M’Cheyne Bible Reading Plan

Jun uˈj e xiˈ ttzˈiˈben Santiago

Jun kˈolbebl tuˈn Santiago

1  Inayena Santiago. Jun t‑akˈanal Dios kena, bix jun t‑akˈanal Kaaw Jesucristo. Nxiˈ nkˈoˈna jun nkˈolbebla te cyey judío ma chi el tz̈itja tuj cykilca twitz txˈotxˈ.

Ntzaj tkˈoˈn Dios knaabl

² Key ocslal, ka ma tzaj pena bix qˈuixcˈaj bix jun kaˈ cyiˈja, miˈn chi bisena, sino chi tzalaja, ³ cuma cytzkiˈna ka ma tziyˈx kej qˈuixcˈaj lu cyuˈna, nchi ajbentzen tuˈn tcywix cyocslabla tiˈ Cristo, bix ctemel mas cypasensyey. ⁴ Iltzen tiˈj tuˈn tten cypasensyey, tuˈntzen tzˈakl cynaabla, tuˈn mintiiˈ palt cyey tuj cyocslabla.

⁵ Katzen at jun xjal cyxola ka at‑x taj tnaabl tiˈ, kanenx te Dios, bix ctzaal tkˈoˈn Dios tnaablxin, cuma taj Dios tuˈn ttzaj tkˈoˈn nim baˈn cye xjal. Min tzˈoc ilen Dios kiˈj oj nko kanen texin. ⁶ Pero oj t‑xiˈ kkanen, ilxsen tiˈj cˈoquel ke kcˈuˈj tiˈjxin, bix miˈn baj kcˈuˈj, cuma ka ma baj tcˈuˈj jun xjal tiˈ Dios oj nxiˈ tkanen, juˈtzen tisen mar nyucch jaca maj tuˈn cykˈiˈk. ⁷ Ka ma txiˈ cykanena te Dios pero min tzˈoc ke cycˈuˈja tiˈjxin, mlay tzaj tkˈoˈnxin cyey, ⁸ cuma tuya caˈba twiˈ cycˈuˈja nxiˈ cykanena, bix yaaˈn cyiw cycˈuˈja tuj cyocslabla.

⁹ Yal kej ocslal mebe, tuˈn cytzalaj, cuma ma kˈoj jawnex cyoclen tuˈn tiyˈx qˈuixcˈaj cyuˈn tisen iyˈx tuˈn Cristo. ¹⁰ Jax kej ocslal kˈine, tuˈn cytzalaj, pero yaaˈn tiˈj cykˈinemal, sino tiˈj ma tzaj tkˈoˈn Dios tuˈn cyoc te chˈin, cuma n‑el cyniyˈ tiˈj cykilca kˈine chi pjel, tisen txmaquel cˈul. ¹¹ Oj n‑ul kˈij, nkˈon nim cyak, biˈx ntzkij cˈul, bix n‑el tzˈak txmaquel, bix naj tilbil. Jaxsen juˈx jxjal kˈine. N‑oc tkˈon tiib tiˈ tikˈch at twitz txˈotxˈ, pero cymel, tisen txmaquel cˈul.

Cyˈiwlaˈn taˈ jxjal miˈn cyaj tkˈoˈn tocslabl tiˈ Cristo oj n‑oc qˈuixcˈaj tiˈj

¹² Cyˈiwlaˈn taˈ jxjal min cyaj tkˈoˈn tocslabl tiˈ Cristo oj n‑oc qˈuixcˈaj tiˈj, cuma ka ma tziyˈx qˈuixcˈaj tuˈn, ckˈojeltzen tcotz, jaj tchunkˈlal te junx maj o tkba Dios te cyej xjal n‑oc takˈ cye.

¹³ Katzen at jun xjal n‑oc niyˈbebl tiˈj tuˈn tbint jun kaˈ tuˈn, miˈn txiˈ tkbaˈn ka ja Dios ma tzˈoc cyakwusante tuˈn tbint jyaaˈn baˈn tuˈn, cuma tcyˈi te Dios tuˈn tbinchante jun kaˈ, bix bajx tzaaˈ tkˈoˈnxin jun yol te jun xjal tuˈn tbint jun kaˈ tuˈn. ¹⁴ Tiˈjx tnaabl xjal n‑el itzˈj niyˈbebl te, cuma npon tcˈuˈj xjal tiˈj tajbil tnaabl aj il, bix nsbuj tuˈn. ¹⁵ Bix oj n‑oc tbiˈnxin, bix nxiˈ tzˈakxin tuj il, bix ntz̈ˈiy tilxin. Ctkˈaˈtzen tcyamecyxin te junx maj tuˈn tilxin.

