Read the Gospels in 40 Days
Ne tatuka
4 Wan pejki tamachtia ukseujti itech ne at wan mutepewat sujsul miak inawak. Yajika yaja kalak tik se barcoj wan mutalij tik itajku ne at, wan muchi ne takamet wan siwatket nemiket ijpak tal iten ne at. 2 Wan kinhilwij ini casoj pal kinmachtia, wan kinmakak ini tamachtilis:
3 —Shinechkakikan: se takat kiski tatuka, 4 wan kwak nemituya tatuka wetzki se chiupi itech ne ujti, wan ajsiket tujtutut wan kikwajket. 5 Ukchiupi wetzki ijpak tejtet kan nemituya sujsul chiupi tal, wan waltakatki nemanha ika te kanaj wey tal, 6 wan kwak kiski ne tunal, kalatatak wan wajwakik nemanha ika teuk kipia inelwayu. 7 Wan ukse chiupi wetzki itzalan wijwitzti, wan ne wijwitzti weyaket wan kimalachujket, wan itakil te tamakak. 8 Wan seuk wetzki ijpak ne tal yek wan tamaka itakil wan weya wan tumakisa wan se kalwika senpual-majtakti, wan se yeshpual, wan se hasta sentzunti.
9 Wan ina:
—Ká kipia takakilis pal weli takaki, ma takaki!
10 Wan kwak nemituya isel, ne senyawit iwan, wan ne majtakti-ume, kitajtaniliat tay kineki ina, 11 wan kinhilwia:
—Anmejemet welit ankimatit ne ichtaka pal ne itatekimakalis ne Teut; ne nemit tatenpan semaya cajcasoj, 12 pal kiane kitat wan melka kitat ma te tachiakan, wan takakit wan melka takakit ma te kimatikan tay kineki ina, pal te muishkwepat pal mutapupulwiat.
13 Wan kinhilwij:
—Su te ankimatit ini, ken anyawit kimatit tay kinekit inat ne cajcasoj? 14 Ne tatuka kituka ne ipalabraj ne Teut. 15 Ini ne wetzi itech ne ujti, yaja kan mutuka ne palabraj wan kwak takakit, nemanha witz ne Tenewani wan kishtia ne palabraj ne mutukatuk ijtik yejemet. 16 Wan ini ne mutuka ijpak tejtet, yaja kwak pakit takakit ne palabraj wan melka kikwit nemanha, 17 te kipiat nelwat ijtik yejemet, wan semaya naka chiupi tunal; neman yejemet muejekuat wan muchiwa uij ipanpa ne palabraj wan nemanha mutekukujmatit. 18 Wan ne seuk mutuka itzalan ne wijwitzti, uni ne takakit ne palabraj, 19 wan kinkakasua ne taltikpak wan kinshijshikua ne tumin wan muchi tay kielewiat kimalachua ne palabraj, yajika te tamakat intakil. 20 Wan ne mutuka ijpak yek tal, yajuni ne takakit ne palabraj wan muyulkwesuat wan tamakat intakil sejse senpual-majtakti, sejse yeshpual wan sejse sentzunti.
21 Wan kinhilwij ka:
—Ne tawil te nemi pal tiktaliat itan se wajkal nian itan ne tapech sute ijpak ne tawilkal. 22 Ika te tatka nemi tzaktuk su te nemi pal muneshtia, nian muchiwki tatka minashtuk su te nemi pal muilwitia se tunal. 23 Su aka kipia takakilis pal weli takaki, ma takaki!
24 Wan kinhilwij:
—Shikitakan tay antakakit. Taiwan antatamachiwat yawit tatamachiwat anmupal wan kenhayuk yawit metzintaliliat. 25 Ika kimakasket ká ne kipiaya wan kishtilisket ká te kipia tay kipiatuya.
Ne ijish
26 Wan inak:
—Niaw nimetzinhilwia ken ne itatekimakalis ne Teut. Yaja ken se takat kitamuta tawial pak ne tal 27 wan kuchi wan muketza mujmusta, wan ne tawial takati wan weya te-kimati-ken: 28 achtu ne tal tamaka sakatzin, neman elut wan neman nakat ne ejelut tejtentuk wan sinti. 29 Kwak tami tamaka itakil, nemanha kitalilia ne imachej wan pewa tapishka.
