New Testament in a Year

Апсењето на Исус

(Матеј 26:47-56; Марко 14:43-50; Лука 22:47-53) 18 Откако заврши со молитвата, Исус отиде со Своите ученици од другата страна на сезонскиот поток Кидрон, каде што имаше една овошна градина. Тој и Неговите ученици влегоа во неа.

² А предавникот Јуда го знаеше тоа место, зашто Исус и Неговите ученици често се собираа таму. ³ Тогаш дојде и Јуда, предводејќи еден одред^[a] војници и гардисти на храмот, испратени од свештеничките поглавари и од фарисеите. Тие беа вооружени, а носеа и факли и фенери.

⁴ Иако знаеше што се мора да Му се случи, Исус излезе и ги праша: „Кого барате?“

⁵ Тие Му одговорија: „Исусa од Назарет!“

„Јас сум Тој“ - им рече Исус. Таму, со групата, стоеше и предавникот Јуда. ⁶ Кога Исус им рече, „Јас сум Тој“ - тие се повлекоа и испопаѓаа по земјата.

⁷ Тогаш Исус повторно ги праша: „Кого барате?“

„Исусa од Назарет“ - повторија тие.

⁸ Исус им одговори: „Ви реков дека Јас сум Тој. Штом Мене Ме барате, пуштете ги овие луѓе да си одат!“ ⁹ Тој го направи ова за да се исполнат зборовите што ги рече: „Не загубив ниту еден од оние што Ми ги даде^[b].“

¹⁰ Тогаш Симон Петар, кој имаше меч, го извлече и го удри слугата на Првосвештеникот, отсекувајќи му го десното уво. Името на слугата му беше Малхус. ¹¹ Исус му заповеда на Петар: „Врати го мечот во канијата! Зар да не ја испијам чашата^[c] што Ми ја даде Таткото?“

¹² Тогаш римскиот заповедник^[d], со својот одред и со гардистите на храмот, Го уапси Исуса. ¹³ Го врзаа и Го одведоа најнапред кај Анан^[e], кој му беше дедо^[f] на Кајафа, Првосвештеникот за таа година. ¹⁴ Тоа беше истиот оној Кајафа што ги посоветува Евреите дека е подобро еден човек да умре за народот^[g].

¹⁵ Симон Петар и еден друг ученик одеа по Исус. Тој ученик се познаваше со Првосвештеникот, па влезе заедно со Исус во дворот на Првосвештеникот, ¹⁶ а Петар остана надвор, пред влезот. Тогаш другиот ученик, кој се познаваше со Првосвештеникот, излезе и откако зборуваше со вратарката, го внесе и Петар внатре.

¹⁷ А вратарката му рече на Петар: „Да не си и ти еден од учениците на Овој човек?“ „Не сум!“ - и одговори тој.

¹⁸ Беше студено, па слугите и гардистите стоеја околу огнот што го запалија и се грееја. И Петар дојде кај нив, за да се стопли.