Revised Common Lectionary (Complementary)

Dee 72 Psalm

Fonn Salamo.

¹ Jeff däm Kjeenijch diene Jerejchte, O Gott; un diene Jerajchtijchkjeit to däm Kjeenijch sien Sän.

² Hee saul dien Folkj enn Jerajchtijchkjeit rejchte, un diene Oame enn rajchtet Jerejcht.

³ Dee Boaj woare Fräd nehejcht häwe to daut Folkj, un dee läaje Boaj derjch Jerajchtijchkjeit.

⁴ Dee woat dee Oame fonn daut Folkj rajchtet jerejcht jäwe; un hee woat dee Bederftje äare Säns rade; un hee woat däm rejchte dee bedrekje deit

⁵ Dee sele die ferjchte met dee Sonn; un fer dee Mon fa aule Jeschlajchte.

⁶ Hee woat rauf kome soo aus Räajen opp daut jeheiwdet Graus; soo aus dee korte Räajen dee de Ead wotre.

⁷ Dee Jerajchte saulet jelinje enn siene Doag, met fäl Fräd, bottet nijch dee Mon es.

¹⁸ Jesäajent es Iesrael äa Herr Gott, dee auleen wundafolle Dinej deit.

¹⁹ En jesäajent es sien harlijcha Nome fa emma, un dee gaunse Ead es jefelt met siene Harlijchkjeit!. Amen en Amen.

¹² Donn jinje see trig no Jerusalem fom Eelboajch, dee en Saubatsgank fonn Jerusalem es.

¹³ En aus see enenn kjeeme, jinge see enn ne Bowastow enenn, wua see luade, beid Peeta en Jehaun, en Joakopp en Aundrees, Filip en Toomas, Bartolomaeus en Mataeus, Joakopp - Alphaeus sien Saen, - en Siemoon Selootes, en Judas - Joakopp sien Brooda.

¹⁴ Dise weare aule toop en hilde enn een Senn aun em Jebaed met dee Frulied en Jesus siene Mutta, en met siene Breeda.

¹⁵ En enn dee Doag stunt Peeta opp mank dee Jinja en saed: (Doa weare onnjefaea hunndat twintich Mensche toop)

¹⁶ "Mana, Breeda, de Schreft, dee de Heilje Jeist ferhaea jeraet haud derch Doft fonn Judas, dee en Leida wea fa daen dee Jesus faust neeme,

¹⁷ dan hee wea eena fonn onns, en haud sien Poat met dis Deenst.

²¹ Doaromm mott eena fonn dise Mana dee de Tiet aewa met onns jewaese es wiel Jesus erut en enenn jegone es mank onns,

²² fonn donn aus Jehaun aunfunk to taufe, bott Jesus fonn onns jenome wort, enn Zeig met onns senne fonn Jesus sien oppstone fom Doot."

²³ En see stalde twee faea: Joosaf, dee uk Barsabas heet, daen see met hinjanome Justus nande; en Matias.

²⁴ En see baede en saede: "Herr, dee du aulamaun aeare Hoate weetst,

²⁵ wies onns waem du fonn dise Twee jewaelt hast dis Deenst en dit Apostelaumt to aewanaeme, fonn woont Judas jefolle es omm no siene Staed hantogone."

²⁶ En see leesde, en daut Loos foll opp Matias; don talde see am met dee twalw Apostel.