Read the Gospels in 40 Days
Muchi ini yawi tami
13 Wan kwak kisa tik ne teupan, se pal ne mumachtianimet kilwij:
—Tamachtiani! Shikita ini tejtet galantzin! Shikita ini kajkal!
2 Wan ne Yeshu kilwij:
—Tikita uni kajkal hombron? Inte yawi mukawa nian se tet ijpak seuk ne inte mutajkali.
3 Wan yaja mutalij ijpak ne Olivajtepet imelawka ne teupan, wan ajsiket Pedro wan Yakob wan Yojan wan Andreas ka inkwaj kitajtanit:
4 —Shitechilwi keman yawi panu uni wan ken yawi muishmati ka yawia tami muchi ini?
5 Ne Yeshu pejki kinhilwia:
—Cuidadoj ma inte metzinshijshikukan. 6 Miak walasket tik nutukay inat: "Naja ne!" wan miak yawit mushijshikuat. 7 Kwak antakakit ka musumat nujme ne talmet, maka shimajmawikan; melka nemi pal muchiwa, muchi inteuk tamis. 8 Ika yawit musumat itzalan ne tejtechan wan itzalan ne talmet, yawi ulini nujme wan yawit mayanat. Yaja kwak pewas wey takukulis kenha ken kwak yawia puni se.
9 Shiktalikan cuidadoj! Tik ne kajkalpuli yawit metzintemakat, wan tik ne kajkalsennemit yawit metzinwitekit, wan yawit metzinwikat ishpan tatuktianimet nupanpa pal kiane mumati tay kichijtiwit. 10 Wan achtu nemi pal munajnawatia ne yeknawatilis tik muchi ne tejtechan.
11 Wan keman metzinwikat pal metzintemakat, maka shiyujyulkakasiwikan ipanpa tay anyawit inat, semaya shinakan muchi tay tik uni horaj ankimatit, ika inte anmejemet ne taketzat asunte ne Ijiutzin. 12 Wan ne se yawi temaka ne iikaw pal kimiktiat, wan ne seuk ne iteku ijkiasan; wan tepilawan kintejtenewasket tetekuwan wan kinmiktisket. 13 Wan yawit metzinhishijiat ipanpa nutukay. Ká ne kiselia muchi ini hasta ma tami, yawi mupalewia.
14 Kwak ankitat ken nujme muwilewa sujsul ejkatuk kan te nemi pal nemi (ká amatachia ma kimati tay ini kineki ina), kwakuni ká nemit tik Yudaya ma chulukan ka tepet; 15 ká nemi pak itzunpan ne ikal ma inte kutemu kalaki kalijtik kikwi tatka; 16 wan ká nemi tik ne kojtan ma inte mukwepa ka ichan pal kalkwi ne ikwajkwach! 17 Tik uni tujtunal, ay pobrejchichin ne wejweyijti wan ne tachichit! 18 Shiktajtanikan ne Teut ma inte muchiwa tik ne shupan, 19 ika yawi sea uij tik uni tujtunal: kwak tamik ne Teut kichiwa muchi hasta ashan inte keman muitztuk tatka kenha, 20 wan asu Tutajwan inte kikutunaskia ne tujtunal, inte mupalewiskia iweyka nian se; wan semaya kikutunki ne tujtunal ipanpa ne ijishpejpentuk ne kinhishpejpen.
21 Wan kwakuni asu aka metzinhilwia: "Shikita, nikan nemi ne Mawaltijtuk!" "Shikita, uni nemi!" maka shumet shitayulmatikan, 22 ika muketzasket sejse ká inat ka yejemet ne Mawaltijtuk wan tashijshikuat, wan tamakasket sejse pal mumati ka tejkia pal kiane, asu weli, ma kipulukan ne ujti ne muishpejpentiwit. 23 Shitachiakan, nimetzinhilwijtuka!
24 Kwak tamit uni tujtunal sujsul uij, ne tunal yawi kunyuakisa wan tea yawi tajtawia ne metzti, 25 wan yawit kuwetzit talchi ne sitalmet, wan ne itajtajpal ipal ne ilwikak mutzejtzelusket. 26 Wan kwakuni yawit kitat witz ne Itelpuch ne Takat ijpak mijmishti iwan itajpal wey wan tzitzinaka. 27 Wan kwakuni yaja yawi kintuktia ne itajtanawatiani, wan yawi kinsenputzua ne ijishpejpentuk pal nujme ne taltikpak itzun ne tal wan hasta itzun ne ilwikak.
