Revised Common Lectionary (Complementary)

Dee 34 Psalm

En Psalm fonn Doft aus sien Benäme enndad fer Abimilech, un dee am wajch schekjt, en hee jinkj.

¹ Ekj woa däm Herr Gott säajne to aule Tiede. Sien Preis saul emma enn mien Mul senne.

² Miene Seel woat sikj puche enn däm Herr Gott; dee Deemietje sele daut heare un sikj freihe.

³ O feharlijcht däm Herr Gott met mie, un wel wie toop sien Nome opphäwe.

⁴ Ekj socht däm Herr Gott, un hee deed mie auntwuate, un rad mie fonn aul miene Forjcht.

⁵ See kjikjte no am, un weare jefelt met Lijcht; un äare Jesejchte bruckte sikj nijch schäme.

⁶ Dis Oama Mensch roopt, un dee Herr Gott head, un rad am ut aul siene Trubbels.

⁷ Daem Herr Gott sien Enjel loagat runnt omm dän dee am ferjchte, un Hee deit an rade.

⁸ Schmack un see daut dee Herr Gott goot es; jesäajent es dee Maun dee enn am fetruet.

6 Breeda, wan eena enn en Aewetraede aewarauscht es, dan sel jie, dee jie jeistlich sent, am enn en saunftmootje Jeist tracht halpe; en doabie opp die selfst oobacht jaewe, daut du nich uk fesocht woascht.

² Halpt eena daem aundra siene Laust droage, dan doaderch woa jie Christus sien Jesats erfelle.

³ Dan wan irjent waea jleeft dautet fael met am meent, wan hee doch nusscht es, dan teischt hee sikj selfst.

⁴ Oba lot en jeeda eena sien eajnet Woakj unjaseakje, en dan woat hee enn sikj selfst Ea ha, en nich enn en aundrem.

⁵ Dan en jieda eena saul siene eajne Laust droage.

⁶ Lot daem dee enn daut Wuat unjarecht woat, met daem aulet Goodet metdeele dee unjarechte deit.

⁷ Lot junt nich feleide; Gott lat sikj nich spotte! dan wautemma en Mensch seit, daut woat hee uk arnte.

⁸ Dan dee, dee to sien eajnet Fleesch seit, woat fom Fleesch daut Fedoawnes arnte; en dee, dee tom Jeist seit, woat fom daem Jeist daut eewjet Laewe arnte.

⁹ En wel wie nich mootloos woare Goots to doone, dan to rachte Tiet woa wie arnte, wan wie nich oppjaewe.

¹⁰ Doaromm, so aus wie de Jelaeajenheit ha, wel wie goodet doone aun aule Mensche, oba besondasch aun daen dee to dee Gloowes Famielje jeheare.