Old/New Testament

Dugang nga Kaayuhan sang Kaalam

3 Anak, indi gid pagkalimti ang ginatudlo ko sa imo; tipigi sa imo tagipusuon ang mga ginasugo ko sa imo, ² kay makapalawig ini kag makapauswag sang imo kabuhi. ³ Magpabilin ka nga maayo kag matutom; indi ina pagdulaa kundi huptan mo gid sa imo tagipusuon.^{[a] 4} Kon himuon mo ini, maluyag sa imo ang Dios kag ang mga tawo, kag mangin maayo ang pagtulok nila sa imo.

⁵ Magsalig ka sa Ginoo sa bug-os mo nga tagipusuon, kag indi ka magsalig sa imo kaugalingon nga kaalam. ⁶ Dumduma ang Ginoo sa tanan mo nga ginahimo, kag tuytuyan niya ikaw sa husto nga dalan. ⁷ Indi ka maghunahuna nga maalam ka na gid kundi magtahod ka sa Ginoo, kag indi ka maghimo sang malain. ⁸ Kay makapaayo kag makapabaskog ina sa imo lawas. ⁹ Padunggi ang Ginoo sa imo mga pagkabutang, pareho halimbawa sa paghalad sa iya sang una nga parte sang tanan mo nga patubas. ¹⁰ Kon himuon mo ini, magasulubra ang mga patubas sa imo mga bodega kag ang duga sang ubas sa imo mga suludlan.

¹¹ Anak, indi pagpakalaina ang pagdisiplina sang Ginoo sa imo.^[b] Indi maglain ang imo buot kon ginasabdong ka niya. ¹² Kay ginadisiplina sang Ginoo ang iya mga ginapalangga pareho sang ginahimo sang isa ka amay sa iya anak nga iya ginakalipay.

¹³ Bulahan ang tawo nga nakaangkon sang kaalam kag pag-intiendi. ¹⁴ Kay mas mapuslanon pa ini sang sa pilak kag bulawan, ¹⁵ kag mas bilidhon pa sang sa mga alahas.^[c] Kag wala gid sing bisan ano nga butang nga imo ginahandom nga makatupong sini. ¹⁶ Makapalawig kag makapauswag ini sang imo kabuhi, kag makahatag man sa imo sang kadungganan. ¹⁷ Makabulig gid ini sa imo kabuhi kag makapaayo sang imo kahimtangan. ¹⁸ Bulahan ang tawo nga nagapabilin nga maalamon; ang kaalam makapaayo kag makapalawig sang iya kabuhi.^[d]

^19-20 Paagi sa kaalam kag ihibalo, gintuga sang Ginoo ang kalibutan kag ang kalangitan, kag nagkalabukas ang mga tuburan kag naghatag ang mga panganod sang ulan.

²¹ Anak, tipigi gid ang imo kaalam kag ihibalo sa pagdesisyon sing husto. Indi pagpabay-i nga madula ini sa imo. ²² Kay makahatag ini sa imo sang malawig kag matahom nga kabuhi. ²³ Kag magakabuhi ka nga luwas sa katalagman kag indi ka maano. ²⁴ Makatulog ka nga mahamuok, nga wala sing may ginakahadlukan. ²⁵ Gani indi ka dapat mahadlok kon gulpi lang nga mag-abot ang makahaladlok nga mga hitabo, ukon kon laglagon na ang mga malaot, ²⁶ kay makasalig ka nga bantayan ka sang Ginoo; ilikaw niya ikaw sa katalagman.

²⁷ Buligi ang mga dapat buligan kon masarangan mo man lang. ²⁸ Indi na pagpabuwasi ang pagbulig sa imo isigkatawo kon mabuligan mo man lang siya subong.

²⁹ Indi ka magplano sing malain kontra sa imo isigkatawo nga nagasalig sa imo bilang iya kaingod.

³⁰ Indi ka magpakigbais sa imo isigkatawo sa wala sing kabangdanan, labi na kon wala man lang siya sing may nahimo nga malain sa imo.

³¹ Indi ka magkahisa sa mapintas nga tawo ukon magsunod sa iya mga ginahimo. ³² Kay ginakangil-aran sang Ginoo ang mga balingag, pero nagasalig siya sa nagakabuhi sing husto.