28 Shimumachtikan tay techmachtia ne casoj pal ini kwawit: kwak ne imajtzal nemiuk selek wan pewat takatit ijiswayu, ankimatit ka witzaya ne shupan. 29 Kenhaya, kwak ankitat ka muchi tay ninatuk muchiwa, shikmatikan ka uni witzaya; nemia tik ne tenkal! 30 Kia nimetzinhilwia: inte yasnekit itan tal ne takamet pal ashan hasta ma muchiwa muchi uni. 31 Ne ilwikak wan ne tal san panusket, wan ini tay nina inte yawi panu! 32 Inte kimati aka keman yawi ajsi uni tunal wan horaj: nian ne tanawatianimet ka ikajku, nian ne Itelpuch, semaya ne Teteku.
33 Shitachiakan, maka shikuchikan, ika te ankimatit keman ne horaj. 34 Yaja ken se takat kiajkawa ne ikal pal yawi pashalua wejka, wan kinhajkawilia ne itejtekitini, wan sejse kipia ne itekiw, wan kituktia ne tajpiani pal ne tenkal kishpelwia.
35 Shitaishpelwikan tel, ika inte ankimatit keman yawi witz ne itekuyu ne kal: ka teutak, ka tajkuyua, o kwak tatwi wan takwikaya ne ukichtijlan; 36 maka shikajkawakan ma ajsi kwak ankuchit! 37 Tay nimetzinhilwia, nimetzinhilwia muchi: shitaishpelwikan!
Musenputzujket pal kitat ken welit kimiktiat Yeshu
14 Kwak kinekiuk ume tunal pal ne ilwit itukay Paskwaj kan te mukwa ne tay kipia shukutishti, ne weypalejmet wan ne tajkwiluanimet tatejtemuat katka ken welituyat kichiwat pal kishijshikuat Yeshu pal kitzkiat wan kimiktiat, 2 ika inat katka:
—Inte tik ne ilwit, ma inte mukumunti ne techan.
Se siwat kimaka pajtipuputuka
3 Wan kwak yaja nemituya tik Bet-Anya, ichan Shimon ne shinpiani, kan takwa ajsik se siwat kipiatuya se botellaj iwan ushit yek sujsul wey ipatiw, wan kitapan wan kikushinij ijpak ne itzuntekun. 4 Sejse kwalanket, inat tik inyujyulu:
"Taipal ankinekit kitzunpuluat ijkiuni ne ushit? 5 Ini ushit weliskia munamaka tik ne tiankis ka mas que yey tzunti tumin wan welit tikinmakat ne munekit!"
Yeshu kiajajwaket. 6 Inak:
—Shikajkawakan! Taika ankijilwiat? Nemi yek tay kichiwki nupal, 7 ika senpa ankipiasket anmuwan sejse ká munekit; welit ankipalewiat kwak ankinekit. Naja inte, te annechpiasket senpa. 8 Yaja kichiwki tay welik: walaj peyna kitalilia pajtipuputuka ne nuweyka pal kiekchiwa pal kitalpachuat. 9 Kia nimetzinhilwia: nujme kan yawi munajnawatia ne yeknawatilis tik ne taltikpak, yawit taketzat ipanpa tay kichiwki ini siwat pal muelnamiki.
Yuda Ishkaryot
10 Yuda Ishkaryot, se pal ne majtakti-ume, yajki itech ne weypalejmet pal temaka. 11 Kwak takakket pakiket wan inaket ka yawit kimakat tumin. Wan pejki tatejtemua ne horaj yek pal temaka.
Ne tipan Paskwaj
12 Wan tik ne achtu tunal pal ne ilwit kwak te mukwa shukutishti wan mumiktia katka ne ichkakunet ipal Paskwaj, ne mumachtianimet kilwijket:
—Kan tikneki ma titaekchiwakan pal tikwa ne Paskwaj?
13 Wan yaja kituktia ume pal ne mumachtianimet wan kinhilwia:
—Shumet ne techan wan yawi metzinnamiki se takat kisajsaka se tzutzukul iwan at. Shumet iwan, 14 wan kan ne kalaki shikilwikan ne itekuyu ne kal ka ne tamachtiani ina:
"Kan nemi ne takutun ipal ne kal kan ne niaw nikwa ne Paskwaj iwan ne numujmumachtiani?"