30 Wan inak:
—Ken ne itatekimakalis ne Teut? Tay tinaskiat pal titaneshtiat ken yaja? 31 Ken se iish culantroj: kwak mutuka tik ne tal yaja ne chikitik pal muchi ne ijish, 32 wan kwak tami mutuka, pewa tejku wan muchiwa ne mas wey pal muchi ne sajsakat wan kishtia tujtumak majtzal kan welit mutaliat ne tujtutut itankupa.
33 Wan kinhilwij ne palabraj iwan miak casoj ijkiuni, ken weliket kikakit. 34 Kwak nemituya katka isel, kinneshtilia katka ne mumachtianimet muchi.
Ne tapayawi
35 Wan tik uni tunal kinhilwia kwak tayuakik:
—Tipanukan ka sentapal.
36 Wan kiajkawket ne miaktal, wan kiwikaket ken nemituya tik ne barcoj, wan nemituyat sejseuk barcoj iwan. 37 Wan kishpitza ejekat wey, wan pejki kimaka ne barcoj hasta mutema ne barcoj iwan at. 38 Wan yaja nemituya kuchi pak se kwajtetun ka ipan, wan kishatiat wan kilwiat:
—Tamachtiani, tay tikneki? Ma tipuliwikan?
39 Wan isak wan kiajwak ne ejekat, wan kilwij ne at:
—Shitzitzikaya, shitakaktuk!
Wan mukawki ne ejekat wan nejmachnemik. 40 Wan kinhilwij:
—Taika ansajsaytit? Teuk ankipiat tayulmatilis?
41 Wan majmawket wey, wan muilwiat katka:
—Tay ini? Hasta ne ejekat wan ne at kitakamatit!
Yeshu tapajtia tik Gerasa
5 Wan ajsiket sentapal ne at kan nemi ne tal pal Gerasa, 2 wan kwak yaja kiski tik ne barcoj, munamik iwan se takat nawalpiani ne kiski tik ne panteon; 3 yaja kipiatuya ne ikal itzalan ne shajshaput wan te welituya aka kilpia nian iwan tepusti, 4 ika kilpijketa seujseujti wan nusan kitepusilpijket, wan kitapana ne tejtepusti wan kikeluna ne ijilpika wan te aka welituya kichiwa tatka pal nejmachnemi, 5 wan tayua wan tunal panu katka ijtik ne pajpanteon wan ne tejtepet, wan semaya tzajtzi katka wan mutzunteki iwan tejtet. 6 Kwak nemiuk wejka kitak ne Yeshu: pejki mutalua, ajsik itech wan mutankwaketzki, 7 wan tzajtzik wey, ina:
—Tay tikneki nuwan, Yeshu Itelpuch ne Wejkapan Teut? Nimetztajtani tik itukay ne Teut ma te shinechchiwili uni tay nechkukua!
8 Ika yaja kilwijtuya:
—Shikisa itech ne takat, nawal teyek!
9 Wan kitajtanilia:
—Ken mutukay?
Wan kilwia:
—Nutukay Tzunti ika mijmiak tinemit.
10 Wan pejki mutajtawelia ma te kititani ne nawalmet wejka. 11 Se wey kuyantal mutakwaltia nemi pak ne tepet, 12 wan mutajtawelijket iwan, inat:
—Shitechtukti tikalakit tik ne inwejweyka uni kujkuyamet!
13 Wan kinhajkaw, wan walkisket ne nawalmet teyek wan kalakket itech ne kuyantal, wan muchi ne kujkuyamet kisket mutaluat hasta muustutaminket wan wetzket tik ne weyat, anka dos mil kuyamet, wan né atukiket muchi. 14 Wan chulujket ne tajpianimet wan yajket ka techan wan ka kojtan pal inat ken ijtuk, wan sekit yajket kitat tay panutuk, 15 wan ajsit itech Yeshu wan kitat ne nawalpia muetztuk iwan ikwajkwach wan itzuntekun yek. Yajaya ne kipiatuya ne Tzunti. Wan majmawket. 16 Wan ne kitztuyat kinneshtijket ken ijtuk iwan ne nawalpiani wan ne kujkuyamet, 17 wan pejket kitajtanit ma yawi ka senkak. 18 Wan kwak yaja kalaki tik ne barcoj, ne kipiatuya nawalmet pejki mutajtawelia ma kiajkawa ma naka iwan, 19 wan te kiajkaw, sute kilwia:
—Shu ka muchan iwan mukniwan, wan shina tay kichiwtuk Tutajwan muwan wan ken metzpalewki.
