Revised Common Lectionary (Complementary)

Dee Psalme IV

Dee 90 Psalm

En Jebäd fonn Mooses, dee Gottes Maun.

¹ O Herr, Du best onnse Wonstäd jewast enn aule Jeschlachte.

² Fer däm daut dee Boaj ferendach kjeeme, ooda Du dee Ead un dee Welt jeformt hautst; soogoa fonn Eewichkjeit bott Eewichkjeit best Du Gott.

³ Du brinjst dän Mensch to Stoff, un sachst: "Komt trigj, O Menschen Säns."

⁴ Dan dusent Joa sent bie Die soo aus Jistre wan daut febie es, un aus ne Woak enne Nacht.

⁵ Du neemst dän wajch soo aus ne Äwaschwamunk; dee sent soo aus Schlop; Zemorjes sent dee soo aus Graus daut waust;

⁶ Zemorjes deit daut kjiene un kjemt opp; un em Owent deit daut fewalkjen en deit oppdreaje.

⁷ Dan Du deist onns febrenne enn dien Oaja, un wie sent jetrubbelt derjch dien Oaja.

⁸ Du hast onnse Sinde fer die jestalt; onnse jeheeme Sind enn daut Licht fonn dien Jesejcht.

⁹ Dan aul onnse Doag feschwinje enn dien Oaja, wie befrädje onnse Doag soo aus en murre.

¹⁰ Dee Doag enn onns Läwe sent zäwentich Joa; un wan eena uk noch derch Krauft tachentich Joa läft, doch es äa Stoltet oabeit un nutzlooss; daut daut feschwinjt, un wie fleaje wajch.

¹¹ Wäa weet dee Macht fonn dien Oaja? Un soo aus diene Forcht es, soo es dien Oaja.

¹² Soo lea onns onnse Doag to tale, soo daut wie en weiset Hoat muchte habe.

5 Oba, Breeda, aewa dee Tiede en Joarestiede eset nich needich junt meeha to schriewe.

² Dan jie weete selfst jeneiw daut daem Herr sien Dach so kome woat aus en Deef enne Nacht.

³ Wan see saje: "Fraed en Sechaheit", dan woat onnferhoffs Fedoawness opp an kome so aus Weedoag opp ne Fru kjemt dee en Kjint to Welt brinjt, en kjeena woat kjenne wajch ranne.

⁴ Oba Breeda, jie sent nich enn Diestaness, daut dee Dach junt sull so aus en Deef aewafaule.

⁵ Jie sent aula Lichtmensche en Doagesmensche. Wie jeheare nich to de Nacht oda to de Diestaness.

⁶ Doaromm wel wie nich schlope so aus dee aundre, oba wel wie faeasechtich en nichta senne.

⁷ Dan soone dee schlope, schlope enne Nacht; en dee bedrunke sent, sent enne Nacht bedrunke.

⁸ Wel wie oba, dee wie tom Dach jeheare, nichta senne, aunjedone met daut Brosstschilt daut Gloowe en Leew es, en fa ne Kjriejesmets, dee Hopninj fa dee Seelichkjeit.

⁹ Dan Gott haft onns nich bestemt to dee Rach, oba dee Seelichkjeit to kjriehe derch onns Herr Jesus Christus,

¹⁰ dee fa onns storf, so daut auf wie woake oda auf wie schlope, met am toop kjenne laewe.

¹¹ Doaromm treest junt unjarenaunda, en buet junt unjarenaunda opp, so aus jie uk doone.

¹⁴ Dan daut es soo aus en Maun dee butrem Launt reisd, en roopt siene Sklowe en aewajeef an sien Hab en Goot.

¹⁵ Eenem jeef hee fief Selwastekja, noch eenem twee, en noch eenem eent, doano aus en jieda faeijch wea, en feleet.

¹⁶ Fuats jinkj dee, dee fief Selwastekje jekreaeje huad, en haundeld doamet, en jewonn fief meeha.

¹⁷ En dee, dee twee jekreaeaje haud, deed jrod soo, en jewonn twee meeha.

¹⁸ Oba dee, dee bloos eent jekraeaje haud, jinkj wajch en growd en Loch enne Ead, en festuak sien Herr sien Selwastkj.

¹⁹ No ne lange Tiet kjeem dee Sklowe aea Herr trig en feraeakjend met siene Sklowe.

²⁰ Dee, dee fief Selwastkje jekraeaje haud brocht fief meeha, en saed: 'Herr, du jeefst mie fief Selwastekje; kjikj! ekj ha fief meeha jewonne.'

²¹ De Herr saed to am: 'Goot! du best en gooda en trua Sklow, du best aewa en poa Dinje tru jewast, ekj woa die aewa fael sate; go enn dien Herr siene Freid enenn.'

²² Donn kjeem dee, dee twee Selwastekje jekraeaje haud, en saed: 'Herr, du jeefst mie twee Selwastekje; kjikj! ekj ha twee meeha jewonne.'

²³ Sien Herr saed to am: 'Goot! du best en gooda en trua Sklow, du best eawa en poa Dinje tru jewast, ekj woa die aewa fael sate. Go enn dien Herr siene Freid enenn.'

²⁴ En dee, dee een Selwastekj jekraeaje haud kjeem uk, en saed: 'Ekj weet daut du en hoada Maun best, du deist arnte wua du nich jeseit hast, en deist toop saumle wua du nich utjestreit hast;

²⁵ en ekj aengst mie, en jinkj wajch en festuak dien Selwastekj enne Ead; kjikj, hia hast waut dient es.'

²⁶ Sien Herr auntwuad en saed to am: 'Du beesa en fula Sklow; du wist daut ekj arnte doo wua ekj nich jeseit ha, en toop saumle doo wua ekj nich utjestreit ha?

²⁷ Du haudst doaromm sullt mien Selwastekj enne Bank jelajcht, dan wan ekj kjeem wudd ekj daut mienje jekjraeaje ha met Entrast.

²⁸ Aulsoo naemt daut Selwastekj fonn am, en jaeft daem daut dee tean haft;

²⁹ dan waeaemma haft, daem woat meeha jejaeft woare, en hee woat aewafluss ha; oba fonn daem dee nich haft, woat sogoa daut wajchjenome woare waut hee haft.

³⁰ En schmiet daem nutsloosa Sklow enn daut butaschte Diestaness enenn; doa woat weegauljet Hiele en Taenekjnirsche senne.'