15 Wan yajuni yawi metzinhilwitia se wey ka ikajku ajshitijtuk, shikekchiwakan ikuni tupal.
16 Wan kisket ne mumachtianimet wan yajket ne techan wan kiajsiket ken yaja kinhilwij, wan kiekchiwket ne Paskwaj.
17 Wan kwak tayuakik walaj iwan ne majtakti-ume, 18 wan kwak musentalijket wan nemituyat takwat, ne Yeshu inak:
—Kia nimetzinhilwia: se anmejemet yawi nechtemaka, wan ashan sentakwa nuwan.
19 Pejket mutechtiat. Se wan ukse pejket kitajtanit:
—Naja ne?
20 Yaja kinhilwij:
—Yaja se pal ne majtakti-ume ne tajwilia nemi nuwan tik ne yayu! 21 Ika tejkia ka yawia ne Itelpuch ne Takat, ijkiunisan ken nemi ijkwilujtuk. Melka uni, ay! uni takat ká temaka ne Itelpuch ne Takat! Mas yek su te nestuskia yajuni!
22 Wan kwak nemituyat takwat, kikwij se tamal wan kiteuchiwki wan kipitzakuj wan kinmakak wan inak:
—Shikwikan: ini ne nuweyka.
23 Wan kikwij se atiluni wan inak panpadiush wan kinmakak, wan muchi atiket, 24 wan kinhilwij:
—Ini ne nuesyu ipal ne sentaketzat, ne mushinia pal muchi. 25 Kia nimetzinhilwia: intea niaw nikuni iayu shukumekat senpa hasta ma nikuni ne yankwik tik uni tunal ijtik ne itatekimakalis ne Teut.
26 Wan takwikaket, wan mukwepket Olivajtepet.
Gat-Shemani
27 Wan ne Yeshu kinhilwia:
—Muchi anmejemet yawit mutekukujmatit, ika nemi tajkwilujtuk:
Nikchalus ne tajpiani wan ne takwalmet musentalusket.
28 Kwak tami nimuyulkwi, niasneki Galilaya anmuishpan.
29 Ne Pedro kilwij:
—Melka mutekukujmatit muchi, naja inte!
30 Wan ne Yeshu kilwia:
—Kia nimetzilwia ka taja ashan tayua, achtu ka takwika ukpa ne ukichtijlan, tiaw tina yeshpa ka inte tinechishmati.
31 Yaja ina katka uksenpa:
—Melka nemi pal nimiki muwan tesu niaw nina ka te ninemi muwan!
Wan muchi yejemet nusan inaket kenha.
32 Wan yajket hasta kan itukay Gat-Shemani, wan kinhilwia ne mumachtianimet:
—Shimutalikan ka nikan. Naja niaw niknutza ne Teut.
33 Wan kikwij iwan Pedro wan Yakob wan Yojan, wan pejki ishpuyawi wan tajselia, 34 wan kinhilwia:
—Nechkukua nualmaj hasta nimiki. Shinakakan nikansan taishpelwiat.
35 Wan yajki achi iishpan wan wetzki talchi kinutza ne Teut pal kitajtani ma te kiseli uni horaj su weli muishtilia, 36 ina:
—Nutata, taja tinuteku wan tiweli muchi, shinechishtili ini atiluni. Melka uni, inte ken naja nikneki asunte ken taja tina.
37 Wan ajsi wan kita ka kuchit. Wan kilwia ne Pedro:
—Shimon, tikuchi? Inte welik tinaka tikishpelwia nian se horaj? 38 Shikishpelwikan wan shiktajtanikan ne Teut ma inte shikalakikan ijtik taejekulis. Melka kineki ne tuyulu, ne tuweyka inte weli.
39 Wan yajki senpa wan tanutzki kenha. 40 Wan mukwepki wan kitak senpa ka kuchit ika ne inhijish etekistiwit wan te kimatit tay nankiliskiat. 41 Yajki wan walaj senpa wan kinhilwia:
—Shikuchikan tel wan shimusewikan. Ajsik ne horaj! Yawia mutemaka ne Itelpuch ne Takat tik ijimey ne tateyekchiwat! 42 Shimuketzakan, tiawita! Nemia nikan ne nechtemaka!
43 Wan nemanha, kwak yaja nemituya taketza, walaj Yuda, ne se pal ne majtakti-ume, wan miak walajket iwan kiwikat majmachej wan kwajkwawit itzalan ne weypalejmet wan ne tajkwiluanimet wan ne nojnoymet. 44 Kinmakatuya yajuni ká temaka se pal mumati, inatuya:
—Ká ne niaw niktennamiki, yaja ne, shikitzkikan wan shikwikakan tzaktuk.
