Beginning

Li Xbe̱n Hu li Quixtzˈi̱ba li San Pablo reheb laj Corinto

Xqˈuebal xsahileb xchˈo̱l

1  La̱in laj Pablo. Sicˈbil chak cuu xban li Dios re nak tincˈanjelak chokˈ x‑apóstol li Jesucristo xban nak joˈcan quiraj li Dios. Cuochben laj Sóstenes li cuech aj pa̱banelil. ² Yo̱quin chixtzˈi̱banquil li hu aˈin e̱riqˈuin la̱ex aj pa̱banel li cuanquex saˈ li tenamit Corinto. Santobresinbilex saˈ xcˈabaˈ li Jesucristo ut sicˈbil e̱ru xban li Dios chokˈ ralal xcˈajol. Ut sicˈbil ajcuiˈ ruheb chixjunileb li cuanqueb yalak bar li nequeˈxya̱ba xcˈabaˈ li Jesucristo. Aˈan li kaDios chikajunilo la̱o li nocopa̱ban re. ³ Chicua̱nk taxak e̱riqˈuin li usilal ut li tuktu̱quilal li nachal riqˈuin li Dios li kaYucuaˈ ut riqˈuin li Ka̱cuaˈ Jesucristo.

Li rusilal li Dios nequecˈul saˈ xcˈabaˈ li Cristo

⁴ Junelic ninbantioxi chiru li Dios nak nintijoc che̱rix la̱ex ut ninbantioxi ajcuiˈ chiru li Dios nak xema̱tani li rusilal li Dios saˈ xcˈabaˈ li Jesucristo. ⁵ Xban nak junajex chic riqˈuin li Cristo, xema̱tani li rusilal li Dios. Cha̱bil chic nequex‑a̱tinac ut cha̱bil chic le̱ naˈleb xban nak nequenau chic li xya̱lal. ⁶ Ac xema̱tani li rusilal li Dios ut nacˈutun nak ya̱l li quinye e̱re chirix li Cristo. ⁷ Ac xema̱tani li usilal li naxqˈue li Santil Musikˈej ut ma̱cˈaˈ chic nequeroybeni. Caˈaj chic lix cˈulunic li Ka̱cuaˈ Jesucristo nequeroybeni. ⁸ Li Dios yo̱k chixqˈuebal xcacuub le̱ chˈo̱l chalen toj saˈ rosoˈjic li cutan re nak ma̱cˈaˈak e̱ma̱c saˈ li cutan nak tol‑e̱lk li Ka̱cuaˈ Jesucristo. ⁹ Li Dios junelic naxqˈue li naxyechiˈi ut aˈan ajcuiˈ li quisicˈoc e̱ru re nak texcua̱nk chi sum a̱tin riqˈuin li Ralal, aˈ li Ka̱cuaˈ Jesucristo.