³³ Ginapakamalaot sang Ginoo ang panimalay sang mga malaot, pero ginapakamaayo niya ang panimalay sang mga matarong.

³⁴ Ginatamay niya ang nagapangtamay, pero ginakaluoyan niya ang mapainubuson.

³⁵ Ang mga maalamon padunggan, pero ang mga buang-buang pakahuy-an.

4 Mga anak, pamatii ninyo sing maayo ang mga pagtadlong sang inyo amay sa inyo pamatasan, agod may matun-an kamo. ² Maayo ang akon ginatudlo, gani indi ninyo ini pag-ibaliwala. ³ Sang bata pa gid ako sa poder sang akon amay, paborito^[e] ako sang akon iloy. ⁴ Gintudluan ako sang akon amay. Siling niya sa akon, “Hupti sa imo tagipusuon ang mga ginatudlo ko sa imo. Tumana ang mga sugo ko sa imo agod padayon ka nga magakabuhi. ⁵ Tinguhai nga makaangkon ka sang kaalam kag pag-intiendi. Indi pagkalimti ang mga ginasiling ko sa imo, kag indi ka magbiya sa sini. ⁶ Indi pag-isikwaya ang kaalam, kundi hatagi ini sing importansya, kay magatipig ini sa imo. ⁷ Ang kaalam ukon ang pag-intiendi amo ang pinakaimportante sa tanan, gani tinguhaan mo gid nga maangkon mo ini bisan maubos ang tanan mo nga pagkabutang.^{[f] 8} Pakamahala kag batuna ang kaalam, kay makahatag ini sa imo sang kadungganan. ⁹ Pareho ini sa korokorona nga mga bulak nga makapatahom sa imo.”

¹⁰ Anak, pamatii kag batuna ang mga ginasiling ko sa imo, agod magalawig ang imo kabuhi. ¹¹ Gintudluan ko na ikaw sang kaalam, kon paano ka magkabuhi sing husto. ¹² Gani kon sundon mo ini, wala sing may makasablag sa imo pagkabuhi, kag indi ka maano. ¹³ Indi gid pagkalimti ang mga pagtadlong ko sa imo pamatasan; tipigi ini sa imo tagipusuon kay magakabuhi ka sa sini.

¹⁴ Indi pagsunda ang ginahimo sang mga malaot. ¹⁵ Likawi gid ina kag magpadayon ka sa imo pagkabuhi nga matarong. ¹⁶ Kay indi sila makatulog kon indi sila makahimo sang malain ukon makapanglaglag sa iban. ¹⁷ Ang kalautan kag ang pagpamintas daw pagkaon kag ilimnon para sa ila.

¹⁸ Ang pagkabuhi sang mga matarong pareho sa pagbutlak sang adlaw nga nagasanag pa gid hasta mag-udto. ¹⁹ Pero ang pagkabuhi sang mga malaot pareho sa kadulom, kag indi nila mahibaluan kon ano ang kabangdanan sang ila pagkalaglag.

²⁰ Anak, pamatii sing maayo ang mga ginatudlo ko sa imo; ²¹ indi gid ini pagkalimti, kundi tipigi ini sa imo tagipusuon. ²² Kay nagahatag ini sang maayo nga lawas kag malawig nga kabuhi sa mga nagabaton sini.

²³ Bantayi sing maayo ang imo hunahuna, kay kon ano ang imo ginahunahuna amo man ang imo kabuhi. ²⁴ Indi ka maghambal sing dinaya ukon binutig. ²⁵ Isintro ang imo panulok sa maayo. ²⁶ Hunahunaa gid sing maayo ang tanan mo nga pagahimuon agod mangin maayo ang resulta sini. ²⁷ Magkabuhi ka sing tadlong; likawi ang paghimo sang malaot.

Paandam Batok sa Pagpanginbabayi

5 Anak, pamatii sing maayo ang akon mga pulong nga may kaalam, ² agod makahibalo ka magdesisyon sing husto kag maghambal nga may kaalam. ³ Dumdumon mo nga ang pulong sang malain nga babayi matam-is pareho sa dugos, kag manami pareho sa lana sang olibo. ⁴ Pero sa ulihi ang ibilin niya sa imo kapait kag kasakit. ⁵ Kon magsunod ka sa iya, dal-on niya ikaw sa lugar sang mga patay; ang dalan nga iya ginalaktan nagapakadto sa kamatayon. ⁶ Wala siya nagasapak sa dalan nga nagapakadto sa kabuhi. Indi tadlong ang iya ginalaktan kag wala siya makatalupangod sini.

