Revised Common Lectionary (Complementary)

Dee 80 Psalm

To dän Haupr Musikaunt, wäajen dee Lelje. En Psalm von Asaf.

¹ O Iesrael äa Schop Hoad, Du, dee Du Joosef leide deist soo aus ne Häad; dee Du tweschen dee Cherubim wonst, doo schiene.

² Doo diene Macht bewäaje fer Efraim, en Benjamin, un Manasse, un komm doo onns rade.

³ O Gott, doo onns wada trigj dreihe, lot dien Jesejcht schiene; dan woa wie jerat woare.

⁴ O Aulmajchtja Herr Gott, woo lang woascht du noch oajalijch senne jäajen daut Jebaed fonn dien Folkj?

⁵ Du deetst an foodre met daut Broot fonn Trone, un du jeefst an Trone to drinkje.

⁶ Du hast onns en Striet jemoakt to onnse Nobasch; un onnse Fiend lache to sikj selfst.

⁷ O Aulmajchtja Gott, doo onns wada trigj dreihe, un lot dien Jesejcht schiene, un wie woare jerat senne.

¹⁷ Lot diene Haunt opp däm Maun senne fonn diene rajchte Haunt; opp däm Menschesän dän Du stoakj jemoakt hast fa die selfst.

¹⁸ Dan woa wie nijch fonn die trigj wajch dreihe; jeff onns niehet Läwe, un wie woare dien Nome aunroope.

¹⁹ Brinj onns trigj, O Aulmajchtja Herr Gott; lot dien Jesejcht schiene, un wie woare jerat senne.

1 Paul, Jesus Christus sien Sklow, beroope aus en Apostel, bestemt fa Gott sien Evanjeelium;

² [daut hee ferhaea fesproake haud enne Heilje Schreft derch siene Profeete]

³ Fonn sien Saen, dee fonn Doft sien Staum kjeem nom Fleesch,

⁴ oba met Macht beteakjent wort aus Gott sien Saen no daem Jeist de Heilichkjeit derch sien oppstone fom Doot;

⁵ derch daem wie Jnod en daut Apostelaumt jekraeaje habe tom Jehuarsaum emm Gloowe mank aule Felkje omm sien Nome haulwe.

⁶ Jie sent uk mank dee, dee beroope sent enn Jesus Christus;

⁷ Aun aul dee, dee enn Room sent, daen Gott leef haft, dee Heilje jenant sent. Mucht Jnod en Fraed fonn Goot onns Foda en fonn daem Herr Jesus Christus met ju senne.

¹⁸ Nu Jesus Christus sien Jeburt fehilt sikj soo: Aus siene Mutta Marie aun Joosef aunfetrut wea, eeha see toop kjeeme, wea see schwanga derch daem Heilje Jeist.

¹⁹ Nu Joosef, aea Maun, wea from en wull aea nich to en Biespel moake, en neem sikj faea daut hee wudd aea em jeheeme gone lote.

²⁰ Oba aus hee doaraun docht, kjeem daem Herr sien Enjel enn en Droom no am, en saed: "Joosef, Doft sien Saen, ha nich Angst Marie to naeme aus diene Fru, dan daut Kjint enn aea es fonn daem Heilje Jeist.

²¹ En see woat en Kjint to Welt brinje, en du saust am daem Nome Jesus jaewe, dan hee woat sien Follkj fonn aeare Sind rade."

²² Aul dit pasead daut waut de Herr derch daen Profeet saed mucht erfelt woare soo aus hee saed:

²³ "Kjikj! ne Junkfru woat met Kjint senne en woat en Saen to Welt brinje, en see woare am daen Nome Emanuel jaewe, aewesat meent daut Gott met onns".

²⁴ En Joosaf, aus hee fom Schlop oppwuak, deed soo aus daem Herr sien Enjel am befoole haud, en neem Marie aus siene Fru;

²⁵ oba hee haud kjeen Jeschlajchtsfekjea meet aea bott see aea easchta Saen to Welt jebrocht haud; en hee jeef am daen Nome Jesus.