M’Cheyne Bible Reading Plan
यहोसू अलविदा कहत ह
24 तब इस्राएल क सबहिं परिवार समूह सकेम मँ बटुर गएन। यहोसू ओन सबहिं क हुआँ एक संग बोलाएस। तब यहोसू इस्राएल क बुजुर्गन, ओनकइ नेतन, ओनकइ निआवधीसन अउर ओनकइ फउज क अफसरन क बोलाएस। इ सबइ मनई परमेस्सर क समन्वा खड़ा भएन।
2 तब यहोसू सबहिं लोगन स बात किहस। उ कहेस, “मइँ उ कहत हउँ जउन यहोवा, इस्राएल क परमेस्सर तू पचन्स कहत अहइ: ‘बहोत समइ पहिले तोहरे पचन्क पुरखन परात नदी क दुसरी कइँती रहत रहेन। मइँ ओन मनइयन क बारे मँ बात करत अहउँ, जउन इब्राहीम अउर नाहोर क पिता तेरह क तरह रहेन। ओन दिनन तोहार पचन्क पुरखन दूसर देवतन क पूजा करत रहेन। 3 मुला मइँ, यहोवा तोहरे पचन्क पुरखन इब्राहीम क नदी क दूसर कइँती क भुइँया स बाहेर लिआएउँ। मइँ ओका कनान क भुइँया स होइके लइ गएउँ अउर ओका अनेक सन्तानन दीन्ह। मइँ इब्राहीम क इसहाक नाउँ क पूत दिहेउँ। 4 मइँ इसहाक क याकूब अउर एसाव नाउँ क दुइ पूत दिहेउँ। मइँ साईर पहाड़े क चारिहुँ कइँती क प्रदेस एसाव क दिहेउँ। मुला याकूब अउर ओकर सन्तानन हुआँ नाहीं रहिन। मिस्र चले गएन।
5 “‘तब मइँ मूसा अउ हारून क मिस्र पठएउँ। मइँ मिस्र क लोगन पइ भयंकर विपत्तियन पड़इ दिहेउँ। तब मइँ तू सबइ पचन्क मिस्र स बाहेर लिआएउँ। 6 इ तरह मइँ तोहरे पचन्क पुरखन क मिस्र स बाहेर लिआएउँ। उ पचे लाल सागर तलक आएन अउर मिस्र क लोग ओनकर पाछा करत रहेन। ओनके संग रथ अउ घुड़सवार रहेन। 7 ऍह बरे मनइयन मोसे यानी यहोवा स मदद माँगेन अउर मइँ मिस्र क लोगन पइ बहोत बड़की विपत्ति आवइ दीन्ह। मइँ यानी यहोवा समुद्दर मँ ओनका बोर दिहेउँ। तू लोग खुद ही लख्या कि मइँ मिस्र क फउज क संग का किहेउँ।
“‘ओकरे पाछे तू पचे रेगिस्तान मँ लम्बे समइ तलक रह्या। 8 तबइ मइँ तू पचन्क एमोरी लोगन क धरती मँ लिआएउँ। इ यरदन नदी क पूरब मँ रहा। उ सबइ लोग तोहरे पचन्क खिलाफ लड़ेन, मुला मइँ तू पचन्क ओनका हरावइ दिहेउँ। मइँ तू पचन्क ओन लोगन्क नस्ट करइ बरे सक्ती दिहेउँ। तब तू पचे उ धरती पइ अधिकार किह्या।
9 “‘तब सिप्पोर क पूत मोआब क राजा बालाक इस्राएल क लोगन क खिलाफ लड़इ क तइयारी किहस। राजा बोर क पूत बिलाम क बोलाएस। उ बिलाम स तू पचन क सराप देइ क कहेस। 10 मुला मइँ यहोवा बिलाम क एक न सुनेउँ। ऍह बरे बिलाम आपन चाहत क खिलाफ तू लोगन बरे नीक चीज होइ क याचना किहस। उ तू पचन्क खुले मन स आसीर्बाद दिहस। इ तरह मइँ तू पचन्क बिलाम स बचाएउँ।
11 “‘तब तू पचे यरदन नदी क पार तलक जात्रा किह्या। तू लोग यरीहो प्रदेस मँ आया। यरीहो सहर मँ बसइयन तोहर पचन्क खिलाफ लड़ेन। एमोरी, परिज्जी, कनानी, हित्ती, गिर्गासी, हिव्वी अउर यबूसी लोग भी तोहरे पचन्क खिलाफ लड़ेन। मुला मइँ तू पचन्क ओन सबका हरावइ दिहेउँ। 12 जब तोहार पचन्क फउज अगवा बढ़ी तउ तोहार दुस्मन पराइ गएन जइसे मइँ ओनका अउर अमोरी राजा क खिलाफ भोंड़ा पठाइ रहा। ऍह बरे तू लोग आपन धनुस या तरवार क प्रयोग किए बिना ही ओन पइ कब्जा कइ लिहा।
13 “‘इ मइँ, ही रहेउँ, जउन तू पचन्क उ धरती दिहेउँ। मइँ तू पचन्क उ धरती दिहेउँ जहाँ तू पचन्क कउनो काम नाहीं करइ क पड़ा। मइँ तू पचन्क सहर दिहेउँ जेनका तू पचन्क बनाउब नाहीं भवा। अब तू पचे उ धरती अउर ओन सहरन मँ रहत अहा। तोहरे सबन्क लगे अंगूरे क लता अउ जइतून क बाग अहइँ, मुला ओन बागन क तू पचे नाहीं लगाया।’”
