Revised Common Lectionary (Complementary)

Dee 51 Psalm

To dän Haupt Musikaunt, en Psalm fonn Doft – Aus Natan dee Profeet no am kjeen no däm daut hee Fekjea haud jehaut met Batseeba.

¹ Sie jnädijch to mie O Gott, no dien Erboarme, no diene groote leeftolje Erboarmunje, doo miene Äweträdunje utlasche.

² Wausch mie gausentgoa fonn mien Beeset, un moak mie rein fonn miene Sind.

³ Dan ekj doo miene Äwträdunge bekjane; miene Sind es emma fer mie.

⁴ Jäajen die, un die auleen, ha ekj jesindijcht un Beeset jedone enn diene Uage; daut du muchst jerajchtfoadijcht senne wan du rätst, un kloa senne wan du rejchte deist.

⁵ See, ekj wort enne Sind jebuare, un miene Mutta deed mie enn Sind bejriepe.

⁶ See, du deist Woarheit felange enn daut ennalijchet, un enn daut festoakne deist du mie Weisheit leare.

⁷ Reinj mie met Iesopp, un ekj woa rein senne, wausch mie, un ekj woa witta senne aus Schnee.

⁸ Moak mie foll Freid un froo senne to heare, daut dee Knoakes dee du jebroake hast sikj freihe kjenne.

⁹ Festäakj dien Jesejcht fonn miene Sind, un doo aul miene Onnjerajchtijchkjeite utlasche.

¹⁰ Erschauf enn mie en reinet Hoat, O Gott; un doo en staunthauftja Jeist enn mie nie moake.

¹¹ Doo mie nijch fonn dien Doasenne wajch schmiete, un nem dien Heilje Jeist nijch fonn mie.

¹² Jeff mie wada dee Freid fonn diene Radunk, un hool mie opprajcht met dien welja Jeist.

¹³ Dan woa ekj Äwaträda enn dien Wajch unjarejchte; en Sinda woare to die bekjeat woare.

¹⁴ Rad mie fonn dee Schult fonn Bloot fejeete, O Gott; O Gott miene Radunk; miene Tunj woat äwalud sinje fonn diene Jerajchtijchkjeit.

¹⁵ O Herr, moak miene Leppe op, un mien Mul woat dien Preis fäa brinje.

¹⁶ Dan du west nijch Opfa ha, sest wudd ekj daut jaewe; du hast kjeen Fejneaje enn Braunt Opfa.

¹⁷ Gott sien Opfa es en jebroakna Jeist; en jebroaknet un Buessfoadjet Hoat, O Gott, woascht du nijch fe-achte.

¹⁸ Doo Goots enn dien gooda Plezhea to Zion; bu dee Jerusalem Wenj opp.

¹⁹ Dan woascht du en Jefaule ha aun dee Jerajchtijchkjeits Opfa, met Braunt Opfa un gaunse Opfa; dan woare see Bolles opfre opp dien Aultoa.

¹⁷ Oba aus dee Tiet dicht bie wea fa daut waut Gott Obraum fesproake haud, woss daut Follkj en femead sikj en Ejipte,

¹⁸ bott doa en aundra Kjeenich aewa Ejipte kjeem dee Joosef nich kjand.

¹⁹ Disa jinkj schlajcht en hinjalestich met onns Follkj omm, daut see aeare Kjinja sulle rut sate daut dee nich sulle laewe bliewe.

²⁰ To dee Tiet wea Mooses jebure, en Gott haud en Jefaule aun am; en am wort fa dree Moonat enn sien Foda sien Hus oppjebrocht.

²¹ En aus hee rut jesat wea, neem Farao sien Dochta am wajch en trok am opp aus aea eajna Saen.

²² En Mooses wort jeleat enn aul dee Ejipte aeare Weisheit, en wea kjraftich enn siene Wead en Woakje.

²³ Aus hee featich Yoa oolt wea, kjeem am daut em Hoat enenn siene Breeda, dee Iesrael Saens, to beseakje.

²⁴ En aus hee sach daut eena Onnracht liede deed, jinkj hee daem to halpe dee Onnracht leet, en schluach daen Ejipta doot.

²⁵ Nu docht hee daut siene Breeda festone wudde daut Gott an rade wudd derch siene Haunt, oba dee festunnde daut nich.

²⁶ De naeakste Dach kjeem hee aus twee sikj streede, en proowd an toop to brinje, to Fraed to kome, en saed: "Jie sent Breeda; wuaromm doo jie eena daem aundra Schode?"

²⁷ Oba dee, dee sien Naeakjste haud Schode jedone, schuppst am wajch, en saed to am: 'Waea haft die aus en Harscha oda Rechta aewa onns jemoakt? West du mie uk doot schlone so aus du jistre daen Ejipta doot schluachst?'

²⁹ Don retst Mooses ut aus hee daut head, en wort so aus en Framda en Miedean, en haud doa twee Saens.