Chronological

7 यहोवा मूसा स कहेस, “मइँ तोहरे संग रहब। फिरौन बरे तू एक बड़वार राजा^[a] क तरह रहब्या। अउर हारून तोहार हकदार बोलवइया^[b] होइ। ² जउन हुकुम मइँ देत हउँ उ सब हारून स कहा। तबहिं उ उ बतियन क जउन मइँ कहत हउँ, फिरौन स कही। अउर फिरौन इस्राएल क मनइयन इ देसे स जाइ देइ। ³ मुला मइँ फिरौन क जिद्दी बनउब। उ तोहार मांग क न मानी। तबहिं मइँ मिस्र मँ बहोत स चमत्कारन, चिन्ह अउर आस्चर्य जनक काम करिबेउँ। ⁴ मुला उ तउ भी तोहार नाहीं सुनी। ऍह बरे मइँ मिस्र क बुरी तरह स सजा देब। अउ मइँ आपन लोगन, इस्राएलियन क मिस्र देस स बाहेर लइ जाब। ⁵ तब मिस्र क मनइयन जनिहीं कि मइँ यहोवा अहउँ। जब मइँ ओन पचन्क खिलाफ होब अउर आपन लोग एस्राएलियन क ओनके देस स बाहेर लइ जाब।”

⁶ मूसा अउ हारून उन बातन क मान लिहेन जेका यहोवा कहे रहा। ⁷ तउ मूसा अस्सी बरिस क रहा अउ हारून तिरासी बरिस क।

मूसा क टहरइ क छड़ी साँप होइ जात ह

⁸ यहोवा मूसा अउ हारून स कहेस, ⁹ “फिरौन तोहसे तोहार सक्ती क सिद्ध करइ बरे कही। उ तोहसे चमत्कार करइ बरे कही। उ समइया तू हारून स कहया कि भुइँया प टहरइ क छड़ी बहाइ द्या। जउन समइया फिरौन देखत रहत होइ, छड़ी साँप बन जाई।”

¹⁰ तउ मूसा अउ हारून फिरौन क लगे गएन अउ यहोवा क हुकुम क मानेन। हारून आपन छड़ी खाले बहाइ दिहस। फिरौन अउ ओनके अफसरन क लखत-लखत तबहीं छड़ी साँप बनि गइ।

¹¹ ऍह बरे फिरौन आपन बुद्धिमान अउ जादूगरन क बोलाएस। इ पचे जन्तर मन्तर किहेन अउ हारून की नाई चमत्कार किहेन। ¹² उ पचे आपन टहरइवाली छड़ी क भुइँया प बहाएन अउ उ सबन साँप बनि गइन। मुला तबहिं हारून क छड़ी उ छड़िन क खाइ लिहस। ¹³ फिरौन तउ भी इस्राएली दास क जाइ स मना किहस। इ वइसा ही भवा जइसा यहोवा कहेस। फिरौन मूसा अउ हारून क बात सुनइ स मना कइ दिहस।

पानी क रकत बन जाब

¹⁴ तब यहोवा मूसा अउ हारून स कहेस, “फिरौन हठ धरे बा। फिरौन मनइयन क जाइ स मना करत ह। ¹⁵ भिन्सारे फिरौन नदी क किनारे जाइ। ओकरे संग भेट करइ बरे नील नदी क किनारे जा। तू अपने साथे उ छड़ी क लइ जाया जउन साँप होइ ग रही। ¹⁶ ओका इ कहया: ‘परमेस्सर, हिब्रू लोगन क यहोवा, मोका तोहरे लगे पठएस ह। यहोवा मोसे इ कहइ क बोलेस ह, “मोरे लोगन क मोर आराधना करइ बरे रेगिस्तान मँ जाइ द्या।” अबहुँ तलक तू यहोवा क कहब नाहीं मान्या। ¹⁷ ऍह बरे यहोवा कहत ह कि उ तोहका लखावइ बरे कछू करी कि उ यहोवा अहइ। मइँ आपन हाथे मँ छड़ी लइके पानी प मारब अउ नील नदी रकत मँ बदल जाइ। ¹⁸ तब नील नदी क मछरियन मरि जइहीं अउ नदी बसाइ लागी। तब मिस्री मनइयन नदी क पानी न पी पइहीं।’”

