Chronological

रोज क भेंट

28 तब यहोवा मूसा स बात किहेस। उ कहेस, ² “इस्राएल क मनइयन क इ हुकुम द्या। ओनसे कहा कि उ पचे मोर बलिदानन अउर अन्नबलि क भोजन जेकर सुगन्ध मोका प्रसन्न करत हीं क भेंट बारी गइ भेंट दुआरा चढ़ावइँ। इ निहिचित करा कि ओका उचित समइ मँ भेंट करइ चाही। ³ इ होमबलि क ओनका यहोवा बरे चढ़ावइ चाही। ओनका दोख क बिना एक बरिस का दुइ ठु मेमना रोज भेंट क रूप मँ चढ़ावइ चाही। ⁴ मेमनन मँ स एक क भिन्सारे चढ़ावा अउ दूसर मेमना क सर्यास्त क टेमॅ। ⁵ ऍकरे अलावा एपा क दसवाँ हींसा अन्नबलि हीन क चौथाई जइतून क तेल क संग मिला भवा आटा क द्या।” ⁶ (इ रोज क होम बलि अहइ जउन सीनै पहाड़ प प्रथम दाईं सरू किहे गवा रहेन। इ बारी गइ भेंट रही जउन यहोवा बरे सुहावना सुगन्ध अहइ।) ⁷ “मनइयन क बारी गइ भेंट क संग पयेबलि करइ चाही। ओनका हर एक भेड़ क संग हीन क एक चौथाई दाखरस देइ चाही। उ पयेबलि क पवित्तर ठउरे मँ वेदी प डावा। इ यहोवा क भेंट अहइ। ⁸ दूसरे भेड़ा क भेंट गोधूरि क टेमॅ चढ़ावा। ऍका भिन्सारे क भेंट क तरह चढ़ावा। अन्नबलि अउ दाखरस क एक ही तरीका स भेंट करिहीं। इ बारी गइ भेंट रही जउन यहोवा बरे सुहावना सुगन्ध अहइ।

सबित भेंट

⁹ “सबित क दिन एक बरिस क बेदोखे क दुइ मेमना जइतून क तेल क संग मिला एपा क दुइ दसवाँ हींसा बढ़िया आटा क अन्नबलि अउ पयेबलि अउ दाखरस भी चढ़ावा। ¹⁰ इ हरेक सबित क दिन क खास भेंट अहइ। इ भेंट रोजाना राजे क भेंट अउ दाखरस क भेंट क अलावा अहइ।”

नवा चन्द्रिमा क भेंट

¹¹ “हर एक महीना क पहिले दिन तू यहोवा क होमबलि चढ़उब्या। इ भेंट बेदोखे क दुइ बर्धा, एक भेड़ा अउ एक बरिस क सात मेमना होइ। ¹² हर एक बर्धा क संग जइतून क तेल क संग जेहमा एपा क तीन दसवाँ हींसा बढ़िया आटा क भेंट भी चढ़ावा। हर एक भेड़ा क संग जइतून क तेल क संग मिला एपा क दुइ दसवाँ हींसा बढ़िया आटा क भेंट भी चढ़ावा। ¹³ हर एक भेड़ क बच्चा क संग जइतून क तेल क संग मिला भवा एपा क दसवाँ हींसा बढ़िया आटा क भेंट भी चढ़ावा। इ होमबलि अहइ जे आगी मँ तइयार भवा अहइ इ यहोवा बरे सुहावना सुगन्ध अहइ। ¹⁴ पयेबलि मँ आधा हीन दाखरस हर एक बर्धा क संग, तिहाई हीन दाखरस हर एक भेड़ा क संग अउ चौथाई हीन दाखरस हर एक मेमना क संग होइ चाही। इ होमबलि अहइ जउन बरिस क हर एक महीना चढ़ावइ जाइ चाही। ¹⁵ हमेसा रोजाना क होमबलि अउ पयेबलि क अलावा तोहका यहोवा क एक बोकरा देइ चाही। उ बोकरा पापबलि होइ।

