Revised Common Lectionary (Complementary)

Dee 143 Psalm

En Psalm fonn Doft.

¹ Hea mien Jebäd, O Herr Gott; jeff Ua to mien prachre; doo mie auntwuate enn diene Truheit, un enn diene Jerajchtijchkjeit;

² un doo nijch enn Jerjecht gone met dien Deena; dan kjeena läft rajcht fer die.

³ Dan dee Fient haft miene Seel nojejoacht; hee haft mien Läwe dol jeschloage bott dee Ead; hee haft mie jemoakt enn Diestanis läwe, soo aus dee freajoasche Doodje.

⁴ Un miene Seel enn mie es beschwiemt; mien Jeist enn mie es bedutst.

⁵ Ekj behool dee freajoasche Doag; ekj bedenkj aul diene Woakje, ekj besenn mie äwa daut Woakj fonn diene Henj.

⁶ Ekj spreed miene Henj ut fer die, miene Seel darscht fa die soo aus en darschtjet Launt. Selah.

⁷ O Herr Gott, doo mie schwind auntwuate; mien Jeist fesajcht enn mie; doo dien Jesejcht nijch fonn mie festäakje, sonnst sie ekj soo aus dee, dee rauf gone no dee Kul.

⁸ Halp mie enn dän Morje dien Erboarme to erfoare; dan ekj ha mien Fetruhe enn die, halp mie dän Wajch to weete enn dän ekj waundle saul; dan ekj häw miene Seel opp no die.

⁹ O Herr Gott, rad mie fonn miene Fiend; ekj ha mie enn die festoake.

¹⁰ Unjarejcht mie dien Welle to doone; dan du best mien Gott; dien Jeist es Goot; leid mie enn daut Launt fonn Jerejcht.

¹¹ O Herr Gott, omm dien Nome haulwe, moak mie Läwendijch; enn diene Jerajchtijchkjeit, bring miene Seel rut ut Trubbel.

¹² Un enn dien Erboarme schnied miene Fiend auf; un doo aul dän fenijchte dee miene Seel tualeide; dan ekj sie dien Deena.

²³ Daen selwje Dach kjeeme Sadutsaea, dee saje daut doa kjeen oppstone fom Doot es, no am met ne Froag,

²⁴ en saede: "Leara: Mooses saed daut wan en Maun storf en kjeene Kjinje haud, dan sull sien Brooda siene Fru friehe en fa sien Brooda nokome fesorje.

²⁵ Nu weare doa saewen Breeda mank onns; dee easchta befried sikj, en storf oone Kjinje, en aewajeef siene Fru aun sien Brooda.

²⁶ En soo pasead daut met daen tweeda, en daen dreda, bott daen saewenda.

²⁷ Tolatst storf dee Fru.

²⁸ Waems siene Fru fonn dee saewen woat see nu senne wan dee Doodes oppstone, dan aula haude aea?"

²⁹ Jesus auntwuad en saed to an: "Jie erre, en kjanne nich de Schreft en Gott siene Macht.

³⁰ Dan enn daut Oppstone fomm Doot befriehe see sikj nich, en jaewe sikj uk nich tom befriehe, oba sent soo aus dee Enjel em Himel.

³¹ Oba waut daut oppstone fomm Doot aunbelangt, ha jie nich jelaest waut Gott to junt saed:

³² 'Ekj sie Obraum sien Gott, en Iesak sien Gott, en Joakopp sien Gott'? Hee es nich dee Doodje aea Gott, oba dee Laewendje aeara."

³³ Aus daut Follkj dee Lea head, erstaunde see doaewa.