Chronological

याजकन अउ लेवी बंसी लोगन क कारज

18 यहोवा हारून स कहेस, “तू, तोहार पूतन, अउ तोहरे पिता क परिवारे क सब मनई कउनो पाप जउन पवित्तर ठउरे क सम्बंधित कीन्ह ग अहइ क जिम्मेदार अहइँ। तू अउ तोहार पूत याजकिये स सम्बन्धि कउनो भी बरे जिम्मेदार होइहीं।^{[a] 2} दूसर लेवी मनइयन क आपन साथ देइ बरे आपन परिवार समूह स लइ आवा। उ सबइ तोहार अउ तोहरे पूतन क मदद साच्छी क तम्बू क काम करइ मँ करिहीं। ³ लेवी परिवार क उ सबइ मनई तोहरे मातहत अहइँ। उ पचे उ सबहिं कामे क करिहीं जेनका तम्बू मँ किया जाब अहइ। मुला उ पचेन क वेदी या पवित्तर ठउर क बर्तनन क लगे न जाइ चाही। जदि उ पचे अइसा करिहीं तउ उ सबइ मरि जइहीं अउ तू भी मरि जाब्या। ⁴ उ पचे तोहरे संग होइहीं अउ तोहरे संग काम करिहीं। उ पचे मिलापवाला तम्बू क देखइ रेखइ क जिम्मेदार होइहीं। सब कारज, जेका तम्बू मँ कीन्ह जाइ चाही, उ पचे करिहीं। दूसर कउनो भी उ ठउर क नगिचे न आइ जहाँ तू अहा।

⁵ “पवित्तर ठउर अउ वेदी क देख-रेख करइ क जिम्मेदार तू अहा। मइँ इस्राएल क मनइयन प फुन कोहाइ नाहीं चाहत हउँ। ⁶ मइँ खुद तोहरे मनइयन यानी लेवी बंस क लोगन क खुद इस्राएल क सबहिं मनइयन मँ स चुनेउँ ह। उ पचे यहोवा क दीन्ह गवा उपहार अहइ अउर उ पचन्क परमेस्सर क सेवा करइ अउर मिलापवाला तम्बू क काम करइ बरे आपिर्त कीन्ह गवा अहइ। ⁷ मुला सिरिफ तू अउ तोहार पूत याजकन क रूप मँ सेवा कइ सकत हीं। अकेले तू ही वेदी क लगे जाइ सकत ह। तू अकेले महापवित्तर ठउर क पर्दा क भितरे जाइ सकत ह। याजक क रूप मँ तोहार सेवा एक ठु उपहार जेका मइँ तोहका देत हउँ। कउनो भी दूसर, जउन पवित्तर ठउर क लगे आइ, मारि डावा जाइ।”

⁸ तब यहोवा हारून स कहेस, “मइँ खुद तोहका मनइयन जउन खास भेंट चढ़ाएन ह जिम्मेदारी दिहेउँ ह। इस्राएल क लोग जउन सारी भेंट मोका देइहीं उ मइँ तोहका देत अहउँ। तू अउ तोहार पूत इ पवित्तर भेंटन क आपुस मँ बाटि सकत ह। इ हमेसा तोहार होइ। ⁹ इ ओन सबहिं पवित्तर भेंटन मँ इ तोहार आपन हींसा होइ जेका जलावा नाहीं गवा ह। हरेक भेंटन, हरेक अन्नबलि, हरेक पापबलि अउ हरेक दोखबलि जउन उ मोरे लगे लइ आवत हीं, इ सबइ तोहर अउ तोहरे पूतन बरे बहोत पवित्तर भेंटन होइ हीं। ¹⁰ उ सबन चीजन क महापवित्तर ठउरे मँ खा। तोहरे परिवार क हर मरद मनसेधू ऍका खाइ सकत ह मुला तोहका सुमिरइ चाही कि उ सबइ भेंट पवित्तर अहइँ।

¹¹ “अउर उ सबहिं चीजिन जेका इस्राएली उत्तोलन बलि क रूप मँ देइहीं, तोहरइ होइहीं। मइँ ऍका तोहका, तोहार पूतन अउ तोहार बिटियन क देत हउँ। इ तोहार हींसा अहइ। तोहरे परिवार क हर एक मनई जउन सुद्ध होई, ऍका खाइ सकी।