¹⁶ Key ocslal n‑oc cyakˈa weya, miˈn chi tzpeta tiˈ Dios, ¹⁷ cuma nuk jaj cotz baˈn bix nuk jaj tbanelxix tzin tkˈoˈn Kman Dios tuj cyaˈj ke. Jkˈij bix xjaw bix ke cheˈw e tbinchaxin, nchi bet jaca hora, bix nchˈixpet xlequen tzin cykˈoˈn. Pero te Dios, min tchˈixpu tnaabl. ¹⁸ Juˈ e tajbexin tuˈn ttzaj tkˈoˈnxin ke tuˈn koc te tcwalxin tuˈnj jaxxix tyolxin, tuˈntzen koc te tneel ocslal cyxol xjal, tisen tneel twitz awal.

Il tiˈj tuˈn tbint tyol Dios kuˈn yaaˈn nuk oˈcx tuˈn toc kbiˈn

¹⁹ Key ocslal n‑oc cyakˈa weya, cybiˈnc ja yol lu. Mas baˈn tuˈn t‑xiˈ cybiˈna tyol Dios twitzj tuˈn t‑xiˈ cykbaˈna nuk cyexa cyyola. Bix miˈn chi jaw kˈojl naja, ²⁰ cuma mlay chi ajbena te Dios tuya cykˈoja. ²¹ Juˈ tzunj, cykˈoˈncj cykilcaj yaaˈn baˈn bix jkaˈ, bix tuya jun cynaabla maans, chi lpexa tiˈj tyol Dios ma cuˈx awet tuj cyanema, bix at tipemal tuˈn cycleta tuˈn. ²² Il tiˈj tuˈn tbint tyolxin cyuˈna, cuma ka nuk ma tzˈoc cybiˈna tyolxin pero min cybiy, ncubtzen cysbun cyiiba juˈwa. ²³ Alcyej xjal nuk nxiˈ tbiˈn tyol Dios pero min bint tuˈn, juˈtzen tisen jun xjal n‑ocx tcyeˈyen twitz tuj jun respej. ²⁴ Oj tbaj tcyeˈyen twitz, nxiˈtzen, bix n‑el tuj tcˈuˈj tiiˈn tcyeˈnc. ²⁵ Pero alcyej xjal n‑oc tkˈon tiib jaca kˈij tuˈn tel tniyˈ tiˈj ti toc tuˈn tley Dios, bix min n‑el tuj tcˈuˈj ti toc tuˈn ley, sino n‑oc tipen tiˈj tuˈn tbint tuˈn, cweltzen xtalbil tibaj, cuma tbanelxix tley Dios, bix nko tzakpet tiˈ il tuˈn.

²⁶ Ka at jun xjal cyxola najben te Dios tuj twitz, pero min ttzuy tiib tiˈ tyol, nuk nsbun tiib, bix mintiiˈ tajbel tocslabl. ²⁷ Chi elela baˈn tuj twitz Kman Dios ka ma chi onena cyiˈj neeˈ mebe bix cyiˈj xuuj viuda oj n‑oc pena cyiˈj, bix ka ma cytzuy cyiiba twitz il tzalu twitz txˈotxˈ.