Xqˈuebal xnaˈlebeb laj pa̱banel re nak junajakeb xchˈo̱l

¹⁰ Ex inherma̱n, saˈ xcˈabaˈ li Ka̱cuaˈ Jesucristo nintzˈa̱ma che̱ru nak junajak le̱ naˈleb. Ma̱cˈaˈak li jachoc ib saˈ e̱ya̱nk. Junajak ban le̱ cˈaˈux ut junajak le̱ chˈo̱l. ¹¹ Ninye e̱re chi joˈcaˈin xban nak lix comoneb lix Cloé xeˈyehoc resil cue nak cuan cuechˈi̱nc ib saˈ e̱ya̱nk. ¹² ¿Cˈaˈut nak jalan jala̱nk nequecˈoxla che̱ju̱nkal? Cuan nequeˈxye: La̱o xtzolom laj Pablo. Ut cuan nequeˈxye: La̱o xtzolom laj Apolos. Ut cuan ajcuiˈ li nequeˈxye: La̱o xtzolom laj Pedro ut cuan cuiˈchic nequeˈxye: La̱o xtzolom li Cristo. ¹³ Abanan la̱in tinpatzˈ e̱re, ¿ma nabal ta biˈ li Cristo? Incˈaˈ. Jun ajcuiˈ. ¿Ma quinqˈueheˈ ta biˈ la̱in chiru cruz saˈ e̱cˈabaˈ la̱ex? ¿Ma saˈ incˈabaˈ ta biˈ la̱in quecˈul li cubi haˈ? ¹⁴ Ninbantioxi chiru li Dios nak ma̱cuaˈ la̱in quincubsin e̱haˈ. Caˈaj cuiˈ laj Crispo ut laj Gayo quincubsi xhaˈeb. ¹⁵ Cui ta la̱in quincubsin e̱haˈ, ma̱re raj quecˈoxla nak quinba̱nu saˈ incˈabaˈ la̱in. ¹⁶ Ut quincubsi ajcuiˈ xhaˈeb li cuanqueb saˈ rochoch laj Estéfanas. Incˈaˈ chic jultic cue ma cuan chic quincubsiheb xhaˈ. ¹⁷ Li Cristo incˈaˈ quinixtakla chak chi cubsi̱nc haˈ. Quinixtakla ban chak chixjulticanquil resil li colba‑ib. Abanan ma̱cuaˈ riqˈuin a̱tin chˈaˈaj xtaubal ru xya̱lal quina̱tinac. Cui ta riqˈuin a̱tin chˈaˈaj xtaubal ru quina̱tinac, cuan raj incˈaˈ queˈtaˈoc ru ut ta̱cana̱k raj chi ma̱cˈaˈ rajbal xcamic li Cristo chiruheb.

Xjulticanquil Xcamic li Cristo

¹⁸ Nak nequeˈrabi resil lix camic li Cristo chiru li cruz, ma̱cˈaˈ na‑oc cuiˈ chiruheb li teˈxic saˈ xbalba. To̱ntil naˈleb aˈan chanqueb. Aban chiku la̱o li ac xocoleˈ kˈaxal lokˈ aˈan xban nak aˈan xcuanquil li Dios. ¹⁹ Joˈcaˈin tzˈi̱banbil retalil saˈ li Santil Hu:

²⁰ Chiru li Dios ma̱cˈaˈ nequeˈoc cuiˈ li cuanqueb xnaˈleb xjuneseb. Ma̱cˈaˈ nequeˈoc cuiˈ laj tzolonel. Ut ma̱cˈaˈ nequeˈoc cuiˈ li nequeˈxnau a̱tinac chirix lix naˈleb li ruchichˈochˈ. Lix naˈleb li ruchichˈochˈ to̱ntil naˈleb ut ma̱cˈaˈ na‑oc cuiˈ chiru li Dios. ²¹ Li Dios naxnau chixjunil. Ac cuan saˈ xchˈo̱l li Dios nak li cuanqueb saˈ ruchichˈochˈ ma̱ jaruj teˈxtau ru xnaˈleb li Dios yal xjuneseb rib. Joˈcan nak quiraj xcolbaleb li teˈpa̱ba̱nk re li resil li colba‑ib usta cuan li nequeˈyehoc re nak to̱ntil naˈleb li yo̱co chixjulticanquil che̱ru chirix li Cristo. ²² Aˈin to̱ntil naˈleb chiruheb laj judío xban nak teˈraj nak ta̱cˈutekˈ junak milagro chiruheb. To̱ntil naˈleb chiruheb li ma̱cuaˈeb aj judío xban nak caˈaj cuiˈ xnaˈleb li ruchichˈochˈ nequeˈxqˈue xcuanquil. ²³ Aban la̱o nakachˈolob xya̱lal nak li Cristo quicam chiru li cruz re kacolbal. Abanan li ca̱mc chiru cruz xuta̱nal chiruheb laj judío ut incˈaˈ nequeˈraj xtaubal xya̱lal lix camic li Cristo. Joˈcan nak chiruheb laj judío li xya̱lal lix camic li Cristo chanchan jun li pec nequeˈxtich rokeb chiru. Joˈcan ajcuiˈ chiruheb li ma̱cuaˈeb aj judío, li xya̱lal lix camic li Cristo to̱ntil naˈleb chiruheb. ²⁴ Abanan chiku la̱o li sicˈbil ku xban li Dios, usta la̱o aj judío usta ma̱cuaˈo aj judío, riqˈuin xcamic li Cristo chiru cruz nakil xcuanquil li Dios nak coxcol ut nakanau chic chanru xnaˈleb li Dios. ²⁵ Kˈaxal cuiˈchic cuan xnaˈleb li Dios chiruheb li cui̱nk usta yal to̱ntil naˈleb chiruheb li incˈaˈ nequeˈpa̱ban. Usta nequeˈxye nak ma̱cˈaˈ xcuanquil li Dios, kˈaxal cuiˈchic nim xcuanquil chiru xcuanquileb li cui̱nk. ²⁶ Ex herma̱n, cheqˈue retal chanru cuanquex nak quisiqˈueˈ e̱ru xban li Dios. Moco nabalex ta cuan e̱naˈleb joˈ xnaˈleb li ruchichˈochˈ. Moco nabalex ta li cuan e̱lokˈal ut incˈaˈ nabaleb saˈ e̱ya̱nk cuanqueb xcuanquil saˈ xcˈabaˈeb lix naˈ xyucuaˈ. ²⁷ Li ma̱cˈaˈeb xnaˈleb chiruheb li cui̱nk, li Dios quixsiqˈueb ru re nak teˈcˈutekˈ xxuta̱neb li cuanqueb xnaˈleb saˈ ruchichˈochˈ. Ut li ma̱cˈaˈeb xcuanquil saˈ ruchichˈochˈ li Dios quixsiqˈueb ru re nak teˈcˈutekˈ xxuta̱neb li cuanqueb xcuanquil saˈ ruchichˈochˈ. ²⁸ Li Dios quixsiqˈueb ru li tzˈekta̱nanbileb li ma̱cˈaˈeb xlokˈal ut li incˈaˈ nequeˈqˈueheˈ xcuanquil xbaneb li cuanqueb saˈ li ruchichˈochˈ. Quixsiqˈueb ban ru re xcubsinquil xcuanquileb li cuanqueb xnaˈleb saˈ ruchichˈochˈ. ²⁹ Quixba̱nu chi joˈcaˈin re nak ma̱ ani tixnimobresi rib chiru li Ka̱cuaˈ. ³⁰ Yal xban rusilal li Dios nak junajex chic riqˈuin li Jesucristo. Li Jesucristo quixakaba̱c xban li Dios re xqˈuebal kanaˈleb. Quixakaba̱c chixti̱cobresinquil li kachˈo̱l chiru li Dios ut chikasantobresinquil. Ut saˈ xcˈabaˈ li Cristo cuybil sachbil li kama̱c. ³¹ Joˈcan nak caˈaj cuiˈ li Ka̱cuaˈ takanimobresi. Joˈcaˈin tzˈi̱banbil retalil saˈ li Santil Hu: Mikanimobresi kib. Chikanimobresihak ban xcuanquil li Ka̱cuaˈ.

2  Joˈcan ut ex herma̱n, nak xincuulac e̱riqˈuin chixchˈolobanquil xya̱lal li ra̱tin li Dios, incˈaˈ xina̱tinac riqˈuin a̱tin chˈaˈaj xtaubal ru ut incˈaˈ xina̱tinac re xcˈutbal nak cuan innaˈleb. ² Xban nak incˈaˈ xcuaj xcˈutbal nak cuan innaˈleb, joˈcan nak caˈaj cuiˈ chirix lix camic li Cristo chiru li cruz xina̱tinac. ³ Nak cuanquin e̱riqˈuin ninsicsot xban inxiu nak yo̱quin chi a̱tinac e̱riqˈuin xban nak incˈaˈ cau inchˈo̱l. ⁴ Nak xinchˈolob xya̱lal che̱ru incˈaˈ xina̱tinac riqˈuin a̱tin joˈ nequeˈxba̱nu li cuanqueb xnaˈleb saˈ ruchichˈochˈ. Xinchˈolob ban xya̱lal che̱ru joˈ quixcˈut chicuu li Santil Musikˈej, ut li Santil Musikˈej quiqˈuehoc xcuanquil li cua̱tin. ⁵ La̱in incˈaˈ xina̱tinac e̱riqˈuin joˈ nequeˈxba̱nu li cuanqueb xnaˈleb xban nak incˈaˈ nacuaj nak ta̱cua̱nk e̱pa̱ba̱l saˈ xcˈabaˈ xnaˈlebeb li cui̱nk; saˈ xcˈabaˈ ban xcuanquil li Dios xexpa̱ban.