⁷ Gani mga anak, pamatii ninyo ako kag tumana. ⁸ Palayo kamo sa babayi nga pareho sina. Indi kamo magpalapit sa iya balay. ⁹ Kay kon himuon ninyo ina, madula ang inyo dungog kag angkunon lang ini sang iban, kag mapatay kamo sa kamot sang mga tawo nga mapintas.^{[g] 10} Kag ang tanan ninyo nga manggad kag iban pa nga ginpangabudlayan kuhaon lang sang mga taga-iban nga lugar. ¹¹ Magaugayong kamo kon nagahimumugto na kamo, nga hugos na gid ang bug-os ninyo nga lawas. ¹² Kag magasiling kamo, “Ano abi kay wala ko ginsapak ang mga pagtadlong sa akon pamatasan. ¹³ Wala ako mamati sa akon mga manunudlo. ¹⁴ Gani karon, ari ako sa bibi sang kamatayon sa atubangan sang katilingban.”

¹⁵ Dapat sa imo ka lang asawa maghulid. Kon sa tubig pa, magkuha ka lang sang imo ilimnon sa imo kaugalingon nga bubon. ¹⁶ Kay basi kon magluib man ang imo asawa.^{[h] 17} Dapat imo lang siya; indi siya dapat maghulid sa iban nga lalaki. ¹⁸ Magkalipay ka sa imo asawa, kag kabay pa nga pakamaayuhon siya sang Dios. ¹⁹ Matahom siya kag maanyag pareho sa usa, gani kabay pa nga mawili ka sa iya^[i] permi kag mabihag sa iya gugma.

²⁰ Anak, indi ka magpadala-dala sa malain nga babayi. Indi ka dapat magpakigrelasyon sa asawa sang iban. ²¹ Kay nakita sang Ginoo ang tanan mo nga ginahimo; kag bisan diin ka magkadto nagatan-aw siya. ²² Ang malaot nga mga ginahimo sang malaot nga tawo pareho sa siod nga magasiod mismo sa iya. ²³ Magatalang siya tungod sang iya kabuangan, kag mapatay siya tungod kay indi siya magpatadlong sang iya pamatasan.

1 Ako si Pablo nga nangin apostol ni Cristo Jesus suno sa kabubut-on sang Dios. Ako kag si Timoteo nga aton utod kay Cristo nagapangamusta sa iglesya^[a] sang Dios dira sa Corinto, kag sa tanan nga katawhan sang Dios dira sa bug-os nga probinsya sang Acaya.

² Kabay pa nga mabaton ninyo ang bugay^[b] kag paghidaet^[c] halin sa Dios nga aton Amay kag kay Ginoong Jesu-Cristo.

Pagpasalamat sa Dios

³ Dalayawon ang Dios kag Amay sang aton Ginoong Jesu-Cristo. Maluluy-on siya nga Amay, kag Dios nga permi nagapabakod kag nagalipay sa aton. ⁴ Ginapabakod niya kita kag ginalipay sa tanan ta nga mga kabudlayan, agod nga paagi sa sini nga bulig nga aton nabaton halin sa iya, mapabakod man naton kag mapalipay ang iban sa ila mga kabudlayan. ⁵ Kay bisan madamo ang aton ginaambit nga mga pag-antos ni Cristo, madamo man nga mga pagpabakod kag paglipay ang aton ginabaton paagi sa iya. ⁶ Kon nagaantos kami, ini para sa pagpabakod kag paglipay sa inyo kag para sa inyo kaluwasan. Kag kon ginapabakod kag ginalipay kami, ini para man sa pagpabakod kag paglipay sa inyo agod mabatas ninyo ang mga pag-antos nga pareho sang amon ginaantos. ⁷ Gani dako ang amon paglaom sa inyo, tungod nga nahibaluan namon nga kon paano kamo nagaantos pareho sa amon, ginapabakod kag ginalipay man kamo sang Dios pareho sa amon.