¹⁹ यहोवा मूसा क इ हुकुम दिहेस, “हारून स कहा कि उ नदियन, नहरन, झीलियन अउ उ सबहिं ठउरन प जहाँ मिस्र क मनइयन पानी भरत हीं-हुवाँ आपन छड़ी क पसारइ। जबहिं उ अइसा करी तउ सारा पानी रकत मँ बदलि जाइ। सारा क सारा पानी हिआँ तलक कि काठे अउ पाथर क बासन मँ धरा पानी रकत मँ बदलि जाई।”

²⁰ ऍह बरे मूसा अउ हारून वइसा किहेन जइसा यहोवा कहेस। हारून छड़ी क उठाएस अउ नील नदी क पनिया प पटकेस। उ इ फिरौन अउ ओकरे अफसरन क समन्वा किहेस। फिन नदी क सारा पानी रकत मँ बदलि गवा। ²¹ मछरियन नील नदी मँ मरि गइन अउ नदी बसाइ लागी। ऍह बरे मिस्री मनइयन नदी क पानी नाहीं पिउ सकत रहेन। मिस्र मँ सब कइँती रकत रहा।

²² फिरौन क जादूगरन आपन जन्तर मन्तर देखाएन अउ उ पचे वइसा ही किहेन। ऍह बरे फिरौन मूसा अउ हारून क सुनइ स इन्कार कइ दिहेस। इ ठीक वइसे भवा जइसे यहोवा कहे रहा। ²³ जउन मूसा अउ हारून किहे रहेन ओका फिरौन नाहीं मानेस। उ घूमा अउ घरे चला गवा।

²⁴ मिस्री मनइयन नदी स पानी नाहीं पिउ सकत रहेन। ऍह बरे पानी पिअइ बरे नदी क चारिहुँ कइँती कुअँन क खोदेन।

मेघा

²⁵ यहोवा क जरिए नील नदी क पानी क रकत मँ बदलइ क पाछे सात दिन बीति गएन।

8 तब यहोवा मूसा स कहेस, “फिरौन क लगे जा अउ ओसे कहा कि यहोवा इ कहत ह, ‘मोरे मनइयन क मोरी आराधना करइ बरे जाइ द्या। ² मुला जदि फिरौन ओनका जाइ स रोकत ह तउ मइँ, यहोवा सारे मिस्र क मेघन स भरि देब। ³ नील नदी मेघन स भरि जाइ। उ पचे नदी स निकरिहीं अउ तोहरे घरे मँ घुसिहीं। उ सबइ तोहरे सोवइ क खोलि मँ अउ तोहरे बिछउना मँ होइहीं। मेघन तोहरे अफसरन क घरे मँ होइहीं अउ तोहरे तन्दूरे मँ अउ पानी क घइली मँ होइहीं। ⁴ मेघन पूरि तरह तोहरे ऊपर, तोहरे मनइयन क ऊपर अउ तोहरे अफसरन क ऊपर होइहीं।’”

⁵ तबहिं यहोवा मूसा स कहेस, “हारून स कहा कि उ आपन छड़ी क नहरन, नदियन अउ झीलियन क ऊपर पसारइ। अउर मेघन बाहेर निकरिके सारे मिस्र देस मँ भरि जइहीं।”

⁶ तब हारून परमेस्सर क हुकम स मिस्र देस मँ जहाँ कहूँ पानी रहा ओकर ऊपर हथवा उठाएस अउ मेघा पानी स बाहेर आउब सुरू कइ दिहन अउ पूरे मिस्र प छाइ गएन।

