Revised Common Lectionary (Complementary)
दाऊदको भजन।
26 हे परमप्रभु मेरो न्याय गर्नुहोस्।
म चोखो भएर बाँचेको छु भनेर प्रमाणित गर्नुहोस्।
म परमप्रभुमा भरोसा गर्न कहिल्यै चुकेको छैन।
2 हे परमप्रभु प्रयास गरेर मलाई जाँच गर्नुहोस्।
मेरो मन र हृदय जाँच्न नियालेर हेर्नुहोस्।
3 मैले तपाईंको साँच्चो प्रेम कहिल्यै बिर्सिएको छैन,
अनि तपाईंको विश्वासले मेरो सारा जीवनलाई डोर्याइरहेको छ।
4 म ती व्यर्थका मानिसहरू मध्येको होइनँ।
म दुष्टहरूका संगतलाई घृणा गर्छु।
5 म ती कुकर्मीहरूको समुदायलाई घृणा गर्छु।
म ती ठग धूर्तहरूको समुदायहरूमा सामेल छैनँ।
6 हे परमप्रभु, म चोखो छु भनेर देखाउनलाई मेरो हातहरू धोई दिनुहोस्,
म तपाईंको वेदीको वरिपरि हिँड्न सकुँ।
7 हे परमप्रभु, म तपाईंको महिमाको गीत गाउँछु।
म ती अद्भूत सृजनाहरूका गीत गाउँछु जुन सबै तपाईंले सृष्टि गर्नुभयो।
8 हे परमप्रभु म तपाईंको मन्दिरलाई प्रेम गर्दछु।
म तपाईंको महिमापूर्ण पाललाई प्रेम गर्दछु।
9 हे परमप्रभु, मलाई पापीहरूसित सजाय नदिनुहोस्।
ती हत्याराहरू सँगै मलाई नमार्नुहोस्।
10 ती पापीहरूले अन्य मानिसहरूलाई ठग्न सक्छन।
तिनीहरूले नीच काम गर्न पैसाहरू लिनसक्छन्।
11 तर म निर्दोष छु।
यसैले परमेश्वरको म प्रति कृपा रहोस् र रक्षा गर्नुहोस्।
12 म सबै विपदहरूबाट सुरक्षित छु।
हे परमप्रभु, म तपाईंका मानिसहरूको महासभामा, बोलाइएकाहरूको माझमा जब उभिन्छु,
त्यहाँ तपाईंको प्रशंसा गर्नेछु।
एदोम दण्डित हुनेछ
1 यो ओबदियाको दर्शन हो। परमप्रभु मेरा मालिकले एदोमको विषयमा यसो भन्नुहुन्छः
हामीले परमप्रभु परमेश्वरबाट एउटा विवरण सुन्यौ।
देशहरूमा एउटा राजदूत पठाइएको थियो।
उनले भने, “आऊ, एदोमको बिरूद्ध युद्ध गरौं।”
परमप्रभु एदोमसँग कुरा गर्नुहुन्छ
2 “एदोम, म तिमीलाई सब भन्दा सानो देश बनाई दिनेछु।
मानिसहरूले तिमीलाई घृणा गर्नेछन्।
3 तिम्रो आफ्नो घमण्डले तिमीलाई धोका दिएकोछ।
तिमी अग्लो पहडहरूको गुफामाहरू बस्नेछौ।
तिम्रो घर पहाको अग्लाईमा छ
र तिमी आफ्नो मनमा भन्छौ कि
‘मलाई कसैले पनि तल जमीनमा खसाल्न सक्तैंन।’”
एदोमलाई तल झारिनेछ
4 परमेश्वर परमप्रभु भन्नुहुन्छ:
“यद्यपि तिमीले चील जस्तै माथि उड्यौ,
अनि आफ्नो गुँड ताराहरूको बीचमा बनायौ भने पनि,
म तिमीलाई त्यहाँबाट तल ल्याउँनेछु।
5 तिमी साँच्चै नै सर्वनाश हुनेछौ!