20 Wan yajki wan pejki tanajnawatia nujme ne Majtaktitechan tay kichiwilij ne Yeshu, wan muchi ishpuyawit katka.
Ne isiwapil Yair wan se siwat eskisa
21 Wan kwak ne Yeshu mukwepki sentapal ne at tik ne barcoj, kinamikket miak ká musentepewtiwit kan yaja nemituya iten ne at. 22 Wan witz se ne tatuktianimet pal ne Sennemit, itukay Yair, wan kwak kitak mutamutak itech ne ijikshi 23 wan sujsul mutajtawelia, ina:
—Ne nusiwapiltzin yawi miki. Shiwi shiktali ijpak ne mujmumey pal mupajtia, pal te miki!
24 Wan yajki iwan, wan miak kimalachujket yajket ka iipan. 25 Wan se siwat kipiatuya majtakti-ume shiwit ka eskisa 26 wan miak tapajtiani kishijshikujtuyat, kitzunpulujtuk muchi itumin wan te kipalewket, mas yek kichiwket ka yaja mas kukuya. 27 Wan yaja takaktuk ká yaja wan tzinkiski iteputzta ne Yeshu wan kimatukak ne ikwajkwach, 28 ika inak tik iyulu, "Su niweli nikmatuka ne ikwajkwach, niaw niyektia". 29 Wan nemanha muketzki ne iesyu, tea eskiski wan ne siwat kimatki tik iweyka ka mupajtij ne ikukulisyu. 30 Wan Yeshu nemanha mumatki kisa ne itajpal itech iweyka, wan muishkwepki tachia wan ina:
—Ká kimatukak ne nukwajkwach?
31 Wan ne mumachtianimet kilwiat:
—Tikita keski nemit metzmalachuat, wan kenhayuk titajtani "Ká nechmatukak?"
32 Wan yaja nakak tachia wan kitak ká ne kichiwki, 33 wan ne siwat pejki ijtzilika iwan mawi ika kimati tay kichiwtuk, wan yajki mutamuta talchi iishpan, wan kilwij ne tejkia. 34 Yeshu kilwij:
—Siwat, ne mutayulmatilis metzpalewtuk. Shiawa wan shinemi yek! Tamik ne mukukulisyu.
35 Kwak taketzayuk, ajsit sejse pal ichan ne tatuktiani ipal ne sennemit, wan inat:
—Ne musiwakunew mikik. Taika tiaw tikakasua ne tamachtiani?
36 Ne Yeshu te kinchiwilij casoj wan kilwij ne sennemituktiani:
—Maka shimajmawi, sema shitayulmati.
37 Wan te kiajkaw ma wiki iwan aka, semaya Pedro, Yakob wan Yojan ne iikaw Yakob, 38 wan ajsit ichan ne sennemituktiani wan kita wey kumunilis wan muchi chukat wan mutajtaweliat, 39 wan yaja kalaki wan kinhilwia:
—Ken ka anmukumuntiat wan anchukat? Te mikik ini chikitik, semaya kuchi.
40 Yejemet ajkawetzkat, wan yaja kinhishtij muchi. Kalkwij ne iteku wan ne inan ne kunet wan ne senyawit iwan yajasan, wan panu kalijtik kan nemituya ne kunet, 41 wan kipachuj ne imey ne kunet wan kilwia:
—Talita, kum!
Kineki ina: Siwapiltzin, shimuketza! 42 Wan muketzki ne siwapiltzin nemanha wan pejki nejnemi, ika kipiaya majtakti-ume shiwit; wan tetekia sea ishpuyawket. 43 Wan kintuktij ka te aka nemi pal kimati ini; wan kinhilwij ma kimakakan takwal ne siwapil.
Tay panuk kwak ajsik itechan
6 Wan kiski. Wan ajsi ne techan kan nesik, wan ne mumachtianimet iwan. 2 Wan uni sewilis pejki tamachtia tik ne kalsennemit. Wan ishpuyawit miak pal ne kikakit nemit, inat:
—Kanka walajtuk muchi ini? Wan tay ini tamatilis kipia, wan ini itajpal tik imejmey? 3 Su yajini ne carpinteroj! Ne ipiltzin Maryam! Wan yaja ne inmanuj Yakob wan Yose wan Yuda wan Shimon! Su ne ieltiwan nusan nikan nemit tutzalan!
Wan mutekukujmatket. 4 Wan ne Yeshu kinhilwij:
—Nujme kitat yek se taketzani, san nepa itechan se, itzalan ne ikniwan wan ichan se inte muita yek!