⁷ जादूगर भी वइसा किहेन। उ पचे भी मिस्र देस मँ मेघा लइ आएन।

⁸ फिरौन मूसा अउ हारून क बोलाएस। फिरौन कहेस, “यहोवा स आराधना करइ कि उ हम लोगन क मेघन स आजाद करइ देइ। तबहिं मइँ मनइयन क यहोवा बरे बलि भेंट चढ़ावइ बरे जाइ देइहउँ।”

⁹ मूसा फिरौन स कहेस, “मोका इ बतावा कि आप कब चाहत हीं कि मेघन निकरि जाइँ। मइँ आप बरे, आप क मनइयन बरे अउ आप क अफसर बरे पराथना करिहउँ। तबहिं मेघन आप क अउ आप क घरन्क, अउ आप क अफसन्क अउ आप क मनइयन क तजि देइहीं। मेघन सिरिफ नदिया मँ रहि जइहीं। तू कब चाहत बाट्या कि मेघन तोहका तजि देइँ?”

¹⁰ फिरौन कहेस, “भियान।”

मूसा कहेस, “जइसा आप कहत हीं वइसा ही होइ। इ तरह आप जानि जइहीं कि यहोवा हमार परमेस्सर क नाई अउर कउनो देवता नाहीं बा। ¹¹ मेघन आप क, आप क घरे क, आप क अफसरन्क अउ आप क लोगन क तजि देइहीं। मेघन सिरिफ नदी मँ रहि जइहीं।”

¹² मूसा अउ हारून फिरौन स बिदा भएन। मूसा ओन मेघन खातिर यहोवा क पराथना किहेस, जउने मेघन क यहोवा फिरौन क खिलाफ पठए रहा। ¹³ अउ यहोवा उहइ किहेस जउन मूसा कहेस। सब मेघा घरन मँ, घरन क अंगने मँ अउ खेतन मँ मरि गएन। ¹⁴ मिस्री मुरदा मेघन क ढेर मँ जमा कहेस तउ समूचा देस मँ भयंकर बदबू होइ लाग। ¹⁵ जब फिरौन निहारेस कि उ पचे मेघन स बरी होइ गएन उ फुन जिद्दियाइ गवा। फिरौन वइसा नाहीं किहेस जइसा मूसा अउ हारून ओसे करइ बरे कहे रहेन। इ ठीक वइसा ही भवा जइसा यहोवा कहेस।

जुआँ

¹⁶ तब यहोवा मूसा स कहेस, “हारून स कहा कि उ आपन छड़ी उठावइ अउ भुइयाँ क धूरि प पटकइ। मिस्र मँ सब कइँती धूरि जुअँन होइ जाइ।”

¹⁷ उ पचे इ किहेन। हारून छड़ी क उठाएस अउ भुइयाँ क धूरि प दइ मारेस। मिस्र मँ सब कइँती धूरि जुअँन मँ बदल गइ। जुअँन जानवरन अउ लोगन प छाइ गइन।

¹⁸ जादूगरन आपन जादू मारेन अउ वइसे करइ चाहेन। मुला जादूगरन धूरि स जुअँन नाहीं बनाइ सकेन। जुअँन जानवरन अउ मनइयन प छाइ गएन। ¹⁹ तउ जादूगरन फिरौन स कहेन, “इ परमेस्सर क सक्ती अहइ?” मुला फिरौन ओनपइ बिसवास करइ स इन्कार कइ दिहेस। उ जिद्दी होइ गवा। इ ठीक अइसा ही भवा जइसा यहोवा कहे रहा।

माखिन

²⁰ यहोवा मूसा स कहेस, “भिन्सारे उठा अउ फिरौन क लगे जा। फिरौन नदी क लगे जाइ। ओन से कहा, ‘मोरे लोगन क मोर आराधना बरे जाइ द्या। ²¹ जदि तू मोर लोगन क नाहीं जाइ देब्या तउ तोहरे घरन मँ माखी अइहीं। माखी तोहरे अउ तोहरे अफसरन प छाइ जइहीं। मिस्र क घरन माखिन स भरि जइहीं। माखिन पूरी भुइयाँ प छाइ जइहीं। ²² मुला मइँ इस्राएल क लोगन क संग वइसा बर्ताव न करब जइसा मिस्री लोगन क संग करिब। जहाँ गोसेन मँ मोर लोगन रहत हीं हुवाँ कउनो माखी नाहीं होइ। इ तरह तू जनब्या कि मइँ यहोवा, इ देसे मँ हउँ। ²³ ऍह बरे मइँ काल्ह भियान स तोहरे लोगन क संग आपन लोगन स अलग बर्ताव करिहउँ।’”

