Revised Common Lectionary (Complementary)

Dee 30 Psalm

En Psalm: En Ennweihunjs Leet fa Doft sien Hus.

¹ Ekj woa die feharlijche, O Herr Gott; dan du hast mie nehejcht jehäft, un hast nijch erlaubt daut miene Fiend sikj äwa mie freihe sulle.

² O Herr Gott mien Gott, ekj schreajch no die, un du hast mie jeheelt.

³ O Herr Gott, du hast mie fonn daut Grauf enopp jebrocht, du hast mie aum läwe jehoole fonn enn dän Kul enenn gone.

⁴ Sinjt Preis to däm Herr Gott, O jie siene Heilje; un jäft Dank to daut Aunjedenkj fonn siene Heilijchkjeit.

⁵ Dan sien Oaja es bloos fa eene Moment; enn sien Gonnst es Läwe. Hiele mucht fa eene Owent duare, oba Freid kjemt enn dän Morje.

⁶ Un enn mien Woolhabent woa ekj sejchalijch saje: "Ekj woa niemols festat woare fa emma.

⁷ O Herr Gott, enn dien Gonnst hast du mien stoakja Boajch bestädijcht; du deetst dien Jesejcht festäakje, ekj wea jetrubbelt;

⁸ Oba ekj woa dien aunroope, O Herr Gott, un ekj woa to daem Herr Gott baede.

⁹ Waut fonn Jewennst es doa enn mien Bloot, enn rauf to gone no dee Kul? Saul daut Stoff oppe Ead die danke? Saul daut diene Woarheit fekjindje?

¹⁰ Horjch, O Herr Gott, un ha en Jefaule aun mie; O Herr Gott, sie mien Halpa.

¹¹ Du hast mien Truare fewaundelt enn Daunse fa mie; du hast mien Saktseijch auf jeräte, un hast mie met Freid jekjleet.

¹² Soo saul mien Harlijchkjeit die preise, un nijch stel senne. O Herr Gott, mien Gott, ekj woa die Dank jäwe fa emma.

⁷ Oba soo aus jie enn aules rikj sent, em Gloowe, en Wuat en Erkjantnes en Earenst, en onnse Leew dee enn junt es, seet doano daut jie enn dise Jnod uk Rikj sent.

⁸ Ekj saj dit nich aus en Jeboot; oba derch aundre aea Iewa to bewiese woo ajcht june Leew es.

⁹ Jie kjane onns Herr Jesus siene Jnod, daut, wan hee uk Rikj wea, doch omm junet haulwe muak hee sikj selfst Oam, soo daut jie derch siene Oamoot kunne Rikj woare.

¹⁰ En ekj jaew hia miene Meeninj. Dit es fa junt to Nutse. Jie haude latst Yoa nich bloos aunjefangt daut to doone, oba uk daut Felange.

¹¹ Nu dan moakt daut uk foadich, soo aus jie Iewrich weare daut to doone, soo moakt daut nu foadich met waut jie ha.

¹² Wan daut Felange aul doa es, dan eset aunjenome no waut en Mensch haft, nich no waut hee nich haft.

¹³ Nich daut aundre daut sulle leichte ha, en jie schwande,

¹⁴ oba daut doa nu sull ne Aewereenheit senne, daut nu derch jun Aewafluss jane kjenne ha waut an faelt, daut aea Aewafluss junt halpe kaun wan junt daut faelt, daut doa ne Aewareenheit es;

¹⁵ soo auset jeschraewe steit: "Waea fael haud, haud nich tom aewrije, en waea weinich haud, haud nich too weinich".

²¹ Aus Jesus em Schepp aewa jefoare wea no dee aundre Sied, fesaumelde sikj doa fael Mensche, en hee wea biem See.

²² Donn kjeem eena fonn dee Faeaschta em Sienagoog, dee Jairus heet, en aus dee am sach, foll hee am fere Feet,

²³ en prachad am earenstlich en saed: "Miene Dochta es bottem stoawe, komm en laj diene Henj opp aea, daut see jesunt woat, en laewe kaun."

²⁴ En hee jinkj met am met. En fael Mensche jinje am hinjaraun, en drenjde am.

²⁵ Nu wea doa ne Fru dee aul fa twalf Yoa jeblat haud,

²⁶ en haud fael jelaede bie fael Doktasch, en haud aules hanjejaeft waut see haud, wea oba nusscht baeta, wort leewa Oaja.

²⁷ See haud fonn Jesus jeheat, en kjeem fonn hinje derch daut Follkj, en schead siene Kljeeda aun;

²⁸ dan see saed: "Wan ekj uk bloos kunn siene Kjleeda aunscheare, dan wudd ekj jesunt woare."

²⁹ En platslich wea dee Blootfluss oppjedreacht, en see wist enn aea Kjarpa daut see jeheelt wea fonn dee Ploag.

³⁰ Jesus oba wist fuats enn sikj selfst daut Krauft ut am rut jegone wea, en dreid sikj omm mank daut Follkj, en saed: "Waea haft miene Kjleeda aunjescheat?"

³¹ En siene Jinja saede to am: "Du sitst daut daut Follkj die drenjt, en du sajchst, 'Waea haft mie aunjescheat'?"

³² Oba hee kjikjt romm tom seene waea daut jedone haud.

³³ En dee Fru haud seeha angst en tsetad, wiel see wist waut met aea paseat wea, kjeem en foll am fere Feet, en fetald am de gaunse Woarheit.

³⁴ Oba Jesus saed to aea: "Dochta, dien Gloowe haft die jeheelt, go enn Fraed, en sie jesunt fonn diene Ploag."

³⁵ Oba waearent hee noch raed, kjeeme see fomm Faeaschta fonne Sienagoog, en saede: "Diene Dochta es jestorwe, wuaromm trubbelst du daem Leara noch lenja?"

³⁶ Jesus oba head waut to daem Sienagoog Faeastone jesajcht wort, en saed: "Ha nich Angst, jleew bloos!"

³⁷ En hee leet kjeenem met am met buta Peeta, en Jakoobus en sien Brooda Jehaun.

³⁸ See kjeeme enn daem Sienagoog Faeastone sien Hus enenn, en hee sach doa en Opprua, Mensche aewalud hiele en jaumareare.

³⁹ Hee jinkj enenn en saed to an: "Wuaromm moak jie soon grootet Opprua en hiele soo? Daut Kjint es nich jestorwe, see schlapt."

⁴⁰ En see lachte am ut. Oba hee stoppt an aule rut, en neem daut Kjint aea Foda en Mutta, en daen dee met am weare, en jinkj enenn wua daut Kjint lach.

⁴¹ Hee neem daut Kjint bie de Haunt, en saed to aea: "Talieta kum", daut meent: "Maeakjstje, ekj saj die, sto opp!"

⁴² En platslich recht daut Maeakjstje sikj opp, en funk aun to gone. See wea twalf Yoa oolt. En fuats erstaunde see aula met en grootet Erstaune.

⁴³ En hee jeef befael daut kjeena daut weete sull, en saed to an daut see aea sulle waut to aete jaewe.