Revised Common Lectionary (Complementary)

Dee 72 Psalm

Fonn Salamo.

¹ Jeff däm Kjeenijch diene Jerejchte, O Gott; un diene Jerajchtijchkjeit to däm Kjeenijch sien Sän.

² Hee saul dien Folkj enn Jerajchtijchkjeit rejchte, un diene Oame enn rajchtet Jerejcht.

³ Dee Boaj woare Fräd nehejcht häwe to daut Folkj, un dee läaje Boaj derjch Jerajchtijchkjeit.

⁴ Dee woat dee Oame fonn daut Folkj rajchtet jerejcht jäwe; un hee woat dee Bederftje äare Säns rade; un hee woat däm rejchte dee bedrekje deit

⁵ Dee sele die ferjchte met dee Sonn; un fer dee Mon fa aule Jeschlajchte.

⁶ Hee woat rauf kome soo aus Räajen opp daut jeheiwdet Graus; soo aus dee korte Räajen dee de Ead wotre.

⁷ Dee Jerajchte saulet jelinje enn siene Doag, met fäl Fräd, bottet nijch dee Mon es.

⁸ Hee saul uk fonn een See bottem däm aundra rejeare, un fonn dän Riefa botte Enj fonne Ead.

⁹ Soone dee enne Wiltnes wone, woare sikj fer am dol beaje; aule Natsjoone woare am deene.

¹⁰ Dee Tarschisch Kjeenije enn dee Insle woare am Gow brinje, dee Scheeba un Seena Kjeenijchs woare Gow opfre.

¹¹ Jo, aule Kjeenije woare fer am dol faule; aule Natsjoone woare am deene.

¹² Dan Hee woat dee Bederftje dee schriehe rade, un dee Oame dee kjeen Helpe ha.

¹³ Hee woat Metliet habe opp dee Oame un Bederftje; un Hee deit dee Bederftje äare Seele rade.

¹⁴ Hee woat dee Seele rade fonn Bedrekje un Jewault, un äa Bloot saul kjestlijch senne enn sien Aunseene.

¹⁵ En hee saul läwe, un Golt fonn Scheeba saul to am jejäft woare, un Jebäd saul uk eegol to am jejäft woare; dee saul am de Tietäwa säajne.

¹⁶ Doa saul follet Jetraeajd senne opp dee Boaj Spets, un daut Frucht saul soo senne aus Lebanon; un dän enn dee Grootstaede saulet soo jelinje aus daut Grauss oppe Ead.

¹⁷ Sien Nome saul fa emma duare; sien Nome saul fer dee Sonn bekaunt jemoakt woare; en dee woare sikj selfst saeajne bie am; un aule Natsjoone sele am jesäajent nane.

¹⁸ Jesäajent es Iesrael äa Herr Gott, dee auleen wundafolle Dinej deit.

¹⁹ En jesäajent es sien harlijcha Nome fa emma, un dee gaunse Ead es jefelt met siene Harlijchkjeit!. Amen en Amen.

²⁰ Däm Jesse sien Sän Doft siene Jebäde sent to en Enj jekome.

²³ Derchem Gloowe festuake Mooses siene Elre am fa dree Moonat aus hee jebuare wea, wiel see saje daut hee en scheenet Kjint wea, en see engste sikj nich fa daem Kjeenich sien Befael.

²⁴ Derchem Gloowe, aus Mooses oppjewosse wea, leet hee sikj nich meeha aus Farao siene Dochte aea Saen nane,

²⁵ en waeld sikj leewa met Gott sien Follkj to liede, aus fa en Stootje dee Sind Jenuss to habe;

²⁶ Hee raeakjend fa Christus to liede en fael jratret Rikjdom to senne aus aul daut Iejipteschet Schats, dan hee kjikjt wajch no dee Beloonunk.

²⁷ Derchem Gloowe feleet hee Iejipte, en engst sikj nich fa daem Kjeenich sien Oaja, dan hee hilt ut aus wan hee daem sach dee nich to seene es.

²⁸ Derchem Gloowe hilt hee daut Passafast, en daut Bloot Bespretse, so daut dee, dee aul dee easchtjebuarne ommbrocht, an nich aunreare wudd.

²⁹ Derchem Gloowe jinje see derch daut Roodet Maea aus opp dreaje Ead, waut dee Iejipte uk proowde, oba fedrunke.

³⁰ Derchem Gloowe folle Jieriko aeare Wenj omm, aus see doa fa saewen Doag eromm jinje.

³¹ Derchem Gloowe wort Rahab dee Hua, nich met dee Onnjehuarsaume omm jebrocht, aus see dee Spione oppneem met Fraed.