²⁴ ऍह बरे यहोवा उहइ किहेस जउन उ कहेस। माखिन झुण्ड क झुण्ड मँ आइ गइन। माखिन फिरौन क घर अउ ओकर सबहिं अफसरन क घरे मँ भरी रहिन। माखिन पूरे मिस्र देस मँ भरि गइन। माखी देस क नासत रहिन। ²⁵ ऍह बरे फिरौन मूसा अउ हारून क बोलाएस। फिरौन कहेस, “तू पचे यहोवा तोहार परमेस्सर क इहइ देस मँ बलि भेंट कइ द्या।”

²⁶ मुला मूसा कहेस, “वइसा करब नीक नाहीं होइ। मिस्री मनइयन सोचत हीं कि परमेस्सर बरे हम लोगन क बलि देब एक खउफनाक बात अहइ। ऍह बरे जदि हम पचे अइसा करित तउ उ पचे हमका देखिहीं अउ हम पइ पाथर बहइहीं अउर हमका मारि डइहीं। ²⁷ हम पचन्क तीन दिना तलक रेगिस्तान मँ जाइ द्या अउर हमका आपन यहोवा परमेस्सर क ओकर हुकम क अनुसार बलि चढ़ावइ द्या।”

²⁸ ऍह बरे फिरौन कहेस, “मइँ तोह सबन क मरूभूमि मँ जाइ क देब अउ तोह सबन क यहोवा तोहार परमेस्सर क भेंट चढ़ाई क देब। मुला तोहका बहोत दूर नाहीं जाई क चाही। अब जा अउर मोरे बरे पराथना कर।”

²⁹ मूसा कहेस, “लखा, मइँ जाब अउ यहोवा स पराथना करब कि काल्ह भियान आप स, आपक लोगन स अउ आपक अफसरन्स माखिन क हड़ाइ देइँ। मुला आप लोगन क यहोवा क बलि चढ़ावइ स जिन रोका।”

³⁰ ऍह बरे मूसा फिरौन क लगे स गवा अउ यहोवा स पराथना किहेस। ³¹ अउर यहोवा इ किहेस जउन बरे मूसा पराथना किहेस। यहोवा माखिन क फिरौन स, ओकरे अफसरन्स ओकरे लोगन स हड़ाइ लिहेस। कउनो माखी नाहीं टिक पाइ। ³² मुला फिरौन फुन जिद्दी होइ गवा अउर उ लोगन क जाइ नाहीं दिहेस।

खेते क गोरूअन क बेरामी

9 तब परमेस्सर मूसा स कहेस, फिरौन क लगे जा अउर ओका कहा, “हिब्रू मनइयन क यहोवा परमेस्सर कहत बा, ‘मोरे लोगन क मोरे आराधना बरे जाइ द्या।’ ² जदि आप ओनकइ लगातार रोकत रहब्या अउ ओनकइ जाइ स लगातार मना करत रहब्या, ³ तउ यहोवा आपन सक्ती क प्रयोग तोहरे खेतन क गोरूअन क खिलाफ करी। परमेस्सर तोहरे सबहिं घोड़न, गदहन, ऊँट, गइया बोकरी अउ भेड़िन क भयानक बेरामी दइ देइ। ⁴ यहोवा इस्राएल क गोरूअन क संग मिस्र क गोरूअन स अलग बर्ताव करी। इस्राएलियन क मनइयन क कउनो गोरू न मरी। ⁵ यहोवा एका घटित होइ जाइ क टेम तइ कइ दिहे अहइ। ‘भियान यहोवा इहइ देस मँ घटइ देइ।’”

