M’Cheyne Bible Reading Plan
एप्रैम अउ मनस्से बरे प्रदेस
16 इ उ प्रदेस अहइ जेका यूसुफ क परिवार पाएस। इ प्रदेस यरीहो क लगे यरदन नदी स सुरु भवा अउ आगे पूरब मँ यरीहो पानी तलक रहा। तउ इ प्रदेस यरीहो स बेतेल क रेगिस्तानी पहाड़ी तलक चली गइ। 2 सीमा लगातार बेतेल स लूज तलक अउर फुन अतारोत पइ एरेकी सीमा तलक चली गइ रही। 3 तब इ चउहद्दी पच्छिम मँ यपलेती लोगन क चउहद्दी तलक चली गइ। इ चउहद्दी लगातार खाले बेथोरोन तलक चली गइ रही। इ चउहद्दी गेजेर तलक गइ अउर समुद्दर तलक चलतइ चलत गइ।
4 इ तरह मनसे अउर एप्रैम आपन प्रदेस पाएस। (मनस्से अउ एप्रैम यूसुफ क पूत रहेन।)
5 इ उ प्रदेस अहइ जेका एप्रैम क कबिलन क दीन्ह गवा: ओनकर पूरबी चउहद्दी ऊपरी बेथोरोन क निअरे अत्रोतदार पइ सुरु भइ। 6 अउर इ हुआँ स सागर तलक जात रही। चउहद्दी उत्तर मँ मिकमतात क छोड़ कर तानतसीलो क मुड़ी अउ लगातार पूरब कइँती यानोह तलक चली गइ रही। 7 तब चउहद्दी यानोह स अतारोथ अउ नारा तलक चली गइ। इ चउहद्दी लगातार चलत भइ यरीहो छुअत ह अउर यरदन नदी पइ खतम होइ जात ह। 8 इ चउहद्दी तप्पूह स होत भइ पच्छिम कइँती कानाह नाला क जात ह अउर सागर पइ खतम होइ जात ह। इ उ प्रदेस अहइ जउन एप्रैम क लोगन क ओकरे परिवार समूह क अनुसार दीन्ह गवा रहा। 9 एप्रैम क बहोत स चउहद्दी क सहर असल मँ मनस्से क चउहद्दी मँ रहेन मुला एप्रैम क लोगन ओन सहरन अउर आपन खेतन क पाएन। 10 मुला एप्रैम लोग कनानी लोगन क गेजेर सहर छोड़इ क मजबूर करइ मँ समर्थ नाहीं होइ सकेन। ऍह बरे कनानी लोग अब तलक एप्रैमी लोगन क बीच रहत हीं।[a] मुला कनानी लोग एप्रैमी लोगन क दास क रूप मँ रहत रहेन।
17 तब मनस्से क परिवार समूह क भुइँया दीन्ह गइ। मनस्से यूसुफ क पहिला पूत रहा। मनस्से क पहिला पूत माकीर रहा जउन गिलाद क बाप[b] रहा। माकीर महान जोधा रहा, ऍह बरे गिलाद अउ बासान माकीर क परिवार क दीन्ह गएन। 2 मनस्से क परिवार समूह क दूसर कबिलन क भी भुइँया दइ दीन्ह गइ। उ सबइ कबिलन अबीएजेर, हेलेक, अस्त्रीएल, सेकेम, हेपेर अउ समीदा रहेन। इ सबहिं मनस्से क दूसर पूत रहेन, जउन यूसुफ क पूत रहा।