45 Wan walaj wan nemanha ajsik itech wan kilwia:
—Tajtzin!
Wan kitejtennamik. 46 Kitzkijket tik inmejmey wan kikwijket. 47 Se pal ne nemituyat ka né kiajkewki iespadaj wan kichaluj ne itekitini ne weypalej wan kikutun ne inakas. 48 Wan ne Yeshu kinhilwij:
—Anwalkisket nechitzkiat ken ankikwit se techteki, iwan majmachej wan kwajkwawit? 49 Ninentuk anmuwan mujmusta nitamachtia ka teupan, wan te anwalajket annechkwit! Nemi pal yekawi tay nemi ijkwilujtuk.
50 Wan muchi kiajkawket wan chulujket. 51 Wan senyawi katka iwan se takapiltzin kiwika semaya se ikwenyu; 52 kiajkawilij ne ikwenyu wan yaja chuluj petznaj.
Yeshu ilpituk
53 Wan kiwikaket ne Yeshu itech ne weypalej, wan musentepewat muchi ne weypalejmet wan ne noymet wan ne tajkwiluanimet ka né. 54 Wan Pedro yajki iipan wan nejnenki wejka hasta ichan ne weypalej, wan mutalij tik ne tenkal kan nemituyat ne tekitinimet mututuniat tentit.
55 Ne weypalejmet wan muchi ne kalpuli tatejtemuat katka pal kiajsit ká inaskia tay kichiwtuk ne Yeshu pal welit kimiktiat, wan te kiajsit tatka, 56 ika miak inat katka ka muchiwki tay te muchiwki, wan tay ina katka ne se te kenha ken tay ina ne seuk. 57 Wan muketzket sejse sankataketzat, inat:
58 —Tejemet tikakket ina: "Ne ijimey sejse kichiwket ini teupan wan naja niaw niktajkali wan ijtik yey tunal niaw niketza ukseuk sin que nikwi nujnumey."
59 Wan nian ijkiuni kenha katka tay inatuya ne se wan ne seuk ipanpa. 60 Wan ne weypalej muketzki tatajku wan kitajtanilij Yeshu:
—Tesu tina tatka? Tay ini yejemet inat ka tikchiwki?
61 Yaja nemik takaktuk wan te inak tatka, wan ne weypalej kitajtanilij senpa:
—Taja ne Mawaltijtuk, ne itelpuch ne Yektenejtuk?
62 Yeshu inak:
—Naja ne, wan san ankitasket ne Itelpuch ne Takat muetztuk ka imayekkan ne Weli Wey walejku pak ne mijmishti ipal ne ilwikak.
63 Ne weypalej kitapanki ne iwipil, wan ina:
—Intea muneki ma aka ina tatka! 64 Ankikakket tay kukujtaketzki. Tay anhinat?
Wan muchi inaket ma kimiktikan. 65 Wan sejse pejket tachijchat ijpak, wan kishtzakwat iwan se kwachti wan pejket kimakat, wan kilwiat:
—Shitanutza ken se taketzani!
Wan ne tekitinimet kichalujket iwan inmajmatashkal.
Pedro ina ka inte kishmati
66 Wan ajsi se pal ne siwapipil ne tekitit tik ne ikal ne weypalej kan nakak Pedro tik ne tenkal, 67 wan kitak ne Pedro mututunia tentit, tachiak wan ina:
—Taja nusan tinemik iwan Yeshu pal Nazaret!
68 Yaja inak:
—Tesu! Te nikishmati, wan te nikmati tay tina!
Wan kiski ne tenkal, 69 wan ne siwapil kitak wan pejki kinhilwia ne nemituyat inawak senpa:
—Uni se pal yejemet!
70 Ne Pedro ina senpa ka tesu. Panuk chiupichin wan ne nemituyat inawak kilwijket ne Pedro senpa:
—Ijkia, taja se pal yejemet, ika nusan tiwitz Galilaya!
71 Yaja pejki kichiwa maldictar wan kichiwa jurar ka:
—Te nikishmati ini takat ká anhinat.
72 Wan nemanha takwikak ne ukichtijlan ukpa, wan Pedro kielnamik tay kilwijtuya ne Yeshu:
"Achtu ka takwika ukpa ne ukichtijlan, tiaw tina yeshpa ka inte tinechishmati."
Kishketzki wan pejki chuka.
Ne Bibliaj Tik Nawat · © 2008, 2012 Jan Morrow