⁶ अगली भियान मिस्र क खेत क सबहीं जनावर मर गएन। मुला इस्राएल क कउनो भी जनावर नाहीं मरा। ⁷ फिरौन मनयइन क यह देखे इस्राएल भेजा कि का इस्राएल क कउनो जनावर मरा। अउ इस्राएल क कउनो जनावर नाहीं मरा। फिरौन हठी रहा उ कउनो मनयइन क नाहीं जाई दया।

फोड़ा फुंसी

⁸ यहोवा मूसा अउ हारून स कहेस, “मुट्ठी भर भट्ठी क राखी ल्या। मूसा तू फिरौन क समन्वा राखी क हवा मँ उछारा। ⁹ इ धूरि होइ जाइ अउ समूचइ मिस्र देस मँ संचरि जाइ। जबहुँ इ धूरि मनई क छुइ या गोरू प गिरी, खाली प फोड़ा (गलका) फुंसी फुटिहीं।”

¹⁰ ऍह बरे मूसा अउ हारून भट्ठी स राखी लिहेस। तबहिं उ पचे गएन अउ फिरौन क समन्वा ठाड़ भएन। मूसा राखी क हवा मँ उछारेन अउर मनइयन अउ गोरूअन क बदन मँ फोड़ा फुंसी होइ लागेन। ¹¹ जादूगर मूसा क अइसा करइ स थाम नाहीं पाएन, काहे कि जादूगरन क फोड़ा होइ गएन। इ समूचइ मिस्र मँ अइसा ही भवा। ¹² मुला यहोवा फिरौन क जिद्दी बनइ दिहे रहा। ऍह बरे फिरौन मूसा अउ हारून क सुनइ स मना कइ दिहेस। इ वइसा ही भवा जइसा यहोवा कहे रहा।

ओला

¹³ तब यहोवा मूसा स कहेस, “भिन्सारे उठा अउ फिरौन क समन्वा आपन आप क पेस करा। अउर ओसे कहा कि परमेस्सर, हिब्रू मनइयन क यहोवा तोहसे कहत ह, ‘मोर लोगन क मोर आराधना बरे जाइ द्या। ¹⁴ जदि तू इ नाहीं करब्या तउ मइँ तोहारे अफसरन अउ तोहरे मनइयन क खिलाफ आपन पूरी ताकत क प्रयोग करब। तब तू जनब्या कि मोरे तरह दुनिया मँ दूसर कउनो देवता नाहीं अहइ। ¹⁵ मइँ आपन सक्ती क प्रयोग कइ सकत हउँ अउ अइसी बीमारी फइलाइ सकत हउँ जउन तोहका अउ तोहरे मनइयन क भुइयाँ प नास कइ डाइ। ¹⁶ मुला मइँ तू सबन्क कउनो खास कारण स हिआँ धरे अहउँ। मइँ तू पचन्क हियाँ ऍह बरे धरे अहउँ कि मइँ तू पचन्क आपन सक्ती देखाउब। तब सारी दुनिया क मनइयन मोरे बारे मँ बात करिहीं। ¹⁷ तू पचे अबहुँ मोरे लोगन क खिलाफ अहा। तू ओनका जाइ नाहीं देत अहा। ¹⁸ ऍह बरे भियान मइँ इहइ टेम काफी जोरदार ओला बरसाउब। जब ते मिस्र देस बना ह आजु तक कबहुँ अइसे ओला नाहीं बरसा ह। ¹⁹ तू आपन गोरूअन क सुरच्छित ठउरे मँ राख्या। जउन कछू तोहार खेते मँ होइ ओका ओंटे मँ छिपाइ जरूर लिहा। काहेकी कउनो भी लोग या गोरू जउन खेते मँ होइ उ मरि जाइ। हर एक चीजन अउ हर एक मनइयन प जउन घरे क बाहेर होइ ओन सब प ओला बरसिहीं।’”