3 सलोफाद हेपेर क पूत रहा। हेपेर गिलाद क पूत रहा। गिलाद माकीर क पूत रहा अउर माकीर मनस्से क पूत रहा। मुला सलोफोद क कउनो पूत नाहीं रहा। ओकर पाँच बिटियन रहिन। बिटियन क नाउँ महला, नोआ, होग्ला, मिल्का अउर तिर्सा रहेन। 4 बिटियन याजक एलीआज़ार अउर नून क पूत यहोसू क इलावा सबहिं प्रमुखन क लगे गइन। बिटियन कहेन, “यहोवा मूसा स निर्देस दिहस कि उ हमका वइसेन ही भुइँया देइँ जइसेन हमार भाईयन क दीन्ह जात हीं।” ऍह बरे एलीआज़ार, यहोवा क हुकुम मानत भए एन बिटियन क वाइसेन ही भुइँया दिहेस जइसन ओनके चाचा लोगन क मिली रही।
5 इ तरह मनस्से क परिवार क लगे यरदन नदी क पच्छिम मँ भुइँया क दस छेत्र रहेन अउर यरदन नदी क दुसरी कइँती दुइ ठु दूसर छेत्र गिलाद अउ बासान रहेन। 6 मनस्से क पोतियन क वइसेन ही भुइँया दीन्ह गइ जइसेन मनस्से क दूसर बेटवन सन्तानन क दीन्ह गइ रही। गिलाद प्रदेस मनस्से क सेस परिवार क दीन्ह गवा।
7 मनस्से क भुइँया आसेर अउ मिकमतात क छेत्र क बीच रही। इ सकेम क निअरे अहइ। एकर चउहद्दी एनतप्पूह स दक्खिन तलक जात रही। 8 तप्पूह क भुइँया मनस्से क रही मुला तप्पूह सहर ओकर नाहीं रहा। तप्पूह सहर जउन कि मनस्से क प्रदेस क चउहद्दी पइ रहा उ एप्रैम क बेटवन स आबाद रहा। 9 मनस्से क चउहद्दी काना नाले क दक्खिन मँ रही। मनस्से क इ छेत्र क सहर एप्रैम क रहेन। मनस्से क चउहद्दी नदी क उत्तर मँ रही अउर इ पच्छिम मँ लगातार भूमध्य सागर तलक चली गइ रही। 10 दक्खिन क भुइँया एप्रैम क रही अउर उत्तर क भुइँया मनस्से क रही। भूमध्य सागर पच्छिम क चउहद्दी बनावत रहा। इ चउहद्दी उत्तर मँ आसेर क प्रदेस क छुअत रही अउ पूरब मँ इस्साकार क प्रदेस क।
11 इस्साकार अउ आसेर क छेत्र क बेतसान अउ एकर चारिहुँ कइँती क गाँव उ यिबलाम अउ एकर चारिहुँ कइँती क गांव मनस्से क रहेन। मनस्से क कब्जा मँ दोर अउ एकर चारिहुँ कइँती क गाँव अउ एनदोर अउर एकर चारिहुँ कइँती क गाँव भी रहेन। नापात क तीन ठु सहरन समेत तानाक अउर ओकर चारिहुँ कइँती क गाँव भी मनस्से क कब्जा मँ रहा। 12 मनस्से क लोग ओन सहरन क नाहीं हराइ सका रहेन। ऍह बरे कनानी लोग हुआँ रहत रहेन। 13 मुला इस्राएल क लोग सक्तीसाली भएन। जबहिं अइसा भवा तउ उ पचे कनान क लोगन क गुलामी मँ जाइ बरे मनबूर किहेन। मुला उ पचे कनानी लोगन क उ भुइँया तजि देइ बरे मजबूर नाहीं किहेस।
14 यूसुफ क परिवार समूहन यहोसू स बातन किहेन अउर कहेन, “तू भुइँया क हमका एक हींसा दिह्या ह। मुला हम बहोत स लोग अहइँ। तू हम लोगन क उ देस क एक हींसा ही काहे दिह्या जबकि यहोवा हम लोगन क आसीर्बाद दिहस?”