5 Wan te welik kichiwa itajpal ikuni, semaya kitalij ijimey ijpak ankakeski kukuyani wan kinpajtij. 6 Wan ishpuyawi katka ika te kipiatuyat tayulmatilis.
Ne majtakti-ume titanijtuk
Wan pashalua nemi katka tik ne tejtechan ka nepa tamachtia. 7 Wan kalinnutza ne majtakti-ume, wan pejki kintitania ujume-ujume, wan kinmakak tatuktilis ijpak nawalmet teyek. 8 Wan kintuktij ma te kiwikakan tatka tik ne ujti, semaya se intupil:
—Nian anmutamal, nian anmutanaj, nian tumin tik anmucinchoj, 9 isel ne kakti tik anmujmukshi, wan maka shikpiakan ume wipil.
10 Wan kinhilwia:
—Nujme kan ankalakit tik se kal, ikuni shinemikan hasta ma shikisakan ka ikuni, 11 wan kan ne inte kinekit metzinkwit yek nian metzinkakit, kwak ankisat ka ikuni shiktzejtzelukan ne tewti itan anmujmukshi pal ankikinakat.
12 Wan kisket tanajnawatiat ma muchi muyulpatakan. 13 Wan kishtiat katka miak nawal, wan kimawaltiat katka miak kukuyani iwan tumakka wan tapajtijket yajket.
Ne mikilis ipal Yojan ne teulyujmaka
14 Wan ne tatuktiani Herodes takakik ika nujme taketzat katka ipanpa Yeshu, wan inat katka ka: "Yojan ne teulyujmaka miktuk wan muyulkweptuk, yajika yajini weli kichiwa tay tetekia wey." 15 Inat katka sekit ka yaja Eliya, wan sekit ka yaja se taketzani ken ne taketzanimet pal ikman. 16 Kwak takakik ne Herodes yaja inak:
—Yajuni ne Yojan, yajasan ká nikechkutun. Muyulkwepkia!
17 Ika ini Herodes kituktij ma kitzkikan ne Yojan wan kilpijtuya ijtik ne tatzakwiluyan ka imaku Herodia, ne isiwaw Pilipo iikaw, ika munamiktij iwan; 18 ika kilwij Herodes:
—Te nemi yek ma shikpia ne isiwaw ne muikaw.
19 Kwalanik ne Herodia wan kinekituya kimiktia wan te welituya, 20 ika Herodes majmawi ika kimati ka Yojan se takat ipal Teut ne sema kichiwa tay yek, wan kipalewia, wan sujsul paki takaki tay yaja taketza katka.
21 Wan ajsik ne tunal pal kichiwa tay kinekituya kwak Herodes kinnutzki ne wejweymet wan ne miaktuktianimet wan ne ajachtu pal Galilaya ma wikikan wan kichijki se yualu pal ne iilwiw, 22 wan kalak ne isiwapil Herodia mijtutia tatajku, wan ne Herodes kielewij ne siwapil, wan ne musentalijtiwit nusan. Kilwij ne siwapil:
—Shinechtajtani tay tiknekiskia, wan yaja niaw nimetzmaka.
23 Kichiwki jurar:
—Nimetzmakas tay tinechtajtani hasta su tinechtajtani se tajku pal muchi tay nitatuktia.
24 Yajki kitajtanilia ne inan tay kitajtaniskia. Wan ne inan inak:
—Ne itzuntekun Yojan ne teulyujmaka.
25 Wan yaja ijisiwki mukwepa wan kitajtan ne tatuktiani:
—Nikneki ma shinechmaka ne itzuntekun Yojan ne teulyujmaka pak se kashit!
26 Wan melka ne tatuktiani kikukua iyulu, te welik kilwia ne siwapil ka te ipanpa tay inatuya wan ipanpa ne sentakwanimet, 27 wan ijisiwki kituktia ne verdugoj ma kalwika ne itzuntekun Yojan wan yajki kikechkutuna kan nemituya tzaktuk, 28 wan kalwikak ne itzuntekun ijpak se kashit wan kitakulij ne siwapil, wan ne siwapil kimakak ne inan. 29 Wan kwak ne mumachtianimet takakket, ajsiket kianat ne mikini wan kitalpachujket.