Tej tkˈumen Juan Bautista tyol Dios

3  Otktzen bint olaaj jnabkˈi tcawbil Tiberio tibaj cykilca twitz txˈotxˈ, tej takˈ Juan kbalte tyol Dios. Tej tyem, tocx xsunj jxin Poncio Pilato cawel tuj departamento te Judea, bix tocx jxin Herodes cawel tuj departamento te Galilea, bix tocx Felipe, jxin titzˈen Herodes, cawel cyuj departamento te Iturea bix Traconite, bix tocx jxin Lisanias cawel tuj departamento te Abilinia, ² bix eteˈc xsunj jxin Anás bix Caifás nejenel cye pala cyxol judío. Jatzen te Juan, tcwal Zacarías, e ten jaaˈ min‑al xjal najl. Dios e kˈonte kej yol te Juan tuˈn tkbante cye xjal. ³ Bix e xiˈ Juan tiyˈ tuj cykil lugar ttziiˈ nimaˈ Jordán te kbalte cye judío tuˈn tcyaj cykˈoˈn cyil tuˈn cymeltzˈaj tuya Dios, tuˈntzen tnajset cyil, bix tuˈn cycuˈx tkˈoˈnxin tuj aˈ te jun techel otktzen chi oc tuya Dios.

⁴ Tej tkˈumente Juan juˈwa, juˈtzen eˈla jaxxix tyol Isaías, jxin kbalte tyol Dios nejl. E tkba Isaías tuj tyol Dios: “Tuj jun lugar min‑al xjal najl tuj, cjawel jlet jun xinak, bix ctkbaˈ cye xjal cyjulu: ‘Tzul Kaaw tuˈn tten kxol. Juˈ tzunj, key xjal, cyjel cykˈoˈna cyila, tuˈntzen binne cytena oj tul. ⁵ Tisentzen binne tten jun be cyuˈna oj tul jun jawnex cawel. Il tiˈj tuˈn tbaj cynojsaˈna jul tuj tbexin, bix tuˈn tcub kuutz̈ˈit witz tuya buˈj tuˈn tcyaj chkˈajlaj. Bix kej be at cyẍoquel, tuˈn cycyaj jiquen, bix kej be at xak cyuj, cjawel buchet, tuˈn cycyaj jiquen. ⁶ Chˈix tpon tumel cykil xjal cylaˈ jun colbil ke tkˈaˈ Dios,’ juˈ ctkbaˈ jun xjal,” tz̈i Isaías.

⁷ Nim xjal e pon tiˈ Juan ttziiˈ nimaˈ tuˈntzen cycuˈx tuˈnxin tuj aˈ. Bix e xiˈ tkbaˈnxin cye:

―Minaˈx tcyaj cykˈoˈna cyila. Ke cyey nuk tisen lbaj nchi el ok twitz kˈakˈ. Cyaj cyey tuˈn cycuˈxa wuˈna tuj aˈ nuk tuˈn miˈn cub castiwa cyibaja tuˈn Dios. ⁸ Ka cycyˈiy tuˈn tcub cycastiwiya tuˈn Dios cyibaja, cybinchamtzen alcyej baˈn, tuˈntzen tchicˈajax ka otk cyaj cykˈoˈna cyila bix otk chi meltzˈaja tuya Dios. Miˈn cykbay: “Tuˈnj tiyˈjil Abraham koˈya, mlay tzaj kcastiwiya tuˈn Dios, cuma t‑xjal Dios koˈya.” Yaaˈn juˈwa. Cxeˈl nkbaˈna cyey ka at xjal t‑xjal Dios nuk tuˈnj tiyˈjil Abrahamke, cykilcatzen loj xak lu baˈn toc te t‑xjal Dios, cuma attzen tipemal Dios tuˈn cyoc te tiyˈjil Abraham. ⁹ Jaxte tzulte castiwa cyibaj kej xjal yaaˈn baˈn twitz Dios. Cˈoquel cycˈuˈja tiˈj ja tumel lu. Taaw cab tken loˈpj cˈoquel tcyeˈyen cyiˈ cyken loˈpj. Kej min cyakˈ cywitz, chi jawel txˈomet ttzi txˈotxˈ, bix nuk te tuj kˈakˈ chi ajbela―tz̈i Juan cye xjal.

¹⁰ Bix e xiˈ cykanen xjal te Juan:

―¿Titzen pjel keya, tuˈntzen tchicˈajax ka otk ko meltzˈaja tuya Dios?―tz̈i ke xjal.

¹¹ E xiˈ tkbaˈn Juan cye:

―Jun xjal at caˈba tcapẍeyen, il tiˈj tuˈn t‑xiˈ tkˈoˈn jun te tej xjal mintiiˈ tcapẍeyen. Bix jun xjal at twa, il tiˈj tuˈn t‑xiˈ tkˈoˈn chˈin tej mintiiˈ twa―tz̈i Juan.