15 अउर यहोसू ओनका जवाब दिहस, “अगर तू लोग गनती मँ जियादा ह्वा तउ पहाड़ी प्रदेस क जंगलन मँ ऊपर चढ़ा अउर हुआँ रहइ बरे अपन जगह बनावा। इ प्रदेस परिज्जन अउ रपाई लोगन क अहइ। अगर एप्रैम क पहाड़ी प्रदेस तू लोगन क जरुरत स छोटवार अहइ तउ उ भुइँया क लइ ल्या।”
16 यूसुफ क लोग कहेन, “इ फुरइ अहइ कि एप्रैम क पहाड़ी प्रदेस हम लोगन बरे काफी नाहीं अहइ। मुला इ प्रदेस जहाँ कनानी लोग रहत हीं खतरनाक बाटइ। उ सबइ वुसल जोधा अउ ओनके लगे लोहा क रथ अहइँ। अउर उ सबइ यिज्रेल क घाटी अउर एकर चारिहुँ कइँती क गाँव क इलावा बेतसान क छेत्र पइ दबदबा रखत हीं।”
17 तब यहोसू यूसुफ, एप्रैम अउर मनस्से क लोगन स कहेस, “मुला तू लोगन क गनती बहोतइ जियादा अहइ। अउर तू लोग बड़की ताकत धरत ह। तू लोगन क जियादा भुइँया मिलइ चाही। 18 तू लोगन क पहाड़ी प्रदेस लेइ क होइ। इ जंगल अहइ, मुला तू लोग बृच्छन क काटि सकत ह अउर रहइ जोग्ग नीक जगह बनाइ सकत ह। इ सारा पचन्क होइ। तू लोग कनानी लोगन क उ प्रदेस क तीज देइ बरे मजबूर करब्या। तू लोग ओनका सक्तीसाली रथ क होत भए भी जउन ओनका सक्ती प्रदान करत ह हराइ देब्या।”
1 यहोवा क बड़कई करा।
ओकर बड़कई सरग स करा।
2 हे सबहिं सरगदूतो, यहोवा क जस गावा।
ग्रहो अउ नछत्रो ओकर गुण गान करा।
3 सूरज अउ चाँद, तू पचे यहोवा क गुण गावा।
अकासे क तारो अउ जोतियो, ओकर बड़कई करा।
4 यहोवा क बड़कई सबन त ऊँच पर्वत मँ करा!
हे जल अकासे क ऊपर, ओकर बड़कई करा।
5 यहोवा क नाउँ क बड़कई करा।
काहेकि उ आदेस दिहस, अउर सब कछू रचे रहा।
6 उ ऍन सबन्क बनाएस एह बरे उ सबइ सदा-सदा बना रहइँ।
उ अपरिवर्तनसील कानून बनाएस।
7 ओ धरती पइ क हर वस्तु, यहोवा क गुण गावा।
ओ बिसाल जन्तुओ अउ सबइ महासागरो, ओकर गुण गावा।
8 आगी अउ ओलन, बरफ अउ कुहासा, तूफानी पवन
जउन ओकर वचन क पूरा किहेन, ओकर गुण गावा।
9 पर्वतन अउ सबइ पहाड़न,
फलदार बृच्छ अउ देवदार क बृच्छ, ओकरे गुण गावा।
10 बनेर पसुअन अउ सब पालतु मवेसी, रेंगइवाले जीव अउ पंछियन, ओकर गुण गावा।
11 धरती क सबहिं राजा लोग अउ सबइ रास्ट्रन,
प्रमुखन अउ धरती पइ क सबहिं निआवाधीसन, ओकर स्तुति करा।
12 नव जवान मनसेधू अउ नव जवान मेहरारू, ओकर स्तुति करा।
परमेस्सर बूढ़े लोगन अउ गदेलन क रचेस ह।
13 ओनका यहोवा क नाउँ क स्तुति करइ द्या।
अकेल्ले ओकरे नाउँ ही ऊँच सम्मानित अहइ।
धरती अउ अकास
ओकर चमक-दमक स भरि जाइहीं।
14 उ आपन लोगन क मजबूती क स्रोत क निर्माण किहेस।
उ आपन सबइ भगतन अरथ इस्राएलियन,
अउ ओकरे समीप रहइवाले रास्ट्रन बरे, स्तुति क स्रोत क निर्माण किहेस।
यहोवा क बड़कई करा।
8 यहोवा कहत ह: “उ समइ लोग यहूदा क राजा लोग अउर प्रमुख सासक लोग क हड्डियन क कब्रन स निकारि लेइहीं। उ पचे याजकन अउर नबियन क हड्डियन क ओनकर कब्रन स लइ लेइहीं। उ पचे यरूसलेम क सबहिं लोगन क कब्रन स हड्डियन निकारि लेइहीं। 2 उ सबइ लोग ओन हड्डियन क सूरज, चाँद अउर तारन क पूजा बरे खाले जमीन पइ फइलइहीं। यरूसलेम क लोग सूरज, चाँद अउ तारन क पूजा स पिरेम करत हीं। कउनो भी मनई ओन हड्डियन क बटोरी नाहीं अउर न ही ओनका फुन दफनाई। एह बरे ओन लोगन क हड्डियन गोबर क तरह भुइँया पइ पड़ी रहिहीं।
3 “मइँ यहूदा क लोगन क आपन घर अउ प्रदेस तजइ पर विवस करब। लोग विदेसन मँ लइ जावा जइहीं। यहूदा क उ सबइ कछू लोग जउन जुद्ध मँ नाहीं मारा जाइ सकेन, चहिहीं कि उ पचे मार डावा गए होतेन।” इ सँदेसा यहोवा क अहइ।
पाप अउर सजा
4 “ओन लोगन स कहा, ‘जउन यहोवा कहत ह उ इ अहइ:
“‘तू इ सब जानत अहा कि जउन मनई गिरत ह
उ फुन उठत ह।
अउर जदि कउनो मनई गलत राहे पइ चलत ह
तउ का उ वापस नाहीं आवत ह?