Li Dios naxcˈut chiku li xya̱lal

⁶ Li ac cauheb xchˈo̱l saˈ lix pa̱ba̱leb, nequeˈka̱tina riqˈuin a̱tin moco yalak ani ta ta̱taˈok ru. Aˈin ma̱cuaˈ xnaˈleb li ruchichˈochˈ chi moco xnaˈlebeb li nequeˈtaklan saˈ ruchichˈochˈ. Lix naˈlebeb na‑osoˈ joˈ nak nequeˈosoˈ eb aˈan. ⁷ Abanan la̱in ninchˈolob xya̱lal li naˈleb li quixqˈue li Dios. Li naˈleb aˈan mukmu nak quicuan chak junxil. Incˈaˈ natauman ru nak quicuan. Abanan chalen chak najter kˈe cutan nak toj ma̱jiˈ quixyi̱b li ruchichˈochˈ ac cuan chak saˈ xchˈo̱l li Dios nak tixqˈue li kalokˈal ut li kalokˈal, aˈan li kacolbal. ⁸ Ma̱ jun li nequeˈtaklan saˈ ruchichˈochˈ queˈxtau ru li naˈleb aˈin. Cui ta queˈxtau ru, incˈaˈ raj queˈxcamsi chiru cruz li Ka̱cuaˈ Jesucristo, laj e̱chal re li lokˈal. ⁹ Joˈcaˈin tzˈi̱banbil saˈ li Santil Hu chirix li kalokˈal:

¹⁰ Aban li Dios quixcˈutbesi chiku li naˈleb aˈin xban li Santil Musikˈej. Li Santil Musikˈej naxnau chixjunil lix naˈleb li Dios li kˈaxal chˈaˈaj xtaubal ru. ¹¹ Ma̱ ani nanaˈoc re cˈaˈru cuan saˈ xchˈo̱l li junju̱nk. Caˈaj cuiˈ li junju̱nk nanaˈoc re. Joˈcan ajcuiˈ lix cˈaˈux li Dios. Ma̱ ani nanaˈoc re. Caˈaj cuiˈ li Santil Musikˈej nanaˈoc re. ¹² Li Dios quixqˈue ke jun li Musikˈej. Ma̱cuaˈ yal xmusikˈ cui̱nk li cuan kiqˈuin. Aˈ lix Santil Musikˈ li Dios, aˈan li cuan kiqˈuin. Li Dios quixqˈue ke li Santil Musikˈej re nak takatau ru li cˈaˈru naxqˈue ke riqˈuin xnimal rusilal. ¹³ Incˈaˈ yo̱co chi a̱tinac chirix li naˈleb aˈin riqˈuin a̱tin xkacˈoxla kajunes. Yo̱co ban chi a̱tinac riqˈuin a̱tin quicˈutbesi̱c chiku xban li Santil Musikˈej. Li xya̱lal li naxcˈut chiku li Santil Musikˈej la̱o nakachˈolob chiruheb li cuan li Santil Musikˈej riqˈuineb. ¹⁴ Li ani ma̱cˈaˈ li Santil Musikˈej riqˈuin incˈaˈ naxcˈu̱luban li xya̱lal li naxcˈut li Santil Musikˈej. Aˈan to̱ntil naˈleb chiru xban nak incˈaˈ naxtau ru. Caˈaj cuiˈ li ani cuan li Santil Musikˈej riqˈuin naru tixtau ru xban nak li Santil Musikˈej aˈan li nacˈutuc re li xya̱lal chiru. ¹⁵ Li ani cuan li Santil Musikˈej riqˈuin naxnau bar cuan li ya̱l ut naxnau ajcuiˈ bar cuan li incˈaˈ ya̱l. Ut li ani ma̱cˈaˈ li Santil Musikˈej riqˈuin incˈaˈ naxtau ru lix naˈleb li cuan li Santil Musikˈej riqˈuin. ¹⁶ Joˈcaˈin tzˈi̱banbil saˈ li Santil Hu: Ma̱ ani nanaˈoc re lix cˈaˈux li Ka̱cuaˈ. Ma̱ ani naru naqˈuehoc xnaˈleb. Ma̱ ani naxnau lix cˈaˈux li Dios yal xjunes. Abanan xban nak la̱o cuan li Santil Musikˈej kiqˈuin, cuan ajcuiˈ lix cˈaˈux li Cristo kiqˈuin.

