Chronological

दस आग्यन

5 मूसा इस्राएल क सब मनइयन क एक संग बोलॉएस अउ ओनसे कहेस, “इस्राएल क मनइयो! आजु जउने नेमन अउ कानूनन क मइँ बतावत अहउँ, ओनका सुना। इ सबइ नेमन क सीखा अउ सव्ती स ओनका माना। ² यहोवा, हम पचन्क परमेस्सर होरब पहाड़े पइ हम पचन्क संग वाचा किहे रहा। ³ यहोवा इ वाचा हम पचन्क पुरखन क संग नाहीं किहे रहा, मुला हम पचन्क हमार संग जउन कउनो आजु जिअत अहइँ। ⁴ यहोवा पहाड़े पइ तू पचन्स आमने सामने बात किहस। उ तू पचन्स आगी मँ स बतियान। ⁵ ओह समइ तू पचन्क इ बतावइ बरे कि यहोवा का किहस ह, मइँ तू लोगन अउ यहोवा क बीच खड़ा रहेउँ। काहेकि तू पचे आगी से डेराइ गया अउर तू पचे पहाड़े पइ जाइ स इन्कार किह्या। यहोवा कहेस:

⁶ ‘मइँ यहोवा तोहार उ परमेस्सर हउँ जउन तू पचन्क मिस्र स बाहेर लइ आएउँ ह जहाँ तू पचे दास क नाईं रहत रह्या।

⁷ ‘मोरे अलावा कउनो दूसर देवता क पूजा जिन करा।

⁸ ‘कउनो भी मूरतियन या कउनो क तस्बीर जउन आकास क ऊपर मँ, भुइँया पइ या समुद्दर क नीचे मँ होइ, जिन बनावा। ⁹ ओका निहुरिके दण्डवत या पूजा जिन करा। काहेकि मइँ यहोवा तोहार परमेस्सर ईर्स्यालु अहउँ। मइँ आपन लोगन क जरिये कउनो दूसर देवता क पूजा स घिना करत हउँ। अइसे लोग जउन मोरे खिलाफ पाप करत हीं, मोर दुस्मन होइ जात हीं। मइँ ओन लोगन्क सजा देब अउर मइँ ओनके पूतन, पोतन अउ परपोतन क सजा देब। ¹⁰ मुला मइँ ओन लोगन पइ बहोत दयालु रहब जउन मोसे पिरेम करत हीं अउर मोरे आदेसन क मानत हीं। मइँ ओनकइ हजार पीढ़ियन तलक दयालु रहब।

¹¹ ‘यहोवा, आपन परमेस्सर क नाउँ क उपयोग गलत तरिके स जिन करा। अगर कउनो मनई ओकरे नाउँ क उपयोग गलत तरीके स करत होइ तउ उ दोखी अहइ अउर यहोवा ओका निदोर्ख न बनाई।

¹² ‘सबित क दिना क खास महत्व देइ बरे साबित खास दिन क रूप मँ माना। यहोवा तोहार परमेस्सर हुकुम दिहस ह कि तू पचे सबित क दिन क हफ्ता क दूसर दिनन स अलगाइ द्या। ¹³ पिछले छ: दिन तोहरे पचन्क काम करइ बरे अहइँ। ¹⁴ मुला सतवाँ दिन यहोवा तोहरे परमेस्सर क सम्मान मँ आराम करइ क दिन अहइ। एह बरे सबित क दिन कउनो मनई काम न करइ चाही। यानी तू पचे, तोहार पूतन, बिटियन, मनइयन अउ मेहरारु नउकरन, गइयन, बर्धन, गदहन, अउर तोहरे पचन्क सहरन मँ रहइवाला बिदेसी, कउनो भी काम न करइ चाही। तोहरे पचन्क दास क भी तोहार जइसा आराम मिलइ चाही। ¹⁵ तोहका इ जरूर याद रखइ चाही कि तू मिस्र मँ दास रहा। यहोवा, तोहार परमेस्सर महान सक्ती स तू पचन्क मिस्र स बाहेर लिआवा। उ तू पचन्क अजाद किहस। इहइ कारण अहइ कि यहोवा तोहार परमेस्सर हुकुम देत ह कि तू पचे सबित क दिन माना।

