Revised Common Lectionary (Complementary)

Dee 16 Psalm

En Jeheemnet Schats fonn Doft.

¹ Doo äwa mie wajchta, O Gott, dan ekj sat mien Toofetruehe enn die.

² Du hast to däm Herr Gott jesajcht: "Du best mien Herr, ekj ha kjeen Goots buta enn die."

³ Waut dee Heilje enne Ead aunbelanjt, dee sent dee fetraflijche, enn wäm aul mien Fejneaje es.

⁴ Soone äa Trua saul femeat woare dee en aundra Gott hinjaraun rane. Ekj woa äa Drunk Opfa fonn Bloot nijch utjeete, un äare Nomes woare nijch ut miene Leppe kome.

⁵ Dee Herr Gott es daut Poat fonn mien Oawgoot un mien Kuffel. Du woascht sejchalijch miene Tookunft bestädje.

⁶ Dee Lienjes sent mie enn scheene Städe jefolle, jo, ekj ha en straumet Oawgoot.

⁷ Ekj woa däm Herr Gott säajne dee mie Rot jeft; mien Hoat deit mie uk enne Nacht beleare.

⁸ Ekj ha däm Herr Gott emma fer mie, dan hee es bie miene rajchte Haunt, ekj woa nijch jescheddat woare.

⁹ Daut es dee Uaosoak wuaromm mien Hoat froo es, en miene Harlijchkjeit freit sikj, mien Fleesch saul uk en Hopninj ruehe,

¹⁰ Dan du woascht miene Seel nijch enn dän Grauf lote, du woascht dien Heilja nijch lote Fewäsunk seene.

¹¹ Du woascht mie dän Laewes Wajch ennleare, enn dien Doasenne es folle Freid; bie diene rajchte Haunt es Fejneaje fa emma en emma.

¹¹ Aun eena Haunt steit dee Priesta Dach fa Dach en deent, en opfat foaken dee selwje Schlachtopfa dee niemols kjenne de Sind wajch naeme;

¹² oba aune aundre Haunt, disa haft een Opfa fa Sind jebrocht, en haft sikj fa emma doljesat to Gott siene rachte Haunt;

¹³ en luat fonn dan bott siene Fiend am sele to ne Footbenk jemoakt woare.

¹⁴ Dan derch een Opfa haft hee dee, dee jeheilicht woare, fa emma follkome jemoakt.

¹⁵ Dit bediedent zeicht onns uk dee Heilje Jeist, dan no daem daut hee jesajcht haud: "Dit es daut Tastament daut ekj no dise Doag moake woa, sajcht de Herr; Ekj woa miene Jeboote enn aeare Hoate jaewe, en uk enn aea Senn enenn schriewe,

¹⁷ en aeare Sind, en aeare Gottloosichkjeit woa ekj nich meeha behoole."

¹⁸ Nu wua doa fejaewunk es fa dise, jeft daut kjeen Opfa meeha fa Sind.

¹⁹ Doaromm, Breeda, wiel wie nu daut toofetruehe ha enn daut aule heilichste enenn to gone derch Jesus sien Bloot,

²⁰ daut hee ennjesaeajent haft fa onns, en Wajch dee fresch en laewendich es, derch dee Gerdien - daut heet, sien Lief -;

²¹ en ha en groota Huagapriesta aewa Gott sien Hus,

²² dan wel wie noda kome met en woarhauftjet Hoat emm folle Fetruehe emm Gloowe, emm Hoat bespretst fonn en onnreinet Jewesse, en onns Lief jewossche met reinet Wota,

²³ dan wel wie onns Bekjantnes aun dee Hopninj faust hoole oone notolote, dan dee daut Fespraeakje jeef es Tru,

²⁴ en wel wie uk eena daem aundra betrachte daut wie onns unjarenaunda Moot toospraeakje to Leew en goode Woakje,

²⁵ en nich onnse Fesaumlunge to felote, soo aus walkje aeare Mood es, oba onns eena daem aundra ermuntre, en soo fael meeha aus wie seene daut dee Dach noda kjemt.

13 Aus hee utem Tempel rut jinkj, saed eena fonn siene Jinja to am: "Kjikj, wautfonne groote Steena en Jebieda!"

² En Jesus saed to am: "Sitst du aul dise groote Jebieda? Opp kjeen wajch woat hia een Steen oppem aundra bliewe, daut nich woat doljeschmaete woare."

³ Aus hee oppem Eeljboajch saut jaeajenaewa fomm Tempel, kjeeme Peeta en Jakoobus en Jehaun en Aundrees enn Priewaut no am, en fruage:

⁴ "Saj onns, waneeha woat dit senne, en waut es daut Teakjen wan dit aula paseare woat?"

⁵ En Jesus funk aun to an to saje: "Seet doano daut kjeena junt feleide woat.

⁶ Fael woare enn mien Nome kome, en saje: 'Ekj sie dee,' en woare fael feleide.

⁷ Oba wan jie fonn Kjrich en Kjrichsjeschrecht heare, siet nich oppjeraeacht, dan soont mott paseare, oba daut es noch nich daut Enj.

⁸ Dan Natsjoon woat jaeajen Natsjoon oppstone, en Kjeenichrikj jaeajen Kjeenichrikj. Doa woare Eadbaebe senne opp feschiedenste Staede, en woat Hungaschnoot senne; dit es aules daut Aunfank fonn grootet Noot.