Yal aj cˈanjelo chiru li Dios

3  Ex inherma̱n, nak cuanquin e̱riqˈuin incˈaˈ quiru quina̱tinac e̱riqˈuin joˈ nina̱tinac riqˈuineb li ac cauheb xchˈo̱l saˈ lix pa̱ba̱leb. La̱ex chanchan ma̱cˈaˈ li Santil Musikˈej e̱riqˈuin. Joˈcan nak nina̱tinac e̱riqˈuin joˈ nak nina̱tinac riqˈuineb li toj kˈun xchˈo̱leb saˈ lix pa̱ba̱leb. ² Li xya̱lal xinchˈolob che̱ru chanchan nak leche xinqˈue cherucˈ. Moco cacuil tzacae̱mk ta xinqˈue e̱re xban nak la̱ex toj ma̱jiˈ nequexqˈui. Naraj naxye nak toj ma̱jiˈ ninchˈolob che̱ru li naˈleb li chˈaˈaj xtaubal ru xban nak toj ma̱jiˈ nequexqˈui saˈ le̱ pa̱ba̱l ut ma̱min te̱tau ru. ³ Incˈaˈ texru̱k xtaubal ru anakcuan xban nak toj nequeba̱nu li cˈaˈru naxrahi ru le̱ chˈo̱l. Nak toj cuan li cakali̱nc ib ut li cuechˈi̱nc ib saˈ e̱ya̱nk, ¿ma incˈaˈ ta biˈ yo̱quex chi xba̱nunquil li cˈaˈru naxrahi ru le̱ chˈo̱l? Ut la̱ex nequejuntakˈe̱ta e̱rib riqˈuineb li toj ma̱cˈaˈ li Santil Musikˈej riqˈuineb. ⁴ La̱ex toj ma̱jiˈ junaj le̱ chˈo̱l. Cuan li nequeˈxye, “la̱in ninta̱ke laj Pablo”. Ut cuan cuiˈchic li nequeˈxye, “la̱in ninta̱ke laj Apolos”. Cui joˈcan yo̱quex chixyebal, ¿ma incˈaˈ ta biˈ toj yo̱quex chixjuntakˈe̱tanquil e̱rib riqˈuineb li toj ma̱jiˈ nequeˈpa̱ban? ⁵ ¿Ani ta biˈ laj Apolos? Ut, ¿anihin ta biˈ la̱in? La̱o yal aj cˈanjelo chiru li Ka̱cuaˈ. Xkachˈolob xya̱lal che̱ru nak xepa̱b li Ka̱cuaˈ. Ut chi kacabichalo nococˈanjelac joˈ taklanbilo cuiˈ xban li Ka̱cuaˈ. ⁶ Chanchano aj acuinel nak nococˈanjelac chiru li Dios. Chanchan a̱uc xinba̱nu nak xinye resil li colba‑ib e̱re. Ut chanchan tˈakresi̱nc quixba̱nu laj Apolos nak quixchˈolob lix ya̱lal che̱ru. Abanan aˈ li Dios quiqˈuehoc lix mokic. ⁷ Joˈcan nak chi moco laj acuinel chi moco laj tˈakresinel cuan xcuanquil. Caˈaj cuiˈ li Dios li naqˈuehoc xmokic cuan xcuanquil. ⁸ Laj acuinel ut laj tˈakresinel juntakˈe̱teb xcuanquil chiru li Dios ut chi xju̱nkaleb teˈxcˈul xkˈajca̱munquil aˈ ya̱l chanru lix cˈanjeleb. ⁹ La̱o kech aj cˈanjelil kib chiru li Dios. Ut la̱ex chanchanex li chˈochˈ li nakacˈanjela ru. Ut li Dios aˈan laj e̱chal re li chˈochˈ. Ut chanchanex ajcuiˈ jun li cab yo̱co chixyi̱banquil ut li Dios, aˈan laj e̱chal re li cab aˈan. ¹⁰ Xban nak sicˈbil cuu xban li Dios chi cˈanjelac chiru joˈ jun aj tzˈac cha̱bil, joˈcan nak xinnau xjolominquil li cˈanjel. Chanchan nak xinyi̱b xcimiento li cab