5 यहूदा क लोग गलत राह चला गवा अहइँ।
मुला यरूसलेम क लोग गलत राह चलत ही काहे जात अहइँ?
उ पचे आपन झूठ मँ बिस्सास रखत हीं।
उ पचे मुड़इ अउर लउटइ स इन्कार करत हीं।
6 मइँ ओनका धियान स सुनेउँ ह,
मुला उ पचे उ नाहीं कहतेन जउन फुरइ अहइ।
लोग आपन पापे खातिर पछतातेन नाहीं।
लोग ओन बुरे करमन पइ विचार नाहीं करतेन जेनका उ पचे किहेन ह।
हर एक अपने राहे पइ वइसे ही चला जात अहइ।
उ पचे जुद्ध मँ दउड़त भए घोड़वन क समान अहइँ।
7 अकासे क पंछी भी काम करइ क ठीक समइ जानत हीं।
सारस, कबूतर, खज्जन अउ मइना भी
जानत हीं कब ओनका आपन नवे घरे मँ उड़िके जाब अहइ।
किन्तु मोर लोग नाहीं जानतेन कि यहोवा ओनसे का कराउब चाहत ह।
8 “‘तू पचे कइसे कह सकत ह, “हमका यहोवा क नेम मिली अहइ।
एह बरे हम बुद्धिमान अही?”
किन्तु जउन नेम क सिच्छा देत ह अहइ उहइ एका झुठलाइ दिहेस ह।
9 ओन “चतुर लोग” यहोवा क सिच्छा अनसुनी किहेन ह
एह बरे फुरइ उ पचे असल मँ बुद्धिमान लोग नाहीं अहइँ।
उ पचे “चतुर लोग” जाल मँ फँसावा गएन।
उ पचे काँप उठेन अउर लज्जित भएन।
10 एह बरे मइँ ओनकर मेहररूअन क दूसर मनइयन क देब।
मइँ ओनके खेते क दूसर मालिकन क दइ देब।
इस्राएल क सबहिं लोग जियादा स जियादा धन चाहत हीं।
कम महत्त्वपूर्ण स लइके ज्यादा महत्त्वपूर्ण सबहिं लोग निआवहीन धन बरे लालची अहइ।
हिआँ तलक कि नबी स लइके याजक भी लबार बोलत हीं।
11 नबी अउर याजक हमरे लोगन क घावन क भरइ क जतन अइसे करत हीं
माना उ पचे नान्ह स घाव होइँ।
उ पचे कहत हीं, “सान्ति! सान्ति!
किन्तु हुआँ सान्ति नाहीं अहइँ।”
12 ओन लोगन क आपन किए बुरे करमन बरे लज्जित होइ चाही।
किन्तु उ पचे बिल्कुल लज्जित नाहीं।
एह बरे उ पचे दूसर सबहिं क संग गिर जाइहीं।
जब मइँ ओनका सज़ा देब तउ उ पचे ठोकर खाइहीं।’”
यहोवा कहत ह।
13 “‘मइँ आपन लोगन क इकट्ठा करइ बरे आउब्या
यहोवा कहत ह: कउनो भी अंगूरे क बेलन मँ कउनो अंगूर नाहीं होइ।
कउनो भी अंजीरे क पेड़न पइ कउनो अंजीर नहीं होइ।
हिआँ तलक कि पातियन भी सूखिके झड़ि जाइहीं।
अउर मइँ इ सारी बातन क ओन लोगन पइ होइ देब।’”
14 “‘हम हिआँ खाली काहे बइठा अही?
