Read the Gospels in 40 Days
Sejseuk tay inak
7 (Wan Yeshu inak:)
—Maka shiktenewakan aka ipanpa tay kichijtuk, ma inte aka yawi metzintenewa! 2 Ika kenha ken ankichiwat juzgar, ijkiunisan yawit metzinchiwat juzgar, wan taiwan antatamachiwat yawit tatamachiwat anmupal. 3 Ken ka tikita ne sakatzin tik ne iish ne muiknew? Wan ne taketzal nemi tik ne muish inte tikita? 4 Wan ken tiaw tikilwia ne muiknew: "Shikajkawa ma nikishti ne sakatzin ijtik muish," wan shikita ne taketzal tikpia tik ne muish! 5 Tensasal! Shikishti achtu ne taketzal tik ne muish; wan kwakuni tiaw titachia yek pal weli tikishtia ne sakatzin nemi tik ne iish ne muiknew!
6 Maka shumet shikintakulikan ne pejpelumet tay ipal Teut, nian shikintamutilikan kujkusti ne kujkuyamet, su inte ankinekit ma kipachanakan iwan ne inhijikshi wan ma muishkwepakan pal metzintapanat.
7 Shitajtanikan wan metzinmakasket; shitatemukan wan ankiajsisket; shitatujtunwikan wan kitapusket ne tenkal. 8 Ika muchi ká tajtanit kikwit, wan muchi ká taishtemuat kiajsit, wan pal muchi ká tatujtunwiat yawi mutentapua. 9 Katiawel ne takat, su ne anmukunew kitajtani tamal, kimakaskiat se tet, 10 wan su ne anmukunew metzintajtanilia se michin, kimakaskiat se kuat? 11 Yajika, su anmejemet ká inte yejyek kinmakat ne anmupilawan tay yek, keski mas Anmuteku ka ikajku yawi kinmaka tay yek muchi ne kitajtaniliat.
12 Yajika, muchi tay ankielewiat ma metzinchiwilikan, shikinchiwakan ijkiuni anmejemetsan, ika yaja tay ina ne tajtuli wan ne taketzanimet.
13 Shikalakikan tik ne uchulnaj tentzakka; ika kuyawak ne tentzakka wan patawak ne ujti techwika hasta ne puliwis, wan miak ne kalakit! 14 Uchulnaj ne tentzakka wan uij ne ujti techwika kanka welit tiyujyultuk, wan sujsul chiujchiupi ne welit ajsit!
15 Shiktalikan cuidadoj inwan ne tashijshikuanimet walejkut anmutech tajtakentijtuk iwan ikwetashyu masat, melka kalijtik yejemet kuyumet ne muishtemuat pal metzinhitzkiat. 16 Ipanpa intajtakil ankinhishmatisket: itech ne witzkilit inte mululuat shujshukut nian itech ne witztumat tzajtzaput. 17 Ijkiuni, ne yek kwawit yejyek itakil tamaka; ne kwawit inte tatka ipatiw itajtakil inte tamaka yejyek. 18 Inte weli tamaka se yek kwawit itajtakil inte yejyek; nusan se kwawit inte yek inte weli tamaka yejyek itakil. 19 Ne kwawit ne inte tamaka itakil yek mutzinewa wan mutamuta tik tit. 20 Neka nina ka ipanpa intajtakil anyawit ankinhishmatit.
21 Te muchi ká nechilwiat "tajtzin, tajtzin!" yawit kalakit tik ne tatekimakalis ipal ne ilwikak asunte semaya ne kichiwat tay kielewia ne Nuteku ka ikajku. 22 Miak yawit nechilwiat tik uni tunal: "Tajtzin tajtzin shikita! Titamachtijket tik mutukay, wan tik mutukay tiktajkalket najnawal inteyek, wan tik mutukay tikchijket miak wejwey!" 23 wan niaw nikinhilwia: "Inte nimetzinhishmati! Shinechajkawakan, tekitinimet pal inteyek!"