फसह त्यौहार

¹⁶ “पहले महीना नीसान क चउदहवाँ दिन यहोवा क सम्मान मँ फसह पर्व होइ। ¹⁷ उ महीना क पन्द्रहवाँ दिन बे खमीरे क रोटी क दावत सुरु होत ह। इ पवित्तर जलसा सात दिनाँ तलक रहत ह। तू सिरिफ उहइ रोटी खाइ जउन बे खमीरे क होइ। ¹⁸ इ पवित्तर जलसा क पहिले दिन तोहका खास बइठक बोलावइ चाही। उ दिन तोहका कउनो काम नाहीं करइ चाही। ¹⁹ तू यहोवा क होमबलि देब्या। इ होमबलि दोख क बिना दुइ बर्धा, एक ठु भेड़ा अउ एक बरिस क सात ठु मेमना होइ। ^20-21 हर एक बर्धा क साथ जइतून क तेल क साथ साना भवा एपा क तीन दसवाँ हींसा बढ़िया आटा, भेड़ा क संग जइतून क तेल क संग साना भवा एपा क दुइ दसवाँ हींसा बढ़िया आटा अउर हर एक मेमना क संग एपा क दसवाँ हींसा जइतून क तेल क संग साना भवा बढ़िया आटा क अन्नबलि भी होइ। ²² तोहका एक बोकरा भी देइ चाही। उ बोकरा तोहरे बरे पापबलि होइ। इ तोहरे पाप क ढाँपि देइ। ²³ तू पचन क ओन भेंटन क अलवा देइ चाही जउन तू हर एक भिन्सारे होमबलि क रूप मँ देत रहत ह।

²⁴ “उहइ तरह तोहका सात दिनाँ तलक बलि भेंट देइ चाही। इ आगी क दुआरा होमबलि क रूप मँ अन्न भेंटन होइ। इ यहोवा बरे सुहावना सुगन्ध अहइ। तू नेमॅ स होमबलि अउ ऍकर दाखरस भेंट चढ़उब्या। ऍकरे अलावा तू भोजन चढ़उब्या। होमबलि क अलावा इ भेंट क तोहका देइ चाही जउन तू रोज देत ह।

²⁵ “तब फसह क सतऍ दिन तू एक पवित्तर सभा बुलाउब्या, अउर उ दिन तू कउनो काम नाहीं करब्या।

हफ्ता क त्यौहार (पिन्तेकुस्त)

²⁶ “पहिले फल क उत्सव क अवसर पइ तोहका यहोवा क एक नवा अनाज क भेंट जरूर देइ चाहीं। उ टेमॅ प तोहका एक खास बइठक बोलावइ चाही। तू उ दिन कउनो काम नाहीं करब्या। ²⁷ तू पचे होमबलि चढ़उब्या। उ बलि यहोवा बरे सुहावानी सुगन्ध होइ। तू सबइ बे दोखे क दुइ साँड़, एक-एक बरिस क भेड़ा अउ सात मेमना क भेंट चढ़उब्या। ²⁸ तू हर एक साँड़ क संग जइतून क तेल क संग साना भवा एपा क तीन दसवाँ हींसा बढ़िया आटा, हर एक भेड़ा क संग एपा क दुइ दसवाँ हींसा ²⁹ अउ हर एक मेमना क संग एपा क दसवाँ हींसा आटा क भेंट चढ़उब्या। ³⁰ तोहका आपन पापे क ढाँपइ बरे एक ठु बैंकरा क बलि चढ़ावइ चाही। ³¹ तोहका इ भेंट रोजाना क दग्ध-भेंट अउ ऍकर अन्नबलि क अलावा चढ़ावइ चाही। ठान ल्या कि गोरुअन मँ कउनो दोख नाहीं हो। अउर इ निहचय करि ल्या कि पयेबलि ठीक बाटइ।

तुरहियन क त्यौहार

29 “सातवाँ महीना क पहिले दिन एक खास बइठक होइ। तू सबइ उ दिन कउनो काम नाहीं करब्या। उ तुरही बजावइ क दिन अहइ। ² तू पचे होमबलि चढ़उब्या। इ भेंटन यहोवा बरे सुहावनी सुगन्ध होइ। तू बेदोखे क एक साँड़ एक भेड़ा अउ एक-एक बरिस क सात मेमना चढ़उब्या। ³ तू पचे एपा क तीन दसवाँ हींसा तेल स सना भवा नीक आटा हरेक बर्धा क संग, अउ एपा क दुइ दसवाँ हींसा भेंड़ा क संग चढ़ाउब्या। ⁴ सात मेमना मँ स हरेक क संग एपा क दसवाँ हींसा आटा क भेंट चढ़उब्या। ⁵ एकरे अलावा पापबलि बरे एक बोकरा भी चढ़उब्या। इ तोहरे पापे क ढाँपी। ⁶ इ भेंटन नवा चन्द्रिमा भेंट अउ ओकरे अन्नबलि क अलावा होइ। अउर इ रोज क भेंट, एकर अन्नबलि अउ पयेबलि क अलावा होइहीं। इ नेम क मुताबिक कीन्ह जाइ चाही। एनका आगी बारइ चाही। इ यहोवा क बरे सुहावनी सुगन्ध होइ।

