Revised Common Lectionary (Complementary)

Dee 68 Psalm

To dän Haupt Musikaunt. En Psalm fonn Dift. En Leet.

¹ Gott deit sikj opprejchte, un siene Fiend sent festreit, en dee, dee am hausse, rane fonn am wajch.

² Doo an wajch driewe soo aus Ruak wajch jedräwe woat; soo aus Wauss schmelte deit ferem Fia, soo woare dee Beese ommkome fer Gott sien Doasenne.

³ Oba dee Jerjachte freihe sikj, dee schriehe fa Freid fer Gott; jo, dee juble met Freid.

⁴ Sinjt to Gott, sinjt Preis to sien Nome; häft däm huach dee enne Wiltnes riede deit, derjch Ja, sien Nome; jo, jubelt enn sien Doasenne.

⁵ Gott enn siene heilje Woninj es en Foda to dän dee kjeen Foda ha, un en Rejchte fa dee Wätfruehes.

⁶ Gott moakt daut soo daut dee Eensaume Tus wone kjenne; Hee brinjt dän rut dee met Kjäde jebunje sent, wäarent dee Oppsternootsche enn en dreajet Launt wone,

⁷ O Gott, aus du fer dien Folkj mascheare deetst, aus du derjch dee Wiltnes jinjst. Selah.

⁸ Dee Ead scheddad, un dee Himels folle rauf fer Gott, dis Sienaie fer Gott, Iesrael äa Gott.

⁹ O Gott, du schekjst en groota Räajen, derjch woont du dien Oawgoot bestädje deetst aus dee Meed wea, du deetst dee bestädje.

¹⁰ Diene Fesaumlunj wond doabenne; Du, O Gott hast dien Goodet reed jemoakt fa dee Oame.

¹⁹ Jesäajent es dee Herr; dach fa dach deit hee Lauste droage fa onns, dee Gott fonn onnse Radunk. Selah.

²⁰ Onns Gott es dee Gott fonn Radunk; un daut Looskome fomm Doot jeheat to däm Herr Gott.

2 Donn featean Yoa lota reisd ekj wada no Jerusalm met Barnabas, en neem Tietus uk met;

² en ekj jinkj han derch ne Oppenboarinj; en laed an daut Evanjeelium faea daut ekj mank dee Heide praedj; oba enn Priewaut met daen dee Aunjeseene weare, daut ekj nich fejaefs rand, oda jerant haud.

³ Oba see felangde nich emol daut Tietus, dee met mie wea, sul beschnaede woare wan hee uk Jriechesh wea;

⁴ Oba dee faulsche Breeda dee emm Jeheeme enenn jebrocht weare, en sikj enenn jeschlikjt haude omm onnse Frieheit dee wie enn Christus ha, utospione, omm daut see onns wada fesklowe muchte,

⁵ ha wie onns opp kjeen Wajch hanjejaeft, nae, nich mol fa ne Stund, daut dee Woarheit fom Evanjeelium bie ju bliewe kunn.

⁶ Oba dise, dee schiende waut to senne - [fonn waut fonne Sort see weare moakt mie kjeen unjasheet, Gott sit kjeene Persoon aun], dee, dee schiende waut to senne, leade mie nusscht niehet,

⁷ oba emm jaeajendeel, aus see sage daut mie daut Evanjeelium to dee onnbeschnaedne aunfetrut wea, so aus Peeta daut aunfetrut wea to dee Beschnaedne;

⁸ dan dee, dee derch Peeta wirkjt to daut Apostelaumt to dee Beschnaedne, oabeid uk enn mie to dee Heide.

⁹ En aus Joakopp, en Peeta, en Jehaun, dee aunjeseene weare aus Stenda enne Jemeent, dee Jnod sage dee mie jejaeft wea, jeewe see mie en Barnabas de rajchte Haunt enn Jemeenschoft, daut wie sulle no dee Heide gone, oba see wudde no dee Beschnaedne gone;

¹⁰ see wulle bloos ha daut wie aun dee Oame denkje sulle, en daut wull ekj uk jearen doone.