24 Yajika tel, ká kikaki ini pajpalabraj wan kichiwa ken nina, ninaskia ka yaja ken se kimati yek ne kiketzki ne ikal ijpak ne tesual, 25 wan chachapakak ne shupan wan walaj ne tepeat wan kishpitzki ne ejekat wan kiwitek uni kal wan te walkuwetzki ika kipia itetzilnaj ijpak tesual. 26 Wan ká kikaki ini pajpalabraj wan te kichiwa tatka, ninaskia ka yaja muchiwas ken ne mele ne kiketzki ne ikal ijpak ne ashal, 27 wan chachapakak ne shupan wan walaj ne tepeat wan kishpitzki ne ejekat wan kitaski uni kal wan walkuwetzki wan wilewik muchi.
28 Wan kwak Yeshu tamik taketza, ne miaktal ishpuyawik ipanpa itamachtilis, 29 ika tamachtia katka ken tatuktiskia, tesu ken ne tajkwiluanimet.
Kipajtij se shinpiani
8 Kwakuni waltemuk ne tapetat wan miak senyajket iwan, 2 wan né nemik se kukuya kipia shinyu ká ajsik mutankwaketza wan ina:
—Tajtzin, asu tikneki weli tinechpajtia.
3 Wan kimelawki ne imey wan kimatukak wan ina:
—Nikneki. Shimupajti.
Wan mupajtija nemanha ne ishinyu. 4 Wan ne Yeshu kilwij:
—Maka shikilwi aka, sema shiawa shikilwitili ne palej wan shiktakuli ne mutetakulis ken tatuktij Moshe, ma kitakan.
Ne sentzuntuktiani iwan se ipiltzin kukuya
5 Kwak ajsik Kaparnajum, se sentzuntuktiani ajsik itech mutajtawelia, 6 ina:
—Tajtzin, ne nupiltzin mutekatuk ka nuchan te weli mijkwani wan kikukua tetekia sea.
7 Wan ina:
—Niasneki nikpajtia?
8 Wan ne sentzuntuktiani nankilij:
—Tajtzin, naja inte nitatka pal tikalaki ijtik ne nukal; sema shina se mupalabraj wan mupajtis ne piltzin. 9 Ika naja nusan nitakat tuktijtuk, wan nikpia ka nuitan tasumanimet, wan naja nikilwia ne se:
"Shu!"
wan yaja yawi, ne seuk:
"Shiwi!"
wan yaja witz, wan ne nutekitini:
"Shikchiwa!"
wan yaja kichiwa.
10 Yeshu kikakik wan ishpuyawik, wan kinhilwij ne iwan senyawit:
—Kia nimetzinhilwia ka tayulmatilis ken ini inte nikajsik itech aka pal ne tukniwan ipal Israel! 11 Nimetzinhilwia ka miak walasket ka nujme ne tal, wan musentalisket iwan Abraham wan Itzak wan Yakob tik ne tatekimakalis ipal ne ilwikak; 12 saman yawit kinhishtiat ne ipilawan ne tatekimakalis, kintamutasket ka tatenpan kan kunyua wan né kinhajkawasket, wan ikuni yawit chukat, yawit tzalanit intajtan.
13 Wan Yeshu kilwij ne sentzuntuktiani:
—Shiawa. Ika titayulmatki, muchijtuk.
Wan mupajtij ne piltzin tik uni horaj.
Ne inan ne isiwaw Pedro
14 Wan Yeshu kalak ichan Pedro, wan kitak ne inan ne isiwaw wetztuk iwan tutunkayu, 15 wan kimatukak ne imey wan kishtilij ne tutunka wan ne siwat kitakwaltij.
16 Kwak tayuakik kalinwikaket miak nawalpiat wan yaja taketzki wan kinhishtij ne najnawal, wan kinpajtij muchi ne kukuyat, 17 pal kiane yekawi tay inak Ishaya ne taketzani, ina:
"Yajuni kikwij wan techishtilij tusutawalis wan tukujkukulis."
Yajki tik se barcoj
18 Kwak Yeshu kitak ne miaktal inawak, inak tipanukan sentapal ne at. 19 Wan se tajkwiluani ajsik itech, kilwij:
—Tamachtiani, niasneki muwan kanka tiaw.
20 Wan ne Yeshu kilwij:
—Ne tepetzkwinti kipia n' ishapu wan ne tutut n' itapajsul;
n' Itelpuch ne Takat te kipia kan musewiskia itzuntekun!
21 Seuk mumachtiani kilwij:
—Tajtzin, achtu shinechajkawa niaw niktalpachua nuteku.