प्रायस्चित क दिन

⁷ “सतऍ महीना क दसवाँ दिन एक खास बइठक होइ। उ दिन तू उपवास रखब्या अउर तू कउनो काम नाहीं करब्या। ⁸ तू होमबलि भेंट करब्या। इ यहोवा बरे सुहावनी गन्ध होइ। तू बे दोखे क एक ठू साँड़ एक ठु भेड़ा अउ एक बरिस क सात मेमना भेंट चढ़उब्या। ⁹ हर एक बर्धा क संग जइतून क तेले स साना भवा एपा क तीन दसवाँ हींसा आटा, भेड़न क संग एपा क दुइ दसवाँ हींसा आटा। ¹⁰ अउ हर एक सातहु मेमना क संग एपा क दसवाँ हींसा आटा क भेंट चढ़उब्या। ¹¹ तू एक बोकरा भी पापबलि क अलावा भेंट करब्या। इ पाप बरे प्रायस्चित क अतिरिक्त होइ। इ रोजाना क बलि, अन्नबलि अउ पयेबलि क अलावा भी होइ।

कुटीर क त्यौहार

¹² “सतऍ महीना क पन्द्रहवाँ दिन एक खास बइठक होइ। इ कुटीर क त्यौहार होइ। तू उ दिना कउनो काम नाहीं करब्या। तू यहोवा बरे खास छुट्टी सात दिना तलक मनउब्या। ¹³ तू होमबलि चढ़उब्या। इ यहोवा बरे सुहावनी सुगन्ध होइ। तू तेरह बर्धा, दुइ भेड़ा अउ एक बरिस क चउदह मेमना चढ़उब्या। ¹⁴ तू तेरह बर्धा मँ स हर एक बरे जइतून क तेल क संग साना भवा एपा क तीन दसवाँ हींसा आटा, दुइनउँ भेड़न मँ स हर एक बरे एपा क दुइ दसवाँ हींसा ¹⁵ अउ चउदह भेड़न मँ स हर एक बरे एपा क दसवाँ हींसा आटा क भेंट चढ़उब्या। ¹⁶ तोहका एक ठु बोकरा भी पाप भेंट क रूप मँ अर्पित करइ चाही। इ रोजाना क भेंट अउ एकर अनाज अउ दाखरस भेंट क अलावा होइ।

¹⁷ “इ पवित्तर दिन क दूसरे दिन तोहका बारह बर्धा, दुइ भेड़ा अउ चउदह ऍक बरिस क मेमना चढ़ावइ चाही। इ सबइ बिना दोख क होइ चाही। ¹⁸ तोहका साँड़, भेड़ा अउ मेमना क संग गनती क मुताबिक तउले मँ अन्नबलि अउ पयेबलि भी चढ़ावइ चाही। ¹⁹ तोहका पापबलि क रूप मँ एक ठु बोकरा क भी भेंट चढ़ावइ चाही। इ रोजाना क भेंट अउ अन्न अउ पयेबलि क अलावा भेंट होइ।

²⁰ “इ पवित्तर दिन क तीसर दिन तोहका बे दोखे क गियारह साँड़, दुइ भेड़ा अउ एक-एक बरिस क मेमना क भेंट चढ़ावइ चाही। ²¹ तोहका बर्धा, भेड़ा अउ मेमना क ठीक गनती क मुताबिक अन्न अउ पयेबलि चढ़ावइ चाही। ²² तोहका पापबलि क रूप मँ एक बोकरा क भी देइ चाही। इ रोजाना क भेंट अउ अन्नबलि अउ पयेबलि क अलावा भेंट होइ।

