Book of Common Prayer

¹ આવો, યહોવા સમક્ષ આપણે ગાઇએ;
    આપણા તારણના ખડક સમક્ષ હર્ષનાદ કરીએ.
² તેની હજૂરમાં આભારસ્તુતિ સાથે આવીએ;
    અને આપણે તેની સમક્ષ સ્તુતિગાન કરીએ.
³ કારણ, યહોવા મહાન દેવ છે;
    તે સર્વ દેવો પર મહાન રાજા છે.
⁴ તેમનાં હાથમાં પૃથ્વીનાં ઊંડાણો છે;
    અને ઊંચા પર્વતોના માલિક પણ તે છે.
⁵ જેણે સમુદ્ર બનાવ્યો અને કોરી ભૂમિ
    પણ બનાવી તેમના તે માલિક છે.
⁶ આવો આપણે તેને ભજીએ અને નમીએ;
    ને આપણા કર્તા યહોવાને ઘૂંટણિયે પડીએ.
⁷ કારણ તે આપણા દેવ છે,
    આપણે તેના ચારાના લોક
    અને તેના હાથના ઘેટાં છીએ.

આજે જો તમે તેની વાણી સાંભળો તો કેવું સારું!
⁸     દેવ કહે છે, “ઇસ્રાએલી લોકોએ અરણ્યમાં મરીબાહમાં તથા માસ્સાહમાં,
    પોતાના હૃદય કઠણ કર્યા, તેવું તમે કરશો નહિ.
⁹ તમારા પિતૃઓએ મારી કસોટી કરી,
    પરંતુ પછીથી તેઓએ જોયું કે હું શું કરી શકું છું!”
¹⁰ યહોવા દેવ કહે છે, “ચાળીસ વર્ષ સુધી મેં તે પેઢીને સહન કરી છે પણ જ્યારે હું તેમનાથી કંટાળ્યો ત્યારે મેં કહ્યું,
    તે લોકો અવિનયી છે.
    તેઓએ મારા માર્ગો કદી શીખ્યાં નથી.
¹¹ મેં મારા અતીશય ક્રોધમાં પ્રતિજ્ઞા લીધી
    કે મેં તેઓ માટે નક્કી કરેલા વિશ્રામમાં વચનનાં દેશમાં,
    તેઓ કદાપિ પ્રવેશ કરશે જ નહિ.”

⁸ તમે મારા મિત્રો પાસે મારો તિરસ્કાર કરાવ્યો છે,
    મારાથી તેઓ દૂર નાસે છે;
હું ફાંદામા ફસાઇ ગયો છું, અને તેમાંથી બહાર નીકળી શકતો નથી.
⁹     દુ:ખને લીધે મારી આંખો ક્ષીણ થાય છે;
હે યહોવા, મેં તને સદા અરજ કરી છે
    અને તારી સંમુખ મેં મારા હાથ જોડ્યા છે.
¹⁰ શું તમે મૂએલા સમક્ષ ચમત્કારો દેખાડશો?
    શું તેઓ ઊઠીને તારી આભારસ્તુતિ કરશે?

¹¹ શું તારી કૃપા કબરમાં કે વિનાશમાં
    તારું વિશ્વાસપણું જાહેરમાં કરવામાં આવશે?
¹² શું અંધકારમાં તારાં કૃત્યો જે આશ્ચર્યકારક છો, તે વિષે,
    અને વિસ્મરણના દેશમાં તમારાં ન્યાયીપણાંનાં કૃત્યો વિષે જણાવવામાં આવે છે?
¹³ પણ, હે યહોવા, સહાય માટે હું વિનંતી કરું છું,
    દરરોજ સવારે મારી પ્રાર્થના તમારી સમક્ષ આવશે.
¹⁴ હે યહોવા, તમે મને તજો છો શા માટે?
    શા માટે તમે તમારું મુખ મારાથી ફેરવો છો?
¹⁵ મારી યુવાવસ્થાથી જ મારા પર દુ:ખ આવી પડ્યાં છે.
    હું તમારા ગુસ્સાથી દુ:ખી થયો છું. હું અસહાય છું.
¹⁶ તમારો ઉગ્ર કોપ મારા પર આવી પડ્યો છે,
    તમારા તરફથી મને ત્રાસ થાય છે;
    અને તેથી હું ભાંગી પડ્યો છું.
¹⁷ મને જળપ્રલયની જેમ દરરોજ ઘેરી લે છે,
    અને તેઓએ મને ડૂબાડી દીધો છે.
¹⁸ તમે મારા મિત્રોને અને સબંધીઓને મારાથી દૂર કર્યા છે.
    ફકત અંધકાર જ મિત્ર તરીકે મારી પાસે છે.

⁴ હું એકજ વસ્તુ માંગુ છું યહોવાથી,
    “મારા જીવનના સર્વ દિવસો પર્યંત
મને યહોવાનાં મંદિરમાં બેસવા દો
    જેથી સદા યહોવાના દિવ્ય સૌંદર્યનું અવલોકન કરી શકું
    અને તેમના પવિત્રસ્થાનની મુલાકાત કરું.”

