Revised Common Lectionary (Complementary)

Dee 75 Psalm

To dän Haupt Musikaunt. Doo nijch fenijchte. En Psalm von Asaf, en Leet.

¹ Wie ha die Dank jejäft, O Gott; wie ha die jepreist; dan dien Nome is dijchtbie; diene wundafolle Woakje sent fonn jerät worde.

² Wan ekj dee rajchte Tiet näme woa, dan woa ekj enn Jerajchtijchkjeit rejchte.

³ De Ead, un aul dee, dee doabenne wone, sent feschmolte; ekj ha dee Stendasch faust jesalt. Selah

⁴ Ekj säd to dee Stollte: "Siet nijch stollt;" un to dee Gottloose: "doot jun Huarn nijch opphäwe."

⁵ Doot jun Huarn nijch huach opphäwe, un doot nijch met en stiewet Jnekj räde.

⁶ Dan Huaget kjemt nijch fomm Ooste, oda fomm Waste, uck nijch fonn dee Wiltnes;

⁷ Oba Gott es dee Rejchta, hee deit disen rauf steete, un daem näakjsta nehejcht häwe.

⁸ Dan doa es en Kuffel enn däm Herr Gott siene Haunt, un dee Wien deit Schume, daut es em folle ennjereat; un hee deit daut utjeete doafonn; sejchalijch motte aul dee Gottloose doafonn drinkje bottet aules wajch es.

⁹ Oba ekj woa fa emma zeije, ekj woa Preis sinje to Joakopp sien Gott.

¹⁰ En ekj woa aul fonn dee Gottloose äare Heanna aufschniede, oba dee Jerajchte äare Heanna woare oppjehowe woare.

²¹ Sajcht mie, jie, dee jie unja daut Jesats wele senne: hea jie daut Jesats nich?

²² Dan daut steit jeschraewe daut Obraum twee Saens haud; eent derch daut Deenstmaeakje, en dee aundra derch dee Fru dee frie wea.

²³ Oba dee fonn daut Deenstmaeakje, wea no daut Fleesch jebuare; en dee fonn dee Fru dee frie wea, derch daut Fespraeakje.

²⁴ Dit haft en biltlichet Senn: dan dise bediede twee Tastamente, eent fonn daem Boajch Sienajie, daut Sklowerie bringt; daut es dee Hagar;

²⁵ dan Hagar es dee Boajch Sienajie enn Arabean; en stalt dee fonndoagsche Staut Jerusalem faea, dan see deent aus en Sklow met aeare Kjinje.

²⁶ Oba daut Jerusalem fonn bowe es frie, en daut es onnse Mutta;

²⁷ Dan daut steit jeschraewe: "Sie froo, du Onnfruchtboare, dee du nich jebuare hast; jubel en schrie ut Freid; dan dee Eensaume haft fael meeha Kjinja aus dee, dee en Maun haft".

²⁸ Oba, breeda, jie sent Fespraeakunjs Kjinja, so aus Iesak wea.

²⁹ Oba soo aus donn: dee, dee no daut Fleesch jebuare wea, fefoljd daem dee nom Jeist jebuare wea, soo esset uk nu.

³⁰ Oba waut sajcht dee Schreft: "Schekjt daut Deenstmaeakje en aea Saen rut; dan daut Deenstmaeakje aea Saen saul nich met daem Saen toop oawe dee fonn dee friehe Fru jebuare es".

³⁰ Aulso, Breeda, wie sent nich Kjinje fonn daut Deenstmaeakje, oba fonn dee Fru dee Frie es.

5 Christus haft onns frie jemoakt frie to senne; doaromm lot junt nich wada met en Slowejoch bewekle.