हेर यदि कुनै चोर तिमी कहाँ आए,
जब राती डाकु आए,
तिनीहरू आफ्नो निम्ति यथेष्ट हुने मात्र लुटेर जानेछ।
यदि तिम्रो दाखको बारीमा दाख चोर्न आए दाख टिपी सकेपछि
उसले पनि आफ्नो पछाडी केही नकेही छोडेर जान्छ।
6 तर हे एसाव! तिमीबाट तिम्रो सबै कुरो खोसिनेछ।
मानिसहरूले लुकाएको सबै भण्डार खोजेर निकाल्नेछन्,
अनि सबै भेट्उनेछन्।
7 तिम्रा मित्र राष्ट्रहरूले तिमीलाई आक्रमण गर्छन्
र सिमानाबाट तिमीलाई तान्छन्।
तिनीहरू तिम्रा मित्रहरू हुन् भनी मानिएका छन्।
तर तिनीहरूले तिमीलाई धोका दिन्छन्,
र तिमीलाई पराजय गर्छन्।
ती जसले तिम्रो रोटी तिमीसित मिलेर खान्छन्
तिनीहरूले तिम्रो विरूद्ध पड्यन्त्र गरिरहेका छन्।
र तिमीलाई त्यो थाहासम्म पनि हुँदैन।”
8 परमप्रभु भन्नुहुन्छ, “त्यस दिन
एदोमको बुद्धिमानी मानिसहरूलाई नष्ट पार्नेछु
अनि एसावको पहाडबाट समझदार मानिसहरूलाई नष्ट पार्नेछु।
9 त्यस समय तेमान,
तिम्रो शक्तिशाली मानिसहरू डराउँने छन्।
अनि एसाव पहाडको प्रत्येक मानिस नष्ट हुनेछन्।
विशाल भीड
9 त्यासपछि मैले हेरें, अनि त्यहाँ कसैले गनिनसक्ने मानिसहरू थिए। तिनीहरू पृथ्वीका हरेक राष्ट्र, जाति, कूल अनि विभिन्न भाषाका मानिसहरू थिए। तिनीहरू सिंहासन अनि भेंडा़को पाठा सामुन्ने उभिरहेका थिए। तिनीहरू सबै सेतो पोशाकमा थिए अनि तिनीहरूका हातमा खजूरका हाँगा थिए। 10 तिनीहरू ठूलो स्वरमा कराए, “हाम्रा परमेश्वर जो सिंहासनमा विराजमान हुनुहुन्छ अनि भेंडा़को पाठाको जय होस्।”
11 अग्रजहरू अनि ती चार सजीव वस्तुहरू त्यहाँ थिए। सबै स्वर्गदूतहरू तिनीहरूको अघि सिंहासनको वरिपरि थिए। ती स्वर्गदूतहरूले सिंहासनको अघि घुँडा टेके अनि परमेश्वरको उपासना गरे। 12 तिनीहरूले भने, “आमिन! प्रशंसा, महिमा, ज्ञान, धन्यवाद, सम्मान, शक्ति अनि पराक्रम सदा-सर्वदा हाम्रा परमेश्वरलाई रहोस्। आमिन।”
13 तब एकजना अग्रजले मलाई सोधे, “यी सेता पोशाकका मानिसहरू को हुन्? तिनीहरू कहाँवाट आएका हुन्?”
14 मैले उतर दिएँ, “महाशय, तपाईंले चिन्नुहुन्छ।”
अनि अग्रजले भने, “यी ती मानिसहरू हुन् जसले महा-यातना भोगेर आएका छन्। तिनीहरूले भेंडा़को रगतले आफ्ना पोशाक धोएका छन्। अब तिनीहरू शुद्ध अनि सेता भएका छन्। 15 यसर्थ अहिले यी मानिसहरू परमेश्वरको सिंहासनको सामुन्ने छन्। तिनीहरू दिन रात परमेश्वरको उपासना उहाँको मन्दिरमा गर्छन्। अनि उनी एक, जो सिंहासनमा बस्छन् तिनीहरूलाई रक्षा गर्नेछन्। 16 तिनीहरूले कहिल्यै भोकाएको महशुस गर्ने छैनन्। तिनीहरू फेरि कहिल्यै तृषित हुने छैनन्। सूर्यले तिनीहरूलाई कहिले क्षति पुर्याउने छैन। तिनीहरूलाई गर्मिले पोल्ने छैन। 17 सिंहासनको माझमा भएको भेंडा़को पाठा तिनीहरूको गोठालो हुनुहुनेछ। उनले तिनीहरूलाई पानीको मुलतिर लानेछन् जसले जीवन प्रदान गर्नेछन्। अनि परमेश्वरले तिनीहरूका आँखाबाट प्रत्येक थोपा आँसु पुछिदिनेछन्।”
© 2004, 2010 Bible League International