¹⁶ ‘आपन महतारी अउर बाप क सम्मान करा। यहोवा तोहार परमेस्सर तोहका इ करइ क हुकुम दिहस ह। अगर तू पचे इ हुकुम क मानत ह तउ तोहार उमिर लम्बी होइ अउर उ देस मँ जेका यहोवा तोहार परमेस्सर तू पचन्क दइ देत अहइ इ तोहार बरे अच्छा होइ।

¹⁷ ‘कउनो क हत्या जिन करा।

¹⁸ ‘बिभिचार क पाप जिन करा।

¹⁹ ‘कउनो चीज जिन चोरावा।

²⁰ ‘दूसर जउन कछू किहे अहइँ ओकरे बारे मँ झूठ जिन बोला।

²¹ ‘तू पचे दूसर लोगन क धन-सम्पति या दूसर कउनो चिजियन जे दूसर क अहइ क आपन बनावइ क इच्छा जिन करा। दूसर मनई क पात्नी, घर, खेत, मनसेधू या मेहरारु नौकर, गइयन अउ गदहन लइ लेइ क इच्छा तू पचन मँ न होइ चाही।’”

मनइयन क परमेस्सर स डर

²² मूसा कहेस, “यहोवा इ सबइ हुकुम तू सबहिं क दिहस जब तू पचे एक संग पहाड़े प रह्या। यहोवा साफ साफ सब्दन मँ बानत किहस अउर ओकर तेज आवाज आगी, बादर अउ घना अँधियारा स सुनाई देत रहा। जब उ इ आदेस दइ दिहस तब अउर कछू नाहीं कहेस। उ आपन सब्दन क दुइ ठु पाथरे क सिला पइ लिखेस अउ ओनका मोका दइ दिहस।

²³ “तू पचे आवाज क तब सुन्या जब पहाड़ आगी स बरत रहा। तब तू पचे मोरे लगे आया, तोहरे परिवार समूह क सबहिं नेता लोग अउ तोहार सबहिं पुरनियन। ²⁴ उ पचे कहेन, ‘यहोवा हमार परमेस्सर आपन गौरव अउ बड़कइ देखॉएस ह। हम पचे ओका आगी मँ स बोलत सुना ह। आजु हम पचे लखि लीन्ह ह कि कउनो मनई क परमेस्सर स बात करइ क बाद भी जिअत रहि सकब, होइ सकत ह। ²⁵ मुला अगर हम पचे यहोवा आपन परमेस्सर क दुसरी दाई बात करत सुना तउ हम पचे जरूर मरि जाब। उ खउफनाक आगी हमार नास कइ देइ। मुला हम पचे मरब नाहीं चाहित। ²⁶ कउनो अइसा मनई नाहीं जउन हम लोगन क नाई कबहुँ जिअत परमेस्सर क आगी मँ स बतियात सुने होइ अउ जिअत होइ। ²⁷ मूसा, तू निअरे जा अउ यहोवा हम लोगन्क परमेस्सर, जउन कहत बाटइ सुना। तब उ सब बातन हमका बतावा जउन यहोवा तू पचन्स कहत ह, अउर हम लोग तोहार सुनब अउर ओकर पालन करब।’

यहोवा मूसा स बतियात ह

²⁸ “यहोवा उ सबइ बातन सुनेस जउन तू मोसे कहया। तब यहोवा मोसे कहेस, ‘मइँ उ सबइ बातन सुनेउँ ह जउन हम पचे कहेन ह। जउन उ पचे कहेन बढ़िया अहइ। ²⁹ मइँ इच्छा करत हउँ कि उ पचे हिरदय स मोर सम्मान करइ अउर मोरे आदेसन क हमेसा मानइ सिखिहीं। तब इ ओनके अउ ओनके सन्तानन बरे सदा ही नीक रही।

³⁰ “‘जा अउ मनइयन स कहा कि आपन आपन तम्बूअन मँ लउटि जाइँ। ³¹ मुला मूसा, तू मोरे निअरे ठाड़ रहा। मइँ तोहका सारा हुकुम, कानून अउ नेम हेरब जेकर सिच्छा तू ओनका देब्या। ओनका इ सबइ उ देस मँ करइ चाही जेका मइँ ओनका रहइ बरे दइ देत हउँ।’