आवा, मजबूत सहरन क भाग निकरी।
जदि हमार परमेस्सर यहोवा हमका मारइ ही जात अहइ,
तउ हम हुअँइ मरी।
हम यहोवा क खिलाफ पाप किहा ह
एह बरे परमेस्सर हमका पिअइ क पानी जहरीला पानी दिहेस ह।
15 हम सान्ति क आसा करत रहे,
किन्तु कछू भी नीक नाहीं होइ सका।
हम अइसे समइ क आसा करित ह,
जब उ छिमा कइ देइ। किन्तु बिपत्ति ही आइ पड़ी अहइ।
16 दान क परिवार समूह क प्रदेस स
हम दुस्मन क घोड़न क नथुनन क फड़फड़ावइ क आवाज सुनित ह,
ओनकर टापन स धरती काँप उठी अहइ,
उ पचे प्रदेस अउर एहमाँ क सारी चीजन क नस्ट करइ आवा अहइँ।
उ पचे सहर अउर एकर निवासी सबहिं लोगन क
जउन हुआँ रहत हीं नस्ट करइ आवा अहइँ।’”
17 “यहूदा क लोगो, मइँ तू पचन्क डसइ क जहरीला साँप पठवत अहउँ।
ओन साँपन क सम्मोहित नाहीं कीन्ह जाइ सकत।
उ सबइ ही साँप तू पचन्क डसिहीं।”
इ सँदेसा यहोवा क अहइ।
18 परमेस्सर, मइँ बहोत दुःखी
अउर भयभीत अहउँ।
19 मोर लोगन क सुना।
इ देस मँ उ पचे चारिहुँ कइँती मदद बरे गोहरावत अहइँ।
उ पचे कहत अहइँ, “का यहोवा अब भी सिय्योन मँ अहइ?
का सिय्योन क राजा अब भी हुआँ अहइँ?”
किन्तु परमेस्सर कहत ह,
“यहूदा क लोग, आपन देव मूरतियन क पूजा कइके
मोका किरोधित काहे करत अहा?
उ पचे आपन बियर्थ बिदेसी देव मूरतियन क पूजा किहन ह।”
20 लोग कहत हीं,
“फसल काटइ क समइ
अउर गरमी क मौसम चला गवा ह
किन्तु हम बचावा नाहीं जाइ सके।”
21 मोर लोग बीमार अहइँ, एह बरे मइँ बीमार हउँ।
मइँ एन बीमार लोगन क चिन्ता मँ दुःखी अउ निरास हउँ।
22 निहचय ही, गिलाद प्रदेस मँ कछू दवा अहइ।
निहचय ही, गिलाद प्रदेस म बैद्य अहइ।
तउ भी मोरे लोगन क घाव काहे नीक नाहीं होतेन?
