Old/New Testament

24 En Jesus jinkj fomm Tempel wajch, en siene Jinja kjeeme no am, omm am dee Jebiede fom Tempel to wiese.

² Hee auntwuad an en saed: "See jie aul dise Dinje? Enn Woarheit saj ekj junt, opp kjeen wajch woat hia een Steen oppem aundre bliewe, daut nich woat dol jeschamete woare".

³ Aus hee oppem Eeljboajch saut, kjeeme siene Jinja no am enn priewaut, en saede: "Saj onns, waneeha woat aul dit paseare, en waut es dee Teakjen fonn dien Wadakome, en daut Enj fonn dise Tiet?"

⁴ En Jesus auntwuad en saed to an: "Seet doano daut kjeena junt fefeare woat.

⁵ Dan fael woare enn mien Nome kome en saje: 'Ekj sie dee Christus', en woare fael feleide.

⁶ Jie woare fonn Kjrich en Kjrichsjeschrecht heare; lot junt nich oppraeaje doawaeajen, dan daut mott aules paseare, oba daut es noch nich daut Enj.

⁷ Dan eene Natsjoon woat sikj oppstale jaeajen ne aundre Natsjoon, en een Kjeenichrikj jaeajen en aundret, en doa woare Hungaschnoot en Eadbaebe senne enn feschiedenste Staede;

⁸ oba aul dit es daut Aunfank fonn grootet Liede.

⁹ Dan woare see junt enn Aelend aewajaewe, en woare junt doot moake, en aule Natsjoone woare junt hause omm mien Nome haulwe.

¹⁰ En fael woare beleidicht senne, en woare eena daem aundra ferode, en woare sikj unjarenaunda hause;

¹¹ en fael faulsche Profeete woare oppstone, en woare fael feleide.;

¹² en wiel Gottloosichkjeit toonaeme woat, woat faele aeare Leew kollt woare.

¹³ Oba waeaemma bottem Enj uthelt, woat jerat woare.

¹⁴ En dit Evanjeelium fomm Rikj woat jepraedicht woare aewa dee gaunse Welt fa en Zeichnes aun aule Natsjoone, en dan woat daut Enj kome.

¹⁵ Doaromm, wan jie daut Aeakjel fonn fedoawness enn daut Heilichtum stone seene, fonn woont dee Profeeet Daneal raed - waea laest, lot am festone -

¹⁶ dan lot daen dee enn Judaea sent no dee Boaj flichte,

¹⁷ en waea oppem Husdack es, lot am nich rauf kome waut ut sien Hus to naeme,

¹⁸ en waea em Fleck es, lot am nich trig gone sikj sien Auntsuch to hole.

¹⁹ En wee dee Fruhes enn dee Doag dee met Kjint sent, en dee, dee en Kjint aune Brosst ha.

²⁰ Oba baet daut june Flicht nich em Winta oda aum Saubat kjemt;

²¹ dan doa woat groote Triebsaul senne, soont aus noch nie es jewast fonn Aunfank Welt bott nu, en woat uk nimeols wada paseare.

²² En wan dee Doag nich weare kjarta jemoakt, wudd kjeen Fleesch jerat woare, oba dee Doag woare kjarta jemoakt woare omm dee utjewaelde aea haulwe.

²³ Wan irjentwaea dan to junt sajcht:'Kjikjt! Hia es dee Christus!' oda: Kjikjt! Doa es dee Christus!' jleeft daut nich!

²⁴ Dan doa woare fael faulsche Christe, en fael faulsche Profeete oppstone, en woare groote Teakjens en Wunnda wiese, soo daut see sogoa dee Utjewaelde fefeare muchte, wan maeajlich.

²⁵ Kjikjt! Ekj ha junt ferhaea jesajcht.

²⁶ Wan see dan to junt saje: 'Kjikjt! hee es enne Wiltnes!' got doa nich han. 'Kjikjt! hee es enn ne Bennastow!' jleeft daut nich!.

²⁷ Dan soo aus dee Blits fom Ooste kjemt en schient bottem Waste, soo woatet senne wan dee Menschesaen kome woat.

²⁸ Wua daut Os es, doa saumle sikj dee Odla.