Old/New Testament

27 Tiedich tsemorjenst, hilde aul dee Huagapriesta en dee Elteste utem Follkj en Rot jaeajen Jesus, omm an doot to moake.

² Aus see am jebunje haude, leide see am wajch, en aewejeewe am aun Pielatus daen Rejeara.

³ Donn aus Judas, dee am ferode haud, sach daut am feuadeelt wort, wea am daut leet waut hee jedone haud, en jinkj en brocht dee Selwastekja trig no dee Huagapriesta en Eltesta en saed:

⁴ "Ekj ha jesindicht enn daem daut ekj onnschuldjet Bloot ferode ha." Oba see saede: " Waut jeit onns daut aun? See selfst doano".

⁵ En hee schmeet dee Selwastekja em Tempel enenn, jinkj wajch en honk sikj selfst.

⁶ Oba dee Huagapriesta neeme dee Selwastekja en saede: "Daut es nich erlaupt daut enne Kaus enenn to laje, dan daut es Blootjelt."

⁷ See hilde en Rot, en koffte doamet daut Toppstrikja Leemflekj tom Framde begrowe.

⁸ Doaromm woat daut flekj Launt bott fonndoagendach daut Blootflekj jenant.

⁹ Donn wort erfelt waut derch daen Profeet Jeremia jesajcht wea: "See neeme dee dartich Selwastekje, daen Pries daen see betsemt haude fa dee Iesrael Saens,

¹⁰ en jeewe daut fa daut Toppstrikja Leemflekj, soo aus de Herr mie befoole haud."

¹¹ En Jesus stunnt fer daem Rejeara; en dee fruach am: "Best du de Jude aea Kjeenich?" En Jesus saed to am: "Du hastet jesajcht."

¹² En aus dee Huagapriesta en Eltesta am beschuljde, jeef hee kjeene Auntwuat.

¹³ Donn saed Pielatus to am: "Heascht du nich woo fael dise faeabrinje jaeajen die?"

¹⁴ Oba hee auntwuad nich en Wuat, soo daut dee Rejeara sikj seehe fawunndad doaewa.

¹⁵ Nu opp daut Fast haud dee Rejeara ne Jewanheit een Jefangna loos to lote, waememma see wulle.

¹⁶ En see haude donn en beriemda Jefangna dee Barabas heet.

¹⁷ Aus see nu soo fesaumelt weare, saed Pielatus to an: "Waem wel jie daut ekj loos lote saul, Barabas, oda Jesus dee Christus jenant woat?"

¹⁸ Dan hee wist daut see am Jesus waeajen Aufgonst jebrocht haude.

¹⁹ Aus hee nu opp sien Rechtastool saut, schekjt siene Fru no am, en saed: "Ha nusscht met daem jerajchta Maun to doone, dan ekj ha fael jelaede fonndoag enn en Droom waeajen am."

²⁰ Oba dee Huagapriesta en Eltesta beraede daut Follkj daut see sulle no Barabas froage, en Jesus ommbrinje.

²¹ Oba dee Rejeara auntwuad en saed to an: "Woona fonn dee twee wel jie daut ekj loos lote saul?" See saede: "Barabas".

²² Pielatus saed to an: "Waut saul ekj dan doone met Jesus, dee Christus jenant es?" See saede aula: "Lot am jekjrietsicht woare!"

²³ Oba hee saed: "Wuaromm, waut haft hee beeset jedone?" Oba see schreaje bloos dolla, en saede: "Lot am jekjrietsicht woare!"

²⁴ En aus Pielatus sach daut hee nusscht kunn utreede, oba dautet leewa en grootet Opprua jeef, neem hee Wota, en wossch siene Henj fer daut Follkj, en saed: "Ekj sie oone Schullt aun dis Maun sien Bloot! Seet junt selfst doafaea."

²⁵ En daut Follkj auntwuad en saed: "Sien Bloot sie opp onns en onnse Kjinja."

²⁶ Donn jeef hee an Barabas, en leet Jesus feheift woare, en aewajeef am daut am sull jekjrietsicht woare.