14 तब यहोसू लोगन स कहेस, “अब तू लोग यहोवा क कहब सुनि लिह्या ह। ऍह बरे तू पचन्क यहोवा क सम्मान करइ चाही अउ ओकर सच्ची सेवा करइ चाही। ओन लबार देवतन क बहाइ द्या जेनका तोहार पचन क पुरखन पूजत रहेन। इ सब कछू बहोत समइ क पहिले फरात नदी क दूसर कइँती, मिस्र मँ भी भवा रहा। अब तू पचन्क यहोवा क सेवा करइ चाही।
15 “मुला होइ सकत ह कि तू पचे यहोवा क उपासना नाहीं करइ चहत्या। तू पचन्क खुद आज ही इ चुन लेइ चाही। तू पचन्क आजु तय कइ लेइ चाही कि तू पचे केकर उपासना करब्या। तू पचे ओन देवतन क उपासना करब्या जेनकर उपासना तोहरे पचन्क पुरखन उ समइ करत रहेन जब उ पचे नदी क दूसर कइँती रहत रहेन? या तू पचे ओन एमोरी लोगन क देवतन क उपासना करइ चाहत अहा जउन हिआँ रहत रहेन? जहाँ तलक मोरी अउ मोरे परिवार क बात अहइ, हम यहोवा क उपासना करब।”
16 तब मनइयन जवाब दिहन, “नाहीं, हम यहोवा क अनुसरण करब कबहुँ न तजब। नाहीं, हम लोग कबहुँ दूसर देवतन क सेवा नाहीं करब। 17 हम जानित ह कि उ परमेस्सर यहोवा रहा जउन हमरे लोगन क मिस्र स लिआवा। हम लोग उ देस मँ दास रहे। मुला यहोवा हम लोगन बरे हुआँ बड़कन-बड़कन काम किहस। उ उ देस स हम लोगन क बाहेर लिआवा अउर उ समइ तलक हमार रच्छा करत रहा जब तलक हम लोग दूसर देसन स होइके जात्रा कीन्ह। 18 तब यहोवा ओन एमोरी लोगन क हरावइ मँ हमार मदद किहस जउन उ प्रदेस मँ रहत रहेन जेहमाँ अज हम पचे रहित ह। ऍह बरे हम लोग यहोवा क सेवा करतइ रहब। काहेकि उ हमार परमेस्सर अहइ।”
19 तब यहोसू कहेस, “तू पचे यहोवा क काफी सेवा अच्छी तरह स नाहीं कइ सकब्या। यहोवा, पवित्तर परमेस्सर अहइ अउर परमेस्सर आपन लोगन क जरिये दूसर देवतन क पूजा स घिना करत ह। अगर तू पचे उ तरह परमेस्सर क खिलाफ जाब्या तउ परमेस्सर तू पचन्क छिमा नाहीं करी। 20 तू पचे यहोवा क तजि देब्या अउर दूसर देवतन क सेवा करब्या तब यहोवा तू पचन पइ भयंकर विपत्तियन क लिआइ। यहोवा तू पचन्क बरबाद करी। यहोवा तोहरे पचन्क बरे अच्छा रहा ह, मुला अगर तू पचे ओकरे विरूद्ध चलत अहा तउ उ तू पचन्क नास कइ देइ।”
21 मुला मनइयन यहोसू स कहेन, “नाहीं। हम पचे यहोवा क सेवा करब।”
22 तब यहोसू कहेस, “खुद आपन अउर आपन संग क लोगन क चारिहुँ कइँती निहारा। का तू पचे जानत अहा अउर अंगीकार करत अहा कि तू पचे यहोवा क सेवा करब चुन्या ह? का तू सब एकर गवाह अहा?”
मनइयन जवाब दिहन, “हाँ, इ फुरइ अहइ। हम लोग धियान रखब कि हम लोग यहोवा क सेवा करब चुना ह।”
23 तब यहोसू कहेस, “ऍह बरे आपन बीच मँ जउन बीच मँ जउन लबार देवतन रखत अहा ओनक जरइ द्या। आपन पूरा हिरदइ स इस्राएल क परमेस्सर यहोवा स पिरेम करा।”
24 तब मनइयन यहोसू स कहेन, “हम लोग यहोवा, आपन परमेस्सर क सेवा करब। हम लोग ओकर आग्या क पालन करब।”
25 ऍह बरे यहोसू लोगन बरे उ दिन एक वाचा किहस। यहोसू इ वाचा क ओन लोगन क जरिये मानइ बरे एक ठु नेम बनाइ दिहस। इ सकेम नाउँ क सहर मँ भवा। 26 यहोसू इ सबइ बातन क परमेस्सर क व्यवस्था क किताबे मँ लिखेस। तब यहोसू एक ठु बड़की सिला लिआवा। इ सिला इ करारा क प्रमाण रही। उ इ सिला क यहोवा क पवित्तर तम्बू क निअरे बलूत बृच्छ क खाले धरेस।
