Revised Common Lectionary (Complementary)

Jun kanbil tiˈj itzˈjlenel tuj cyamecy

¹⁸ Yajcˈatltzen bix e pon jun clojxin xjal, saduceo tbi cyclojxin, tiˈ Jesús. Ejeeˈtzen xinj e kbante ka oj tcyim jun xjal, biˈx ccymel junx maj. Mintiiˈ tuˈn tjatz itzˈj. Bix e ponkexin te kˈolcˈa cˈoˈbil tuj tbe Jesús tuya cyyolxin. Tz̈ikexin cyjulu:

¹⁹ ―Xnakˈtzal, o cyaj ttzˈiˈben Moisés ka jun xinak najlel ma cyim, bix min‑al tcwal tuya t‑xuˈl, il tiˈj tuˈn tmaje xuuj tuya jun titzˈen ma jun ttzicy cyimne tuˈn titzˈj tal xuuj. Yaltzen tneel tal xuuj n‑octltzen te tcwal ktzan tchmil xuuj te cˈojlal txˈotxˈ bix tuˈn miˈn txiˈ tzˈak tiyˈjil cyimne. ²⁰ Jaxse baˈnte, attzen jun maj at wuuk xjal cyitzˈen cyiib. Ja tzunj xin tneel e majexin, pero bix e cyimxin, bix min e cyaj jun tcwalxin. ²¹ Entonces bix e maje viuda tuya tneel titzˈen ktzan tchmil xuuj. Pero jax bix e cyimtlxin minxn‑al tal xuuj itzˈj. Juˈxtl e baj tuya tcab cyitzˈenxin. ²² E majekexin cywuukelxin tuya xuuj, bix min‑alx jun cyexin itzˈj tcwal tuya xuuj. Mancˈbiltzen bix e cyim xuuj. ²³ Baˈntzete. Pero ojtzen cyjatz itzˈj xjal juntl maj, ¿altzenle jun cyexin cˈoquel te tchmilxuj tiˈj cywuukelxin e maje tuyaxuj?―tz̈i tzunkexin te Jesús te kˈilbel tipemalxin.

²⁴ Pero bix aj ttzakˈbeˈn Jesús:

―Junxse maj tzpetpajninkey, cuma min cytzkiˈna ti toc tuˈn tyol Dios, bix min cytzkiˈna ka tuˈn tipemal Dios baˈn tjatza itzˈjtl t‑xumlal jun xjal cyimne. ²⁵ Oj cyjatz itzˈj cyimne juntl maj, jun wikxitlte chunkˈlal. Xuujle, xinakle, mlay chi majecye juntl maj, tise ke tsanjel Dios tuj cyaˈj min chi oc maje. ²⁶ Cxeˈltzen nkbaˈn cyey ka il tiˈj chi jawetz itzˈj cyimne juntl maj. ¿Bajxpatzen txaˈ cycyeˈyena tyol Dios e cyaj ttzˈiˈben Moisés ti toc tuˈn Dios tej tetz yolenxin tuya Moisés tuj tken kˈakˈ tuj chˈiˈx? Tz̈i Dios cyjulu: “Inayen wej Tdios Abraham, bix te Isaac, bix te Jacob,” tz̈i Dios te Moisés tuj tken kˈakˈ. Juˈtzen e xaˈ tkbaˈn Dios cuma iˈtzx Abraham, Isaac bix Jacob tuj juntl chunkˈlal. ²⁷ Cycyeˈnc tzuna Dios, yaaˈn Tdios cyimne texin, sino Tdios iˈtz texin. Juˈ tzunj tzpetpajninx ke cyey―tz̈i Jesús cye xjal saduceo.