nak xinye resil li colba‑ib ut jalan chic teˈcablak saˈ xbe̱n nak teˈxchˈolob li xya̱lal che̱ru. Ut li junju̱nk chixqˈuehak retal nak tzˈakal re ru lix cˈanjel tixba̱nu. ¹¹ Tixqˈue retal chanru lix cˈanjel xban nak ac qˈuebil lix cimiento li cab. Ut ma̱ ani naru tixqˈue junak chic li cimiento chiru li ac qˈuebil. Ut aˈan li Ka̱cuaˈ Jesucristo. ¹² Cuan li teˈcablak saˈ xbe̱n li cimiento aˈan riqˈuin li cˈaˈak re ru najt naxcuy joˈ li oro, li plata ut li terto̱quil pec. Ut cuan li teˈcablak saˈ xbe̱n riqˈuin li incˈaˈ naxcuy joˈ li cheˈ, li cu̱c ut li qˈuim. Lix ya̱lal aˈan, aˈin: nak cuan li teˈcˈanjelak chi cha̱bil chiru li Dios ut cuan incˈaˈ. ¹³ Lix cˈanjel li junju̱nk ta̱cˈutu̱nk nak tol‑e̱lk cuiˈchic li Ka̱cuaˈ Jesucristo chi rakoc a̱tin. Chanchan nak ta̱numsi̱k saˈ xam lix cˈanjel naxba̱nu re rilbal ma ta̱osokˈ malaj incˈaˈ. ¹⁴ Cui lix cˈanjel incˈaˈ ta̱sachekˈ, nacˈutun nak us lix cˈanjel ut li jun aˈan tixcˈul lix kˈajca̱munquil. ¹⁵ Cui ut lix cˈanjel junak incˈaˈ tzˈakal re ru, lix cˈanjel ta̱sachk chanchan cˈatbil nak ta̱osokˈ. Ut li jun aˈan ta̱colekˈ, abanan chanchan ta̱numekˈ saˈ xam nak ta̱colekˈ. ¹⁶ ¿Ma incˈaˈ ta biˈ nequenau nak la̱ex rochochex li Dios? ¿Ma incˈaˈ ta biˈ nequenau nak li Santil Musikˈej cuan e̱riqˈuin? ¹⁷ Li rochoch li Dios aˈan santo. Cui ani naxtiquib li jachoc ib saˈ e̱ya̱nk, li jun aˈan yo̱ chixjucˈbal rochoch li Dios xban nak la̱ex aj pa̱banel rochochex chic li Dios. Ut li Dios tixsach li ani naxtiquib xjachbal ruheb laj pa̱banel. ¹⁸ Ma̱ ani taxak tixbalakˈi rib xjunes. Cui cuan junak saˈ e̱ya̱nk narecˈa nak cuan xnaˈleb saˈ li ruchichˈochˈ aˈin, chixcubsihak rib ut tixba̱nu joˈ li ma̱cˈaˈ naxnau re nak tixtau xnaˈleb chi tzˈakal. ¹⁹ Lix naˈleb li ruchichˈochˈ, aˈan to̱ntil naˈleb chiru li Dios. Joˈcaˈin tzˈi̱banbil saˈ li Santil Hu:

²¹ Joˈcan nak ma̱ ani tixnimobresi ru junak cui̱nk riqˈuin li cˈaˈru naxba̱nu xban nak chixjunil li cˈaˈak re ru qˈuebil e̱re xban li Dios re nak ta̱cˈanjelak che̱ru. ²² Usta laj Apolos, usta la̱in, usta laj Pedro, la̱o yal aj cˈanjelo che̱ru. Usta li ruchichˈochˈ, usta li yuˈam, usta li ca̱mc, e̱re ajcuiˈ re nak teˈcˈanjelak che̱ru. Chixjunil li cuan anakcuan e̱re la̱ex ut e̱re ajcuiˈ li toj cha̱lel chiku. ²³ Chixjunil li cˈaˈak re ru, e̱re la̱ex. Abanan la̱ex rehex li Cristo ut li Cristo, aˈan re li Dios.