27 तब यहोसू सबहिं लोगन स कहेस, “इ सिला तू पचन्क ओका याद दिआवइ मँ सहायक होइ जउन कछू हम पचे आजु कहे अही। इ सिला तब हिआँ रही जब परमेस्सर हम लोगन स बतियात रहा। ऍह बरे इ सिला कछू अइसी रही जउन तू पचन्क याद दिआवइ मँ मदद करी कि आजु क दिन का भवा रहा। इ सिला तोहरे बरे एक गवाह बनी रही। इ तू पचन्क तोहर परमेस्सर यहोवा क खिलाफ जाइ स रोकी।”
28 तब यहोसू लोगन स आपन घरे लउटि जाइ क कहेस तउ हर एक मनई आपन प्रदेस क लउटि गवा।
यहोसू क मउत
29 ओकरे पाछे नून क पूत यहोसू मर गवा। उ एक सौ दस बरिस क रहा। 30 यहोसू आपन भुइँया तिम्नत्सेरह मँ दफनावा गवा इ रास पहाड़ क उत्तर मँ एप्रैम क पहाड़ी प्रदेस मँ रहा।
31 इस्राएल क लोगन यहोसू क जिन्नगी क समइ मँ यहोवा क उपासना किहन अउर यहोसू क मरइ क पाछे भी, लोग यहोवा क उपासना करत रहेन। इस्राएल क लोग तब भी यहोवा क उपासना करत रहेन जब तलक सबहिं बुजुर्गन जउन कि यहोसू क पाछे जिअत रहेन। इ सबइ उ सब नेता रहेन, जउन उ पचे उ सब कछू लखे रहेन जउन यहोवा इस्राएल बरे किहे रहा।
यूसुफ दफनावा गवा
32 जब इस्राएल क लोगन मिस्र तजि दिहेन तब उ पचे यूसुफ क तने क हाड़ आपन संग लइ आएन रहेन। ऍह बरे लोग यूसुफ क हाड़ सकेम मँ दफनाएन। उ पचे हाड़न क उ भुइँया मँ दफनाएन जेका याकूब सकेम क बाप हमोर क पूतन स बेसहे रहा। याकूब उ भुइँया क चाँदी क सौ सिक्कन स बेसहे रहा। इ प्रदेस यूसुफ क सन्तानन क रहा।
33 हारून क पूत एलीआजार मर गवा। उ गिबा मँ दफनावा गवा। गिबा एप्रैम क पहाड़ी प्रदेस मँ एक ठु सहर रहा। उ सहर एलीआजार क पूत पीनहास क दीन्ह गवा रहा।
पतरस अउर यूहन्ना यहूदी सभा क समन्वा
4 अबहिं पतरस अउर यूहन्ना मनइयन स बतियात रहेन कि याजक, मन्दिर क सिपाहियन क मुखिया अउर कछू सदूकीयन ओनकइ लगे आएन। 2 उ पचे ओनसे इ बाते प भिनका रहेन कि पतरस अउर यूहन्ना उपदेस देत भए ईसू क मरे हुएन मँ स जी उठइ क जरिए पुनरूत्थान क प्रचार करत रहेन। 3 तउ उ पचे ओका बन्दी बनइ लिहेन अउर काहेकि उ समइ साँझ होइ ग रही, ऍह बरे दूसर दिना हौलात मँ राखेन। 4 मुला उ पचे उ संदेसा सुनेन कि ओनमाँ स बहोतन ओह प बिसवास अउर इ तरह ओनकइ गनती पाँच हजार ताईं पहोंच गइ।
5 दूसरे दिन यहूदी नेतन बुजुर्ग यहदी नेतन अउर धरम सास्तिरियन यरूसलेम मँ बटुरेन। 6 महायाजक हन्ना, काइफा, यूहन्ना, सिकन्दर अउर महायाजक क परिवारे क सबहिं मनई भी हुवाँ हाजिर रहेन। 7 उ सबइ इ प्रेरितन क आपन समन्वा खड़ा कइके पूछइ लागेन, “तू पचे कउने सक्ती या अधिकार स इ काम किहे ह?”
8 फिन पवित्तर आतिमा[a] क सवार होए स पतरस ओनसे कहेस, “हे मनइयन क नेतन अउर बुजुर्ग नेतन। 9 जदि आजु हमसे एक बीमार मनई क संग कीन्ह भलाई क बारे मँ इ पूछब पछोरब होत अहइ कि उ नीक कइसे होइ गवा। 10 तउ तू सबन्क अउर इस्राएल क मनइयन क इ पता होइ जाइ चाही कि इ काम नासरी ईसू मसीह क नाउँ स भवा ह जेका तू पचे क्रूस प चढ़ाइ दिहा ह जेका परमेस्सर मरि जाए प पुनर्जीवित कइ दिहस ह। उहइ क जरिए पूरी तरह स नीक भवा इ मनई तोहरे समन्वा ठाड़ बा। 11 इ ईसू उहइ
‘पाथर अहइ जेका तू सबइ राजमिस्तरी लोग तुच्छ जान्या रहा,
उहइ बहोत खास पाथर बन गवा अहइ।’ (A)
12 कउनो दूसर स उद्धार नाहीं अहइ, संसारे मँ अउर दूसर नाउँ नाहीं अहइ जेहसे मानव जाति बचाई जाय सकइ। हम सब ईसू स ही उद्धार पाउब!”
