Revised Common Lectionary (Semicontinuous)
26 Agripa kilwij Pawlo:
—Weli titaketza mupanpa.
Kwakuni ne Pawlo kimelawki ne imey wan pejki ina:
2 —Ipanpa muchi tay inat ne Yudayujmet ka nikchijtuk, nimumati iwan suertej ika ashan niaw niweli ninankilia muishpan, tatuktiani Agripa; 3 keski mas ika taja tikmati ken muwikat ne Yudayujmet wan muchi ne tajtajtanilis. Neka nimutajtawelia ma shinechkaki nejnejmach.
4 Kwak nichikitik katka ninemik ka Yerushalem ijtik nutechan, wan muchi ne Yudayujmet kimatit ken nimuwikatuk senpa. 5 Yejemet nechishmatit yek kwak pejki wan hasta ashan wan kimatit, su kinekiskiat inat, ka naja ni Parishayuj katka, uni ne sectaj mas uchulnaj ipal ne tutayulmatilis. 6 Wan ashan nechchiwat juzgar ipanpa nutejchialis ipal ne sentaketzat tay kichijki ne Teut. 7 Muchi ne tribujmet ipal tutechan Israel tekitit katka sujsul, ka tayua wan ka tunal, ika kimatit ka yawi witz. Wan nechtenewat, tatuktiani, ipanpa ini tejchialis. 8 Taika anhinat ka inte weli ma kiketza ne Teut ne miktiwit?
9 Najasan ninak ka ninemituya pal nikchiwa miak pal niksuma ne itukay ne Nazarayuj Yeshu, 10 wan yaja tay nikchijki tik Yerushalem, wan nikwikak tzajtzaktuk sujsul miak takamet wan siwatket ipal ne Teut, iwan ne tatuktilis ne nechmakaket ne weypalejmet, wan kwak mumiktiat katka, naja ninak ka nemi yek; 11 wan tik muchi ne kajkalsennemit nikchiwa katka ka muwitekit sejsenpa, wan ka kukujtaketzat, wan sujsul nikwalani katka inwan wan nikintalultia katka hasta tik tepal tejtechan.
Ne Bibliaj Tik Nawat · © 2008, 2012 Jan Morrow