¹² E pon cab chmol alcabala tuˈn cycuˈx tuˈn Juan tuj aˈ, bix e xiˈ cykanen te Juan:

―¿Titzen pjel keya tuˈn tchicˈajax ka otk ko meltzˈaja tuya Dios?―tz̈ike.

¹³ E xiˈ tkbaˈn Juan cye:

―Chi chmola alcabala nuk jaj tzin tkbaˈn ley. Miˈn chi chmona pwak nuk te cyexa―tz̈i Juan.

¹⁴ Bix at cabtl soldado ttziiˈ nimaˈ, bix e xiˈ cykanen te Juan:

―Yajtzen keya, ¿titzen pjel keya tuˈntzen tchicˈajax tuˈn kmeltzˈaja tuya Dios?―tz̈ike.

Bix e xiˈ ttzakˈbeˈn Juan cye:

―Miˈn tzˈel cykanena cypwak xjal tuˈn cyclet cywitza. Miˈn jaw cyxtzˈimena cyiˈ xjal tuˈn cycamana cyiˈj. Miˈn nuk cub cytziy tiˈj twiˈ cycˈuˈja―tz̈i Juan cye soldado.

¹⁵ Cykil aj Israel nchi ayon tuˈn tul jxjal Scyˈoˈn tuˈn Dios te cawel, jxjal Cristo, bix kej xjal e pon ttziiˈ nimaˈ e yolenke tiˈ Juan, ka ja Juan te Cawel at tulel, bix ka min. ¹⁶ Tbinte Juan juˈwa, bix e xiˈ tkbaˈnxin cye xjal:

―Weya, yaaˈn jawnex kena twitzj xjal tzul. Jxjal tzul, mintlpetiiˈ woclena tuˈn tel npjuˈna takˈel t‑xaab. Weya, nuk jun techel tzin nkˈoˈna, jaj tuˈn cycuˈxa wuˈna tuj aˈ. Pero ja tzunj xjal tzul, yaaˈn nuk jun techel ctkˈaˈ, sino ctzaal tkˈoˈnxin Espíritu Santo te cyej cyey ma cyaj cykˈoˈna cyila, bix ctzaal tkˈoˈnxin tuˈn cyxiˈy tuj kˈakˈ te cyej cyey min cyaj cykˈoˈna cyila. ¹⁷ Juˈtzen tten pjel tpaˈnxin kej xjal at tuˈn cyclet cyuyaj xjal at tuˈn cyxiˈ tuj kˈakˈ, tisen jun awal triwa qˈuelel tpaˈnxin twitz tuya t‑xcˈomel. Jtwitz triwa cˈoquex tuj txˈutxˈ, pero ja tzunj t‑xcˈomel cˈoquex tuj jkˈakˈ min yubtzˈaj―tz̈i Juan cye xjal.

¹⁸ Juˈtzen tten tej tkˈumen Juan tyol Dios cye xjal, bix tuya mastl tumel tiˈj colbil cye e tkˈumexin cye xjal. ¹⁹ Pero bix e pon tumel tuˈn mintl e kˈumen Juan tyol Dios, tuˈn tyol Herodes, cuma otk tzˈel tiiˈn Herodes t‑xuˈl ttzicy, Herodías tbixuj, bix otk bint mas kaˈ tuˈnxin. Tuˈn tzunj lu e xiˈ tkbaˈn Juan texin otk bint kaˈ tuˈnxin. ²⁰ Juˈ tzunj e tbinchaxin juntl tkaˈyelxin, jaj tuˈn ocx tkˈoˈnxin Juan tuj tzeeˈ.

Tej tbautizarj Jesús

²¹ Tej tcuˈx tkˈoˈn Juan ke xjal tuj aˈ, bix e pon Jesús tiˈjxin, bix e cuˈx tkˈoˈnxin tuj aˈ. Tejtzen tjatz Jesús tuj aˈ, bix akˈ naˈl Dios, bix e jket cyaˈj, ²² bix e cub Espíritu Santo tibajxin tisen tcyeˈnc junjil cucuˈ, bix e tzaj tkˈajkˈajel yol tuj cyaˈj. Tz̈i yol cyjulu:

―Jay Ncwala n‑oc takˈa weya. Nchin tzalaja jay ma scyˈet wuˈna―tz̈i Kman Dios te Jesús.