बियाहे क भोज प लोगन्क क राजा क बोलावइ क दिस्टान्त कथा
(लूका 14:15-24)
22 एक दाई फिन ईसू ओनसे दिस्टान्त कथन क कहइ लाग। उ बोला, 2 “सरगे क राज्य उ राजा क नाईं अहइ जउन आपन बेटवा क बियाहे प भोज दिहेस। 3 राजा आपन नउकरन क पठएस कि उ पचे ओन मनइयन क बोलाइ लियावईं जेका बियाहे क भोज प न्यौता दीन्ह गवा रहा। मुला उ पचे नाहीं आएन।
4 “उ आपन नउकरन क फिन पठएस, उ कहेस कि जउन मनइयन क बियाह क भोजे प बोलावा गवा ह, ओनसे कहि द्या, ‘देखा मोर भोज तइयार बा। मोर सॉड़ अउर मोटवार ताजा पसू क काटा जाइ चुका बाटइ। सब कछू तइयार अहइ। बियाहे क भोज मँ आइ जा।’
5 “मुला न्यौतहरी ओह प कउनो धियान नाहीं दिहेन अउर उ सबइ चले गएन। कउनो आपन खेत मँ काम करइ चला गवा तउ दूसर मिला आपन आपन काम धंधा पा। 6 अउ कछू मिला तउ राजा क नउकरन क धइके ओकरे साथे मार-पीट किहेन अउ ओनका मार डाएन। 7 तउ राजा कोहाइके आपन फउज पठएस। उ सबइ ओन हत्यारन क मउत क घा पहुँचाइ दिहस अउर ओनके सहर मँ आगी बार दिहेन।
8 “फिन राजा क नउकरन स कहेस, ‘बियाह क भोज तइयार बाटइ मुला जेकॉ बोलॉई गवा रहा, उ सबइ अजोग्ग माना गएन, 9 एह बरे गलियन क नोक्कड़ प जा अउर तू जेका पावा, बियाहे क भोज प बोलॉई लिआवा।’ 10 फिन नउकरन गलियन मँ गएन अउ जउन भी भला अउर बुरा मनई भेंटेन उ पचे ओनका बटोरि लियाएन। अउ सादी क महल मेहमानन स भरि गवा।
11 “मुला जब जेवन्हार क लखइ राजा आवा तउ हुवाँ उ एक अइसा मनई क निहारेस जउन बियाहे क ओढ़ना नाहीं पहिरे रहा। 12 राजा ओसे कहेस, ‘मितउ, बियाहे क वस्तर पहिरे बिना हियाँ भीतर कइसे आइ गया?’ पर उ मनई खमोस रहा। 13 ऍह प राजा आपन नउकरन स कहेस, ‘ऍकर हाथ गोड़ छाँदिके बाहेर अँधियारे मँ नाइ द्या। जहाँ मनई रोवत अउर दँतवा कटकटावत होइहीं।’
14 “काहेकि बोलावा तउ बहोत गवा अहइँ मुला चुना भवा थोड़के अहइँ।”
यहूदी नेतन लोगन्क छलावा
(मरकुस 12:13-17; लूका 20:20-26)
15 तब फरीसियन जाइके एक सभा बोलॉएन जेसे उ इ बात क फरियाइ सकइँ कि ईसू क ओकरे आपन ही कही भई बात मँ कइसे फँसावइ। 16 उ पचे अपने चेलन क हेरोदियन क संग ओकरे लगे पठएन, उ मनइयन ईसू स कहेन, “गुरु हम जानत अही कि तू सच्चा अहा। तू सचमुच परमेस्सर क राहे क सिच्छा देत अहा। अउर तू, कउनो का सोचत ह, ऍकइ चिंता नाहीं करत्या काहेकि तू कउनो मनई क हैसियत प नाहीं जात्या। 17 तउ हमका बतावा तोहार का बिचार बा कि सम्राट कैसर क चुंगी चुकाउब ठीक अहइ कि नाहीं?”
18 ईसू ओनकइ बुरा बिचार क समुझ गवा, तउ उ बोला, “अरे कपटियो! तू पचे मोका काहे परखब चाहत बाट्या? 19 मोका कउनो दीनार देखावा जेसे तू चुंगी अदा करत ह।” तउ सबइ ओकरे लगे एक दीनार लइ आएन। 20 तब उ ओनसे कहेस, “ऍह प केकर मूरत अउर लिखाई खुदी बा?”
21 उ पचइ ओसे कहेन, “कैसर क।”
तब उ ओनसे कहेस, “अच्छा तउ फिन जउन कैसर क अहइ, ओका कैसर क द्या, अउर जउन परमेस्सर क अहइ, ओका परमेस्सर क।”
22 इ सुनिके उ पचइ अचरजे स भरि गएन अउर ओका छोड़िके चला गएन।
सदूकियन क चाल
(मरकुस 12:18-27; लूका 20:27-40)
23 उहइ दिन कछू सदूकियन जउन पुनरुत्थान क नाहीं मनतेन, ओकरे लगे आएन। 24 अउ ओसे पूछेन, “गुरु, मूसा क उपदेस क अनुसार जदि बिना बे बाल बच्चा क कउनो मरि जाइ तउ ओकर भाई, निचके क नातेदार होइ क नाते ओकरे विधवा स बियाह करइ अउर आपन भाई क बंस चलावइ बरे संतान पइदा करइ। 25 अब मान ल्या हम पचे सात ठु भाई अही। पहिलौठा बेटवा का बियाह भवा अउर पाछे ओकर मउत होइ गइ। फिन काहेकि ओकरे कउनो संतान नाहीं भइ, यह बरे ओकर भाई आपन भउजी क आपन पत्नी बनइ लिहस। 26 तब दुसर का भाई मरि गवा। उहइ घटना तिसरेक क संग भइ। जब तलक सातहु भाइयन मरि नाहीं गएन वइसन भवा। 27 अउर सब क पाछे उ स्त्री भी मर गई। 28 अब हमार पूछब इ अहइ कि पुनरुत्थान मँ ओन सातउ मँ स कउने क पत्नी होई काहेकि सातउ ओका आपन बनाएन?”
