Revised Common Lectionary (Semicontinuous)

11 Kwak titayulmatit, tikmatit ka ijkia tay ne tikchiat wan ka tejkia tay ne inte tikitat, ² ika muitak ka ne noymet yejyek ipanpa ne intayulmatilis.

³ Ipanpa tayulmatilis tikmatit ka muchijki muchi ne taltikpak ika ne Teut inak ma muchiwa, wan ijkiuni tay ne tejemet tikitat inte kiski tik sejse tay walmuneshtiat.

⁴ Ipanpa tayulmatilis Habel kalwikak se tetakulis ipal ne Teut mas yek que Kain wan muilwitij ka yaja yulmelawak. Tikmatit ka ijkia ipanpa ne itejtetakulis ne Teut, wan yajika yaja tanutza melka mikik.

⁵ Ipanpa tayulmatilis, ne Teut kiwikak Hanok iwan ma inte kita mikilis, wan te muajsi ika ne Teut kiwikak iwan, ika kwak inteuk kiwikak, inak ne Teut ka yaja kiwelitak. ⁶ Asu inte nemi tayulmatilis ne Teut inte weli techita yek, ika nemi pal tayulmati ká ne ajsi itech ne Teut ka Yaja nemi wan ka Yaja kintashtawia ne kitajtanit.

⁷ Ipanpa tayulmatilis Noa, kwak muneshtijket sejse tay inteuk muitztuyat, kitakamatki: kiekchijki se takukal pal mupalewia ne ikal, wan ijkiuni ne taltikpak muchijki juzgar, wan muchi muchijki ipal ika yaja yek wan tayulmatini.

⁸ Ipanpa tayulmatilis Abraham takamatki kwak kinutzket pal kisa pashalua hasta se kan yaja yawi kikwi ken ipalwan, wan kiski melka inte kimati kanka yasneki. ⁹ Ipanpa tayulmatilis yaja muchantij tik tepal tal, ijtik ne tal ipal ne promesaj, wan nemik ken ejkuni ijtik tajtawipanti iwan Itzak wan Yakob, ká nusan kikwit uni promesaj, ¹⁰ ika yaja kichia katka ne techan ne kipiatuya itetzilnaj, wan ká ne kitukak wan ká ne kiketzki, ne Teut.

¹¹ Ipanpa tayulmatilis nusan Sara, ká inte welituya kipia, kikwij itajpal pal shinachkisa wan punik kwak yaja lamaj, ika yaja inak ka yek ká ne kichijki prometer. ¹² Neka se ká achka miktuka kipishki pilawan ne mijmiak ken ne sitalmet tik ne ilwikak, wan te weli mupuat ken ne ashal ne muajsi iten ne weyat.