Old/New Testament

^89 (A)Ayi Mukama, Ekigambo kyo kinywevu mu ggulu,
    kya mirembe gyonna.
^90 (B)Obwesigwa bwo tebuggwaawo emirembe gyonna;
    watonda ensi era enyweredde ddala.
^91 (C)Amateeka go na buli kati manywevu;
    kubanga ebintu byonna bikuweereza.
⁹² Singa nnali sisanyukira mu mateeka go,
    nandizikiridde olw’obulumi bwe nalimu.
⁹³ Siyinza kwerabira biragiro byo;
    kubanga mu ebyo obulamu bwange mw’obufuulidde obuggya.
⁹⁴ Ndi wuwo, ndokola,
    kubanga neekuumye bye walagira.
⁹⁵ Newaakubadde ng’abakola ebibi beekukumye nga banteeze okunzikiriza;
    naye nze nyweredde ku ebyo bye walagira.
⁹⁶ Ebintu byonna biriko we bikoma
    naye amateeka go tegakugirwa.

^97 (D)Amateeka go nga ngagala nnyo!
    Ngafumiitirizaako olunaku lwonna.
^98 (E)Amateeka go ganfuula mugezi okusinga abalabe bange,
    kubanga ge gannuŋŋamya bulijjo.
⁹⁹ Ntegeera okusinga abasomesa bange bonna,
    kubanga nfumiitiriza nnyo ebyo bye walagira.
^100 (F)Ntegeera okusinga abakadde;
    kubanga ŋŋondera ebyo bye walagira.
^101 (G)Neekuumye obutatambulira mu kkubo lyonna ekyamu,
    nsobole okugondera ekigambo kyo.
¹⁰² Sivudde ku mateeka go,
    kubanga ggwe waganjigiriza.
^103 (H)Ebisuubizo byo nga bimpoomera nnyo!
    Biwoomera akamwa kange okusinga omubisi gw’enjuki.
^104 (I)Mu biragiro byo mwe nfunira okutegeera;
    kyenva nkyawa ekkubo lyonna ekyamu.

^105 (J)Ekigambo kyo ye ttaala eri ebigere byange,
    era kye kimulisa ekkubo lyange.
^106 (K)Ndayidde ekirayiro era nkikakasizza
    nga nnaakwatanga amateeka ag’obutuukirivu bwo.
¹⁰⁷ Nnumizibwa nnyo;
    nzizaamu obulamu, Ayi Mukama, ng’ekigambo kyo bwe kiri.
^108 (L)Okkirize Ayi Mukama ettendo akamwa kange lye kakuwa;
    era onjigirize amateeka go.
^109 (M)Newaakubadde ng’obulamu bwange ntera okubutambuza nga bwe njagala,
    naye seerabira mateeka go.
^110 (N)Abakola ebibi banteze omutego,
    naye sikyamye kuva ku ebyo bye walagira.
¹¹¹ Ebiragiro byo gwe mugabo gwange emirembe gyonna;
    weewaawo, ebyo bye bisanyusa omutima gwange.
^112 (O)Omutima gwange gweteeseteese okukwatanga ebiragiro byo
    ennaku zonna ez’obulamu bwange.

^113 (P)Nkyawa abalina emitima egisagaasagana,
    naye nze njagala amateeka go.
^114 (Q)Ggwe kiddukiro kyange era ggwe ngabo yange;
    essuubi lyange liri mu kigambo kyo.
^115 (R)Muve we ndi mmwe abakola ebitali bya butuukirivu,
    mundeke nkwate ebiragiro bya Katonda wange.
^116 (S)Onnyweze nga bwe wasuubiza, ndyoke mbeere omulamu;
    nneme kuswazibwa ne nzigwamu essuubi.
¹¹⁷ Onnyweze ndyoke nfuuke ow’eddembe,
    era nkwatenga ebiragiro byo bulijjo.
¹¹⁸ Onyooma abo bonna abaleka ebiragiro byo;
    weewaawo obugezigezi bwabwe tebuliimu kantu.
^119 (T)Abakola ebibi bonna mu nsi obalaba ng’ebisasiro;
    nze kyenva njagala ebyo bye walagira.
^120 (U)Nkankana nzenna nga nkutya,
    era ntya amateeka go.

¹²¹ Nkoze eby’obwenkanya era eby’obutuukirivu;
    tondeka mu mikono gy’abo abanjooga.
^122 (V)Okakase okundaganga ekisa kyo bulijjo,
    oleme kukkiriza ababi okunjooganga.
^123 (W)Amaaso gange ganfuuyiririra, nga nnindirira obulokozi bwo
    n’ebyo bye wasuubiza mu butuukirivu bwo.
^124 (X)Nze omuddu wo nkolaako ng’okwagala kwo bwe kuli;
    era onjigirize amateeka go.
^125 (Y)Ndi muddu wo, mpa okwawula ekirungi n’ekibi;
    ndyoke ntegeere ebiragiro byo.
¹²⁶ Ekiseera kituuse, Ayi Mukama, okubaako ky’okola,
    kubanga amateeka go gamenyeddwa.
^127 (Z)Naye nze njagala amateeka go
    okusinga zaabu, wadde zaabu omulongoose.
^128 (AA)Kubanga mmanyi ng’ebiragiro byo byonna bituufu;
    nkyawa buli kkubo lyonna ekyamu.

