Beginning

Lix Yehom Xba̱nuhomeb li Apóstol

Li Dios quixyechiˈi li Santil Musikˈej reheb li ralal xcˈajol

1  Saˈ li xbe̱n hu quintzˈi̱ba a̱cuiqˈuin, at Teófilo, quintzˈi̱ba retalil chixjunil li joˈ qˈuial quixcˈut ut quixba̱nu li Ka̱cuaˈ Jesús chalen nak quixtiquib lix cˈanjel saˈ ruchichˈochˈ ² toj saˈ li cutan nak quicˈameˈ saˈ choxa. Nak toj ma̱jiˈ naxic saˈ choxa, riqˈuin xcuanquil li Santil Musikˈej, quixye reheb cˈaˈru tento teˈxba̱nu lix apóstol li quixsiqˈueb ru. ³ Nak ac xrahobtesi̱c ut ac xcamsi̱c, quicuacli cuiˈchic chi yoˈyo ut quixcˈutbesi cuiˈchic rib chiruheb. Caˈcˈa̱l cutan quicuan saˈ ruchichˈochˈ ut nabal sut quixcˈutbesi rib chiruheb re nak teˈxnau chi tzˈakal nak quicuacli cuiˈchic chi yoˈyo. Quixchˈolob xya̱lal chiruheb chanru nak ta̱cua̱nk xnimal xcuanquilal li Dios saˈ xbe̱neb li tenamit. ⁴ Nak toj cuan saˈ xya̱nkeb li Jesús quixye reheb chi joˈcaˈin: ―Incˈaˈ texxic saˈ jalan naˈajej. Texcana̱k ban Jerusalén roybeninquil li Santil Musikˈej li yechiˈinbil e̱re xban li Dios Acuabej, li ac xinye e̱re la̱in. ⁵ Ya̱l nak laj Juan quicubsin haˈ riqˈuin haˈ. Abanan anakcuan aˈ chic lix cuanquilal li Santil Musikˈej te̱cˈul chi se̱b ut aˈan chic ta̱cua̱nk e̱riqˈuin, chan.

Li Jesús quicˈameˈ saˈ choxa xban li Dios

⁶ Eb li apóstol li chˈutchˈu̱queb aran queˈxpatzˈ re li Jesús: ―At Ka̱cuaˈ, ¿ma anakcuan ta̱qˈueheb cuiˈchic xcuanquileb laj Israel re teˈxtakla cuiˈchic rib xjuneseb? chanqueb. ⁷ Quichakˈoc li Jesús ut quixye reheb: ―Ma̱cuaˈ e̱re la̱ex xnaubal li cˈaˈak re ru aˈin. Caˈaj cuiˈ li Dios Acuabej nanaˈoc re jokˈe tixba̱nu xban nak caˈaj cuiˈ aˈan yal re saˈ xbe̱n chixjunil. ⁸ La̱ex te̱cˈul le̱ cuanquil nak ta̱cha̱lk li Santil Musikˈej e̱riqˈuin. La̱ex chic texchˈoloba̱nk resilal chicuix la̱in arin Jerusalén, aran Judea ut Samaria. Joˈ ajcuiˈ yalak bar jun sut saˈ ruchichˈochˈ te̱chˈolob li xya̱lal, chan. ⁹ Nak quirakeˈ xyebal chixjunil aˈin quicˈameˈ saˈ choxa li Jesús xban li Dios. Yo̱queb chirilbal nak quichal jun li chok ut quimukun saˈ li chok. Ut incˈaˈ chic queˈril ru. ¹⁰ Toj yo̱queb ajcuiˈ chirilbal nak yo̱ chi xic li Jesús saˈ choxa nak xaka̱mileb cuibeb li cui̱nk chiruheb. Sakeb li rakˈ. ¹¹ Ut queˈxye reheb: ―Ex cui̱nk aj Galilea, ¿Cˈaˈut nak yo̱quex chi iloc saˈ choxa? Li Jesús li xcuan saˈ e̱ya̱nk ut xcˈameˈ saˈ choxa, aˈan ta̱cha̱lk cuiˈchic. Chanru nak xeril chi xic saˈ choxa, joˈcan cuiˈchic nak te̱ril nak yo̱k chi cha̱lc, chanqueb reheb.