³² “एह बरे, तू सब मनइयन क उ सब कछू करइ बरे होसियार रहइ चाही जेकरे बरे यहोवा तोहका हुकुम दिहेस बाटइ। तोहका न दाहिन हाथे कइँती घूमइ चाही अउर न ही बाएँ हाथे कइँती। ³³ तोहका उहइ तरह रहइ चाही, जउने तरह रहइ क हुकुम यहोवा तोहार परमेस्सर तोहका दिहे अहइ। तब तू सदा जिअत रहि सकत ह अउर हर चीज तोहरे बरे नीक होइ। उ देस मँ, जउन तोहार होइ, तोहार उमिर लम्बी होइ जाइ।

सदा परमेस्सर स पिरेम करा अउर आग्या माना

6 “जउन आदेसन, नेमन अउ हुकुमन क यहोवा, तोहार परमेस्सर तोहका सिखावइ क मोका आदेस दिहस ह, उ सबइ इ सब अहइँ। ऍनका उ देस मँ मानया जेहमाँ रहइ बरे तू प्रवेस करत अहा। ² तू अउर तोहार गदेलन अउ पतोहून जब तलक जिअत रहा यहोवा आपन परमेस्सर क सम्मान करइ चाही। तोहका ओनके ओन सबइ नेमन अउ हुकुमन क पालन करइ चाही जेनका मइँ तोहका दइ देत हउँ। अगर तू अइसा करब्या तउ लम्बी उमिर पउब्या। ³ इस्राएल क मनइयो, एका धियान स सुना अउ इ सबइ नेमन क माना। तब इ तोहारे बरे नीक होइ अउर तू पचे तेजी स बढ़ब्या। यहोवा तोहरे पुरखन क परमेस्सर, इ सबन बरे बचन दिहे अहइ कि तू पचे दूध अउर सहद स बहत भवा धरती पाउब्या।

⁴ “इस्राएल क मनइयो, धियान स सुना। यहोवा हमार परमेस्सर अहइ, यहोवा एक अहइ। ⁵ अउर तू पचन्क यहोवा आपन परमेस्सर स आपन क पूरा हिरदय, आतिमा अउ सक्ती स पिरेम करइ चाही। ⁶ इ सबइ हुकुमन क सदा आपन दिल मँ रखा जेनका मइँ आजु तू पचन्क दइ देत हउँ। ⁷ एनकइ सिच्छा आपन लरिकन क देइ बरे होसियार रहा। इ सबइ हुकुमन क बारे मँ तू पचे जब तू आपन घरन मँ बइठे भए, सड़किया पइ टहरत भए, जब तू ओलरा अउ जब जागा तब एकरे बारे मँ बात करा। ⁸ ऍका स्मरण पत्र नाईं आपन हाथे पइ बाँधा अउ ललाट पइ धारण करा। ⁹ ऍका आपन घरन क दरवाजन पइ, अउ सहर फाटक पइ लिख ल्या।

¹⁰ “यहोवा तोहार परमेस्सर तू पचन्क देस मँ लइ जाइ जेकरे बरे उ तोहरे पुरखन-इब्राहीम, इसहाक अउ याकूब क देइ क बचन दिहे रहा। तब उ तू पचन्क बड़के अउ अमीर सहर देइ जेनका तू नाहीं बनाया। ¹¹ यहोवा तू पचन्क अच्छी चीजन्स भरा भवा घर देइ जेनका तू पचे हुवाँ नाहीं राख्या ह। यहोवा तू पचन्क कुआँ देइ जेनका तू पचे नाहीं खन्या ह। यहोवा तू पचन्क अंगूरन अउ जइतून क बाग देइ जेनका तू पचे नाहीं लगाया ह। तू पचन्क ओका खाब्या अउ संतुट्ठ होब्या।

