Revised Common Lectionary (Semicontinuous)
8 Achtu, nikilwia panpadiush ne Teut, itech Yeshu Mawaltijtuk, anmupanpa muchi, ika ne anmutayulmatilis munawatia nujme ne taltikpak. 9 Ika ne Teut, ká ipal nitekiti iwan muchi nuyulu wan nitayeknawatia tay ipal ne ikunew, kimati ka senpa nimetzinhelnamiki. 10 Kwak niknutza ne Teut, senpa niktajtani su ashan weli nechajkawa niaw nipashalua, iwan itaelewilis ne Teut, pal niajsi anmutech, 11 ika nikelewia nimetzinhita pal nimetzintakulia chiupi Ijiutzin pal metzinpalewia, 12 pal kiane welit timusennapaluat anmuwan ijtik anmutayulmatilis wan ijtik ne nupal.
13 Nikneki ma shikmatikan, nukniwan, ka ninak seujseujti ka niasneki anmutech, melka te niwelik hasta ashan, pal nusan nikpia sejse nutakil anmuwan kenha ken iwan uksejse techan. 14 Greciajtakamet wan Indiojmet, ne kimatit wey wan ne melemet, nikinwikilia muchi! 15 Kiane tel, naja niknekiskia nimetzinmaka anmejemet nusan ne yeknawatilis.
16 Ika te nishpinawa ipanpa ne yeknawatilis. Yaja ne itajpal Teut pal kimakishtia muchi ne tayulmatit: ne Yudayujmet achtu, ne Greciajtakamet nusan. 17 Ijtik yaja muneshtia ne itamelakchiwalis ne Teut, sejsenpa iwan tayulmatilis, ken nemi ijkwilujtuk:
"Ká ne yulmelawak, ipanpa tayulmatilis yaja yawi yultuk."
Ne Bibliaj Tik Nawat · © 2008, 2012 Jan Morrow