne nikujkutiatuk anmuwan te kipishki ipatiw pal tatka!

¹² Shimuchiwakan ken naja, kenha ken naja ken anmejemet, nukniwan, nitajtani anmuwan. Inte annechchiwilijtiwit tatka, ¹³ ankimatit ka ipanpa se nukukulisyu ipal nuweyka nimetzinmakak yeknawatilis achtu, ¹⁴ wan uni anmutaejekulis ijtik nunakayu te anhinaket ka te tatka ipatiw nian antachijchaket ijpak, sute annechkwijket ken su naja niitanawatiani ne Teut, ken su ne Mawaltijtuk Yeshu. ¹⁵ Yajika tel, kanka ne anmupajpakilis? Ika nimetzinhilwia ka, su welituskiat, ankishtijtuskiat anmujmuish pal annechmakat! ¹⁶ Kiane tel, anka anhinat ka nikneki nimetzinhijtakua kwak nitaketza tejkia anmuwan?

¹⁷ Metzintemuat inte ipal yek asunte kinekit metzinkupewat pal ma shiktemukan yejemet. ¹⁸ Yektzin ma kitemukan se ipal yek senpa, wan te sema kwak ninemi anmuwan. ¹⁹ Nukukunew ká nechkukua pal nimetzinpunia senpa hasta ma muketza ne Mawaltijtuk ijtik anmejemet: ²⁰ niknekiskia ninemi anmuwan seman wan nimetzinnutzaskia ken muneki, ika nishpuyawi anmupanpa.