¹² “मुला होसियार रहा। यहोवा क जिन बिसरा जउन तू पचन्क मिस्र स लिआएस, जहाँ तू पचे दास रह्या। ¹³ यहोवा आपन परमेस्सर क सम्मान करा अउर सिरिफ उहइ क सेवा करा। बचन देइ बरे तू पचे सिरिफ उहइ क नाउँ क उपयोग करा। ¹⁴ तू पचन्क दूसर देवतन क अनुसरण नाहीं करइ चाही। तू पचन्क आपन चारिहुँ कइँती रहइवाला लोगन क देवतन क अनुसरण नाहीं करइ चाही। ¹⁵ काहेकि यहोवा तोहार परमेस्सर जउन तोहार बीच अहइ ईर्स्यालु परमेस्सर अहइ। अगर तू पचे दूसर देवतन क पाछे रहब्या, तउ उ तू पचन पइ कोहाइ जाइ अउ उ धरती पइ स तू पचन क खतमइ कइ देइ।

¹⁶ “तू पचन्क यहोवा आपन परमेस्सर क जाँच उहइ तरह नाहीं करइ चाही जउने तरह तू पचे मस्सा मँ जाँचत किह्या ह। ¹⁷ तू पचन्क यहोवा आपन परमेस्सर क हुकुमन क मानइ बरे पक्का निहचय रखइ चाही। तू पचन्क ओकर सबहिं ओन उपदेसन अउ नेमन क मानइ चाही जेनका उ तू पचन्क दिहे अहइ। ¹⁸ तू पचन्क उ सबइ उचित अउ नीक काम करइ चाही जउन यहोवा क खुस करइ तब तोहरे बरे इ ठीक होइ अउर तू पचे उ देस मँ जाइ सकत ह जेकरे बरे यहोवा तोहरे पचन्क पुरखन क बचन दिहे अहइ। ¹⁹ अउर तू पचे आपन सबहिं दुस्मनन क सक्ती स निकार सकब्या, जइसा यहोवा कहेस ह।

आपन गदेलन क परमेस्सर क कारज क सिच्छा द्या

²⁰ “भविस्स मँ, तोहार पचन्क पूत तोहसे सबन्स इ पूछ सकत ह कि ‘यहोवा हमार परमेस्सर हमका जउन उपदेस, कानून अउ नेम दिहस ह, ओकर अरथ का अहइ?’ ²¹ तब तू पचे आपन पूतन स कहब्या, ‘हम पचे मिस्र मँ फ़िरौन क गुलाम रहेन, मुला यहोवा हम पचन्क बड़की सक्ती स बाहेर लिआवा ह। ²² यहोवा हमका माहन, खउफनाक चीन्हा अउ चमत्कार देखॉएस। हम पचे ओनके जरिये इ सबइ घटना क मिस्र क मनइयन, फिरौन अउ फिरौन क महल क संग होत भए लखा ह। ²³ अउर यहोवा हम लोगन क मिस्र स एह बरे लिआवा कि उ-उ देस हमका दइ सकइ जेकरे बरे उ हमरे पुरखन क बचन दिहे रहा। ²⁴ यहोवा हमका इ सबहिं उपदेसन क मानइ क हुकुम दिहस। इ तरह हम लोग यहोवा आपन परमेस्सर क सम्मान करत अही। तब यहोवा सदा हम लोगन क जिअत राखी अउ हम पचे बढ़िया जिन्नगी बिताउब जइसा इ समइ अहइ। ²⁵ अगर हम इ सबइ आदेसन क मानब जेका यहोवा हमार परमेस्सर हमका आदेस देत ह तउ हम पचे नीक होब्या।’

इस्राएल, परमेस्सर क खास लोग

7 “यहोवा तोहार परमेस्सर तू पचन्क उ देस मँ लइ जाब, जेका कब्जा करइ बरे तू पचे ओहमाँ जात अहा। परमेस्सर तोहरे बरे हित्ती, गिर्गासी, एमोरी, कनानी, परिज्जी, हिब्बी अउ यबूसी क बाहरे हाँकि देइ। उ सात रास्ट्र तोहसे जियाद बरियार अउ जियादा तादद मँ अहइ। ² यहोवा तोहार परमेस्सर इ रास्ट्रन क तू पचन्क अधीन करी अउर तू पचे ओनका हरउब्या। तू पचन्क ओनका पूरी तरह नस्ट कइ देइ चाही। ओनके संग कउनो सन्धि जिन करा। ओन पइ दाया जिन करा। ³ ओन लोगन मँ स कउनो क संग बियाह जिन करा, अउर उ रास्ट्रन क कउनो मनई क संग आपन पूत अउ बिटियन क बियाह न करा। ⁴ काहेकि उ पचे तोहारे गदेलन क परमेस्सर क दूर लइ जइहीं। एह बरे तोहरे गदेलन दूसर देवतन क सेवा करिहीं। तब यहोवा तोहे सबन पइ कोहाइ जाइ। उ हाली ही तोहार नास कइ देइ।