Quixakaba̱c laj Matías chokˈ apóstol chokˈ re̱kaj laj Judas

¹² Chirix aˈan eb li apóstol queˈcube chak saˈ li tzu̱l Olivos ut queˈco̱eb cuiˈchic Jerusalén. Li tzu̱l aˈan nachˈ cuan riqˈuin li tenamit Jerusalén, jun kilómetro tana xnajtil, joˈ xnajtil li naru nequeˈxbeni saˈ li hiloba̱l cutan. ¹³ Nak queˈcuulac Jerusalén queˈtakeˈ saˈ xcaˈ tasal li cab li nequeˈhilan cuiˈ nak cuanqueb Jerusalén. Aˈaneb laj Pedro, laj Juan, laj Jacobo, laj Andrés, laj Felipe, laj Tomás, laj Bartolomé, laj Mateo, laj Jacobo li ralal laj Alfeo, laj Simón li na‑oquen saˈ xya̱nkeb li jun chˈu̱tal Celote nequeˈxye reheb, ut laj Judas li ralal laj Jacobo. ¹⁴ Chixjunileb aˈan yo̱queb chi tijoc chi junajeb xchˈo̱l rochbeneb li ri̱tzˈin li Jesús ut lix María lix naˈ. Ut cuanqueb ajcuiˈ ixk yo̱queb chi tijoc rochbeneb. ¹⁵ Saˈ eb li cutan aˈan jun ciento riqˈuin junmay chixjunileb laj pa̱banel li chˈutchˈu̱queb aran. Laj Pedro quixakli saˈ xya̱nkeb ut qui‑oc chixyebal reheb: ¹⁶ ―Ex inherma̱n, tento nak ta̱uxma̱nk li tzˈi̱banbil saˈ li Santil Hu li quicˈuteˈ chiru li rey David xban li Santil Musikˈej chirix laj Judas li quikˈaxtesin re li Jesús reheb li queˈchapoc re. ¹⁷ Laj Judas, aˈan raj jun saˈ kaya̱nk saˈ li cˈanjel aˈin. ¹⁸ Riqˈuin lix tojbal li quiqˈueheˈ re xban nak quixba̱nu li ma̱usilal, quilokˈeˈ jun li chˈochˈ. Quixyatzˈ rib ut nak quitˈaneˈ chi xulxu, quichireˈ ut qui‑el chak chixjunil saˈ lix saˈ. ¹⁹ Qui‑el ut resil aˈan saˈ xya̱nkeb chixjunileb li cuanqueb Jerusalén. Joˈcan nak Acéldama nequeˈxye re li naˈajej aˈan saˈ li ra̱tinoba̱leb. Aˈan naraj naxye “Lokˈbil riqˈuin quicˈ.” ²⁰ Quicˈulman chi joˈcan xban nak saˈ li hu Salmos tzˈi̱banbil retalil li naxye chi joˈcaˈin:

²¹ Joˈcan nak tento takaxakab junak chokˈ re̱kaj laj Judas. Cuanqueb cui̱nk saˈ kaya̱nk queˈochbenin chak ke nak toj cuan li Jesús saˈ kaya̱nk, ²² chalen nak quicubsi̱c chak xhaˈ li Jesús xban laj Juan ut toj chalen nak quicˈameˈ saˈ choxa chiku. Jun reheb li cui̱nk aˈan naru takaxakab chokˈ re̱kaj laj Judas re nak tixchˈolob ajcuiˈ xya̱lal nak quicuacli cuiˈchic chi yoˈyo li Jesús saˈ xya̱nkeb li camenak, chan laj Pedro. ²³ Queˈxxakab laj José li nequeˈxye Barsabás re. Aj Justo lix cˈabaˈ jun chic nequeˈxqˈue. Ut queˈxxakab ajcuiˈ laj Matías. ²⁴ Ut queˈoc chi tijoc ut queˈxye: ―At Ka̱cuaˈ, la̱at nacanau chanru li ra̱m li junju̱nk. Joˈcan nak nakatzˈa̱ma cha̱cuu nak ta̱cˈutbesi chiku ani reheb li cuib aˈin ta̱sicˈ ru re ta̱cana̱k chi cˈanjelac chokˈ re̱kaj laj Judas. ²⁵ Aˈan tixcˈul xcuanquil chi cˈanjelac chokˈ apóstol. Tixba̱nu li cˈanjel li quixtzˈekta̱na laj Judas xban li incˈaˈ us quixba̱nu. Laj Judas co̱ saˈ li naˈajej chixtojbal xma̱c bar xcˈulub cuiˈ xic, chanqueb. ²⁶ Joˈcan nak queˈxbu̱li rix li ani ta̱cana̱k chi cˈanjelac. Ut nak ac xeˈbu̱lic, li cˈanjel aˈan quicana saˈ xbe̱n laj Matías. Ut saˈ ajcuiˈ li ho̱nal aˈan laj Matías qui‑oc chokˈ apóstol saˈ xya̱nkeb li junlaju chic.

