Old/New Testament

22 Jesus auntwuad en raed wada enn Jlikjnese to an, en saed:

² "Daut Himelsrikj es soo aus en Kjeenich dee ne Kjast muak fa sien Saen.

³ En hee schekjt siene Sklowe rut daen to roope dee to de Moltiet ennjelode weare, oba dee wulle nich kome.

⁴ Wada schekjt hee aundre Sklowe en saed: "Sajcht daen dee ennjelode sent, kjikjt, ekj ha daut Owentkost reed jemoakt, en dee Mastfee sent jeschlacht, en aules es reed; komt to daut Fast!"

⁵ Oba dee jeewe nusscht dromm en jinje wajch, eena no sien Flekj, noch eena no sien Haundel;

⁶ en dee aewrije jreepe siene Sklowe en beleidjde daen, en muake an doot.

⁷ Aulsoo wea dee Kjeenich seeha doll en schekjt siene Armee en brocht dee Merda omm, en febrend aeare Staut.

⁸ Donn saed hee to siene Sklowe: 'Daut Fast es reed, oba dee, dee ennjelode weare, sentet nich weat.

⁹ Doaromm got no dee Krietswaeaj wua dee sikj deele, en soo fael aus jie finje, lot an enn to dit Fast.

¹⁰ Dee Sklowe jinje enne Waeaj en saumelde waem see funje, beides Goode uk Schlajchte, en daut Kjasthus wort foll Jast.

¹¹ Oba aus dee Kjeenich ennen kjeem dee Jast to seene, sach hee doa en Maun dee nich en Kjastkjleet aun haud;

¹² en hee saed to am: 'Frint, woo best du hia enenn jekome oone en Kjastkjleet?' Hee kunn nusscht saje.

¹³ Donn saed dee Kjeenich to siene Deena: 'Binjt am de Henj en Feet en schmiet am rut enn daut butaschte Diestanes; doa woat betalich hiele en Taene kjnirsche sene.'

¹⁴ Dan fael sent beroope, oba weinich sent jewaelt."

¹⁵ Donn jinje dee Farisaea en hilde Rot woo see am kunne enn siene Raed faust naeme.

¹⁶ En see schekjte eenem fonn aeare Jinja no am met daen dee Heroodes siene Nofolja weare, dee saede: "Wie weete daut du woarhauftich best, leascht Gott sien Wajch enn Woarheit, en kjemmascht die nich omm waut aundre saje, dan du deist nich Menschepersoon aunseene;

¹⁷ doaromm saj onns: Waut denkjst du? esset erlaubt daem Kjeisa Koptaks to tole, oda nich?"

¹⁸ Oba hee wist aeare Gottloosichkjeit, en saed: "Jie Heichla! wuaromm feseakj jie mie?

¹⁹ Wiest mie mol daut Taksjelt." En see brochte am en Selwstekj.

²⁰ En hee saed to an: "Waems Bilt en Unjeschreft es dit?"

²¹ See saede: "Daem Kjeisa sient." Donn saed hee to an: "Dan jaeft daem Kjeisa waut daem Kjeisa sient es, en Gott waut Gott sient es."

²² Aus see daut heade, fawunndade see sikj, en feleete am en jinje wajch.