Revised Common Lectionary (Semicontinuous)

Ne tajtuli o ne tayulmatilis?

3 Melemet ipal Galatia! Ká metzinshuchiwijtuk, kwak ishpan anmujmuish muneshtijtuka Yeshu Mawaltijtuk cruzpilujtuk? ² Sema ini nikneki nimumachtia anmutech: ankikwijket ne Ijiutzin itech itekiw ne tajtuli, o ika antakakket ne tayulmatilis? ³ Anka anmelemet, ken anpejket iwan ne Ijiutzin wan ashan tamit iwan ne nakat? ⁴ Ankiekujket muchi uni pal te-tatka, su yaja ijkia pal te-tatka? ⁵ Yajika, ne ká metzinmaka ne Ijiutzin wan kichiwa sejse tay wey ijtik anmejemet, ken? Iwan itekiw ne tajtuli, o ika antakakket ne tayulmatilis?

⁶ Ijkiunisan ken Abraham kiyulmatki ne Teut, wan mupujki ken tamelakchiwalis, ⁷ shikmatikan tel ka ne ká kipiat tayulmatilis, yejemet ipilawan Abraham. ⁸ Ne ijkwilujtuk achtutachishki ka ne tejtechan yawit muchiwat yek ipanpa tayulmatilis, wan ne Teut kimakak Abraham ne yeknawatilis ka ipanpa yawit muteuchiwat muchi ne tejtechan. ⁹ Kiane, ne kipiat tayulmatilis muteuchiwat iwan Abraham ne tayulmati.