Queˈxcˈul li xcuanquilal li Santil Musikˈej eb laj pa̱banel saˈ xkˈehil li ninkˈe Pentecostés

2  Saˈ xkˈehil li ninkˈe re li Pentecostés chˈutchˈu̱queb chixjunileb laj pa̱banel saˈ jun chi naˈajej ut junajeb xchˈo̱l. ² Queˈrabi jun choki̱nc chanchan xya̱b cacuil ikˈ yo̱ chi cha̱lc saˈ choxa. Chixjunileb li cuanqueb saˈ li cab queˈrabi. ³ Queˈril li chanchan rakˈ xam. Li rakˈ xam queˈxjeqˈui rib ut queˈhilan saˈ xbe̱neb chi xjunju̱nkaleb. ⁴ Queˈxcˈul li xcuanquilal li Santil Musikˈej, ut queˈoc chi a̱tinac saˈ jalan a̱tinoba̱l aˈ yal chanru quicˈuteˈ chiruheb xban li Santil Musikˈej. ⁵ Cuanqueb aj judío aran Jerusalén cauheb xchˈo̱l saˈ xpa̱ba̱leb. Queˈchal chak saˈ chixjunil li tenamit jun sut rubel choxa. ⁶ Nak queˈrabi li cˈaˈru yo̱queb chixcˈulbal eb aˈan, queˈxchˈutub ribeb li qˈuila tenamit. Sachso̱queb xchˈo̱l xban nak queˈrabi nak yo̱queb chi a̱tinac saˈ li ra̱tinoba̱leb li junju̱nk chi tenamit. ⁷ Cˈajoˈ nak queˈxucuac ut sachso̱queb xchˈo̱l queˈcana ut queˈxye chi ribileb rib: ―¿Ma ma̱cuaˈeb ta biˈ aj Galilea chixjunileb aˈin li yo̱queb chi a̱tinac saˈ jalanil a̱tinoba̱l? ⁸ ¿Cˈaˈut nak yo̱co chirabinquileb chi a̱tinac saˈ li ka̱tinoba̱l chikaju̱nkal? ⁹ Anakcuan eb aˈan yo̱queb chi a̱tinac saˈ ra̱tinoba̱leb laj Partos, laj Medo, laj elamitas ut chikajunilo la̱o li cuanco Mesopotamia, ut Judea, Capadocia, Ponto ut Asia, ¹⁰ joˈqueb ajcuiˈ laj Frigia ut laj Panfilia, laj Egipto ut eb li cuanqueb saˈ eb li naˈajej xcue̱nt Libia li cuanqueb nachˈ riqˈuin Cirene, joˈqueb ajcuiˈ laj Roma. ¹¹ Cuanqueb aj judío saˈ xyoˈlajiqueb ut cuanqueb ajcuiˈ li queˈxjal xpa̱ba̱l ut queˈoc saˈ xya̱nkeb laj judío. Cuanqueb ajcuiˈ li queˈchal Creta ut Arabia. Nakabi nak yo̱queb chixyebal saˈ ka̱tinoba̱l li cˈaˈru yo̱ chixba̱nunquil li Ka̱cuaˈ Dios riqˈuin xnimal xcuanquilal, chanqueb. ¹² Ut chixjunileb sachso̱queb xchˈo̱l ut incˈaˈ queˈxtau ru. Queˈxye chiribileb rib: ―¿Cˈaˈru xya̱lal aˈin li yo̱co chixcˈulbal? chanqueb. ¹³ Cuanqueb ajcuiˈ yo̱queb chi hoboc ut yo̱queb chixyebal: ―Ma̱re teˈcala̱k, chanqueb.