¹² “अउर मइँ सारा बढ़िया जइतून क तेल अउ सबन त बढ़िया नीक नई दाखरस अउ अनाज तोहका देत अहउँ। इ सबइ उहइ चीजन बाटिन जेका इस्राएल क लोग मोका यानी आपन यहोवा क देत हीं। इ सबइ उ चीजियन बाटिन जेका उ पचे आपन फसिल पाक जाए प बटोरत हीं। ¹³ सबइ चीज जउन तोहार भूइँया स आवत ही क पहिला फल परमेस्सर क अहइ। एह बरे इ चीजन क मइँ तोहका देब। अउर हर एक मनई जउन परिवार मँ सुद्ध होई ऍका खाइ सकी।

¹⁴ “अउर हर एक इस्राएल मँ जउन यहोवा क दीन्ह जात हीं, तोहार बा।

¹⁵ “कउनो भी परिवारे मँ पहिलौटी क पूत या गोरु परमेस्सर क भेंट होइ। उ तोहार होइ। मुला तोहका हर एक पहिलौटी लरिका अउ पहिला पइदा भवा असुद्ध गोरु क फुन स वापिस लइ लेइ चाही। तब पहिला पइदा बच्चा फुन उ परिवार क होइ जाइ। ¹⁶ जब लरिका बच्चा एक महीना क होइ जाइँ तब्बइ तोहका ओकर बरे दाम लइ लेइ चाही। ओका मुक्त करावइ क मूल्य पाँच सेकेल चाँदी पवित्तर स्थान क अधिकारिक माप अनुसार होइ चाहीं। एक सेकेल बीस गेरा क बराबर होत ह।

¹⁷ “मुला तोहका पहिलौटी क गइया या भेड़ी या बोकरा क दाम नाहीं लेइ चाही। उ सबइ गोरु तउ पवित्तर बाटेन। ओनकइ रकत वेदी प छिछकारा अउर ओनकइ चर्बी बारा। इ भेंट आगी क जरिए दीन्ह जात ह। इ भेंट क महकब मोरे बरे यानी यहोवा बरे सोहइवाली गंध होइ। ¹⁸ मुला इ गोरुअन क गोस तोहार होइ जइसे कि उत्तोलन बलि क छाती तोहार होइ अउर भेंटन क दहिनी जाँघन तोहार होइ। ¹⁹ कउनो भी चीज, जेका लोग पवित्तर भेंट क रूप मँ मोका चढ़ावत ही, मइँ यहोवा ओका तोहका देत हउँ। इ तोहार हींसा अहइ। मइँ ऍका तोहका, तोहार बेटहनन अउ तोहार बिटिहिनियन क देत अहउँ। इ यहोवा क संग किया गवा करार अहइ जउन हमेसा बना रही। मइँ इ बचन तोहका अउ तोहरे सन्तानन क देत अहउँ।”

²⁰ यहोवा हारून स इ भी कहेस, “तू कउनो भी भुइयाँ न पउब्या। अउर अइसी कउनो भी चीज नाहीं रखब्या जइसी दूसर लोग राखत हीं। मइँ तोहार अंस अउ मइँ इस्राएल क लोगन क बीच तोहार उत्तरधिकार अहइ।

²¹ “इस्राएल क लोग जउन कछू ओनके लगे होइ ओकर दसवाँ हींसा देइहीं। इ तरह मइँ लेवी बंस क सन्तानन क दसवाँ हींसा देत अहउँ। इ ओनके उ काम क मजूरी अहइ जउन उ पचे मिलापवाला तम्बू मँ सेवा करत भए करत रहत हीं। ²² मूला इस्राएल क दूसर लोगन क मिलापवाला तम्बू क निअरे कबहुँ नाहीं जाइ चाही। जदि उ पचे अइसा करत हीं तउ ओनका अपने आप मरइ क होइ। ²³ जउन लेवी बंसी मिलापवाला तम्बू मँ काम करत अहइँ उ पचे ऍकरे खिलाफ पाप क जिम्मेदार होइहीं। इ कनून हमेसा बरे होइ। लेवीबंसी उ भुइँया क न लेइहीं जेका मइँ इस्राएल क दूसर लोगन क बचन दिहेउँ ह। ²⁴ मुला इस्राएल क लोगन क लगे जउन कछू होइ ओकर दसवाँ हींसा मोका देइहीं। इ तरह मइँ लेवी बंसी मनइयन क दसवाँ हींसा देब। इहइ कारण अहइ कि मइँ लेवीबंसी मनइयन बरे कहेउँ ह: उ पचे उ भुइँया क न पइहीं जेका मइँ इस्राएल क मनइयन क देइ क वचन दिहेउँ ह।”