22 Ne Yeshu kilwia:
—Shiwi nuwan, shikinhajkawa ne mikinimet kitalpachuat n' inmijmikini.
23 Wan yaja kalak tik ne barcoj wan ne imujmumachtiani yajket iwan, 24 wan né ulinik ne at wan ne at kitzak ne barcoj, wan yaja kuchi nemi. 25 Wan ajsiket kishatiat, inat:
—Tajtzin, shitechpalewi, tipuliwit!
26 Wan kinhilwia:
—Ansajsaytit! Inte ankipiat tayulmatilis!
Kwakuni muketzki, kinhajwak ne ejekat wan ne at wan nejmachnemik. 27 Ne takamet ishpuyawiket, inat:
—Ká ini? Ne ejekat wan ne at kitakamatit!
Yeshu tapajtia tik Gadara
28 Wan ajsik sentapal ne at kan nemi ne tal pal Gadara, wan kisket tik ne panteon ume nawalpiat chujchucaroj ken te aka welituya panu tik uni ujti, 29 wan né tzajtziket inat:
—Tay tikneki tuwan, Itelpuch ne Teut? Tiwalaj nikan achtu ka muneki titechchiwilia tay techkukua?
30 Né wejka nemituya se wey kuyantal mutakwaltia. 31 Ne nawalmet mutajtawelijket iwan inat:
—Asu titechishtia, shitechtukti tikalakit itech ne kuyantal!
32 Wan kinhilwij:
—Shiakan.
Yejemet walkisket, kalakket ijtik inwejweyka ne kujkuyamet, wan kisket mutaluat muchi ne kuyantal, muustutaminket wan wetzket tik ne weyat. Mikiket. 33 Ne tajpianimet chulujket; yajket tik ne techan wan kinhilwijket muchi ne chanejket tay panutuk wan ken ijtuk wan ne nawalpiat, 34 wan kisket muchi ne techanchanejket kinamikit Yeshu wan kwak kitaket kitajtanket ma yawi wejka ne intechan.
Yeshu tetapupulwia wan tapajtia
9 Wan kalak tik ne barcoj wan mukwepki ne itechan, 2 wan né kalwikaket se inte weli mijkwani, wetztuk pak se petat, wan Yeshu kitak tay kimatit tik inyujyulu; wan kilwij ne kukuyani:
—Yek nemi nupipil, mutapupulwijtuka tay titateyekchijki.
3 Wan ankakeski tajkwiluani ka né muilwijket:
—Yajini kukujtaketzaya!
4 Wan Yeshu kitak tay yultaketzat nemit wan inak:
—Taika anyultaketzat tay inte yek? 5 Katiawel sea uij tel: ma nina "mutapupulwijtuka tay titateyekchijki" o ma nina "shimuketza wan shinejnemi"? 6 Pal ankimatit ka ne Itelpuch ne Takat kia weli kitapupulwia ne tateyekchijtuk ijpak ne tal...
kilwia ne kukuyani:
—Shimuketza, shikana ne mutapech wan shu ka muchan!
7 Wan muketzki, wan yajki ichan. 8 Wan kwak muchi kitaket, majmawket wan inaket ka wey ne Teut ne kichiwa ka welit ijkiuni takamet.
Ichan Matay
9 Wan kwak Yeshu panu ka ikuni, kitak se takat itukay Matay tik ne tasentepewayan, wan kilwia:
—Shiwi nuwan.
Wan muketzki wan yajki iwan. 10 Wan seujti kwak mutalij takwa tik ne kal, né ajsiket miak tumintepewani wan tateyekchiwat, muchi sentakwat iwan yaja wan imujmumachtiani. 11 Wan kwak ne Parishayujmet kitaket, kinhilwijket ne mumachtianimet:
—Taika sentakwa ne anmutamachtiani iwan tumintepewanimet wan tateyekchiwat?
12 Yaja kikakik wan inak:
—Ne kipiat yek inweyka inte munekit tapajtiani, munekit ne kukuyat. 13 Shumet shimumachtikan tay uni. Nikelewia tetasujtalis, inte nikelewia esti, ika inte niwalaj pal niknutza ne kichiwat tay yek asunte ne tateyekchiwat.
14 Kwakuni ne imujmumachtiani Yojan itech ajsiket inat:
—Taika tejemet wan ne Parishayujmet tiksejseliat mayan wan ne mumujmumachtiani inte?