Laj Pedro naxchˈolob xya̱lal chiruheb li qˈuila tenamit

¹⁴ Tojoˈnak quixakli laj Pedro rochbeneb li junlaju chic chi apóstol ut qui‑oc chi a̱tinac chi cau xya̱b xcux. Quixye reheb li qˈuila tenamit: ―Ex cuech tenamitil aj judío ut che̱junilex la̱ex li cuanquex Jerusalén, la̱in tinye e̱re cˈaˈru xya̱lal aˈin. Qˈuehomak retal chi us li oc cue xyebal e̱re. ¹⁵ Li joˈ qˈuialeb li cuanqueb arin moco teˈcala̱k ta joˈ yo̱quex chixcˈoxlanquil la̱ex. Anakcuan tojeˈ bele̱b o̱r re li cutan cuanco. ¹⁶ Yo̱co ban chixcˈulbal li quixye chak resil li profeta Joel nak quixye chi joˈcaˈin:

²² Ex aj Israel, abihomak li tinye e̱re. La̱ex ac nequenau nak li Jesús aj Nazaret, aˈan qˈuebil xcuanquil xban li Dios saˈ e̱ya̱nk la̱ex riqˈuin li sachba chˈo̱lej ut li milagro quilajxba̱nu. La̱ex ac nequenau nak riqˈuin xcuanquil li Dios quixba̱nu li sachba chˈo̱lej. ²³ Li Jesús quikˈaxtesi̱c saˈ e̱rukˈ la̱ex xban nak ac joˈcan chak saˈ xchˈo̱l li Dios nak joˈcan tixcˈul. Ut la̱ex quechap ut quekˈaxtesi saˈ rukˈeb li cui̱nk li incˈaˈ useb xnaˈleb. Ut eb aˈan queˈxcamsi chiru cruz. ²⁴ Abanan li Dios quicuaclesin cuiˈchic re chi yoˈyo saˈ xya̱nkeb li camenak. Li Dios quirisi xcuanquil li ca̱mc saˈ xbe̱n xban nak li ca̱mc incˈaˈ naru nanumta saˈ xbe̱n. ²⁵ Joˈcaˈin quixye li rey David chirix li Jesús:

²⁹ Ex kech tenamitil, la̱in ninye e̱re chi anchal inchˈo̱l nak tzˈakal ya̱l nak laj David li kaxeˈto̱nil yucuaˈ quicam ut quimukeˈ. La̱o nakanau nak li mukleba̱l li cuan cuiˈ toj cuan ajcuiˈ chalen anakcuan. ³⁰ Laj David aˈan jun profeta. Aˈan quixnau nak li Dios quixye riqˈuin juramento nak saˈ xya̱nkeb li ralal xcˈajol ta̱yoˈla̱k li Cristo, ut aˈan chic ta̱xakaba̱k chokˈ rey. ³¹ Ut laj David quixnau li cˈaˈru ta̱cˈulma̱nk mokon. Joˈcan nak quixchˈolob xya̱lal nak li Cristo ta̱cuacli̱k cuiˈchic chi yoˈyo saˈ xya̱nkeb li camenak. Quixnau nak aˈan incˈaˈ ta̱cana̱k saˈ xnaˈajeb li camenak chi moco lix tibel ta̱kˈa̱k. ³² Aˈan aˈin li Jesús li quicuaclesi̱c cuiˈchic chi yoˈyo xban li Dios. La̱o xkil tzˈakal riqˈuin xnakˈ ku. Joˈcan nak nakanau nak ya̱l. ³³ Quicˈameˈ xban li Dios re nak ta̱cˈojla̱k saˈ lix nim ukˈ ut quiqˈueheˈ xcuanquil. Ut quiqˈueheˈ li Santil Musikˈej re xban li Dios. Ut quixqˈue ajcuiˈ ke la̱o li Santil Musikˈej joˈ quiyechiˈi̱c ke. Aˈan aˈin li yo̱quex chirilbal ut chirabinquil anakcuan. ³⁴ Li rey David incˈaˈ quicˈameˈ saˈ choxa joˈ nak quicˈameˈ li Cristo saˈ choxa. Abanan quixye chi joˈcaˈin:

³⁶ Chenauhak che̱junilex la̱ex aj Israel nak li Jesús li queqˈue la̱ex chiru cruz, aˈan li quiqˈueheˈ chokˈ Ka̱cuaˈ ut chokˈ Cristo xban li Dios, chan laj Pedro. ³⁷ Nak queˈrabi aˈan li chˈutchˈu̱queb aran, queˈyotˈeˈ xchˈo̱leb ut queˈxye re laj Pedro joˈ ajcuiˈ reheb li apóstol li jun chˈol chic: ―Ex kas ki̱tzˈin, ¿cˈaˈru takaba̱nu? chanqueb. ³⁸ Laj Pedro quichakˈoc ut quixye reheb: ―Chiyotˈekˈ e̱chˈo̱l ut jalomak e̱cˈaˈux ut ta̱cubsi̱k e̱haˈ chi junju̱nkalex saˈ xcˈabaˈ li Jesucristo re nak tixcuy e̱ma̱c li Dios ut tixqˈue e̱re li Santil Musikˈej. ³⁹ Yechiˈinbil e̱re la̱ex li ma̱tan aˈin, ut yechiˈinbil ajcuiˈ reheb le̱ ralal e̱cˈajol ut reheb ajcuiˈ li ma̱cuaˈeb aj judío. Yechiˈinbil reheb chixjunileb li joˈ qˈuialeb teˈbokekˈ xban li Ka̱cuaˈ li kaDios, chan. ⁴⁰ Ma̱cuaˈ caˈaj cuiˈ aˈan li quixye laj Pedro reheb. Quixchˈolob ban ajcuiˈ xya̱lal chiruheb riqˈuin nabal chi a̱tin ut quixqˈue xnaˈlebeb. Quixye reheb: ―Chenauhak xcolbal e̱rib chiru li tojba ma̱c li ta̱cha̱lk saˈ xbe̱neb li incˈaˈ useb xnaˈleb, chan. ⁴¹ Ut chixjunileb li queˈpa̱ban re li ra̱tin queˈcubsi̱c xhaˈ. Oxib mil tana li queˈpa̱ban saˈ li cutan aˈan ut queˈoc chokˈ xcomoneb.

Chanru nak queˈcuan chi junaj xchˈo̱leb li xbe̱n aj pa̱banel

⁴² Cauheb xchˈo̱l chixpa̱banquil li tijleb li quichˈoloba̱c chiruheb xbaneb li apóstol. Junaj xchˈo̱leb nak cuanqueb ut saˈ comonil queˈtijoc ut queˈcuaˈac re xjulticanquil lix camic li Jesucristo. ⁴³ Chixjunileb sachso̱queb xchˈo̱l xban li milagro ut li sachba chˈo̱lej li yo̱queb chixba̱nunquil li apóstol. ⁴⁴ Ut eb li queˈpa̱ban junaj xchˈo̱leb ut chixjunil li cˈaˈru cuan reheb, reheb saˈ comonil. ⁴⁵ Queˈxcˈayi lix chˈochˈeb ut chixjunil li cˈaˈru cuan reheb ut queˈxjeqˈui lix tzˈak reheb chixjunileb aˈ yal chanru ta̱cˈanjelak chiruheb li junju̱nk. ⁴⁶ Rajlal cutan queˈxchˈutub ribeb saˈ li templo chi lokˈoni̱nc. Ut saˈ eb li rochoch queˈcuaˈac saˈ comonil chi sa saˈ xchˈo̱leb ut chi junaj xchˈo̱leb. ⁴⁷ Queˈxlokˈoni li Ka̱cuaˈ Dios ut queˈqˈueheˈ xcuanquil xbaneb chixjunileb li tenamit. Ut rajlal cutan li Dios quixtenkˈaheb chi qˈuia̱nc laj pa̱banel.