13 उ पचे जब पतरस अउर यूहन्ना क निडर होब निहारेन अउर इ समुझेन कि पतरस अउर यूहन्ना अनपढ़ अउर साधारण मनइ रहेन तउ ओनका बहोत अचरज भवा। फिन उ पचे जान गएन कि इ सबइ ईसू क संग रहि चुका बाटेन। 14 अउर काहेकि उ पचे उ मनई क जउन चंगा भ रहा, ओनकइ संग खड़ा भवा लखत रहेन। तउ ओनकइ लगे तनिकउ बोलइ क कछू नाहीं रहा।
15 उ पचे ओनसे यहूदी महासभा स निकर जाइ क कहेन अउर फिन उ सबइ इ कहत भए आपुस मँ बिचार करइ लागेन कि, 16 “इ पचन्क संग कइसा बिवहार कीन्ह जाइ? काहेकि यरूसलेम मँ बसइया हर कउनो जानत ह कि ऍनके जरिये एक ठु अजरज क काम कीन्ह गवा ह अउर हम ओका मना नाहीं कइ सकित। 17 मुला हम ऍनका चिताउनी दइ देइ कि उ सबइ इ नाउँ क बात कउनो अउर मनई स जिन करइँ काहेकि मनइयन म इ बात क संचरइ क अउर फैलि जाइ स रोक जाइ सकइ।”
18 तउ पचे ओनका भीतर बोलाएन अउर हुकुम दिहेन कि उ पचे ईसू क नाउँ पन तउ कउनो स कछू बात करइँ अउर न ही उपदेस देइँ। 19 मुला पतरस अउर यूहन्ना ओनका जवाब दिहेन, “तू पचे ही फरियावा, क परमेस्सर क समन्वा हमरे बरे इ नीक होइ कि परमेस्सर न सुनिके हम तोहार सुनी? 20 हम, जउन कछू हम पचे लखा ह अउर सुना ह, ओका कहे क आलावा अउर कछू नाहिं कर सकित।”
21-22 फिन उ पचे ओनका धमकाए क पाछे छोड़ दिहन। ओनका सजा देइ क कउनो रस्ता नाहीं मिलि सका काहेकि जउन कछू भवा रहा, ओकरे बरे सबहिं मनइयन परमेस्सर क स्तुति करत रहेन। जउने मनई क नीक करइ क इ काम कीन्ह गवा रहा, ओकर उमिर चालीस बरिस स जिआदा रही।
पतरस अउर यूहन्ना क लउटब
23 जब ओनका छोड़ दीन्ह गवा तउ आपन ही मनइयन क लगे आइ गएन अउर ओनसे जउन कछू मुख्ययाजक अउर बुजुर्ग यहूदी नेतन कहेन, उ सब ओनका कहिके सुनावा गवा। 24 जब उ पचे इ सुनेन तउ मिलिके उँची आवाज मँ परमेस्सर क गोहरावत भवा बोलेन, “स्वामी, तू ही अकास, धरती, समुद्दर अउर ओकरे अंदर जउन कछू अहइ, ओका बनाया ह। 25 तू ही पवित्तर आतिमा क जरिये आपन सेवक, हमरे पूर्वज दाऊद क मुँहना स कहे रहा:
‘देखाएन इ जानित आपन अहंकार काहे?
मनइयन वृथा ही कुचाल काहे किहेन?
26 इ धरती क राजा लोग आपन क तइयार किहेन ओनके खिलाफ जुद्ध बरे।
अउर राजा बटुर गएन पर्भू अउर ओकरे मसीह क खिलाफत मँ।’ (B)
27 हाँ, हेरोदेस अउर पुन्तियूस पिलातुस भी इ सहर मँ गैर यहूदियन अउर इस्त्राएलियन क संग मिलिके तोहरे पवित्तर सेवक ईसू क खिलाफ, जेकर तू मसीह रूप मँ अभिसेक किहे ह, सचमुच उ पचे एक अउट ग रहेन। 28 उ पचे बटुर गएन काहेकि तोहार सक्ती अउर इच्छा क अनुसार जउन कछू पहिले ही तय होइ चुका रहा उ पूरा होइ। 29 अउर अबहिं हे पर्भू, ओनकइ धमकिन प धियान द्या अउर आपन सेवक लोगन क निडर होइके ‘तोहार बचन’ सुनावइ क सक्ती द्या। 30 जब कि चंगा किहे क पाछे आपन हाथ बढ़ाया अउर अद्भुत चीन्हन अउर अद्भुत कारजन तोहरे पवित्तर सेवकन क जरिये ईसू क नाउँ प कीन्ह जात रहत हीं।”
31 जब उ पचे पराथना कइ चुकेन तउ जउने ठउरे प उ सबइ बटुरा रहेन, उ हल गवा अउर ओन सब मँ “पवित्तर आतिमा” समाइ गवा। अउर उ पचे निडर होइके परमेस्सर क बचन बोलइ लागेन।
बिसवासी क मेल जोल क जिन्नगी
32 बिसवासियन क इ समूचा दल एक मन अउर एक आतिमा स साथ रहा। कउनो भी इ नाहीं कहत रहा कि ओकर कउनो भी चीज ओकर आपन अहइ। ओनकइ लगे जउन कछू होत, उ पचे सब कछू क आपुस मँ बाँट लेतेन। 33 अउर प्रेरितन पूरी सक्ती क संग पर्भू ईसू क पुनरूत्थान क बारे मँ साच्छी देत रहेन। परमेस्सर क महान बरदान ओन पइ बना रहत। 34 दले मँ कउनो क कउनो चीज क कमी नाहीं रहत रही। काहेकि जउन कउनो क लगे खेत या घर होत, उ पचे ओका बेच देत रहेन अउर ओसे जउन धन मिलत, 35 ओका लिआइके प्रेरितन क गोड़वा प धइ देतेन। अउर जेका जेतॅनी जरूरत होत, ओका ओतॅना धन दइ दीन्ह जात।
36 उदाहरण बरे यूसुफ नाउँ क, साइप्रस मँ पइदा भवा, एक लेवी रहा, जेका प्रेरितन बरनाबास (अर्थात् “सान्ति क पूत”) भी कहा करत रहेन। 37 उ एक ठु खेत बेंच दिहेस जेकर उ मालिक रहा अउर उ धन लाइके प्रेरितन क गोड़वा प धइ दिहस।