15 Wan Yeshu kintajtanilij:
—Welit mutechtiat ne ikujkunpalejwan kwak nemiuk inwan ne munamiktia? Walasket tujtunal kwak kiwikasket ne munti wan kwakuni kisejselisket mayan.
16 Te aka kitzuma se takutun yankwik kwachti ijpak ikwajkwach palikman, ika ne talilijtuk kishtiliskia ne palikman wan ne tzayantuk mutzayana chiupiuk.
17 Wan te aka kitalia kushushaj yankwik ijtik tajtaijtik pal kwetashti palikman, ika mukelunaskiat ne tajtaijtik wan puliwit ne kushushaj wan nusan ne tajtaijtik, yajika tiktaliat yankwik kushushaj ijtik tajtaijtik yankwik.
Ne isiwapil ne tatuktiani, wan se siwat eskisa
18 Kwak yaja taketza ijkiuni, né ajsi se tatuktiani, mutankwaketza iishpan, ina:
—Tamik miki nusiwapiltzin; shiwi shiktali ne mumey ijpak ma yultuk.
19 Wan Yeshu muketzki wan yajki iwan, wan ne mumachtianimet nusan. 20 Wan ka iteputz ajsik se siwat kipiatuya majtakti-ume shiwit eskisa wan kimatukak ne iten ne ikwajkwach Yeshu, 21 ika yaja ina tik iyulu:
—Asu semaya niweli nikmatuka ne ikwajkwach, niaw niyektia.
22 Ne Yeshu muishkwepki kita ne siwat wan inak:
—Yek nemi, nusiwapil, ne mutayulmatilis metzpalewijtuk.
Wan yektiak ne siwat tipan.
23 Wan Yeshu ajsik ne ikal ne tatuktiani wan kitak ne tatzutzunanimet wan ne miaktal mukumuntia, 24 wan inak:
—Shiakanha, ika te mikik ne siwapiltzin, semaya kuchi.
Wan ajkawetzkat. 25 Kwak yajket muchi, yaja panuk kalijtik wan kipachuj ne imey, wan muketzki ne siwapiltzin. 26 Wan mumatki nujme uni tal.
Kinpajtia sejseuk
27 Wan Yeshu kiski ka ikuni, wan ume pupuyut kinutzket yajket ka iipan, inat:
—Shitechpalewi, itelpuch Dawid!
28 Yeshu kalak ichan wan ne pupuyumet ajsiket ka né, wan yaja kinhilwia:
—Ankimatit tik anmuyulu ka niweli nikchiwa ini?
Yejemet kilwiat:
—Tikmatit, tajtzin.
29 Kwakuni kimatukak ne inhijish wan ina:
—Ken ankipiat tayulmatilis, ijkiuni ma muchiwa anmuwan.
30 Wan tapuiket ne inhijish. Wan Yeshu kinhajajwak, ina:
—Shitapachiwikan ma inte shikilwikan aka.
31 Melka uni, kisket wan kinhilwijket muchi tik uni tal.
32 Kwak yejemet kisat, né kalwikaket se takat inte welituya taketza kipiatuya se nawal inteyek. 33 Wan kitajkal ne nawal wan yaja pejki taketza, wan muchi ishpuyawiket, inat:
—Te keman muitak tatka kiane tik Israel!
34 Ne Parishayujmet inaket:
—Yaja kikwi ne tatuktiani pal ne nawalmet pal kintajkali nawalmet!
35 Wan Yeshu yajki pashalua ijtik muchi ne tejtechan wey wan chikitik tamachtia tik ne kajkalsennemit wan tanajnawatia ne yeknawatilis ipal ne tatekimakalis wan kipajtia muchi ne kujkukulis.
Pewa kinnutza ne tijtitanijtuk
36 Kwak kinhitak muchi ne takamet wan siwatket, kikukuj iyulu ika mukakasuat wan musentaluat ken takwalmet inte kipiat tajpiani. 37 Kwakuni kinhilwia ne imujmumachtiani:
—Wey ne tapishkal wan chiujchiupi ne tapishkanit: 38 yajika shiktajtanikan ne itekuyu ne tapishkal ma kintukti tapishkanimet pal tapishkat.
Ne Bibliaj Tik Nawat · © 2008, 2012 Jan Morrow