Laj Pedro quixqˈuirtesi jun li cui̱nk incˈaˈ nabe̱c

3  Saˈ jun li cutan queˈco̱eb saˈ li templo laj Pedro rochben laj Juan oxib o̱r re ecuu saˈ x‑o̱ril li tijoc. ² Rajlal cutan nacˈameˈ jun li cui̱nk incˈaˈ nabe̱c chalen saˈ xyoˈlajic ut naqˈueheˈ chire li oqueba̱l re li templo. Lix cˈabaˈ li oqueba̱l aˈan “Chˈinaˈus”. Naqˈueheˈ li yaj aran re tixtzˈa̱ma cˈaˈru re riqˈuineb li nequeˈoc saˈ li templo. ³ Li cui̱nk aˈin quiril nak yo̱queb chi oc saˈ li templo laj Pedro ut laj Juan. Qui‑oc chixtzˈa̱manquil cˈaˈru re reheb. ⁴ Laj Pedro ut laj Juan queˈcana chirilbal li yaj ut laj Pedro quixye re: ―Ilon chak kiqˈuin.― ⁵ Nak quirabi li cui̱nk li cˈaˈru quixye, qui‑oc chiroybeninquil cˈaˈru teˈxqˈue re. ⁶ Laj Pedro quixye re: ―Ma̱cˈaˈ intumin la̱in re tinqˈue a̱cue. Abanan li cˈaˈru cuan cuiqˈuin tinqˈue a̱cue. Saˈ xcˈabaˈ li Ka̱cuaˈ Jesucristo laj Nazaret, ninye a̱cue cuaclin ut be̱n, chan re. ⁷ Ut nak quixye aˈin, quixchap ut quixcuaclesi riqˈuin lix nim ukˈ. Saˈ junpa̱t quicacuu li xbe̱n rak ut li rok li cui̱nk. ⁸ Saˈ junpa̱t quixakli ut quibe̱c. Ut qui‑oc saˈ li templo rochbeneb. Yo̱ chi piscˈoc xban xsahil xchˈo̱l ut yo̱ chixlokˈoninquil li Dios. ⁹ Chixjunileb li tenamit queˈiloc re chi be̱c ut chixlokˈoninquil li Dios. ¹⁰ Cˈajoˈ nak queˈxucuac ut sachso̱queb xchˈo̱l chirilbal li cui̱nk aˈan, xban nak queˈxnau ru nak aˈan li nacˈojla chixtzˈa̱manquil cˈaˈru re chire li oqueba̱l “Chˈinaˈus” xcˈabaˈ.

Laj Pedro quixye reheb laj judío nak li Jesús aˈan laj Colonel li yechiˈinbil xban li Dios

