Revised Common Lectionary (Semicontinuous)

Dee Psalme II

Dee 42 Psalm

To dän Haupt Musikaunt, En Nodenkje; fa dee Korah Säns.

¹ Soo aus dee Harsch no dee Woatstreem jescht, soo jescht miene Seel no die, O Gott.

² Mien Seel darscht no die, O Gott, no däm läwendja Gott; waneeha woa ekj kome un fer Gott stone?

³ Miene Trone sent mien Äte jewast Dach en Nacht, wäarent see dän Dachäwa to mie saje: "Wua es dien Gott?"

⁴ Wan ekj dise Dinje behool, jeet ekj miene Seel ut enn mie. Dan ekj wea jewant met dee groote Menj; ekj jinkj met an no Gott sien Hus met dee Stem fonn Freid un Preis, dee Groote Menj dee daut Fast hilde.

⁵ O miene Seel, wuaromm best du doljeschloage enn mie, un deist Stäne enn mie? Hop enn Gott, dan ekj woa am noch danke fa dee Radunk fer dien Jesejcht.

⁶ O mien Gott, miene Seel es ennalijch dol jeschloage; doaromm behool ekj die fonn daut Jordan Launt, un fonn dee Boaj.

⁷ Daut Deepet roopt daut Deepet aun, derjch daut Jelud fonn dee Wotafaul; aul diene Walle, un deepe Walle sent äwe mie jekome.

⁸ Dee Herr Gott woat siene Leeftolijchkjeit aunkommendeare wäarent daen Dach, un enne Nacht woat sien Leet enn mie senne, mien Jebäd to dän Gott fonn mien Läwe.

⁹ Ekj woa to Gott mien groota Steen saje, "Wauromm hast du fonn mie fejäte? Wuaromm go ekj enn Trau wan dee Fient mie bedrekjt?"

¹⁰ Miene Fiend doone mie aulahaunt fäaschmiete soo aus met Knoakes tweibräakje –wan see jieda Dach to mie saje: "Wua es nu dien Gott?"

¹¹ O miene Seel, wuaromm best du doljeschloage enn mie, un deist Stäne enn mie? Dan ekj woa am noch preise, dee Radunk fa mien Jesejcht un mien Gott.

Dee 43 Psalm

¹ Doo mie rejchte, O Gott, un doo fa mie ennstone jäajen ne Natsjoon dee nijch jetlijch es, rad mie fonn däm Lestfola un onnjerajchta Maun.

² Dan bloos du best dee Gott fonn miene Krauft; wuaromm deist du mie wajch schmiete? Wuraomm doo ekj dän dachäwa truare äwa daut Älend fonn daen Fient?

³ O schekj dien Lijcht un diene Woarheit erut; lot dän mie leide un mie no dien Heilja Boajch brinje, un no diene Fesaumlunjs Staed.

⁴ Dan woa ekj no Gott sien Aultoa gone, no Gott dee miene Freid un Fejneaje es; Jo, ekj woa die met dee Hoap danke, O Gott mien Gott.

⁵ O miene Seel, wuaromm best du doljeschloage enn mie, un deist Stäne enn mie? Dan ekj woa am noch preise, dee Radunk fa mien Jesejcht un mien Gott.

¹⁷ Oba wan du en Jud jenant best, en felatst die oppem Jesats, en puchst die doamet daut du Gott kjanst,

¹⁸ en weetst waut sien Wele es, en wiels du em Jesats jeleat best kaunst du unjaschiede waut daut baste es,

¹⁹ en best aewazeicht daut du de Blinje leide kaunst, uk en Licht best fa daen, dee em Diestre sent;

²⁰ en Unjarechta fa dee Noare, en Lear fa Kjinja, en hast en Form fonn Erkjantnes en Woarheit em Jesats;

²¹ Wan du dan en aundrem leare deist, deist du die selfst nich leare? Wan du to en aundrem praedje deist daut hee nich staele saul, deist du staele?

²² Du sajchst en Aundrem hee saul nich de Eehe braekje, brakjst du de Eehe? Du hast en Aufshue fa Jetse, oba deist du de Tempels beroowe?

²³ Du puchst die em Jestats, oba deist du Gott spatre doaderch daut du daut Jesats brakjst?

²⁴ Dan Gott sien Nome woat jelastat mank de Heide waeajen junt, so aus et jeshraewe steit.

²⁵ Dee Beschniedunk haft secha en Weat wan du daut Jesats helst, oba wan du daut Jesats aewatraede deist, es diene Beschniedunk ne Onnbeschniedunk jeworde.

²⁶ Doaromm, wan dee, dee nich beschnaede es, dee Jesats Bedinjunje helt, woat am sien Onnbeschnaede senne nich aunjeseene woare aus ne Beschniedunk?

²⁷ En saul nich daut Oonbeschnaedne bie Natua, wan daut daut Jesats helt, die rechte dee du no daut Lata en Beschnaede senne, daut Jesats aewatraede deist?

²⁸ Dan en Jud es nich daut waut fonn Buta to seene es, en dee Beschniedunk es nich waut fonn Bute es;

²⁹ oba en achta Jud es dee, dee ennalich eena es, en de Beschniedunk es daut waut em Hoat es, em Jeist, nich enn Latre, daem sien Riem fonn Gott es, nich fonn Mensche.