29 जवाब देत ईसू ओनसे कहेस, “तू बगद गया काहेकि तू पचे पवित्तर सास्तरन अउर परमेस्सर क सक्ती क नाहीं जनत्या। 30 तोहका समझइ चाही कि पुनरुत्थान मँ लोग न तउ बियाह करिहीं अउर न ही कउनो सादी मँ दीन्ह जाई। मुला उ पचे सरगे क दूतन क नाईं होइहीं। 31 इहइ सिलसिला मँ तोहरे फायदा बरे परमेस्सर मरा भवा क पुनरुत्थान क बारे मँ जउन कहेस ह, का तू कबहुँ नाहीं पढ्या? उ कहे रहा, 32 ‘मइँ इब्राहीम क परमेस्सर हउँ, इसहाक क परमेस्सर हउँ अउर याकूब क परमेस्सर हउँ।’(A) उ मरा हुअन क नाहीं मुला जिन्दा क परमेस्सर अहइ।”
33 जब मनइयन इ सुनेन तउ ओकरे उपदेस प उ सबइ बहोत अचम्भा मँ पड़ि गएन।
सबन ते बड़का हुकुम
(मरकुस 12:28-34; लूका 10:25-28)
34 जब फरीसियन इ सुनेन कि ईसू आपन जवाबे स सदूकियन क चुप कराइ दिहस तब उ सबइ ऍकट्ठा भएन। 35 ओहमाँ क एक फरीसी ईसू क परीच्छा क बिचार स ओसे पूछेन, 36 “गुरु, व्यवस्था मँ सबन ते बड़का हुकुम कउन स बाटइ?”
37 ईसू ओसे कहेस, “‘तोहका आपन सारे मनवा स, सारी आतिमा स अउर सारी बुद्धि स आपन परमेस्सर पर्भू क पिरेम करइ चाही।’(B) 38 इ सब ते पहिला अउर सब ते बड़ा हुकुम अहइ। 39 फिन अइसा ही दूसर हुकुम इ अहइ: ‘आपन पड़ोसी स वइसा ही पिरेम करा जइसा तू अपने स खुद करत ह।’(C) 40 सारी व्यवस्था अउर नबियन क किताबन इन दुइनउँ हुकुमन प टिका बाटइ।”
ईसू क फरीसियन स एक सवाल
(मरकुस 12:35-37; लूका 20:41-44)
41 जब फरीसियन अबहीं एकट्ठा ही रहेन, कि ईसू ओनसे एक ठु प्रस्न पूछेस, 42 “मसीह क बारे मँ तू का बिचारत ह कि उ केकर बेटवा अहइ?”
उ फरीसियन ओसे कहेन, “मसीह दाऊद क पूत ह।”
43 ईसू ओसे पूछेस, “फिन आतिमा क बसे मँ होइके दाऊद ओका ‘पर्भू’ कहत इ काहे कहेस:
44 ‘पर्भू मोरे पर्भू (ईसू) स कहेस:
मोरे दाहिन बइठिके राज्य करा
जब ताई कि मइँ दुस्मनन क तोहरे गोड़वा तले न कइ देउँ।’ (D)
45 फिन जब दाऊद ओका ‘पर्भू’ कहेस तउ उ ओकर बेटवा कइसे होइ सकत ह?”
46 जवाबे मँ कउनो भी ओसे कछू नाहीं कहि पावा। अउर न ही उ दिना क पाछे कउनो क ओसे पूछइ क हिम्मत भवा।
Awadhi Bible: Easy-to-Read Version. Copyright © 2005 Bible League International.