²⁵ यहोवा मूसा स कहेस, ²⁶ “लेवी बंसी मनइयन स बात करा अउ ओनसे कहा, ‘इस्राएल क लोग हर एक चीज क दसवाँ हीसां यहोवा क देइहीं। उ दसवाँ हींसा लेवी बंसी मनइयन क होइ। मुला ओकर दसवाँ हींसा यहोवा क ओनकी भेंट क रूप मँ देइ चाही। ²⁷ अउर उ दसवाँ हींसा क इ समुझा जाब कि तू खरिहान स अनाज या दाखरस क कोलहू स दाखरस भेंट किहे रहा। ²⁸ इ तरह तू यहोवा क वइसेन ही भेंट देब्या जइसे इस्राएल क दूसर लोग देत हीं। तू इस्राएल क मनइयन क दीन्ह गवा दसवाँ हीसां पउब्या। अउर तू ओकर दसवाँ हीसां याजक हारून क देब्या। ²⁹ जब इस्राएल क लोग आपन हर एक चीज क दसवाँ हींसा देइँ तउ तोहका ओहमाँ स सबन त जियादा पवित्तर हींसा चुनइ चाही। उहइ दसवाँ हींसा अहइ जेका तोहका यहोवा क देइ चाही।’

³⁰ “मूसा, लेवी लोगन स इ कहा, ‘लोग जउन कछू तोहका देत ह ओका सबन त अच्छा हींसा जब तू भेंट करब। तउ इ अइसा होइ जइसा तू एका खरिहान स आनाज या दाखरस क कोलहू स दाखरस भेंट किहे रहा। ³¹ जउन बाकी बची ओका तू अउ तोहार परिवार ऍका कउनो जगह खाइ सकत ह। इ तू मनइयन क उ काम बरे मजूरी अहइ जउन तू पचे मिलापवाला तम्बू मँ करत बाट्या। ³² अउर अगर तू ऍकर सब स बढ़िया हीसां यहोवा क देत रहब्या तउ तू कबहुँ दोखी न होब्या। तू इस्राएल क मनइयन क पवित्तर भेंट क बरे दूसित न करब्या अउर तू मरब्या नाहीं।’”

लाल गइया क राखी

19 यहोवा मूसा अउ हारून स बात किहेस अउ कहेस, ² “इ सबइ कनून अउर नेमॅ अहइँ जेका यहोवा इस्राएल क मनइयन क दिहे अहइ। ओनका बिना दोखे क एक लाल गइया तोहार लगे लिआवइ। उ गइया क कउनो खोचा भी नाही लागी रहइ चाही। अउर न ही कबहुँ ओका काँधे पइ कउनो जुआ धर दीन्ह गवा ह। ³ इ गइया क याजक एलीआज़ार क द्या। एलीआज़ार गइया क सिबिर स बाहेर लइ जाइ अउ हुवाँ गइया क मारी। ⁴ तब याजक एलीआज़ार ऍकर कछू रकत आपन अँगुरी प लगाइ। तब ओका कछू रकत पवित्तर तम्बू क ओर छिछकारइ चाही। ओका इ सात दाई करइ चाही। ⁵ तब पूरी गइया क उ समइ जलाइ चाही जब उ लखत ह। चाम गोस, रकत अउ गोबर सबन क फूँकि देइ चाही। ⁶ तब याजक एक ठु देवदारु क लकड़ी, हिस्सप क डार अउ एक लाल तॉत लेइ चाही। याजक क इ चीजन क उ आगी मँ नावइ चाही जेहमाँ गइया बरत होइ। ⁷ तब याजक क अपने क अउ अपने ओढ़ना क धोवइ चाही। तब ओका सिबिर मँ लउटइ चाही। याजक साँझ तलक असुद्ध रही। ⁸ जउन मनई गइया क फूँकि ओका आपन क आपन ओढ़ना क पानी स धोवइ चाही। उ साँझ तलक असुद्ध रही।