²³ “इ पवित्तर दिन क चउथा दिन तोहका बे दोखि क दस साँड़, दुइ भेड़ा अउ एक-एक बरिस क चउदह मेमना भेंट चढ़ावइ चाही। इ सबइ बेदोख होइ चाही। ²⁴ तोहका बर्धा, भेड़ा अउ मेमना क ठीक सख्याँ क मुताबिक अन्न अउ पयेबलि चढ़ावइ चाही। ²⁵ तोहका पापबलि क रूप मँ एक बोकरा क भी च़ढ़ावइ चाही। इ रोजाना क भेंट अउ अन्नबलि अउ पेयबलि क अलावा होइ चाही।

²⁶ “इ पवित्तर दिन क पँचए दिन तोहका बेदोख क नौ साँड़, दुइ भेड़ा अउ एक-एक बरिस क चउदह मेमना भेंट चढ़ावइ चाही। इ सबइ बेदोख होइ चाही। ²⁷ तोहका बर्धा, भेड़ा अउ मेमना क ठीक संख्याँ क मुताबिक अन्न अउ पयेबलि चढ़ावइ चाही। ²⁸ तोहका पापबलि क रूप मँ एक बोकरा क भी भेंट चढ़ावइ चाही। इ रोजाना क भेंट अउ अन्नबलि अउ पेयबलि क अलावा होइ चाही।

²⁹ “इ पवित्तर दिन क छठऍ दिन तोहका बे दोखे क चउदह साँड़, दुइ भेड़ा अउ एक-एक बरिस क चउदह मेमना क भेंट चढ़ावइ चाही। ³⁰ तोहका बर्धा, भेड़ा अउ मेमना क संग जेतँना होइ चाही उ मात्रा मँ अन्न अउ पयेबलि चढ़ावइ चाही। ³¹ तोहका पापबलि क रूप मँ एक बोकराँ क भी भेंट देइ चाही। इ रोजाना क भेंट अउ अन्नबलि अउर पयेबलि क अलावा भेंट होइ।

³² “इ पवित्तर दिन क सतऍ दिन तोहका बेदोख क सात साँड़, दुइ भेड़ा, अउ एक-एक बरिस क चउदह मेमना क भेंट चढ़ावइ चाही। ³³ तोहका बर्धा, भेड़ा अउ मेमना क संग गनी भइ गनती मँ अन्न अउ पयेबलि चढ़ावइ चाही। ³⁴ तोहका पापबलि क रूप मँ एक बोकरा क भी भेंट देइ चाही। इ रोजाना क भेंट अउ अन्नबलि तथा पयेबलि क अलावा भेंट होइ।

³⁵ “इ पवित्तर दिन क अठवाँ दिन तोहका एक समापन बइठक करइ चाहीं। तोहका उ दिन कउनो काम नाहीं करइ चाही। ³⁶ तू होमबलि अउ आगी क भेंट चढ़ावा। इ यहोवा बरे सुहावनी सुगंध होइ। तोहका बेदोखे क एक साँड़, एक भेड़ा अउ एक एक बरिस क सात मेमना भेंट मँ चढ़ावइ चाही। ³⁷ तोहका साँड़, भेड़ा अउ भेड़ी क बच्चा बरे गनी भइ मात्रा मँ अन्न अउ पयेबलि देइ चाही। ³⁸ तोहका पापबलि क रूप मँ एक बोकरा क भी भेंट देइ चाही। इ रोजाना क भेंट अउ अन्नबलि अउ पयेबलि क अलावा भेंट होइ चाही।

³⁹ “उ सबइ तोहार खास दिन यहोवा क सम्मान बरे अहइ। तोहका एपा क दसवाँ हींसा ओन बचन भेंट, आपन स्वेच्छा भेंट, होमबलि, अन्नबलि, पयेबलि अउ मेलबलि क अलावा इ पवितर दिनन म मानइ चाहीं।”

⁴⁰ मूसा इस्राएल क लोगन स ओन सबहिं बातन क कहेस जउन यहोवा ओका हुकुम दिहे रहा।

दीन्ह गवा खास बचन

30 मूसा सबहिं इस्राएली परिवार समूहन क नेता लोगन स बात किहेस। मूसा यहोवा क इ आदेस क बारे मँ ओनसे कहेस।

² “अगर कउनो मनई परमेस्सर क खास बचन देइ चाहत ह या जदि उ मनई परमेस्सर क कछू खास न्यौछावर करइ क बचन देत ह तउ ओका वइसे ही करइ द्या। मुला ओन मनई क ठीक वइसेन ही करइ चाही जइसा उ बचन दिहे अहइ।

