Revised Common Lectionary (Complementary)
41 Lát náð þína koma yfir mig, Drottinn, hjálpræði þitt, samkvæmt fyrirheiti þínu,
42 að ég fái andsvör veitt þeim er smána mig, því að þínu orði treysti ég.
43 Og tak aldrei sannleikans orð burt úr munni mínum, því að ég bíð dóma þinna.
44 Ég vil stöðugt varðveita lögmál þitt, um aldur og ævi,
45 þá mun ég ganga um víðlendi, því að ég leita fyrirmæla þinna,
46 þá mun ég tala um reglur þínar frammi fyrir konungum, og eigi skammast mín,
47 og leita unaðar í boðum þínum, þeim er ég elska,
48 og rétta út hendurnar eftir boðum þínum, þeim er ég elska, og íhuga lög þín.
16 Fyrirætlanir hjartans eru á mannsins valdi, en svar tungunnar kemur frá Drottni.
2 Manninum þykja allir sínir vegir hreinir, en Drottinn prófar hugarþelið.
3 Fel þú Drottni verk þín, þá mun áformum þínum framgengt verða.
4 Allt hefir Drottinn skapað til síns ákveðna marks, svo og guðleysingjann til óheilladagsins.
5 Sérhver hrokafullur maður er Drottni andstyggð, hér er höndin upp á það: hann sleppur ekki óhegndur!
6 Með elsku og trúfesti er friðþægt fyrir misgjörð, og fyrir ótta Drottins forðast menn hið illa.
7 Þegar Drottinn hefir þóknun á breytni einhvers manns, þá sættir hann og óvini hans við hann.
8 Betra er lítið með réttu en miklar tekjur með röngu.
9 Hjarta mannsins upphugsar veg hans, en Drottinn stýrir gangi hans.
10 Goðsvar er á vörum konungsins, í dómi mun munni hans ekki skeika.
11 Rétt vog og reisla koma frá Drottni, lóðin á vogarskálunum eru hans verk.
12 Að fremja ranglæti er konungum andstyggð, því að hásætið staðfestist fyrir réttlæti.
13 Réttlátar varir eru yndi konunga, og þeir elska þann, er talar hreinskilni.
14 Konungsreiði er sem sendiboði dauðans, en vitur maður sefar hana.
15 Í mildilegu augnaráði konungs er líf, og hylli hans er sem vorregns-ský.
16 Hversu miklu betra er að afla sér visku en gulls og ákjósanlegra að afla sér hygginda en silfurs.
17 Braut hreinskilinna er að forðast illt, að varðveita sálu sína er að gæta breytni sinnar.
18 Drambsemi er undanfari tortímingar, og oflæti veit á fall.
19 Betra er að vera lítillátur með auðmjúkum en að skipta herfangi með dramblátum.
20 Sá sem gefur gætur að orðinu, hreppir hamingju, og sæll er sá, sem treystir Drottni.
16 Þá kom til hans maður og spurði: "Meistari, hvað gott á ég að gjöra til þess að öðlast eilíft líf?"
17 Jesús sagði við hann: "Hví spyr þú mig um hið góða? Einn er sá hinn góði. Ef þú vilt inn ganga til lífsins, þá haltu boðorðin."
18 Hann spurði: "Hver?" Jesús sagði: "Þú skalt ekki morð fremja, þú skalt ekki drýgja hór, þú skalt ekki stela, þú skalt ekki bera ljúgvitni,
19 heiðra föður þinn og móður, og þú skalt elska náunga þinn eins og sjálfan þig."
20 Þá sagði ungi maðurinn: "Alls þessa hef ég gætt. Hvers er mér enn vant?"
21 Jesús sagði við hann: "Ef þú vilt vera fullkominn, skaltu fara, selja eigur þínar og gefa fátækum, og munt þú fjársjóð eiga á himnum. Kom síðan, og fylg mér."
22 Þegar ungi maðurinn heyrði þessi orð, fór hann brott hryggur, enda átti hann miklar eignir.
by Icelandic Bible Society