बनावटी देवतन क नास करइ क हुकुम

⁵ “तू पचन्क इ सबइ रास्ट्र क संग इ करइ चाही। तू पचन्क ओनकर वेदियन क बरबाद कइ देइ चाही। स्मृति पाथरन क टूकन मँ तोड़ि डावइ चाही। ओनकर असेरा खम्भन क काटि डावा अउ ओनकइ मूरतिन क बार डावा। ⁶ काहेकि तू पचे यहोवा आपन परमेस्सर क अलग कीन्ह भवा मनई अहा। तू पचे यहोवा क आपन सम्पत्ति अहा। संसार क सबहिं मनइयन मँ स यहोवा तोहार परमेस्सर तू पचन्क विसेख अइसे लोग जउन ओकर आपन अहइँ, चुना। ⁷ यहोवा तू पचन्स काहे पिरेम करत ह अउ तू पचन्क उ काहे चुनेस? एह बरे नाहीं कि दूसर लोगन क बराबरी मँ तोहार गिनती बहोतइ जियादा अहइ। तू पचे सबहिं लोगन मँ स सबसे कम रह्या। ⁸ मुला यहोवा तू पचन्क आपन बड़की सक्ती क जरिये मिस्र क बाहेर लिआवा, काहेकि उ तोसे पिरेम करत ह। उ मिस्र क सम्राट फिरौन क गुलामी स तू पचन क तोहरे पुरखन क दीन्ह भए बचन क पूरा करइ बरे, अजाद कराएस।

⁹ “एह बरे याद राखा कि यहोवा तोहार परमेस्सर ही सिरिफ परमेस्सर अहइ। उ बिसासी परमेस्सर अहइ। उ आपन वाचा क पूरा करत ह। उ ओन सबहिं लोगन स पिरेम करत अउ ओन पइ दाया करत ह जउन ओकरे हुकुमन क मानत हीं। उ हजारन पीढ़ियन तलक पिरेम करत रहत ह। ¹⁰ जउन ओहसे घिना करत ह उ खुद ओसे ही सजा पाइहीं। उ ओनका बरबाद कइ देइ। जउन ओसे घिना करत ह उ बिना देरी भए खुद ओसे ही सजा पाइहीं। ¹¹ एह बरे तू पचे इ आदेसन, नेमन अउ हुकुमन क मानइ मँ जरूर होसियार रहा, जेनका मइँ आजु तू पचन्क दइ देत हउँ।

¹² “अगर तू पचे मोरे इ सबइ नेमन पइ धियान देब्या अउ ओनका मानइ मँ होसियार रहब्या तउ यहोवा तोहार परमेस्सर तू पचन्स पिरेम क वाचा क पूरा करी। उ इ बचन तोहरे पुरखन क दिहे रहा। ¹³ उ तू पचन्स पिरेम करी अउ तू पचन क आसीर्बाद देइ। तोहरे रास्ट्रे मँ लोग लगातार बढ़त जइहीं। उ तोहे पचन्क गदेलन क आसीर्बाद देइ। उ तोहरे पचन्क खेतन मँ अच्छी फसल क आसीर्बाद देइ। उ तू पचन्क अन्न, दाखरस अउ तेल क आसीर्बाद देइ। उ तोहारी गइयन क बछवन अउ तोहरी भेड़िन क बच्चा पइदा करइ क आसीर्बाद देइ। तू पचे उ सबइ आसीर्बाद उ देसे मँ पउब्या जेका तू पचे देइ क बचन यहोवा तोहरे पुरखन क दिहे रहा।

