Revised Common Lectionary (Semicontinuous)

²³ Ipanpa tayulmatilis, kwak nesik Moshe, ne itejteku kinashket yey metzti ika ne kunetzin sujsul yektzin wan te mumutijket ipanpa ne itatuktilis ne tatuktiani. ²⁴ Ipanpa tayulmatilis, kwak weytiak Moshe, inte kinekik ina ka yaja ipiltzin ne isiwapiltzin ne Parao; ²⁵ kishpejpen mas yek taekua kenha ken ne itechan ne Teut, wan tesu ma mukwesu iwan ne tay inteyek ijtik se ratoj, ²⁶ ika kishkejketzki ka ne ikwalan ne Mawaltijtuk mas wey que muchi ne tumin ipal Egipto; ika yaja kikejketza katka ne tashtawilis. ²⁷ Ipanpa tayulmatilis yaja kiajkaw Egipto; inte majmawki ipanpa ne ikwalan ne tatuktiani, ika yaja achka kita katka ne ká inte weli muita, wan chikawayak.

²⁸ Ipanpa tayulmatilis kichijki ne Paskwaj wan kishinij ne esti pal te kinmatuka ne ká kinmiktia katka ne ajachtupunijtuk. ²⁹ Ipanpa tayulmatilis panuket sentapal ne Chiltik At ken su ijtik tal waktuk, wan kwak ne Egiptojtakamet kinekiket kichiwat kenha atukiket.

³⁰ Ipanpa tayulmatilis wetzki ne tepanti ipal Yerijo kwak kiyawalujket chikume wipta. ³¹ Ipanpa tayulmatilis ne siwapala Rajab inte puliwik iwan ne inte tayulmatit kwak yaja kinkwij ne tachianimet iwan nejmachnemilis.