अधो वस्त्र
13 जउन यहोवा मोहसे कहेस उ इ अहइ: “यिर्मयाह, आवा अउर एक ठु सन (कीमती सूती कपड़ा) क अधोवस्त्र बेसहा। तब एक आपन कमर मँ लपेटा। अधोवस्त्र क गीला न होइ द्या।”
2 एह बरे मइँ एक ठु सन क अधोवस्त्र बेसहेउँ, जइसा कि यहोवा करइ क कहे रहा अउर मइँ एका आपन कमर मँ लपेटेउँ। 3 तब यहोवा क सँदेसा मोरे लगे दुबारा आवा। 4 सँदेसा इ रहा: “यिर्मयाह आपन बेसहा गए अधोवस्त्र क ल्या अउर परात क जा। अधोवस्त्र क चट्टानन क दराइ मँ छिपाइ द्या।”
5 एह बरे मइँ परात गएउँ अउर जइसा यहोवा कहे रहा, मइँ अधोवस्त्र क हुवाँ छुपाइ दिहेउँ। 6 कइउ दिनन बाद यहोवा मोहसे कहेस, “यिर्मयाह, अब तू परात जा। उ अधोवस्त्र क ल्या जेका मइँ छुपावइ क कहे रहेउँ।”
7 एह बरे मइँ परात क गएउँ अउर मइँ खोदके अधोवस्त्र क निकारेउँ, मइँ ओका चट्टानन क दरार स निकारेउँ जहाँ मइँ ओका छुपाइ राखे रहेउँ। किन्तु अब मइँ अधोवस्त्र क पहिर नाहीं सकत रहेउँ काहेकि उ गलि चुका रहा, उ कउनो भी काम क नाहीं रह गवा रहा।
8 तब यहोवा क सँदेसा मोका मिला। 9 यहोवा जउन कहेस, उ इ अहइ: “अधोवस्त्र गल चुका बा अउर कउनो भी काम क नाहीं रह गवा ह। इहइ प्रकार मइँ यहूदा अउर यरूसलेम क घमण्डी लोगन क बर्बाद करब। 10 उ पचे मोरे सँदेसन क सुनइ स इन्कार किहेन ह। उ पचे हठी अहइँ अउर उ पचे सिरिफ उ करत हीं जउन उ पचे करइ चाहत हीं। उ पचे दूसर देवतन क अनुसरण अउर ओनकर पूजा करत हीं। उ पचे यहूदा क लोग इ सने क अधोवस्त्र क तरह होइ जइहीं। उ पचे बर्बाद होइहीं अउर कउनो काम क नाहीं रइहीं। 11 अधोवस्त्र मनई क कमर स कसिके लपेटा जात ह। उहइ तरह मइँ पूरे इस्राएल अउर यहूदा क परिवारन क आपने चारिहुँ कइँती लपेटेउँ।” इ सँदेसा यहोवा क हिआँ स अहइ। “मइँ वइसा एह बरे किहेउँ कि उ सबइ लोग मोर लोग होइहीं। तब मोर लोग मोका जस, तारीफ अउर प्रतिस्ठा प्रदान करिहीं। किन्तु मोर लोग मोर एक नाहीं सुनेन।”
यहूदा क चेताउनियन
12 “यिर्मयाह, यहूदा क लोगन स कहा: ‘इस्राएल क परमेस्सर यहोवा जउन कहत ह, उ इ अहइ: हर एक दाखरस क मसक दाखरस स भरी जाइ चाही।’ उ सबइ लोग हँसिहीं अउर तोहसे कहिहीं, ‘निहचय ही हम जानित ह कि हर एक दाखरस क मसक दाखरस स भरी जाइ चाही।’ 13 तब तू ओनसे कहब्या, ‘यहोवा जउन कहत ह उ इ बाटइ: मइँ इ देस क हर एक निवासी क ओन राजा क जउन दाऊद क सिंहासने पइ बइठत हीं, याजकन, नबियन अउर सबहिं लोगन क मदमत्त क नाई बेसहारा करब। 14 मइँ यहूदा क लोगन क ठोकर खाइ अउर एक दूसरे पइ महराइ देब। पिता अउ पूत एक दूसर पइ भहरइहीं।’ इ सँदेसा यहोवा क अहइ। ‘मइँ ओनके बरे अफसोस नाहीं करब अउर न ओन पइ द्या। मइँ करूणा क, यहूदा क लोगन क नस्ट करइ स रोकइ नाहीं देब।’”
15 सुना अउ धियान द्या।
यहोवा तू पचन्क सँदेस दिहे अहइ।
घमण्डी जिन बना।
16 आपन परमेस्सर यहोवा क सम्मान करा,
ओकर स्तुति करा नाहीं तउ उ अँधियारा लाई।
अँधेरी पहाड़ियन पइ लड़खड़ाइ अउर गिरइ स पहिले ओकर स्तुति करा।
यहूदा क लोगो, तू पचे प्रकास क आसा करत अहा।
किन्तु यहोवा प्रकास क घोर अँधियारा मँ बदली।
यहोवा प्रकास क बहोत गहिर आँधियारा स बदल देई।
17 यहूदा क लोगो, जदि तू पचे यहोवा क अनसुनी करत अहा
तउँ मइँ छुपि जाब अउर रोउब।
तोहार पचन्क घमण्ड मोका रोवाई।
मइँ फूटि-फूटिके रोउब।
मोर आँखिन आँसुअन स भरि जइहीं।
काहेकि यहोवा क रेवड़ धरी जाइ।
18 इ सबइ बातन राजा अउर ओकर रानी स कहा,
“आपन सिंहासनन स उतरा।
तोहार पचन्क सुन्नर मुकुट तोहरे पचन्क मूँड़न स गिर चुका अहइँ।”
19 नेगव रेगिस्ताने क नगरन मँ ताला पड़ चुका अहइ,
ओनका कउनो खोल नाहीं सकत।
यहूदा क लोगन क देस निकारा दिया जाइ चुका बाटइ।
ओन सबहिं क बंदी क रूप मँ लइ जावा गवा अहइ।
20 यरूसलेम, धियान स लखा।
दुस्मनन क उत्तर स आवत लखा।
तोहार पचन्क रेवड़ कहाँ अहइँ?
परमेस्सर तू पचन्क सुन्नर रेवड़ दिहे रहा।
तू पचन्स उ रेवड़ क देखरेख क आसा रही।
21 जब यहोवा उ रेवड़ क हिसाब तू पचन्स माँगी
तउ तू पचे ओका का जवाब देब्या?