⁹ “तब एक मनई जउन सुद्ध होइ, गइया क राखी बटोरी। उ इ राखी क सिबिर क बाहेर एक सुद्ध ठउरे प राखी। इ राख ओनका असुद्धता क सुद्धीकरण क उपयोग क लइ इस्रएलियन दुआरा रखइ जाब्या।

¹⁰ “उ मनई जउन गइया क राखी बटोरेस, आपन ओढ़ना धोइ। उ साँझ तलक असुद्ध रही।

“इ नेमॅ सदा चलतइ रही। इ नेमॅ इस्राएल क नागरिक लोगन बरे अहइ अउर ओन बिदेसी मनइयन बरे भी बाटइ जउन तोहरे बीच रहत हीं। ¹¹ जदि एक मनई कउनो मरे मनई क छुअत ह तउ उ सात दिन बरे असुद्ध होइ जाइ। ¹² ओका आपन क तीसरे दिन अउ फुन सतऍ दिन पानी स धोवइ चाही। जदि उ अइसा नाहीं करत तउ उ सुद्ध नाहीं होइ। ¹³ जदि कउनो मनई ल्हास क छुअत ह तउ उ मनई जउन असुद्ध अहइ। जदि उ मनई जउन असुद्ध अहइ पवित्तर तम्बू क जात ह तउ पवित्तर तम्बू अपवित्तर होइ जात ह। एह बरे उ मनई क इस्राएलियन स निकारइ दीन्ह जाइ। जदि सुद्धीकरण क जल उ असुद्ध मनई प नाहीं छिरकइ जात ह, उ असुद्ध ही रहब्या।

¹⁴ “इ नेमॅ ओन लोगन स जुड़ा बाटइ जउन तम्बू मँ मरि जात हीं। जदि कउनो व्यक्ति तम्बू मँ मरि जात ह तउ तम्बू क हर एक मनई अउर हर एक चीज असुद्ध होइ जाइ। उ सबइ सात दिना तलक असुद्ध रइहीं। ¹⁵ अउर हर बे ढकना क कूँड़ा या बासन असुद्ध होइ जात ह। ¹⁶ जदि कउनो ल्हास क छुअत ह तउ उ मनई सात दिना तलक असुद्ध रही। इ तब भी लागू होइ जब ल्हास खुला मैदान मँ या जुद्ध क मइदान मँ मरा होइ। जदि कउनो मनई मरा भवा मनई क हाड़ या कबर क छुअत ह तउ उ मनई सात दिना तलक असुद्ध रहब्या।

¹⁷ “एह बरे तोहका बारी भइ गइया क राखी क प्रयोग उ मनई क फुन सुद्ध करइ बरे करइ चाही। बहता भवा जल गगरी मँ धरी राखी प डावा। ¹⁸ सुद्ध मनई क एक हिस्सप डार लेइ चाही अउ ऍका पानी मँ बोरइ चाही। तब ओका तम्बू, घारी अउ तम्बू मँ जउन मनइयन होइँ ओन पइ इ पानी छिरकइ चाही। तोहका ओन मनइयन क संग इहइ करइ चाही जउन ल्हासे क छुअइँ। तोहका इ ओकरे संग भी करइ चाही जउन लराइ मँ मारे मनइयन क ल्हासे क छुअत ह। या उ कउनो क संग भी जउन कउनो मरे मनई क हाड़े क या कबर क छुअत ह।

¹⁹ “तउ कउनो सुद्ध मनई इ जल क असुद्ध मनई प तीसरे दिन अउ फुन सतऍ दिन छिरकइ। सतऍ दिन उ मनई सुद्ध होइ जात ह। ओका आपन ओढ़ना क पानी मँ धोवइ चाही। उ साँझ तलक पवित्तर होइ जात ह।”

²⁰ “जदि कउनो मनई असुद्ध होइ जात ह अउ सुद्ध नाहीं होत तउ ओका इस्राएल क मनइयन स निकारइ दीन्ह जाइ। उ मनई प सुद्धीकरण क जल नाहीं छिरका गवा। उ सुद्ध नाहीं भवा। एह बरे उ पवित्तर तम्बू क असुद्ध कइ सकत ह। ²¹ इ नेमॅ तोहरे बरे सदा होइ। जउन मनई इ सुद्धीकरण क जल क छिरकत ह ओका भी आपन ओढ़ना जरुर धोइ लेइ चाही। जउन मनई इ सुद्धीकरण क जल क छुइ उ साँझ तलक असुद्ध रही। ²² जदि कउनो असुद्ध मनई कउनो दूसर क छुअइ तउ भी असुद्ध होइ जाइ। उ मनई साँझ तलक असुद्ध रही।”

