Revised Common Lectionary (Semicontinuous)

¹¹ Nimuchijtuk ken se tzuntet; ankichijket ma nikchiwa; niknektuskia ma shinakan ka niyek, ika tesu mas chiupi nupatiw que ne tijtitanijtuk sea tetekia, melka te nitatka. ¹² Muchi tay muneki pal muishmati se titanijtuk muchijki ijtik anmejemet, iwan muchi tanejmachselilis: sejse pal muishmati wan sejse tay tetekia wan tay wejwey. ¹³ Tay metzchijtuk faltaj mas que ne uksejse sennemit; anka ika najasan te nimetzinkakasujtuk iwan nukimil? Shinechtapupulwikan ipanpa tay nimetzinchiwilij!

¹⁴ Niajsituka ukpa anmutech wan ashan niasneki uksenpa, wan te niaw nimetzinkakasua ika te niktemua tay anmupal, sute anmejemet ká nimetzintemua. Ika te yek ma tasentepewakan ne kukunet pal kinmakat ne intejteku, sute ne tetejteku nemit pal tasentepewat ipal ne kukunet. ¹⁵ Naja niaw nitemaka iwan pakilis tay nupal, wan najasan nusan niaw nimutemaka, ka imaku ne anmuajalmaj. Anka su nimetzintasujta mas, nemi pal annechtasujtat mas chiupi? ¹⁶ Ma naka. Naja te nimetzintakimiltijtuk. Melka uni, tinakan ka naja nimetzinshijshikujtuk pal nimetzinhitzkia. ¹⁷ Anka nimetzinhishtilijtuk tatka itech se ká niktitanij anmutech? ¹⁸ Niktajtan Titus wan niktitanij se tuiknew iwan: anka Titus metzinhishtilij tatka? Te timuwikatiwit kenha? Te titaksatiwit tik sanse ujti?

¹⁹ Ikman ankikejketzat ka tinat muchi sema pal tinakat yek anmuwan? Iishpan Teut tik ne Mawaltijtuk titanutzat. Muchi uni, nuyejyektasujtatuk, pal anmuskaliat. ²⁰ Ika nimajmawi ka kwak niwitz te niaw nimetzinhajsi ken niknekiskia wan te anyawit nechajsit ken ankinekiskiat, sute musumalis, kwalan, tatejtenewalis, pupulukalis, muweymatilis, kumunilis; ²¹ ka kwak niajsi, ne Teut yawi nechtemultia senpa anmuishpan wan niaw nichuka ipanpa miak ká tateyekchijtiwit wan te muyulpatatiwit ipanpa ne susulkayu wan tatzinhejenchiwalis wan susultailwitilis ne kichijtiwit.