Revised Common Lectionary (Complementary)

⁴ Kọ orin ìyìn sí Olúwa, ẹ̀yin olódodo;
    kí ẹ sì fi ọpẹ́ fún orúkọ rẹ̀ mímọ́.
⁵ Nítorí pé ìbínú rẹ̀ wà fún ìgbà díẹ̀,
    ojúrere rẹ̀ wà títí ayérayé;
Ẹkún lè pẹ́ títí di alẹ́,
    Ṣùgbọ́n ayọ̀ yóò wá ní òwúrọ̀.

⁶ Ní ìgbà ayé mi, mo wí pé,
    “a kì yóò ṣí mi ní ipò padà.”
⁷ Nípa ojúrere rẹ, Olúwa,
    ìwọ ti gbé mi kalẹ̀ bí òkè tí ó ní agbára;
ìwọ pa ojú rẹ mọ́,
    àyà sì fò mí.

⁸ Sí ọ Olúwa, ni mo ké pè é;
    àti sí Olúwa ni mo sọkún fún àánú:
⁹ “Èrè kí ni ó wà nínú ikú ìparun mi,
    nínú lílọ sí ihò mi?
Eruku yóò a yìn ọ́ bí?
    Ǹjẹ́ yóò sọ nípa òdodo rẹ?
¹⁰ Gbọ́, Olúwa, kí o sì ṣàánú fún mi;
    ìwọ Olúwa, jẹ́ olùrànlọ́wọ́ mi.”

¹¹ Ìwọ ti yí ìkáàánú mi di ijó fún mi;
    ìwọ sì ti bọ́ aṣọ ọ̀fọ̀ mi, o sì fi aṣọ ayọ̀ wọ̀ mí,
¹² nítorí ìdí èyí ni kí ọkàn mi máa yìn ọ́, kí o má sì ṣe dákẹ́.
    Ìwọ Olúwa Ọlọ́run mi, èmi yóò máa fi ọpẹ́ fún ọ títí láé.

2 Báwo ni Olúwa ṣe bo ọmọbìnrin Sioni
    pẹ̀lú àwọsánmọ̀ ìbínú rẹ̀!
Ó sọ ògo Israẹli kalẹ̀
    Láti ọ̀run sí ayé;
kò rántí àpótí ìtìsẹ̀ rẹ̀
    ní ọjọ́ ìbínú rẹ̀.

² Láìní àánú ni Olúwa gbé
    ibùgbé Jakọbu mì;
nínú ìrunú rẹ̀, ni ó wó
    ibi gíga ọmọbìnrin Juda lulẹ̀.
Ó ti mú ìjọba àti àwọn ọmọ-aládé ọkùnrin
    lọ sínú ilẹ̀ ní àìlọ́wọ̀.

³ Ní ìbínú gbígbóná rẹ̀ ni ó ké
    gbogbo ìwo Israẹli.
Ó ti mú ọwọ́ ọ̀tún rẹ̀ kúrò
    nígbà tí àwọn ọ̀tá dé.
Ó run ní Jakọbu bí ọ̀wọ́-iná
    ní àgọ́ àwọn ọmọbìnrin Sioni.

⁴ Ó na ọfà rẹ̀ bí ọ̀tá;
    ọwọ́ ọ̀tún rẹ̀ sì múra
Bí ti ọ̀tá tí ó ti parun
    ó tú ìbínú rẹ̀ jáde bí iná
sórí àgọ́ ọmọbìnrin Sioni.

⁵ Olúwa dàbí ọ̀tá;
    ó gbé Israẹli mì.
Ó ti gbé gbogbo ààfin rẹ̀ mì
    ó pa ibi gíga rẹ̀ run.
Ó sọ ìmí ẹ̀dùn àti ìbànújẹ́ di púpọ̀
    fún àwọn ọmọbìnrin Juda.

⁶ Ó mú ìparun bá ibi mímọ́,
    ó pa ibi ìpàdé rẹ̀ run.
Olúwa ti mú Sioni gbàgbé
    àjọ̀dún tí a yàn àti ọ̀sẹ̀ tí ó yàn;
nínú ìbínú gbígbóná rẹ̀ ni ó run
    ọba àti olórí àlùfáà.

⁷ Olúwa ti kọ̀ pẹpẹ rẹ̀ sílẹ̀
    ó sì ti kọ̀ ibi mímọ́ rẹ̀.
Ó sì fi lé ọ̀tá lọ́wọ́
    àwọn odi ààfin rẹ̀;
wọ́n sì kígbe ní ilé Olúwa
    gẹ́gẹ́ bí ọjọ́ àpèjẹ tí a yàn.

⁸ Olúwa pinnu láti fa
    ògiri tí ó yí ọmọbìnrin Sioni ya.
Ó gbé wọn sórí òṣùwọ̀n,
    kò sì fa ọwọ́ rẹ̀ padà kúrò nínú ìparun wọn.
Ó mú kí ilé ìṣọ́ àti odi rẹ̀ ṣọ̀fọ̀
    wọ́n ṣòfò papọ̀.

⁹ Ẹnu-ọ̀nà rẹ̀ ti wọ inú ilẹ̀;
    òpó rẹ̀ ni ó wó tí ó sì ti bàjẹ́.
Ọba àti ọmọ ọbakùnrin rẹ̀ wà ní ìgbèkùn láàrín àwọn orílẹ̀-èdè,
    kò sí òfin mọ́,
àwọn wòlíì rẹ̀ kò rí
    ìran láti ọ̀dọ̀ Olúwa mọ́.

¹⁰ Àwọn àgbàgbà ọmọbìnrin Sioni
    jókòó sílẹ̀ ní ìdákẹ́rọ́rọ́;
wọ́n da eruku sí orí wọn
    wọ́n sì wọ aṣọ àkísà.
Àwọn ọ̀dọ́mọbìnrin Jerusalẹmu
    ti tẹrí wọn ba sí ilẹ̀.

¹¹ Ojú mi kọ̀ láti sọkún,
    mo ń jẹ ìrora nínú mi,
mo tú ọkàn mi jáde sí ilẹ̀
    nítorí a pa àwọn ènìyàn mí run,
nítorí àwọn ọmọdé àti ọmọ ọwọ́ ń kú
    ní òpópó ìlú.

¹² Wọ́n wí fún àwọn ìyá wọn,
    “Níbo ni ọkà àti wáìnì wà?” Wò ó
bí wọ́n ṣe ń kú lọ bí àwọn ọkùnrin tí a ṣe léṣe
    ní àwọn òpópónà ìlú,
bí ayé wọn ṣe ń ṣòfò
    láti ọwọ́ ìyá wọn.