²⁰ फिरौन क कछू अफसरन यहोवा क संदेसे प धियान दिहेस। उ पचे हाली हाली आपन गोरूअन अउ गुलामन क घरे मँ हाँक लिहेन। ²¹ मुला दूसर मनइयन यहोवा क सँदेसा प धियान नाहीं दिहेन। ओ पचन्क गुलाम अउ गोरू जउन बाहेर खेतन मँ रहेन सब तबाह हो गएन।

²² यहोवा मूसा स कहेस, “आपन हाथ हवा मँ उठावा अउ मिस्र प ओला गिरब सुरू होइ जइहीं। इ ओला मिस्र क सबहुँ खेतन प, लोगन प, गोरूअन प अउर बृच्छ अउ पौधा प गिरिहीं।”

²³ ऍह बरे आपन छड़ी क हवा मँ उठाएस अउ यहोवा बिजुरी अउ ओला क भुइँया प गिराएन। ओला समूचइ मिस्र प गिरेन। ²⁴ ओला पड़त रहेन अउ बिजुरी चमकत रही। जबहिं ते मिस्र एक ठु रास्ट्र बना तबहिं स अब तलक इ सबते जिआदा नोसकान करइवाली ओला बरसत रही। ²⁵ मिस्र क खेत मँ जउन कछू रहा आँधी ओका नसाइ दिहेस। ओला मिस्र मँ मनइयन, गोरूअन अउ बृच्छ पउधन क नास कइ डाएस। ओला खेतन मँ सबन बृच्छन क ओखाड़ अउ तोड़ि दिहस। ²⁶ गोसेन पहँटा मँ जहाँ इस्राएल क मनइ रहत रहेन हुवाँ ओला नाहीं गिरेन।

²⁷ फिरौन मूसा अउ हारून क बोलाएस। फिरौन ओनसे कहेस, “इ समइ मँ मइँ पाप किहउँ ह। यहोवा सही अहइ। अउर मइँ अउ मोर लोग गलत अहइँ। ²⁸ परमेस्सर क ओर स ओला क आवाज अउ गर्जत अवाज बहोत जिआदा बा। यहोवा स आँधी थामइ क परार्थना करा। मइँ तू सबइ पचन्क जाइ देब। तू सबइ पचन्क हिआँ नाहीं रहइ क पड़ी।”

²⁹ मूसा फिरौन स कहेस, “जब मइँ सहर क तजि देब, तबहिं मइँ पराथना मँ आपन बाँही क यहोवा क समन्वा पसराउब। गर्जब अउ ओला क गिरब थमि जाइ। तबहिं आप सबन जनिहीं कि इ भुँइया यहोवा क अहइ। ³⁰ मुला मइँ जानत हउँ कि आप अउ आपक अफसरन अबहुँ नाहीं यहोवा स डेरातेन अउर नाहीं यहोवा क इज्जत देत हीं।”

³¹ सनई मँ दाना पड़ि गवा रहा अउ बारली मँ फूल निकरि आवा रहा। मुला इ सब पउधन नसाइ गएन। ³² गोहूँ अउ कठियान गोहूँ जउन दूसर अनाजे क पाछे पाकत हीं, ऍह बरे एनकइ फसल नसान नाहीं।

³³ मूसा फिरौन क तजि दिहेस अउ सहर क बाहेर आवा। उ यहोवा क समन्वा आपन बाँह पसारेस अउ गर्जब अउ ओला क गिरब पटान। बर्खउ धरती प गिरब पटाइ गइ।

³⁴ जब फिरौन लखेस, कि बर्खा, ओला अउ गर्जब पटाइ गएन। उ फुन स पाप किहेस। उ अउ ओकर अफसरन फुन जिद धरे रहेन। ³⁵ फिरौन फुन जिद्दी होइ गएन। उ इस्राएल क मनइयन क अजादी स जाइके मना कइ दिहस। इ ठीक उहइ तरह भवा जइसे यहोवा मूसा स कहे रहा।