¹⁴ “तू पचे दूसर लोगन्स जियादा आसीर्बाद पउब्या। हर एक पति-पत्नी बच्चे पइदा करइ क काबिल होइहीं। तोहार गोरु बछवा पइदा करइ काबिल होइहीं। ¹⁵ अउर यहोवा तू पचन्स सबहिं बेरमियन क दूर करी। यहोवा तू पचन्क उ खउफनाक बेरमियन स बचाइ जउन तू मिस्र मँ जानत रहेन अउ ओन खउफनाक बेरमियन क ओन सबहिं लोगन क देइ जउन तू पचन्स घिना करत हीं। ¹⁶ तू पचन्क ओन सबहिं लोगन्क नास जरूर करइ चाही जेनका हरावइ मँ यहोवा तोहार मदद करत ह। ओन पइ दाया न करा। ओनके देवतन क सेवा न करा। उ तोहार बरे फंदा अहइ।

यहोवा आपन लोगन क सहायता क बचन देत ह

¹⁷ “आपन मन मँ इ न सोचा, ‘इ सबइ रासट्र हम लोगन्स जियादा बरिआर अहइँ। हम पचे ओनका दबाव डाइके कइसे भगाइ सकित ह?’ ¹⁸ तू पचन्क ओनसे डेराइ नाहीं चाही। तू पचन्क सुमिरइ चाही जउन यहोवा तोहार परमेस्सर फिरौन अउर मिस्र क लोगन्क संग किहस। ¹⁹ जउन बड़की बिपदन उ दिहस तू पचे ओनका लख्या। तू पचे ओकरे किए भए चमत्कार अउ अचरजन क लख्या। तू पचे यहोवा क बड़की सक्ती अउ मजबूती क, तू पचन्क बाहेर लिआवइ मँ उपयोग करत देख्या। यहोवा, तोहार परमेस्सर उहइ सक्ती क उपयोग ओन लोगन्क खिलाफ करी जेनसे तू पचे डेरात अहा।

²⁰ “यहोवा तोहार परमेस्सर, ओकर खिलाफ बर्रो^[a] क भेजब जउन बचा भवा अहइ अउ आपन क तोहस छुपाए अहइ। यहोवा ओन सबहिं मनइयन क नास करी। ²¹ तू पचे ओनसे जिन डेराअ, काहेकि यहोवा तोहार परमेस्सर तोहरे संग अहइ। उ महान अउ आस्चर्यजनक परमेस्सर अहइ। ²² यहोवा तोहार परमेस्सर ओन रास्ट्रन क तोहार देस थोड़ा-थोड़ा कइके तज देइ क मजबूर करी। तू पचे ओनका हाली मँ सबहिं क नास नाहीं कइ पउब्या। अगर तू पचे अइसा करब्या तउ जगंली जनावरन क तादाद तोहर बरे बहोत जियादा होइ जाइ। ²³ मुला यहोवा तोहार परमेस्सर ओन रास्ट्रन क तू पचन्क दइ देइ। उ ओनका बरबाद होइ तलक बड़ा उलझन मँ डाइ के परेसान करब्या। ²⁴ यहोवा तू पचन्क ओनके राजा लोगन क हरावइ मँ मदद करी। तू पचे ओनका मारि डाउब्या अउर उ बिसारि जाब। कउनो भी तू पचन्क रोक नाहीं सकी। तू पचे ओन सबहिं क बरबाद करब्या।

²⁵ “तू पचन्क ओनके देवतन क मूरतियन क बारि डावइ चाही। तू पचन्क ओन मूरतियन पइ मढ़ा भवा सोना या चाँदी क लेइ क इच्छा नाहीं करइ चाही। तू पचन्क उ सोना क अउ चाँदी क अपने खातिर नाहीं लेइ चाही। इ तोहका फंसा लेइहीं काहेकि उ सबइ मूरती यहोवा तोहार परमेस्सर बरे नफ़रत-अंगेज अहइ। ²⁶ इ सबइ मूरतियन क बर्बाद कीन्ह जाब्या। तू पचन्क ओन प्रकार क मूरतियन क आपन घरे मँ नाहीं लावइ चाही। एह बरे तू पचन्क ओनकर संग बर्बाद नाहीं कीन्ह जाब्या। तू पचन ओका अस्वीकार करइ चाही अउर ओन से घिना करइ चाही।