तू पचन्स आसा रही कि तू पचे परमेस्सर क बारे मँ लोगन क सिच्छा देब्या।
तोहरे पचन्क नेता लोगन स लोगन क अगुवई करइ क आसा रही।
लेकिन उ पचे इ कारज नाहीं किहन।
एह बरे तू पचन्क बहोत दुःख व पीरा भुगतइ होइ।
22 तू पचे आपन स पूछ सकत अहा,
“इ बुरी बिपत्ति मोह पइ काहे आइ?”
इ सबइ बिपत्तियन तोहरे पचन्क अनेक अपराधन क कारण आई।
तू पचन्क निर्वस्त्र कीन्ह गवा अउर तोहार संग
हिसंक अउर सरमनाक बेउहार कीन्ह गवा।
23 एक ठु करिया मनई आपन चमड़ी क रंग बदल दिहस।
अउर कउनो चीता आपन धब्बन नाहीं बदल सकत।
ओ यरूसलेम, उहइ तरह तू भी बदल नाहीं सकत्या, नीक काम नाहीं कइ सकत्या।
तू सदा ही बुरे करम करत अहा।
24 “मइँ तू पचन्क आपन घर तजइ क मजबूर करब,
जब तू पचे पराब्या तब हर दिसा मँ दउड़ब्या।
तू पचे उ भूसे क तरह होब्या जेका रेगिस्ताने क हवा उड़ाइ लइ जात ह।
25 इ सबइ उ सबइ चीजन अहइँ जउन तोहरे पचन्क संग होइहीं,
इ मोर जोजना क तोहार पचन्क हींसा अहइ।”
इ सँदेसा यहोवा क अहइ।
“इ काहे होइ?
काहेकि तू पचे मोका बिसरि गया,
तू पचे लबार देवतन पइ बिस्सास किहा।
26 यरूसलेम मँ, मइँ तोहरे पचन्क वस्त्र उतारब
लोग तोहार नंगा होइ के देखिहीं
अउर तू पचे लज्जा स गड़ जाब्या।
27 मइँ ओन खउफनाक कामन क लखेउँ जउन तू किहा।
मइँ तोहका हँसत अउर आपन पिरेमियन क संग तने क सम्बन्ध करत लखेउँ।
मइँ जानत हउँ कि तू रण्डी क तरह दुस्कर्म किहे ह।
मइँ तोहका पहाड़ियन अउर खेतन मँ लखेउँ ह।
यरूसलेम, इ तोहरे बरे बहोत बुरा होइ।
तू कब तलक आपन गंदे पापन क करत रहब्या?”
ईसू क पीलातुस क अगवा पेसी
(मरकुस 15:1; लूका 23:1-2; यूहन्ना 18:28-32)
27 दूसर दिन बड़े भिन्सारे सबइ ही मुख्य याजकन अउर बुजुर्ग यहूदी नेतन ईसू क मरवाइ डावइ क एक चाल चलेन। 2 फिन उ पचे ओका बाँधि के लइ गएन अउर राज्यपाल पिलातुस क सौपं दिहन।
यहूदा क आत्महत्या
(प्रेरितन 1:18-19)
3 ईसू क धरवावइ वाला यहूदा जब देखेस कि ईसू क दोखी ठहराइ दीन्ह ग अहइ, तउ उ बहोत पछतावा। अउर उ याजकन तथा यहूदी नेतन क चाँदी क तीस सिक्कान लउटाइ दिहस। 4 उ कहेस, “मइँ एक वे अपराधी क मार डावइ बरे धरावइ क पाप कीन्ह ह।”
ऍह प मनई कहेन, “हम पचेन क का! इ तोहार आपन मामिला अहइ।”
5 ऍह प यहूदा चाँदी क ओन सिक्कान क मन्दिर क भितरे लोकाएके चला गवा अउर फिन बाहेर जाइके आपन क फाँसी लगाएस।
6 मुख्ययाजकन उ सब चाँदी क सिक्कन क उठाइ लिहन अउर कहेन, “हमरे व्यवस्था क मुताविक इ धन क मन्दिर क खजाना मँ धरब नीक नाहीं काहेकि ऍकर प्रयोग कउनो क मार डावइ बरे कीन्ह ग रहा।” 7 एह बरे उ पचे उ सिक्कान क यरूसलेम मँ बाहेर स आवइ वाले मनइयन क मरि जाए प गाड़इ बरे कोहारे क खेत खरीदै क फैसला किहन। 8 एह बरे आजु ताईं इ खेत “लहू क खेत” क नाउँ स जाना जात ह। 9 इ तरह परमेस्सर क नबी यिर्मयाह क कहा भवा बचन पूर होइ ग:
“उ पचे चाँदी क तीस सिक्कान बरे, उ रकम जेका इस्राएल क मनइयन ओकरे बरे देब तइ किहे रहेन। 10 अउ पर्भू क जारिये मोका दीन्ह गवा हुकुम क मुताबिक ओसे कोंहारे क खेत खरीदेन।”[a]
पिलातुस क सवाल ईसू स
(मरकुस 15:2-5; लूका 23:3-5; यूहन्ना 18:33-38)
11 ऍकरे बीच मँ ईसू राज्यपाल क समन्वा पेस भवा। राज्यपाल ओसे पूछेस, “का तू यहूदियन क राजा अहा?”
ईसू कहेस, “हाँ, मइँ हउँ।”
12 दुसरी कइँती जब प्रमुखयाजकन अउर बुजुर्ग यहूदी नेतन ओह प दोख लगाव रहेन तउ उ कउनो जवाब नाहीं दिहस।
13 तब पिलातुस ओसे पूछेस, “का तू नाहीं सुनत अहा कि उ सबइ तोह प केतॅता दोख लगावत अहइँ?”
