Old/New Testament

³⁰ Dee Apostel saumelde sikj omm Jesus, en brochte am Berecht fonn aules waut see jedone en jeleat haude.

³¹ En hee saed to an: "Komt apoat no ne wiltnes Staed en doot en stoot ruhe;" dan fael Mensche kjeeme en jinje, en see haude nich emol Jelaeajenheit tom aete.

³² See fuare auleen wajch enn en Schepp no ne wiltnes Staed.

³³ Oba fael sage an wajch foare, en kjande an, en rande tofoot fonn aul dee Staede, en kjeeme fer an doahan.

³⁴ Aus Jesus rut steach, sach hee fael Mensche, en am jaumad daut aewa an, dan see weare soo aus Schop oone en Hoad, en hee funk aun an fael to leare.

³⁵ Auset nu lot wort, kjeeme siene Jinje no am en saede: "Dit es ne wiltnes Staed, en daut es nu aul lot.

³⁶ Schekj dee Mensche wajch daut see kjenne no dee Flekje en Darpa runt omm gone en waut kjeepe, daut see aete kjenne."

³⁷ Oba hee auntwuad en saed to an: "Jaeft jie an to aete!" See saede to am: "Sull wie gone en Broot kjeepe fe twee Hundat Selwastekje, en daen to aete jaewe?"

³⁸ Hee saed to an: "Woo fael Brood ha jie?" See saede: "Fief, en twee Fesch."

³⁹ En hee befool an daut dee sikj enn Gruppe sulle dolsate oppet jreenet Graus.

⁴⁰ En see sade sikj dol en Gruppe fonn Hundat en fonn Feftich.

⁴¹ Hee neem dee fief Brood en twee Fesch, kjikjt nom Himel, saeajend daut, bruak dee Brood twei en jeef dee Jinja daut, en dee deelde daut ut mank an aula, en dee Fesch uk aun aulem.

⁴² En dee aute aula en worde saut.

⁴³ Donn neeme see dee bieta opp dee aewajeblaewe weare, en felde twlaf Kjarw.

⁴⁴ En doa weare bie fief Dusent Mana dee je-aete haude.

⁴⁵ Fuats doaropp bedingd hee siene Jinja daut see fer am sulle no dee aundre Sied foare no Betseeda, wiel hee daut Follkj gone leet.

⁴⁶ Aus hee fonn daen Aufscheet jenome haud, jinkj hee opp en Boajch omm doa to baede.

⁴⁷ Auset Owent wea, wea daut Schepp med oppem See, en hee wea auleen oppem Launt.

⁴⁸ En hee sach daut see en Not weare biem roodle, dan dee Wint wea jaeajenaun; en enn dee feade Nachtwoak kjeem hee no an, en jinkj oppem Wota; en wull bie an febie gone.

⁴⁹ Oba aus see am sage oppem Wota gone, dochte see dautet en Jespanst wea, en schreaje;

⁵⁰ dan aule sage am, en enjste sikj. Oba hee raed fuats met an, en saed: "Siet jetroost! dit sie ekj, enjst junt nich!"

⁵¹ Hee steach enn daut schepp enenn, en dee Wint head fuats opp, en see fewunndade sikj seeha;

⁵² dan see festunnde noch nich fonn dee Brood, en aeare Hoate weare noch Hoat.

⁵³ See fuare aewa en kjeeme no daut Launt Jenetsaret, en ankade doa.

⁵⁴ En platslich aus see ut daut Schepp erut steaje, kjande see am,

⁵⁵ en rande derch dee gaunse Ommjaeajent en funge aun dee Kranke opp aeare Bade to brinje, aus see heade daut hee doa wea.

⁵⁶ En wuaemma hee enn Darpa, oda Staede, oda enn dee Ommjaeajent, oda enn Moakjplautse kjeem, brochte see aeare Kranke, en prachade am daut see uk bloos daen Soom fonn siene Kjleeda kunne aunscheare; en so fael aus am aunscheade, worde jesunt.