⁵ સંકટના સમયે તેઓ ખરેખર
    મને પોતાના પવિત્ર મંડપમાં સંતાડી દેશે.
    અને મને તેમની સુરક્ષિત જગાએ લઇ જશે.
⁶ મારા શત્રુઓ મને ઘેરી વળ્યા છે, પણ તેમને હરાવવા યહોવા મારી મદદ કરશે.
    હું તેના મંડપમાં હર્ષનાદ સાથે અર્પણો ચઢાવીશ.
    હું સ્તુતિગીતો ગાઇશ, અને તેઓ જે મારો આભાર યહોવાને વ્યકત કરે.

⁷ હે યહોવા, મારી વિનંતી સાંભળો.
    મારા પર દયા કરીને મને જરૂરી સહાયતા આપો.
⁸ મારું હૃદય તમારા વિષે કહે છે કે તમે ઇચ્છો છો કે અમે તમને શોધીએ, તેથી હે યહોવા,
    હું તમારી પાસે તમારૂં મુખડું શોધવા આવું છું.
⁹ હે યહોવા, હું તમારી પાસે આવું છું.
    તમે તમારું મુખ મારાથી ફેરવશો નહિ.
    તમારા આ સેવક પર ગુસ્સો ન કરો, હે મારા તારણહાર,
મારા દેવ, હવે મને છોડી ન દેતા
    અને મને તજી ન દો.
¹⁰ મારા માતાપિતાએ મને તજી દીધો છે,
    પરંતુ યહોવા મને સંભળશે અને સ્વીકારશે.
¹¹ હે યહોવા, મને કહો, હવે મારે શું કરવું?
    હું શત્રુઓથી ધેરાએલો છું અને તમારી મદદની રાહ જોઉ છું માટે હવે
    મને તમે સત્કર્મના સરળ માર્ગે દોરી જાઓ.
¹² હે યહોવા, મને મારા શત્રુઓના હાથમાં સુપ્રત ન કરો.
    કારણકે તેઓએ મારા ઉપર ખોટા આરોપો મૂક્યાં છે
    તથા તેઓ હંમેશા મને નિષ્ઠુરતાથી ઇજા પહોંચાડવાની યોજનાઓ કરે છે.
¹³ હું આશા રાખું છું કે યહોવા ખરેખર મને ફરીથી છોડાવશે,
    અને હું આ જીવનમાં તેમની દયાનો અનુભવ કરીશ.
¹⁴ તું યહોવાની રાહ જોજે, ધૈર્ય ગુમાવીશ નહિ;
    તેઓ જરૂર આવશે અને તને બચાવશે;
બળવાન થા અને હિંમત રાખ;
    હા, તું યહોવાની રાહ જોજે,
    તેઓ તને સહાય કરશે.

⁴¹ આપણે બે હાથ જોડીને સાચા હૃદયથી.
    સ્વર્ગમાં વસતા દેવને પ્રાર્થના કરીએ.
⁴² અમે બળવો કરીને અપરાધ કર્યો છે;
    અને તમે અમને માફ કર્યા નથી.
⁴³ રોષે ભરાઇને તમે અમારો પીછો કર્યો છે
    અને નિર્દયી રીતે અમારો વધ કર્યો છે.
⁴⁴ તમે રોષના વાદળ પાછળ છુપાઇ ગયા છો;
    જેથી અમારી પ્રાર્થના તમને ભેદીને પહોંચી શકે નહિ.
⁴⁵ તમે અમને પ્રજાઓની વચમાં.
    કચરા અને ઉકરડા જેવા બનાવી મૂક્યા છે.
⁴⁶ અમારી વિરુદ્ધ મુખ ઉઘાડીને અમારા
    સર્વ શત્રુઓએ અમારી હાંસી કરી છે.
⁴⁷ અમે ભયભીત થયા છીએ,
    જાણે અમે ખાડામાં પડી ગયા હોઇએ એવું લાગે છે.
અમે એકલા છીએ
    અને ભાંગી પડ્યા છીએ.
⁴⁸ મારા લોકોનો વિનાશ જોઇને મારી
    આંખોમાંથી આંસુની નદીઓ વહે છે.
⁴⁹ યહોવા આકાશમાંથી
    દ્રષ્ટિ કરીને જુએ ત્યાં સુધી.
⁵⁰ નિરંતર મારી
    આંખમાંથી આંસુઓ વહે છે.
⁵¹ મારી નગરીની સર્વ કુમારીકાઓની દશા
    જોઇને મારી આંખો સૂજી ગઇ છે.
⁵² તેઓ કારણ વિના મારા શત્રુ થયા છે
    અને તેમણે પંખીની જેમ મારો શિકાર કર્યો છે.
⁵³ તેઓએ મને જીવતો ખાડામાં નાખ્યો છે
    અને તેમણે મારા પર પથ્થર ઢાંક્યો છે.
⁵⁴ મારા માથા પર પાણી ફરી વળ્યાં
    અને હું બોલી ઉઠયો કે “હું મરી ગયો છુું.”
⁵⁵ હે યહોવા, કારાગૃહના નીચલા ભોંયરામાંથી.
    મેં તમારા નામનો પોકાર કર્યો.
⁵⁶ હું મદદ માટે ઘા નાખું છું અને મારી અરજ
    સાંભળીને તમે તમારો કાન બંધ ન કરશો.
⁵⁷ તમે ચોક્કસ મારી હાંક સાંભળીને આવ્યા,
    અને કહ્યું પણ ખરુ કે, “ડરીશ નહિ.”
⁵⁸ હે યહોવા! તમે અમારો બચાવ કર્યો છે
    અને મારું જીવન બચાવ્યું છે.