¹²⁹ Ebiragiro byo bya kitalo;
    kyenva mbigondera.
^130 (AB)Ebigambo byo bwe binnyonnyolwa bireeta omusana;
    n’atategeera bulungi bimugeziwaza.
^131 (AC)Njasamya akamwa kange ne mpejjawejja
    nga njaayaanira amateeka go.
^132 (AD)Nkyukira, onkwatirwe ekisa,
    nga bw’okolera bulijjo abo abaagala erinnya lyo.
^133 (AE)Oluŋŋamye ebigere byange ng’ekigambo kyo bwe kiri,
    era tokkiriza kibi kyonna kunfuga.
^134 (AF)Mponya okujooga kw’abantu,
    bwe ntyo nkwatenga ebiragiro byo.
^135 (AG)Ontunuulire, nze omuddu wo, n’amaaso ag’ekisa,
    era onjigirizenga amateeka go.
^136 (AH)Amaziga gakulukuta mu maaso gange ng’omugga,
    olw’abo abatakwata mateeka go.

^137 (AI)Oli mutuukirivu, Ayi Katonda,
    era amateeka go matuufu.
^138 (AJ)Ebiragiro byo bye wateekawo bituukirivu,
    era byesigibwa.
^139 (AK)Nnyiikadde nnyo munda yange,
    olw’abalabe bange abatassaayo mwoyo eri ebiragiro byo.
^140 (AL)Ebisuubizo byo byetegerezebwa nnyo,
    kyenva mbyagala.
^141 (AM)Newaakubadde ndi muntu wa bulijjo era anyoomebwa, naye seerabira biragiro byo.
^142 (AN)Obutuukirivu bwo bwa lubeerera,
    n’amateeka go ga mazima.
¹⁴³ Newaakubadde nga ndi mu kulumwa n’okutegana okungi,
    amateeka go ge gansanyusa.
^144 (AO)Ebiragiro byo bituufu emirembe gyonna;
    onjigirize okubitegeera ndyoke mbeere omulamu.

¹⁴⁵ Nkoowoola n’omutima gwange gwonna, Ayi Mukama, onnyanukule!
    Nnaagonderanga amateeka go.
¹⁴⁶ Nkukaabirira, ondokole,
    nkwate ebiragiro byo.
^147 (AP)Ngolokoka bunatera okukya ne nkukaabirira onnyambe;
    essuubi lyange liri mu kigambo kyo.
^148 (AQ)Seebaka ekiro kyonna
    nga nfumiitiriza ku ebyo bye wasuubiza.
¹⁴⁹ Olw’okwagala kwo okutaggwaawo wulira eddoboozi lyange, Ayi Mukama,
    ompe obulamu obuggya ng’amateeka go bwe gali.
¹⁵⁰ Abo ab’enkwe era abatakwata mateeka go bansemberedde,
    kyokka bali wala n’amateeka go.
^151 (AR)Naye ggwe, Ayi Mukama, oli kumpi nange,
    era n’amateeka go gonna ga mazima.
^152 (AS)Okuva edda n’edda nayiga mu biragiro byo,
    nga wabissaawo bibeerewo emirembe gyonna.

^153 (AT)Tunuulira okubonaabona kwange omponye,
    kubanga seerabira mateeka go.
^154 (AU)Ompolereze, onnunule,
    onzizeemu obulamu nga bwe wasuubiza.
^155 (AV)Abakola ebibi obulokozi bubabeera wala,
    kubanga tebanoonya mateeka go.
^156 (AW)Ekisa kyo kinene, Ayi Mukama,
    onzizeemu obulamu nga bwe wasuubiza.
^157 (AX)Abalabe abanjigganya bangi,
    naye nze siivenga ku biragiro byo.
^158 (AY)Nnakuwalira abo abatakwesiga,
    kubanga tebakwata biragiro byo.
¹⁵⁹ Laba, Ayi Mukama, bwe njagala ebiragiro byo!
    Onkuumenga ng’okwagala kwo bwe kuli.
¹⁶⁰ Ebigambo byo byonna bya mazima meereere;
    n’amateeka go ga lubeerera.

^161 (AZ)Abafuzi banjigganyiza bwereere,
    naye ekigambo kyo nkissaamu ekitiibwa.
^162 (BA)Nsanyukira ekisuubizo kyo okufaanana
    ng’oyo afunye obugagga obungi.
¹⁶³ Nkyawa era ntamwa obulimba,
    naye amateeka go ngagala.
¹⁶⁴ Mu lunaku nkutendereza emirundi musanvu
    olw’amateeka go amatuukirivu.
^165 (BB)Abo abaagala amateeka go bali mu ddembe lingi;
    tewali kisobola kubeesittaza.
^166 (BC)Nnindirira obulokozi bwo, Ayi Mukama,
    era mu biragiro byo mwe ntambulira.
¹⁶⁷ Ŋŋondera ebiragiro byo,
    mbyagala nnyo nnyini.
^168 (BD)Buli kye nkola okimanyi,
    era olaba nga bwe nkwata ebiragiro byo.

^169 (BE)Okukaaba kwange kutuuke gy’oli, Ayi Mukama,
    ompe okutegeera ng’ekigambo kyo bwe kiri.
^170 (BF)Okwegayirira kwange kutuuke gy’oli,
    onnunule nga bwe wasuubiza.
^171 (BG)Akamwa kange kanaakutenderezanga,
    kubanga gw’onjigiriza amateeka go.
¹⁷² Olulimi lwange lunaayimbanga ekigambo kyo,
    kubanga bye walagira byonna bya butuukirivu.
^173 (BH)Omukono gwo gumbeerenga,
    kubanga nnonzeewo okukwatanga ebiragiro byo.
^174 (BI)Neegomba nnyo obulokozi bwo, Ayi Mukama,
    era amateeka go lye ssanyu lyange.
^175 (BJ)Ompe obulamu nkutenderezenga,
    era amateeka go gampanirirenga.
^176 (BK)Ndi ng’endiga ebuze.
    Onoonye omuddu wo,
    kubanga seerabidde mateeka go.