⁸ Mga utod kay Cristo, gusto namon nga mahibaluan ninyo ang amon naagihan nga kalisod sa probinsya sang Asia. Kay sa sadto nga tiyempo daw indi na gid kami makaantos, kag ang hunahuna namon mapatay na gid kami. ⁹ Abi gani namon amo na ato ang amon katapusan. Pero natabo gali ato agod makatuon kami nga indi magsalig sa amon kaugalingon, kundi sa Dios nga amo ang nagabanhaw sang mga patay. ¹⁰ Ginluwas niya kami sa kamatayon, kag pagaluwason pa gid niya kami liwat. Siya lang gid ang amon ginasaligan nga magapadayon sa pagluwas sa amon ¹¹ samtang ginabuligan ninyo kami paagi sa inyo mga pagpangamuyo. Kag tungod sa mga bulig nga amon mabaton sa Dios bilang sabat sa madamo nga nagapangamuyo, madamo man ang magapasalamat sa iya.

Ang Pagbag-o ni Pablo sang iya Plano

¹² Amo ini ang butang nga amon ginapabugal: nagkabuhi kami nga matarong kag wala gid sang kasawayan sa tanan nga tawo, kag labi na gid sa inyo. Nahimo namon ini tungod sa bulig sang Dios kag indi sa amon kaugalingon nga ikasarang. Nagapamatuod ang amon konsensya nga matuod gid ining amon ginapabugal. ^13-14 Wala kami nagasulat sang indi ninyo mabasahan kag maintiendihan. Bisan indi gid ninyo kami kilala kaayo, nagalaom ako nga magaabot ang tion nga makilal-an gid ninyo kami, agod nga sa pag-abot sang aton Ginoong Jesus mapabugal ninyo kami kag kamo mapabugal man namon.

¹⁵ Tungod sa sining akon pagsalig, nagplano anay ako nga magbisita una sa inyo agod doble ang inyo kahigayunan nga makabulig.^{[d] 16} Nagplano ako nga mahapit anay dira sa inyo kon magkadto na ako sa Macedonia, kag sa akon pagbalik halin sa Macedonia maagi ako liwat dira agod mabuligan naman ninyo ako sa akon pagkadto sa Judea. ¹⁷ Amo kuntani ato ang akon plano. Pero tungod kay wala ini madayon, nagakahulugan bala ini nga indi masaligan ang akon ginahambal? Basi magsiling kamo nga pareho man ako sa iban nga mga tawo diri sa kalibutan nga ang mga butang nga ila ginaplano kag ginaintiendi ang para gid lang sa ila kaayuhan. Nagasiling sila “Huo,” pero ato gali “Indi.” ¹⁸ Pero ang matuod amo ini: subong nga ang Dios masaligan, masaligan man ninyo ang amon ginasugid sa inyo. ¹⁹ Kami ni Silas kag ni Timoteo nagwali sa inyo parte sa Anak sang Dios nga si Jesu-Cristo. Kag nahibaluan ninyo nga si Cristo masaligan sa iya ginhambal. Indi mahimo nga indi niya paghimuon ang iya mga ginpromisa. ²⁰ Paagi sa iya, ang tanan nga ginpromisa sang Dios natuman. Gani makasiling kita nga masaligan gid ang Dios,^[e] kag ini nagahatag sang pagdayaw sa iya. ²¹ Ang Dios amo ang nagapalig-on sang aton relasyon kay Cristo. Ginpili niya kita nga mag-alagad sa iya. ²² Ginmarkahan niya kita nga iya na paagi sa pagpapuyo niya sang Espiritu Santo sa aton tagipusuon, nga amo man ang kalig-unan nga pagabatunon ta ang iya mga ginpromisa sa aton.

²³ Nakahibalo ang Dios nga nagasugid ako sang matuod kon ngaa wala ako nakadayon sa pagkadto dira sa inyo sa Corinto. Ang rason amo nga indi ko gusto nga maglain ang inyo buot sa akon. ²⁴ Wala kami nagadikta sa inyo parte sa inyo pagtuo, kay malig-on na man kamo. Gusto lang namon kuntani nga buligan kamo agod mangin malipayon kamo.