14 मुला ईसू पिलातुस क कउनो भी दोख क जवाब नाहीं दिहस। पिलातुस क ऍह प बहोत अचरज भवा।
ईसू क छोड़इ मँ पिलातुस सफल नाहीं भवा
(मरकुस 15:6-15; लूका 23:13-25; यूहन्ना 18:39–19:16)
15 फसह क त्यौहार क अउसर प राज्यपाल क रीति रही कि उ कउनो भी एक कैंदी क, जेका भीड़ चाहत रही, ओनके बरे छोड़ दीन्ह जात रहा। 16 उहइ समइया बरअब्बा नाउँ क एक बदनाम कैदी हुवाँ रहा।
17 तउ जब भीड़ आइके एकट्ठी होइ गइ तउ पिलातुस ओसे पूछेस, “तू का चाहत बाट्या, मइँ तोहरे बरे केका छोड़ि देउँ, बरअब्बा क या उ ईसू क, जउन मसीह कहा जात ह?” 18 पिलातुस जानत रहा कि उ पचे ओका मने मँ डाह क कारण धरवाइ दिहेन ह।
19 पिलातुस जब निआव क सासन प बइठा रहा तउ ओकर पत्नी ओकरे लगे एक संदेसा पठएस: “उ सीधा साँच मनई क संग कछू जिन कइ बइठ्या। मइँ ओकरे बारे मँ एक ठु सपन देखिउँ ह जेसे मइँ आज सारा दिन भइ बेचइन रही।”
20 मुला प्रमुख याजकन अउर बुजुर्ग यहूदी नेतन भीड़े क बगदाएन, फुसलाएन कि उ पिलातुस स बरअब्बा क छोरि देइ क अउर ईसू क मरवाइ डावइ बरे कहेन।
21 जवाबे मँ राज्यपाल ओसे पूछेस, “दुइनउँ कैदियन मँ स कउनो एक बरे केका मोसे छुरवावइ बरे तू पचे चाहत बाट्या?”
उ पचे जवाब दिहन, “बरअब्बा क।”
22 जब पिलातुस ओसे पूछेस, “तउ मइँ, जउन मसीह कहा जात बा उ ईसू क का करउँ?”
उ सबइ कहेन, “ओका क्रूस प चढ़ावा!”
23 पिलातुस पूछेस, “काहे, उ कउन अपराध किहेस ह”
मुला उ सबइ तउ अउर जिआदा चिचियानेन, “ओका क्रूस प चढ़ाइ द्या।”
24 पिलातुस देखेस कि अब कउनो फायदा नाहीं। मुला दंगा भड़कइ क बा। तउ उ तनिक पानी लिहस अउर भीड़े क समन्वा आपन हाथ धोएस, उ बोला, “इ मनई क लहू स हमार कउनो जिम्मेदारी नहीं। यह तोहार मामिला बा!”
25 जवाबे मँ सब लोगन कहेन, “एक्करे मउत क जबावदेही हम अउ हमार लरिकन मान लेत हँ।”
26 तब पिलातुस ओनके बरे बरअब्बा क छोरि दिहस अउर ईसू क कोड़वा स पिटवाइ क क्रूस प चढ़ावइ बरे सौंपि दिहस।
ईसू क मजाक
(मरकुस 15:16-20; यूहन्ना 19:2-3)
27 फिन राज्यपाल क सिपारी ईसू क राज्यपाल निवास क भितरे लइ गएन। हुवाँ ओकरे चारिहुँ कइँती सिपाहियन क फउज ऍकट्ठी होइ गइ। 28 उ पचे ओकर ओढ़ना उतार दिहन अउ चटकीले लाल रंग क ओढ़ना पहिराइ क 29 काँटे स बनवा एक ताज ओकरे सिरे प ढाँपि दिहस। ओकरे दाहिन हाथ मँ ए ठु नरकट थमाइ दिहन अउर ओकर समन्वा अपने घुटनन पइ निहुरिके क ओकरे हँसी करत बोलेन, “यहूदियन क राजा अमर रहइ!” 30 फिन उ पचे ओकरे मुँहना पर थूकेन, डंडी छोरेन अउर ओकरे मुँड़वा प सुटकइ लागेन। 31 जब उ पचे ओकर हँसी उड़ाइ चुकेन तउ ओकर पोसाक उतारेन अउर ओका ओकर आपन ओढ़ना पहिराइ क क्रूसे प चढ़ावइ बरे लइ चलेन।
ईसू क क्रूस प चढ़ाउब
(मरकुस 15:21-32; लूका 23:26-39; यूहन्ना 19:17-19)
32 जब उ पचे बाहेर ही रहेन तउ ओनका कुरैन क निवासी समौन नाउँ क एक मनई मिलि गवा। उ पचे ओह प जोर डाएन कि उ ईसू क क्रूस उठाइके चलइ। 33 फिन जब उ पचे गुलगुता नाउँ क जगह (जेकर अरथ अहइ “खोपड़ा क ठउर।”) पहुँचेन। 34 तउ उ पचे ईसू क अंगूर क रस मँ पित्त[b] नाइ क पिअइ बरे दिहन। मुला जब ईसू ओका चखेस तउ पिअइ स मना किहस।
35 तउ उ सबइ ओका क्रूसे प चढ़ाइ दिहन अउर ओकरे ओढ़ना क आपुस मँ बाँटइ बरे पाँसा खेलिके आपन हींसा लिहन। 36 ऍकरे पाछे हुवाँ बइठिके ओह प पहरा देइ लागेन। 37 उ पचे ओकर जुर्म पत्थर लिखिके ओकरे मूड़े पर लटकाइ दिहेन, “इ यहूदियन क राजा ईसू अहइ।”
38 इहइ समइ ओकरे संग दुइ डाकु भी क्रुसे प चढ़ाइ जात रहेन एक ठु ओकरे दाहिन अउर दूसर ओकरे बाईं कइँती। 39 नगिचे स होइ क जात मनइयन आपन मूँड़ी झमकावत ओका बेज्जत करत रहेन। 40 उ पचे कहत रहेन, “अरे मन्दिर क गिराइके तीन दिना ओका फिन स बनवइया, आपन क तउ बचावा। जदि तू परमेस्सर क पूत अहा तउ क्रूसे स तरखाले उतरि आवा।”
41 अइसे ही मुख्ययाजकन, धरम सास्तिरियन अउर बुजुर्ग यहूदी नेतन क संग ओकर इ कहिके हँसउआ करत रहेन: 42 “दूसर क उद्धार करइया इ आपन उद्धार नाहीं कइ सकत। इ इस्राएल क राजा अहइ। इ क्रूसे स अबहिं तरखाले उतरइ तउ हम पचे ऍका मान लेइ। 43 इ परमेस्सर मँ बिसवास करत ह। तउ जदि परमेस्सर चाहइ अब ऍका बचाइ लेइ। आखिर इ तउ कहत भी रहा, ‘मइँ परमेस्सर क पूत हउँ।’” 44 उ सबइ लुटेरन भी जउन ओकरे संग क्रूसे प चढ़ाइ गएन रहा, ओकर अइसा ही हँसउआ भवा।
ईसू इ मउत
(मरकुस 15:33-41; लूका 23:44-49; यूहन्ना 19:28-30)
45 फिन समूची धरती प दुपहर स तीन बजे तलक अँधियारा छावा रहा। 46 कउनो तीन बजे क लगभग ईसू ऊँच अवाजे मँ चिल्लान, “एली, एली, लमा सबक्तानी?” अरथ, “मोरे परमेस्सर, हे मोरे परमेस्सर, तू मोका काहे बिसार दिहा ह?”