¹¹ Ut li cui̱nk li quiqˈuirtesi̱c incˈaˈ quiraj xcanabanquil rib riqˈuineb laj Pedro ut laj Juan. Yo̱ chi be̱c rochbeneb. Ut chixjunileb sachso̱queb xchˈo̱l chirilbal li quicˈulman. Queˈco̱eb saˈ a̱nil saˈ li templo ut queˈxchˈutub ribeb saˈ li oqueba̱l Salomón xcˈabaˈ, cuanqueb cuiˈ laj Pedro ut laj Juan. ¹² Nak laj Pedro quirileb, quixye reheb: ―La̱ex aj Israel, ¿cˈaˈut nak sachso e̱chˈo̱l nequexcana xban li cˈaˈru xcˈulman? ¿Cˈaˈut nak yo̱quex chikilbal? ¿Ma nequecˈoxla la̱ex nak la̱o xkaqˈuirtesi li cui̱nk aˈin kajunes? ¿Ma xban ta biˈ kacuanquil ut li kacha̱bilal nak xkaqˈue chi be̱c li cui̱nk aˈin? ¹³ Li Dios li queˈxlokˈoni chak laj Abraham, laj Isaac ut laj Jacob joˈqueb ajcuiˈ li kaxeˈto̱nil yucuaˈ, aˈan quiqˈuehoc xcuanquil li Jesucristo laj cˈanjel chiru. Ut la̱ex quekˈaxtesi aˈan re laj Pilato. Ut nak laj Pilato quiraj raj rachˈabanquil, la̱ex incˈaˈ queraj. ¹⁴ La̱ex incˈaˈ queraj xcolbal rix li santil cui̱nk aˈin, li ti̱c xchˈo̱l. Aˈ chic laj camsinel queqˈue chi achˈaba̱c. ¹⁵ La̱ex queqˈue chi camsi̱c aˈan, ut aˈan li naqˈuehoc yuˈam. Abanan quicuaclesi̱c cuiˈchic chi yoˈyo xban li Dios saˈ xya̱nkeb li camenak. Ut aˈan li nakachˈolob xya̱lal la̱o xban nak la̱o xkil chi tzˈakal nak quicuacli. ¹⁶ Li cui̱nk aˈin xqˈuira saˈ xcˈabaˈ li Jesús. Riqˈuin xpa̱banquil li Jesús xqˈuira chi junaj cua li cui̱nk aˈin li nequenau ru ut yo̱quex chirilbal. ¹⁷ Joˈcan ut ex cuas cui̱tzˈin, la̱in ninnau nak queqˈue chi camsi̱c li Jesús xban nak incˈaˈ nequenau xya̱lal joˈqueb ajcuiˈ li nequeˈtaklan saˈ e̱be̱n. ¹⁸ Riqˈuin aˈin quitzˈakloc ru li queˈxye chak li profeta najter nak queˈxye nak tento tixcˈul li rahobtesi̱c li Cristo li Mesías, xban nak joˈcan quixye li Dios. ¹⁹ Joˈcan ut nak yotˈomak e̱chˈo̱l ut jalomak e̱cˈaˈux ut sicˈomak li Ka̱cuaˈ re nak aˈan tixcuy tixsach le̱ ma̱c. Ut li Ka̱cuaˈ tixqˈue xcacuilal ut xsaylal e̱chˈo̱l. ²⁰ Li Dios tixtakla cuiˈchic chak li Jesucristo saˈ ruchichˈochˈ xban nak aˈan li Mesías li ac xakabanbil chak najter re xcolbaleb chiru li raylal li cuanqueb saˈ ruchichˈochˈ. ²¹ Abanan tento nak cua̱nk chak aran saˈ choxa toj ta̱cuulak xkˈehil nak ta̱tzˈaklok ru chixjunil joˈ queˈxchˈolob xya̱lal li santil profeta junxilaj joˈ quiyeheˈ reheb xban li Dios. ²² Laj Moisés quixye reheb li kaxeˈto̱nil yucuaˈ, “Li Ka̱cuaˈ le̱ Dios tixqˈue junak profeta saˈ e̱ya̱nk sicˈbil ru xban joˈ la̱in. E̱comon ajcuiˈ la̱ex. Cheba̱nu chixjunil li cˈaˈru tixye e̱re. ²³ Ut li ani incˈaˈ tixpa̱b li cˈaˈru tixye li profeta aˈan, ta̱isi̱k saˈ xya̱nkeb lix tenamit li Dios ut ta̱sachekˈ ru.” ²⁴ Chalen nak quicuan li profeta Samuel chixjunileb li profeta queˈxye ajcuiˈ resil li cˈaˈru ta̱cˈulma̱nk saˈ eb li cutan aˈin. ²⁵ La̱ex ralal xcˈajol eb li profeta ut la̱ex texcˈuluk re li quiyechiˈi̱c reheb le̱ xeˈto̱nil yucuaˈ. Nak li Dios quixba̱nu li contrato riqˈuin laj Abraham, quixye re, “Chixjunileb li cuanqueb saˈ ruchichˈochˈ teˈosobtesi̱k saˈ xcˈabaˈeb la̱ cualal a̱cˈajol.” ²⁶ Nak li Dios quixtakla chak li ralal, quixtakla xbe̱n cua e̱riqˈuin la̱ex aj judío re e̱rosobtesinquil re nak che̱junju̱nkalex te̱yotˈ e̱chˈo̱l ut te̱jal e̱cˈaˈux ut te̱canab xba̱nunquil li ma̱usilal.