³ “होइ सकत ही कि कउनो जवान मेहरारु आपन पिता क घर रहत होइ जउन जवान अहइ। अउर उ मेहरारु यहोवा क कछू चढ़ावइ क बचन देत होइ। ⁴ अउर ओकर बाप इ बचन क बारे मँ सुनत ह अउर ओकर बरे (बचन क रद्द करइ बरे) कछू नाहीं कहत ह तउ उ जवान मेहरारू क बचन तउ जरुर पूरा कइ देइ चाही जेका करइ क उ बचन दिहे अहइ। ⁵ मुला अगर ओकर बाप ओकर दीन्ह गवा बचन क बारे मँ सुनिके ओका पूरा करइ स मना करत ह तउ उ मेहरारु क उ बचन पूरा नाहीं करइ चाही जेका उ बचन लिहेस ह। काहेकि ओकर बाप ओका रोकेस। एह बरे यहोवा ओका छिमा करिहीं।

⁶ “होइ सकत ह कि कउनो मेहरारु बात ही बातन मँ बे सोचे बिचारे कउनो किरिया खाइ लेत ह अउ पाछे ओकर बियाह होइ जात ह। ⁷ अउर भतार दीन्ह गवा बचन क बारे मँ सुनत ह अउ अउर ओकर (बचन क रद्द करइ) बरे कछू नाहीं कहत ह। तउ उ मेहरारु क आपन दीन्ह गवा बचन क मुताबिक काम क पूरा कइ लेइ चाही। ⁸ मुला जदि भतार दीन्ह गवा बचन क बारे मँ सुनत ह अउ ओका अंगीकार नाहीं करत ह तउ मेहरारु क दीन्ह गवा बचन क पूरा नाहीं करइ क पड़ी। ओकर भतार ओकर बचन रोकि दिहन-उ ओका कही गइ बात क पूरा नाहीं करइ दिहस। एह बरे यहोवा ओका छिमा करिहीं।

⁹ “कउनो राँड़ या तलाक दीन्ह गइ मेहरारु खास बचन दइ सकत ह। अगर उ अइसा करत ह तउ ओका आपन ठीक बचन क मुताबिक करइ चाही।

¹⁰ “एक बियाही मेहरारु यहोवा क कछू चढ़ावइ क बचन, या कछू स अपने आप क बचाइ क बचन दइ सकत ह। ¹¹ अदि ओकर भतार दीन्ह गए बचन क बारे मँ सुनत ह अउ ओका आपन बचन क पूरा करइ देत ह तउ ओका ठीक आपन दीन्ह गए बचनन क मुताबिक ही उ काम करइ चाही। ¹² मुला अगर ओकर भतार ओकर दीन्ह गए बचन क सुनत ह अउर ओका बचन पूरा करइ स मना कइ देत ह तउ ओका आपन दीन्ह गए बचन क मुताबिक उ काम पूरा नाहीं करइ क होइ। ऍकर कउनो महत्व न होइ काहे की उ का बचन दिहे रहा, ओकर भतार उ बचन क भगं कइ सकत ह। अगर ओकर भतार उ बचन क तोड़ देत ह तउ यहोवा ओका छिमा करिहीं। ¹³ एक बियाही मेहरारु यहोवा या परमेस्सर क कउनो खास बचन दइ सकत ह। भतार ओकरे बचन मँ स कउनो क रोक सकत ह या भतार उ बचन मँ स कउनो क पूरा करइ देइ सकत ह। ¹⁴ भतार आपन मेहरारु क कइसे बचन पूरा करइ देइ? अगर उ दीन्ह ग बचन क बारे मँ सुनत ह अउ ओनका रोकत नाहीं तउ मेहरारु क आपन दीन्ह ग बचन क मुताबिक काम क पूरा करइ चाही। ¹⁵ अगर भतार दीन्ह ग बचन क बारे मँ सुनत ह अउ ओकर पाछे ओका बचन पूरा करइ स रोकत ह तउ ओकर बचन तोड़इ क जिम्मेदारी भतार प होइ।”

¹⁶ इ सबइ हुकुम अहइ जेनका परमेस्सर मूसा क दिहेस। इ सब आदेस एक मनई अउ ओकरे मेहरारु क बारे मँ अहइँ अउ बाप अउ ओकरे बिटिया क बारे मँ अहइ जउन उ जवान मेहरारू रहइ अउ अपने बाप क घरे मँ रहत होइ।