Yeshu kitakwaltia ne miaktal
30 Wan ne tijtitanijtuk walmusentepewat itech Yeshu wan kilwijket muchi tay kichiwtiwit wan tay tamachtijtiwit, 31 wan yaja kinhilwia:
—Shiwikikan ka kojtan anmusel pal anmusewiat chiupi.
Ika mijmiak ne witzet wan yawit, hasta nian welituyat takwat.
32 Wan yajket ka inkwaj ijtik se barcoj kanka te kanaj tatka. 33 Wan miak kinhitaket ajkewit wan kishmatket, wan kisket ikshipan tik muchi ne tejtechan pal musenputzuat ikuni kan yejemet nemituyat. 34 Wan yaja kiski wan kitak sujsul wey takat wan siwat wan kikukuj iyulu inpanpa ika yejemet ken tajtakwalmet te kipiat aka pal kintajpia, wan pejki kinmachtia wan tamachtij miak horaj. 35 Wan ka teutak ne mumachtianimet ajsiket itech inat ka te nemituya tatka ka né wan teutaka.
36 —Shikinhajkawa yawit tik ne tejtechan nikansan pal kikuat tay munekit pal takwat.
37 Yaja kinhilwij:
—Shikintakwaltikan anmejemet!
Wan kilwiat:
—Tikneki ma tiawit tikuat tajtamal pal tikinmakat pal kikwat? Muneki ume tzunti tumin.
38 Yaja kinhilwia:
—Keski tamal ankipiat? Shumet shitachiakan.
Wan kwak kitztiwita, inat:
—Makwil, wan ume michin.
39 Wan kintuktij ma mutalikan wan ma kichiwakan tejtepewa ijpak ne shushuik sakat, 40 wan mutalijket ken ne sinti tik ne mil, tik tejtepewa pal sentzunti wan pal unpual-majtakti. 41 Wan kikwij ne makwil tamal wan ne ume michin wan ajkutachiak ka ikajku, wan kiteuchiwki, wan kipitzakuj ne tajtamal wan kinmajmakak ne mumachtianimet ma kintalilikan muchi, wan ijkiasan iwan ne mijmichin wan kinmajmakak muchi. 42 Wan takwajket muchi wan ishwiket. 43 Wan iwan ne pusul ne kianket mutenket majtakti-ume chikiwit wan iwan ne michin. 44 Wan nemiket cinco mil takat ne sentakwajtiwit.
Yeshu nejnemi ijpak ne at
45 Wan nemanha yaja kichiwki ka kalakit ne mumachtianimet tik ne barcoj wan ka yawit ka sentapal iishpan Bet-Tzaida, wan yaja nakak kan nemituya hasta yawit ne takamet wan siwatket. 46 Wan kwak yajketa, yaja kalak ijtik ne tepet kinujnutza ne Teut. 47 Wan kwak tayuakik, ne barcoj nemituya tik itajku ne at wan yaja nemik isel ijpak tal, 48 wan kitak ka yejemet mukumuntiat kishtupewat ne barcoj ika tapitza nemi ne ejekat ka iishpan, wan nemituyat anka majtakti horaj ne tayua, wan yaja nejnenki walaj hasta kan nemituyat ijpak ne at, wan achka yawi panu ishpan yejemet! 49 Kwak kitaket nejnemi ijpak ne at, inaket:
"Uni witz se tukujkul!"
wan pejket tzajtzit, 50 ika kwak kitaket mukakasujket muchi. Yaja kinnutzki wan kinhilwij:
—Maka shiyujyulkakasiwikan! Naja né! Maka shimajmawikan!
51 Wan tejkuk ijpak ne barcoj, wan mukawki ne ejekat, wan yejemet pejket sujsul ishpuyawit 52 ika te kishkejketzket tay panutuya iwan ne tajtamal, wan takwawayatiwit ne inyujyulu.
Tapajtia tik Genesaret
53 Wan panuket sentapal wan ajsiket ne tal itukay Genesaret wan nakaket iten ne at, 54 wan kwak kisket tik ne barcoj kishmatket, 55 wan ijisiwket nujme uni tal kalsajsakat ne kukuyat ijpak tajtapech pal ajsit kanka takakit ka yaja nemituya. 56 Wan kan yaja yawi tik techan wan tik kojtan, kitaliat katka ne kukuyat ijtik ne tiajtiankis wan kitajtanket pal kichijchimit melka semaya ne iten ne ikwajkwach, wan muchi ká kichijchinket mupajtijket.
Ne Bibliaj Tik Nawat · © 2008, 2012 Jan Morrow