Ke tiyˈjil Jesús

²³ Tejtzen tbint jlu tiˈ Jesús, bixsen e xiˈ ttzyuˈnxin jtaakˈenxin otk tzaj tkˈoˈn Dios tuˈn tbint tuˈnxin cyxol xjal. Tej takˈxin akˈanal tiˈ taakˈen Dios, otk japanxin winaklaaj jnabkˈi. Bix cybi tiyˈjilxin jaaˈ ela itzˈjxin ejeeˈ tzunj lu: Tuj cywitz xjal, tcwal José jaxin. Yaltzen te José, tcwal Elíxin. ²⁴ Yaltzen te Elí, tcwal Matat‑xin. Te Matat, tcwal Levíxin. Te Leví, tcwal Melquixin. Te Melqui, tcwal Janaxin. Te Jana, tcwal Joséxin. ²⁵ Te José, tcwal Matatíasxin. Te Matatías, tcwal Amósxin. Te Amós, tcwal Nahumxin. Te Nahum, tcwal Eslixin. Te Esli, tcwal Nagaixin. ²⁶ Te Nagai, tcwal Maat‑xin. Te Maat, tcwal Matatíasxin. Te Matatías, tcwal Semeixin. Te Semei, tcwal Joséxin. Te José, tcwal Judáxin. ²⁷ Te Judá, tcwal Joanaxin. Te Joana, tcwal Resaxin. Te Resa, tcwal Zorobabelxin. Te Zorobabel, tcwal Salatielxin. Te Salatiel, tcwal Nerixin. ²⁸ Te Neri, tcwal Melquixin. Te Melqui, tcwal Adixin. Te Adi, tcwal Cosamxin. Te Cosam, tcwal Elmodamxin. Te Elmodam, tcwal Erxin. ²⁹ Te Er, tcwal Josuéxin. Te Josué, tcwal Eliezerxin. Te Eliezer, tcwal Jorimxin. Te Jorim, tcwal Matat‑xin. Te Matat, tcwal Levíxin. ³⁰ Te Leví, tcwal Simeónxin. Te Simeón, tcwal Judáxin. Te Judá, tcwal Joséxin. Te José, tcwal Jonánxin. Te Jonán, tcwal Eliaquimxin. ³¹ Te Eliaquim, tcwal Meleaxin. Te Melea, tcwal Mainánxin. Te Mainán, tcwal Matataxin. Te Matata, tcwal Natánxin. Te Natán, tcwal Davidxin. ³² Te David, tcwal Isaíxin. Te Isaí, tcwal Obedxin. Te Obed, tcwal Boozxin. Te Booz, tcwal Salmónxin. Te Salmón, tcwal Naasónxin. ³³ Te Naasón, tcwal Aminadabxin. Te Aminadab, tcwal Aramxin. Te Aram, tcwal Esromxin. Te Esrom, tcwal Faresxin. Te Fares, tcwal Judáxin. ³⁴ Te Judá, tcwal Jacobxin. Te Jacob, tcwal Isaacxin. Te Isaac, tcwal Abrahamxin. Te Abraham, tcwal Taréxin. Te Taré, tcwal Nacorxin. ³⁵ Te Nacor, tcwal Serugxin. Te Serug, tcwal Ragauxin. Te Ragau, tcwal Pelegxin. Te Peleg, tcwal Heberxin. Te Heber, tcwal Salaxin. ³⁶ Te Sala, tcwal Cainánxin. Te Cainán, tcwal Arfaxadxin. Te Arfaxad, tcwal Semxin. Te Sem, tcwal Noéxin. Te Noé, tcwal Lamecxin. ³⁷ Te Lamec, tcwal Matusalénxin. Te Matusalén, tcwal Enocxin. Te Enoc, tcwal Jaredxin. Te Jared, tcwal Mahalaleelxin. Te Mahalaleel, tcwal Cainánxin. ³⁸ Te Cainán, tcwal Enósxin. Te Enós, tcwal Set‑xin. Te Set, tcwal Adánxin. Te Adán, tcwal Diosxin.