Old/New Testament

26 En daut pasead aus Jesus met aul dise Raed to Enj wea, saed hee to siene Jinja:

² "Jie weete daut daut Pasafast omm twee Doag kjemt, en dee Menschesaen woat aufjeleewat woare, en see am woare kjrietsje."

³ Donn fesaumelde dee Huagapriesta en dee Elteste fonne Mensche sikj enn daem Huagapriesta Kaifas sien Hoff,

⁴ en unjahilde sikj woo see Jesus met Lest kunne faust naeme en am doot moake;

⁵ oba see saede: "Nich opp daut Fast, dautet nich meteemol en Opprua manke Mensche jeft."

⁶ Aus Jesus enn Betanean enn Siemoon, daen Utsautsje, sien Hus wea,

⁷ kjeem ne Fru no am met en Aulabaustaglaus seeha deara Saulw, en goot daut opp sien Kopp aus hee doa biem Desch saut.

⁸ Aus dee Jinja daut sage, weare see bossijch, en saede: "To waut es dit onneedjet fekwose?

⁹ dan dit haud kunnt fekofft woare fa fael Jelt, en dee Oame jejaeft."

¹⁰ Aus Jesus daut wist, saed hee to an: "Wuaromm moak jie daut Schwoa fa dee Fru? see haft ne goode Oabeit aun mie jedone.

¹¹ Dan dee Oame ha jie emma bie junt, oba mie ha jie nich emma.

¹² Enn daem daut see dise Saulw opp mie jegote haft, haft see mie reed jemoakt tom begrowe.

¹³ Enn Woarheit saj ekj junt, wuaemma dit Evanjeelium woat jepraedicht woare enne Welt, woat hiafonn jeraet woare to aea Jedajchtnes."

¹⁴ Donn jinkj eena fonn dee Twalw, dee Judas Iescharijot heet, no dee Huagapriesta,

¹⁵ en saed: "Waut se jie welich mie to jaewe, wan ekj am junt aewajaew?" En see jeewe am dartich Selwastekje.

¹⁶ Fonn donn aun socht hee Jelaeajenheit am to ferode.

¹⁷ Nu aum easchte Dach fonn daut Seetbroot Fast, kjeeme dee Jinja no Jesus, en saede: "Wua west du ha daut wie fa die reed moake sele fa daut Pasafast?"

¹⁸ He saed: "Got enne Staut no en jewessa Maun en sajcht to am: 'Dee Leara sajcht: Dee Tiet es dicht bie. Ekj woa daut Pasafast bie die hoole met miene Jinja'."

¹⁹ En dee Jinja deede soo aus Jesus an befoole haud, en muake daut Pasafast reed.

²⁰ Auset nu Owent wea, sad Jesus sikj dol met dee Twalf Jinja.

²¹ Aus see aute, saed hee: "Enn Woarheit saj ekj junt, daut eena fonn junt woat mie ferode."

²² En see worde seeha truarich, en saede eena nom aundra to am: "Ekj sie daut doch nich, Herr?"

²³ En hee auntwuad en saed: "Dee, dee met mie enn daut Schatel enenn dukt, woat mie ferode.

²⁴ Dee Menschesaen jeit werklich doahan soo auset fonn am jeschraewe steit; oba wee daem derch waem de Menschesaen ferode woat; daut wea baeta fa daem wan hee nie wea jebuare worde."

²⁵ Donn auntwuad Judas, dee am ferode wudd, en saed: "Ekj sie daut doch secha nich, Leara?" Hee saed to am: "Du hastet jesajcht!"