Qˈuebilo chi cˈanjelac chiru li Ka̱cuaˈ

4  Joˈcan nak chenauhak nak la̱o yal aj cˈanjelo chiru li Cristo ut qˈuebil saˈ kabe̱n xchˈolobanquil lix ya̱lal li colba‑ib li quiqˈueheˈ ke xban li Dios. Li xya̱lal aˈin mukmu nak quicuan chak junxil. ² Li ani sicˈbil ru chixchˈolobanquil li xya̱lal tento nak ti̱cak xchˈo̱l. ³ La̱in ma̱cˈaˈ nacuaj re cui yo̱quex chixsicˈbal a̱tin chicuix ut ma̱cˈaˈ nacuaj re cui junak aj rakol a̱tin ta̱tzˈilok a̱tin chicuix. Chi moco la̱in naru tincuechˈ rix lin cˈanjel. ⁴ La̱in nacuecˈa nak ma̱cˈaˈ inma̱c. Abanan moco xban ta aˈan nak tinye nak ti̱c inchˈo̱l. Aˈ li ta̱rakok a̱tin saˈ inbe̱n aˈan li Ka̱cuaˈ, ut aˈan ta̱yehok re ma us xinba̱nu malaj incˈaˈ. ⁵ Joˈcan nak mexrakoc a̱tin chirix le̱ ras e̱ri̱tzˈin. Cheroybeni toj ta̱cuulak xkˈehil nak tol‑e̱lk cuiˈchic li Ka̱cuaˈ Jesucristo ut aˈan tixcˈutbesi li incˈaˈ nanauman anakcuan. Tixcˈutbesi li cˈaˈru nanumeˈ saˈ xchˈo̱l li junju̱nk. Ut li Dios tixqˈue xlokˈal li junju̱nk aˈ yal chanru lix yehom xba̱nuhom. ⁶ Ex herma̱n, chixjunil li xinye chirix laj Apolos ut chicuix re e̱tenkˈanquil nak xinye. Nacuaj nak te̱tau ru li cˈaˈru xinye. Chetzol e̱rib kiqˈuin re nak te̱ba̱nu joˈ tzˈi̱banbil saˈ li Santil Hu. Incˈaˈ naru te̱nimobresi e̱rib xban nak nequeta̱ke li jun ut nequetzˈekta̱na li jun chic. ⁷ ¿Ma jalanex ta biˈ la̱ex chiruheb li jun chˈo̱l chic nak nequerecˈa e̱rib? ¿Ma ma̱cuaˈ ta biˈ li Dios quiqˈuehoc e̱re li cˈaˈru cuan e̱re? ¿Cˈaˈut nak nequenimobresi e̱rib chixyebal nak cuan cˈaˈru e̱re? Incˈaˈ naru te̱nimobresi e̱rib xban nak yal xema̱tani li cˈaˈru cuan e̱re riqˈuin li Dios. ⁸ Ac xcˈojla e̱chˈo̱l xban nak saˈ e̱chˈo̱l la̱ex nak ac xetau e̱naˈleb. Chanchanex li biom saˈ le̱ pa̱ba̱l nak nequecˈoxla. ¿Ma la̱ex chic rey nak nequecˈoxla? Saˈ e̱chˈo̱l la̱ex nak ma̱cˈaˈ kacuanquil. Us raj ac ta cuan xetau e̱naˈaj chokˈ rey, re nak tocua̱nk ajcuiˈ raj la̱o chi takla̱nc e̱rochben. ⁹ Nak nincˈoxla la̱in li Dios xoxqˈue la̱o li apóstol chi ma̱cˈaˈ kacuanquil. Chanchano junak aj ma̱c li ac xteneba̱c ca̱mc saˈ xbe̱n ut qˈuebilo chiruheb li ángel ut chiruheb li cui̱nk re toeˈril. ¹⁰ La̱ex nequecˈoxla nak ma̱cˈaˈ kanaˈleb xban nak nakachˈolob resil li