मिरियन मरत ह

20 इस्राएल क मनई सीन रेगिस्तान मँ पहिले महीना मँ पहोंचेन। लोग कादेस मँ रुकि गएन। मिरियम क मउत भइ अउ उ हुवाँ दफनाई गइ।

मूसा क गलती

² उ जगह प मनइयन बरे पानी जियादा नाहीं रहा। एह बरे लोग मूसा अउ हारून क खिलाफ सिकाइत करइ बटुर गएन। ³ मनइयन मूसा स बहस किहेन। उ सबइ केहन, “इ नीक होत कि हम आपन भइयन क तरह यहोवा क समन्वा मर गए होतेन। ⁴ तू यहोवा क मनइयन क इ रेगिस्तान मँ काहे लियाया? का तू चाहत ह कि हम अउ हमार गोरु हिआँ मरि जाइँ? ⁵ तू हम पचन क मिस्र स काहे लिआया? तू हम पचन क बुरे ठउर प काहे लिआया ह? हिआँ कउनो अनाज नाहीं अहइ, कउनो अंजीर, अंगूर या अनार नाही अहइ। अउर हिआँ पिअइ बरे पानी नाहीं अहइ।”

⁶ एह बरे मूसा अउ हारून उ मनइयन क तजि दिहन अउ उ पचे मिलापवाला तम्बू क दुआरे पहोंचेन। उ पचे हुआँ पैलगी किहेन। यहोवा क मोजूदगी क तेज ओन पइ परगट भवा।

⁷ यहोवा मूसा स बात किहेस। उ कहेस, ⁸ “आपन भाई हारून अउ मनइयन क भीड़ क संग ल्या अउ उ चट्टान तलक जा। आपन टहरइ वाली कुबरी क ल्या। मनइयन क समन्वा चट्टान स बात करा। तबहिं चट्टान स पानी बही। अउर तू उ पानी आपन मनइयन अउ जानवरन क दइ सकत ह।”

⁹ टहरइ वाली कुबरी यहोवा क समन्वा पवित्तर तम्बू मँ रही। जइसा यहोवा कहे रहा, मूसा टहरइवाली कुबरी लिहस। ¹⁰ मूसा अउ हारून मनइयन स चट्टाने क समन्वा मिलइ क कहेन। तब मूसा कहेस, “तू लोग सदा बिद्रोह करत ह। अब मोरउ सुना। का हम इ चट्टाने स पानी बहाउब?” ¹¹ मूसा आपन भुजा उठाएस अउ दुइ दाईं चट्टानें प चोट किहेस। चट्टान स पानी बहइ लाग। मनइयन अउ गोरुअन पानी पिएन।

¹² मुला यहोवा मूसा अउ हारून स कहेस, “इस्राएल क सबहिं मनइयन चारिहुँ कइँती बटुरा रहेन। मुला तू पचे मोका उ लोगन क समन्वा पवित्तर नाहीं ठहराया। तू पचे मनइयन क नाहीं बताएस कि मइँ चट्टान स पानी कइसा बहाएस ह। तू सबइ मनइयन क नाहीं बताया कि तू सबइ मोहे प पतियाना ह। मइँ ओन मनइयन क उ देस देब जेका देइ क मइँ बचन दिहेउँ ह। मुला तू सबइ उ देस मँ ओनका पहोंचावइ वाला न रहब्या।”

¹³ इ ठउर क नाउँ मरीबा क पानी कहा जात रहा। इ उहइ ठउर अहइ जहाँ इस्राएल क मनइयन यहोवा स वाद-विवाद किहन। अउर इ उहइ ठउर रहा जहाँ यहोवा इ देखँए रहा कि उ पवित्तर रहा।

एदोम इस्राएल क पार नाहीं होइ दिहस

¹⁴ जब मूसा कादेस मँ रहा, उ कउनो मनइयन क एदोम क राजा क लगे एक संदेसा क संग पठएस। संदेसा इ रहा:

“तोहरे भाई लोग तोहसे इ कहत हीं: तू जानत ह कि हम पचे केतॅनी तकलीफ उठावा ह। ¹⁵ बहोत बहोतइ बरिस पहिले हमार पुरखन मिस्र चला ग रहेन। अउर हम पचे हुवाँ देर बरिस रहेन। मिस्र क मनई हम सबन बरे निर्दयी रहेन। ¹⁶ मुला हम पचे यहोवा क मदद क बिनती कीन्ह। अउर उ हम सबन क मदद बरे एक सरगदूत पठाएस। यहोवा हम पचन क मिस्र स बाहेर लइ आएन ह।

“अब हम पचे कादेस मँ अही जहाँ स तोहार पहँटा सुरु होत ह। ¹⁷ कृपा कइके आपन देस स हम पचन क जात्रा करइ देइँ। हम पचे कउनो खेत या अंगूरे क बाग स जात्रा नाहीं करब। हम पचे तोहरे कउनो इनारा स पानी नाहीं पिअब। हम पचे सिरिफ राजपथ स जात्रा करब। हम पचे राजपथ क तनिके दाहिन बाऍ नाहीं बढ़ब। हम पचे तब तलक राजपथ प ठहरब जब तलक तोहरे धरती क पार नाहीं कइ जाइत।”

¹⁸ मुला एदोम क राजा उत्तर दिहस, “तू हमरे देस स होइके जात्रा नाहीं कइ सकत्या। जदि तू हमरे देस स जात्रा करइ क कोसिस करत ह तउ हम पचे आउब अउ तोहसे तरवारे स लड़ब।”

¹⁹ इस्राएल क मनइयन जवाब दिहन, “हम पचे बड़की सड़क स जात्रा करब। जदि हम या हमार गोरु तोहार कछू पानी पीहीं तउ हम पचे ओकरे दाम क भुगतान करब। हम सबइ तोहरे देस स सिरिफ चलिके पार जाइ चाहित ह। हम सबइ ऍका आपन बरे लेइ नाहीं चाहित।”

²⁰ मुला एदोम फिन जवाब दिहस, “हम पचे आपन देस स होइके तोहका जाइ नाहीं देब।”

तब एदोम क राजा एक ठु बहोत बड़वार अउ ताकतवर फउज बटोरेस अउ इस्राएल क मनइयन स लड़इ बरे निकर पड़ा। ²¹ एदोम क राजा इस्राएल क मनइयन क अपने देस स जात्रा करइ बरे मना कइ दिहस। अउर इस्राएल क लोग मुड़ गए अउर दूसरे राहे स चल पड़ेन।

हारून मरि जात ह

²² इस्राएल क सब मनइयन कादेस स होर पहाड़े तलक जात्रा किहन। ²³ होर पहाड़ एदोम क चौहद्दी प रहा। यहोवा मूसा अउ हारून स कहेस, ²⁴ “अब हारून क मरि क समइ अउर आपन पुरखन क लगे जा मिलइ क समइ आ गवा ह। इ उ पहॅटा मँ न जाइ जेका देइ क मइँ इस्राएल क मनइयन क बचन दिहेउँ ह। मूसा, मइँ इ तोहसे कहत हउँ काहेकि मरीबा क पानी क बारे मँ तू अउ हारून मोरे दीन्ह ग हुकुम क खिलाफ बिद्रोह किहस।

²⁵ “हारून अउ ओकरे पूत एलीआज़ार क हॉर पहाड़े प लिआवा। ²⁶ हारून क खास ओढ़ना क ओसे ल्या अउ ओन ओढ़नन क ओकर पूत एलीआज़ार क पहिरावा। हारून हुवाँ पहाड़े प मरी। अउर उ आपन पुरखन क संग होइ जाइ।”

²⁷ मूसा यहोवा क हुकुम क मानेस। मूसा, हारून अउ एलीआज़ार हॉर पहाड़े प गएन। इस्राएल क सब मनइयन ओका जात लखेन। ²⁸ मूसा हारून क ओढ़ना उतार लिहस अउ ओन ओढ़ना क हारून क पूत एलीआज़ार क पहिराएस। तब हारून पहाड़े क चोटी प मरि गवा। मूसा अउ एलीआज़ार पहाड़े स उतरि आएन। ²⁹ तबहिं इस्राएल क सब मनइयन जान लिहन कि हारून गुजर गवा। एह बरे इस्राएल क हर मनई तीस दिना तलक हारून बरे गमी मनाएस।