47 हुवाँ खड़ा भवा मनइयन मँ स कछू इ सुनिके कहइ लागेन, “यह एलिय्याह क पुकारत अहइ।”
48 फिन फउरन ओनमाँ स एक मनई धावत सिरका मँ बोरा भवा स्पंज एक डंडी पइ लटकाइ क लइ आवा अउर ओका ईसू क चूसइ बरे दिहस। 49 मुला दूसर लोग कहत रहेन, “छोड़ द्या, देखित ह कि एलिय्याह ऍका बचावइ आवत ह कि नाहीं।”
50 ईसू फिन एक दाईं ऊँच सुरे मँ चिल्लाइ क प्राण तजि दिहस।
51 उहइ समइया मन्दिरे क परदा ऊपर स तरखाले तलक फाटिके दुइ टुकड़न मँ बाँटि गवा। धरती डोल उठी। चट्टानन फाट पड़िन। 52 हियाँ तलक कब्रन खुलि गइन अउर परमेस्सर क मरा भएन भक्तन क बहोतन सरीर जी उठेन। 53 उ पचे कब्रन स निकरि आएन अउर ईसू क जी जाइ क पाछे पवित्तर नगर मँ जाइके बहोतन क देखाइॅ दिहेन।
54 रोम क फऊजी नायक अउर ईसू क पहरुअन भूँइडोल अउर वइसी ही दूसर घटनन क लखिके डेराअ गएन। उ पचे बोलेन, “ईसू असिल मँ परमेस्सर क पूत रहा!”
55 हुवाँ ढेरि के स्त्रियन खड़ी रहिन जउन दूरे स लखत रहिन। उ पचे ईसू क देखभाल बरे गलील स ओकरे पाछे पाछे आवत रहिन। 56 ओनमाँ स मरियम मगदलीनी, याकूब अउर यूसुफ क महतारी मरियम तथा जब्दी क बेटवन की महतारी रही।
ईसू क दफन
(मरकुस 15:42-47; लूका 23:50-56; यूहन्ना 19:38-42)
57 सांझ क समइ अरिमतियाह सहर स यूसुफ नाउँ क एक धनवान आवा उ खुद ही ईसू क चेला होइ गवा। यूसुफ पिलातुस क लगे गवा अउर ईसू क ल्हास माँगेस। 58 तबहिं पिलातुस हुकुम दिहस कि सब ओका दइ दीन्ह जाइ। 59 यूसुफ ल्हास लई लिहस अउर ओका एक नई चदरे मँ लपेटिके 60 आपन खुद क नई कब्र मँ धइ दिहस। जेका उ चट्टाने मँ काटि के बनवाए रहा। फिन उ चट्टाने क दरवाजे प एक बड़का सा पाथर लुढ़काएस अउर चला गवा। 61 मरियम मगदलीनी अउर दूसर स्त्री मरियम हुवाँ कब्रे क समन्वा बइठी रहिन।
ईसू क कब्रे प पहरा
62 अगले दिन जब सुक्रवार बीत गवा तउ प्रमुख याजकन अउर फरीसियन पिलातुस स मिलइ गएन। 63 उ पचे कहेन, “महासय हमका याद बा कि इ छलिया, जब उ जिअत रहा, कहे रहा, ‘तिसेर दिन मइँ फिन जी उठब।’ 64 तउ हुकुम द्या कि तिसरे दिन तलक कब्रे प चौकसी कीन्ह जाइ। जेसे अइसा न होइ कि ओकर चेलन आइके ओकर ल्हास चोरॉइ लइ जाइँ अउर मनइयन स कहइँ, उ मरे भवा मँ स जी गवा। इ दूसर छल पहिले छल से जिआदा बुरा होई।”
65 पिलातुस ओसे कहेस, “तू पहरा बरे सिपाही लइ जाइ सकत ह। जा जइसी चौकसी कइ सकत ह, करा।” 66 तब उ पचे चला गएन अउर उ पाथर प मोहर लगाइके अउर पहरुअन क हुवाँ बइठाइ के कब्र क हिफाजत करइ लागेन।
Awadhi Bible: Easy-to-Read Version. Copyright © 2005 Bible League International.