Cristo ut la̱ex cuan e̱naˈleb xban nak nequenau nabal chirix li Cristo nak nequecˈoxla. La̱o ma̱cˈaˈ kacuanquil ut la̱ex cuan e̱cuanquil nak nequecˈoxla. Saˈ e̱chˈo̱l la̱ex nak la̱ex nequex‑oxlokˈi̱c ut la̱o tzˈekta̱nanbilo. ¹¹ Toj chalen anakcuan yo̱co chixcuybal kasaˈ ut ta̱chakik ke. Ma̱cˈaˈ chic kakˈ. Sacˈbilo ut ma̱cˈaˈ kochoch. ¹² Cau nocotrabajic re xnumsinquil li cutan junju̱nk. Nak nequeˈxba̱nu ma̱usilal ke, la̱o nakaba̱nu usilal reheb. Ra nequeˈxba̱nu ke li xicˈ nequeˈiloc ke ut nakacuy xnumsinquil li raylal li nequeˈxba̱nu ke. ¹³ Nak nocohobeˈ incˈaˈ nakasume ru. Nequeˈka̱tina ban saˈ usilal. Chalen anakcuan tzˈekta̱nanbilo xbaneb chixjunileb. Ma̱cˈaˈ noco‑oc cuiˈ nak nocoeˈril. Chanchano li mul chiruheb. ¹⁴ Ma̱cuaˈ re xcˈutbal e̱xuta̱n nak yo̱quin chixyebal e̱re chi joˈcaˈin. Re ban xqˈuebal e̱naˈleb xban nak chanchanex li cualal incˈajol chicuu ut raro̱quex inban. ¹⁵ Usta cuan laje̱bak mil li nequeˈchˈoloban xya̱lal li Cristo che̱ru, abanan la̱in li xinyehoc e̱re resil li colba‑ib junxil nak xexpa̱ban. Joˈcan nak la̱in le̱ yucuaˈ saˈ xcˈabaˈ li Jesucristo. ¹⁶ Joˈcan ut nak nintzˈa̱ma che̱ru nak te̱tzol e̱rib cuiqˈuin ut te̱ba̱nu joˈ ninba̱nu la̱in. ¹⁷ Aˈan aj e nak xintakla e̱riqˈuin laj Timoteo. Aˈan tixjultica e̱re nak li cˈaˈru yo̱quin chixchˈolobanquil chirix li Cristo, aˈan ajcuiˈ li yo̱quin chixba̱nunquil. Ninchˈolob chi tzˈakal lix ya̱lal yalak bar chiruheb chixjunileb laj pa̱banel. Laj Timoteo chanchan li cualal ut raro inban. Tzˈakal re ru lix pa̱ba̱l saˈ xcˈabaˈ li Jesucristo. ¹⁸ Cuan li xeˈkˈetkˈetoˈ saˈ e̱ya̱nk. Eb aˈan nequeˈxye nak ninxucuac. Joˈcan nak incˈaˈ chic ninxic e̱riqˈuin. ¹⁹ Aˈan moco ya̱l ta. Cui li Dios naxqˈue cue, chi se̱b tincuulak e̱riqˈuin. Aran toxintau xya̱lal. Tincuil ma caˈaj cuiˈ a̱tinac nequeˈxnau li kˈetkˈeteb. Toj aran tincuil ma ya̱l na nak cuan xcuanquil li Dios riqˈuineb. ²⁰ Lix nimajcual cuanquilal li Dios, tento ta̱cˈutu̱nk saˈ li kayuˈam. Moco caˈaj cuiˈ ta riqˈuin ka̱tin ta̱cˈutu̱nk xcuanquil li Dios. ²¹ La̱in ninpatzˈ e̱re cˈaˈru te̱raj. ¿Ma te̱raj nak texinkˈus chi cau nak tincuulak e̱riqˈuin? ¿Malaj ut te̱yi̱b le̱ yuˈam re nak tincuulak riqˈuin rahoc ut tu̱lanil?