Revised Common Lectionary (Complementary)

Dee 114 Psalm

¹ Aus Iesrael ut Iejipte rut kjeem, Joakopp sien Hushault fonn daut Folkj met ne framde Sproak;

² Donn wea Juda siene Fesaumlunks Städ; Iesrael sien Kjeenijchrikj.

³ Dee See kjikjt un feschwunk, dee Jordan dreid sikj trigj;

⁴ Dee Boaj huppste soo aus Kosebakj; dee läaje Boaj soo aus Lama!

⁵ Waut wea die, O See, daut du feschwungst? O Jordan, daut du trigj dreisd?

⁶ O Boaj daut jie soo huppste aus Kosebakj? O läje Boaj soo aus Lama?

⁷ Tsetta, O Ead, fer däm Herr Gott sien Jesejcht, fonn Joakopp sien Herr Gott sien Jesejcht;

⁸ dee daut Steen to en Wotapuddel muak; dee hoada Steen to ne Wotakjwal.

³⁸ Donn auntwuade walkje fonn dee Schreftjeleade en Farisaea en saede to am: "Leara, wie wudde jearen en Teakjen fonn die seene."

³⁹ Oba Jesus auntwuad en saed to an: "En beeset en eehebraeakjarischet Jeschlajcht seakjt en Teakjen, oba an woat kjeen Teakjen jejaeft woare buta daut fonn daem Profeet Joona.

⁴⁰ Dan soo aus Joona dree Doag en dree Nacht enn daem groota Fesch sien Buk wea, soo woat dee Menschesaen dree Doag en dree Nacht enn daut Hoat fonne Ead senne.

⁴¹ Dee Mana fonn Nienawie woare opp stone em Jerecht met dit Jeschlajcht en woare daut fedaume; dan see deede Buesse aus Joona to an praedjd; en kjikjt! hia es eena dee jrata es aus Joona wea.

⁴² Dee Kjeenijin utem Siede woat opp stone em Jerecht met dit Jeschlajcht en woatet fedaume, dan see kjeem fom Enj fonne Welt Salomo siene Weisheit to heare, en kjikjt! hia es eena dee jrata es aus Salomo.